1 Reyes 7 - Li Santil hu

¹ Chirix chic aꞌan li rey Salomón quixqꞌue chi yi̱ba̱c lix palacio. Ut chiru oxlaju chihab quiya̱loꞌ.

² Quixyi̱b jun li cab ut quixqꞌue chokꞌ xcꞌabaꞌ “Qꞌuicheꞌ re Líbano”. Aꞌan aꞌin lix nimal: o̱b roxcꞌa̱l (55) metro xnimal rok, cuib xcaꞌcꞌa̱l metro riqꞌuin media xnimal xsaꞌ ut oxlaju metro riqꞌuin media xnimal xteram. Ca̱hib tzol li rokechal. Li ca̱hib tzol chi okech, aꞌan chacalteꞌ joꞌ ajcuiꞌ li tzꞌamba. Ut saꞌ xbe̱neb li okech aꞌan queꞌhilan li tzꞌamba.

³ Li o̱b roxcꞌa̱l chi tzꞌamba queꞌhilan saꞌ xbe̱n li o̱b roxcꞌa̱l chi okech. Saꞌ li junju̱nk tzol cuan oꞌlaju chi okech. Ut queꞌxtzꞌap li xbe̱n riqꞌuin li tzꞌalam cheꞌ chacalteꞌ.

⁴ Oxib tzol li ventana cuan saꞌ li jun pacꞌal ut oxib tzol chic cuan saꞌ li jun pacꞌal chic. Eb li ventana aꞌin cuanqueb chi ox ox ut cuanqueb saꞌ xcaꞌyaba̱l li cuanqueb jun pacꞌal.

⁵ Eb li puertas ut eb li cheꞌ li nequeꞌxchap cuiꞌ ribeb, aꞌan ca̱ xucu̱teb. Ut eb li ventana cuanqueb oxib tzol ut nequeꞌxcaꞌya ribeb.

⁶ Ut quixyi̱b ajcuiꞌ jun lix mu li cab cuanqueb cuiꞌ li okech. Lix nimal, aꞌan cuib xcaꞌcꞌa̱l (22) metro riqꞌuin media xnimal rok, ut oxlaju metro riqꞌuin media lix nimal ru. Li xmu cab aꞌin nacana chiru li jun chꞌol chic. Cuan li okech ut li cheꞌ li queꞌxqꞌue saꞌ xbe̱n.

⁷ Quixyi̱b ajcuiꞌ jun chic li naꞌajej re ta̱cua̱nk cuiꞌ lix cꞌojariba̱l. Ut quixtzꞌap ru riqꞌuin tzꞌalam cheꞌ chacalteꞌ. Naticla takꞌa nacuulac toj takecꞌ. Li naꞌajej aꞌan ta̱cꞌanjelak ajcuiꞌ re rakoc a̱tin.

⁸ Li rochoch laj Salomón, aꞌan cuan jun lix neba̱l chirix. Joꞌcan ajcuiꞌ li cab li quixyi̱b re li rixakil cuan xmu juntakꞌe̱t riqꞌuin li rochoch aꞌan. Li rixakil laj Salomón, aꞌan xrabin laj faraón.

⁹ Eb li cab aꞌin yi̱banbileb riqꞌuin li cha̱bil pec ti̱cobresinbil ruheb. Setbil riqꞌuin chꞌi̱chꞌ aꞌ yal chanru xni̱nkal li naraj, joꞌ chi saꞌ joꞌ chirix. Naticla chak saꞌ li cimiento. Nacuulac toj takecꞌ. Joꞌcan ajcuiꞌ chirix. Nacuulac toj saꞌ li neba̱l.

¹⁰ Lix cimiento eb li cab aꞌan yi̱banbileb riqꞌuin li ni̱nki pec terto xtzꞌak. Cuan li pec ca̱hib metro riqꞌuin media xni̱nkaleb. Ut cuanqueb ajcuiꞌ oxib metro riqꞌuin oxcꞌa̱l (60) centímetro xni̱nkaleb.

¹¹ Joꞌcan ajcuiꞌ li tzꞌac yi̱banbileb riqꞌuin li pec terto xtzꞌak. Ti̱cobresinbil ruheb aꞌ yal chanru xni̱nkal naraj. Ut quirocsi ajcuiꞌ li cheꞌ chacalteꞌ.

¹² Chi xjun sutam li nimla neba̱l cuan oxib tzol li pec ut jun tzol li cheꞌ. Chacalteꞌ queꞌxqꞌue saꞌ xbe̱n. Li neba̱l aꞌin juntakꞌe̱t riqꞌuin li neba̱l li cuan chiru lix templo li Dios.

Laj Hiram quixyi̱b riqꞌuin bronce li cꞌaꞌak ru li ta̱cꞌanjelak saꞌ li templo joꞌ ajcuiꞌ lix sahob ru

¹³ Li rey Salomón quixtakla xcꞌambal laj Hiram saꞌ li tenamit Tiro.

¹⁴ Laj Hiram aꞌan xyum jun li ixk xma̱lcaꞌan xcomoneb li ralal xcꞌajol laj Neftalí. Lix yucuaꞌ, aꞌan aj Tiro xtenamit ut naxnau chi us xcꞌanjelanquil li chꞌi̱chꞌ bronce. Joꞌcan ajcuiꞌ laj Hiram. Cuan xnaꞌleb chi us ut se̱b xchꞌo̱l chixcꞌanjelanquil li chꞌi̱chꞌ bronce. Joꞌcan nak laj Hiram quichal riqꞌuin li rey Salomón ut quixba̱nu chixjunil li cꞌanjel li quiqꞌueheꞌ chixba̱nu.

¹⁵ Laj Hiram quixyi̱b cuib li okech riqꞌuin bronce. Cuakxakib metro xni̱nkal rok ut o̱b metro riqꞌuin media xni̱nkal xsaꞌ.

¹⁶ Ut quixyi̱b ajcuiꞌ cuib li chꞌi̱chꞌ bronce re tixchꞌic saꞌ xjolomeb li cuib chi okech. Li junju̱nk chi chꞌi̱chꞌ cuib metro riqꞌuin o̱b xcaꞌcꞌa̱l centímetro xnajtil rok.

¹⁷ Ut cuanqueb ajcuiꞌ cꞌa̱m quixyi̱b riqꞌuin chꞌi̱chꞌ tzꞌulbil ru chanchan li cadena re xqꞌuebal saꞌ xbe̱n li okech. Cuukutk re li junju̱nk.

¹⁸ Quixyi̱b ajcuiꞌ cuib tzol li granadas chokꞌ xsahob ru re xtzꞌapbal ruheb li chꞌi̱chꞌ li quixqꞌue saꞌ xjolomeb li okech. Chanru quixba̱nu re li jun, joꞌcan cuiꞌchic quixba̱nu re li okech jun chic.

¹⁹ Li xyi̱banquileb li chꞌi̱chꞌ li quixqꞌue saꞌ xjolomeb li okech li cuan saꞌ xmu li cab, aꞌan chanchaneb li utzꞌuꞌuj azucena. Caꞌchꞌin chic ma̱ cuib metro xni̱nkaleb li junju̱nk.

²⁰ Chi xjun sutam li chꞌi̱chꞌ li cuan saꞌ xjolomeb li cuib chi okech cuanqueb cuib ciento chi granado. Cuib tzol ru nak cuanqueb chi xjun sutam li junju̱nk chi okech.

²¹ Laj Hiram quixxakabeb li cuib chi okech saꞌ li oqueba̱l re li templo. Li okech li quicana saꞌ lix nim quixqꞌue Jaquín chokꞌ xcꞌabaꞌ. Ut li okech jun chic li quicana saꞌ li tzꞌe quixqꞌue Boaz chokꞌ xcꞌabaꞌ.

²² Li xyi̱banquil li chꞌi̱chꞌ li quixqꞌue saꞌ xjolomeb li okech, aꞌan chanchaneb li utzꞌuꞌuj azucena. Joꞌcaꞌin nak quixchoy xyi̱banquileb li okech.

²³ Ut laj Hiram quixyi̱b ajcuiꞌ jun li nimla pila sursu riqꞌuin bronce. Aꞌan ta̱cꞌanjelak re xnaꞌaj li haꞌ. Ca̱hib metro riqꞌuin media xnimal li re. Cuib metro riqꞌuin o̱b xcaꞌcꞌa̱l centímetro xteram. Oxlaju metro riqꞌuin media xnimal xsaꞌ.

²⁴ Ut chire li pila queꞌxyi̱b cuib tzol li granado. O̱b roxcꞌa̱l centímetro xya̱nk li laje̱tk chi granado. Jun cuacaj queꞌxyi̱b lix sahob ru nak queꞌxyi̱b li pila.

²⁵ Li pila aꞌin queꞌxtochob saꞌ xbe̱neb cablaju chi bo̱yx yi̱banbileb riqꞌuin bronce. Oxib li bo̱yx nequeꞌiloc saꞌ li norte. Li oxib chic nequeꞌiloc saꞌ li occidente. Ut li oxib chic nequeꞌiloc saꞌ li sur. Ut li oxib chic nequeꞌiloc saꞌ li oriente. Li pila queꞌxchunub saꞌ xbe̱neb li bo̱yx ut li rokeb li bo̱yx li cuan chirixeb queꞌcana rubel li pila.

²⁶ Cuakxakib centímetros xpimal li tzꞌac re li pila. Lix sahob ru re li pila chanchan li utzꞌuꞌuj azucena. Ca̱hib roxcꞌa̱l mil (44,000) litro li haꞌ na-oc chi saꞌ li pila aꞌan.

²⁷ Ut quixyi̱b ajcuiꞌ laje̱b li cꞌochleba̱l riqꞌuin li chꞌi̱chꞌ bronce. Jun metro riqꞌuin caꞌcꞌa̱l centímetro xni̱nkal rok li junju̱nk. Ut joꞌcan ajcuiꞌ xnimal ru ut jun metro riqꞌuin oꞌlaju xcaꞌcꞌa̱l centímetro xteram.

²⁸ Joꞌcaꞌin nak yi̱banbileb li cꞌochleba̱l: tzꞌaptzꞌo ru chi perpo̱quil chꞌi̱chꞌ. Ac xnaꞌaj xnaꞌaj li junju̱nk.

²⁹ Ut eb li perpo̱quil chꞌi̱chꞌ bronce qꞌuebileb xsahob ru joꞌ li cakcoj, li bo̱yx, ut li querubín. Ut yi̱banbil ajcuiꞌ xsahob ru riqꞌuin utzꞌuꞌuj, joꞌ takecꞌ joꞌ takꞌa.

³⁰ Li junju̱nk chi cꞌochleba̱l cuan ca̱ ca̱ xruedil yi̱banbileb riqꞌuin bronce. Joꞌcan ajcuiꞌ li chꞌi̱chꞌ li nequeꞌchapoc reheb. Saꞌ li xuc xca̱ pacꞌalil cuanqueb li chꞌi̱chꞌ li nahilan saꞌ xbe̱n li chꞌi̱chꞌ li nequeꞌchapoc re li ruedas. Ut saꞌ xbe̱n li ca̱hib chi chꞌi̱chꞌ aꞌin nacꞌochla li pila. Li chꞌi̱chꞌ aꞌin yi̱banbileb ajcuiꞌ xsahob ru.

³¹ Li cꞌochleba̱l re li pila, aꞌan sursu. O̱b xcaꞌcꞌa̱l centímetros xnajtil xteram ut lix nimal xsaꞌ, aꞌan oxcꞌa̱l centímetros. Ca̱ xucu̱t li re li cꞌochleba̱l. Moco sursu ta ut yi̱banbil lix sahob ru.

³² Rubel li perpo̱quil chꞌi̱chꞌ cuanqueb li ca̱hib chi ruedas joꞌ eb ajcuiꞌ li chꞌi̱chꞌ li nequeꞌchapoc reheb. Cuakxakib xca̱cꞌa̱l centímetros xni̱nkaleb lix ruedil.

³³ Li ruedas juntakꞌe̱teb riqꞌuin lix ruedil li carruajes. Li chꞌi̱chꞌ li nachapoc re li ruedas, ut li cocꞌ chꞌi̱chꞌ li cuan saꞌ li ruedas, joꞌ eb ajcuiꞌ li sursu̱quil chꞌi̱chꞌ yi̱banbil riqꞌuin bronce.

³⁴ Li ca̱hib chi chꞌi̱chꞌ li nacu̱tun re li ruedas junaj xyi̱banquil riqꞌuin li cꞌochleba̱l.

³⁵ Chire li cꞌochleba̱l cuan jun li sursu̱quil chꞌi̱chꞌ, cuib xcaꞌcꞌa̱l centímetro riqꞌuin media xnajtil xteram. Junaj xyi̱banquil riqꞌuin li cꞌochleba̱l.

³⁶ Chiruheb li perpo̱quil chꞌi̱chꞌ laj Hiram quixyi̱b li retalil li querubines, joꞌ ajcuiꞌ li cakcoj ut li cheꞌ palmera, aꞌ ya̱l chanru lix naꞌaj naraj. Ut quilajxyi̱b ajcuiꞌ retalil li utzꞌuꞌuj.

³⁷ Joꞌcaꞌin nak quixyi̱b li laje̱b chi cꞌochleba̱l, juntakꞌe̱t xbisbaleb, juntakꞌe̱t xni̱nkaleb ut juntakꞌe̱t xyi̱banquileb.

³⁸ Ut quixyi̱b ajcuiꞌ riqꞌuin bronce laje̱b li pila. Li junju̱nk chi pila ju̱nk metro riqꞌuin ca̱cꞌa̱l centímetros xni̱nkal. Ut li haꞌ li na-oc chi saꞌ eb li pila aꞌan, cuan cuakxakib ciento riqꞌuin ca̱cꞌa̱l (880) litro chi haꞌ. Eb li laje̱b chi pila aꞌan quixqꞌueheb saꞌ xbe̱n li laje̱b chi cꞌochleba̱l.

³⁹ Eb li pila aꞌin rochbeneb lix cꞌochleba̱leb queꞌqꞌueheꞌ chixcꞌatk li templo. O̱b queꞌcana saꞌ lix nim ut li o̱b chic queꞌqꞌueheꞌ saꞌ li tzꞌe. Ut li nimla pila queꞌxqꞌue saꞌ xxuc li templo saꞌ li sureste.

⁴⁰ Laj Hiram quixyi̱beb ajcuiꞌ li ucꞌal, ut li chꞌi̱chꞌ li nequeꞌxchap cuiꞌ li ru xam, ut li ni̱nki secꞌ. Joꞌcaꞌin nak quixchoy li cꞌanjel quiqꞌueheꞌ chixyi̱b xban laj Salomón. Aꞌaneb aꞌin li quixyi̱b laj Hiram re lix templo li Dios:

⁴¹ Cuib li okech, ut li cuib li sursu̱quil chꞌi̱chꞌ li queꞌxqꞌue saꞌ xjolomeb ut li chꞌi̱chꞌ li tzꞌulbil ru chanchan cadena re xqꞌuebal saꞌ xbe̱n li okech.

⁴² Ut quixyi̱b ajcuiꞌ riqꞌuin bronce ca̱hib ciento li granadas re teꞌxqꞌue chokꞌ xsahob ru li chꞌi̱chꞌ li queꞌxqꞌue saꞌ jolomeb li okech. Cuib tzol nak queꞌxqꞌue.

⁴³ Ut quixyi̱b ajcuiꞌ laje̱b li cꞌochleba̱l ut laje̱b li pilas re teꞌxqꞌue saꞌ xbe̱neb li laje̱b chi cꞌochleba̱l.

⁴⁴ Quixyi̱b jun li nimla pila ut li cablaju chi bo̱yx bronce li yo̱queb chi i̱ka̱nc re li pila.

⁴⁵ Ut quixyi̱b ajcuiꞌ li ucꞌal ut li ni̱nki secꞌ joꞌ eb ajcuiꞌ li chꞌi̱chꞌ re xchapbal li ru xam. Aꞌan aꞌin chixjunil li cꞌanjeleba̱l li quiqꞌueheꞌ chixyi̱b laj Hiram xban li rey Salomón re teꞌcꞌanjelak saꞌ lix templo li Dios. Chixjunil yi̱banbil riqꞌuin li cha̱bil bronce.

⁴⁶ Chixjunil aꞌin quixtakla xyi̱banquil li rey saꞌ li ru takꞌa re Jordán saꞌ xyi li cuib chi tenamit Sucot ut Saretán.

⁴⁷ Li rey Salomón incꞌaꞌ quixbis joꞌ qꞌuial li bronce li qui-oc saꞌ eb li secꞌ xban nak kꞌaxal cuiꞌchic nabal.

⁴⁸ Li rey Salomón quixtakla xyi̱banquileb riqꞌuin oro chixjunil li quicꞌanjelac saꞌ lix templo li Ka̱cuaꞌ. Quixyi̱b jun li artal riqꞌuin oro, ut jun li me̱x yi̱banbil riqꞌuin oro li nequeꞌxqꞌue cuiꞌ li mayejanbil caxlan cua.

⁴⁹ Quixyi̱b ajcuiꞌ riqꞌuin tzꞌakal oro laje̱b xnaꞌajeb li candil. O̱b quixqꞌue saꞌ lix nim ut o̱b quixqꞌue saꞌ lix tzꞌe chiru li Lokꞌlaj Santil Naꞌajej. Ut quixqꞌue ajcuiꞌ xsahob ru riqꞌuin utzꞌuꞌuj. Ut quixyi̱b ajcuiꞌ riqꞌuin oro li candil, joꞌ ajcuiꞌ li chꞌi̱chꞌ re xchapbal li ru xam.

⁵⁰ Quixyi̱b li secꞌ ut li ucꞌal, ut li chꞌi̱chꞌ re xchupbal lix xamlel li candil joꞌ eb ajcuiꞌ li chꞌi̱chꞌ re xchapbal li ru xam. Ut quixyi̱b ajcuiꞌ li sansar re xcꞌatbal li pom. Joꞌcaneb ajcuiꞌ li bisagras re lix puertil li Lokꞌlaj Santil Naꞌajej ut eb li bisagras re lix puertil li templo yi̱banbileb riqꞌuin oro.

⁵¹ Joꞌcaꞌin nak quixchoy xyi̱banquil li cꞌaꞌru quicꞌanjelac saꞌ lix templo li Dios li quixtakla xyi̱banquil li rey Salomón. Ut quixcꞌameb ajcuiꞌ li secꞌ ut li plata ut li oro li ac kꞌaxtesinbil re li Dios xban laj David lix yucuaꞌ. Quixkꞌaxtesiheb saꞌ li naꞌajej li nequeꞌxxoc cuiꞌ li nacꞌanjelac saꞌ li templo.