1 Reyes 6 - Li Santil hu

¹ Li templo quiticla xyi̱banquil nak ac xnumeꞌ ca̱hib ciento chihab riqꞌuin ca̱cꞌa̱l chihab reliqueb laj Israel aran Egipto. Li rey Salomón quixtiquib xyi̱banquil lix templo li Ka̱cuaꞌ nak yo̱ xca̱ chihab roquic chokꞌ rey saꞌ li po Zif, li xcab po re li chihab aꞌan.

² Lix templo li Ka̱cuaꞌ li quixyi̱b li rey Salomón, aꞌan cuan cuukub xcaꞌcꞌa̱l metro xnajtil rok, ut bele̱b metro xnajtil ru, ut numenak oxlaju metro xnajtil xteram.

³ Li naꞌajej li cuan saꞌ li oqueba̱l, aꞌan bele̱b metro xnajtil rok, joꞌ xnimal ru li templo. Ut li xnajtil ru, aꞌan numenak ca̱hib metro.

⁴ Laj Salomón quixqꞌue chi yi̱ba̱c xventanil li templo. Ni̱nk li re chi saꞌ quixqꞌue ut cocꞌ li re chirix.

⁵ Ut quilajeꞌxyi̱b cocꞌ cab chi xjun sutam li templo chiru li tzꞌac. Queꞌxyi̱b ajcuiꞌ li cocꞌ cab chiru li tzꞌac cuan cuiꞌ li Lokꞌlaj Santil Naꞌajej.

⁶ Li cocꞌ cab li queꞌxyi̱b oxib tasal xteram. Li xbe̱n tasaleb li cab cuan cuib metro riqꞌuin o̱b xcaꞌcꞌa̱l centímetro xni̱nkal xsaꞌ. Li xcab tasaleb li cab cuan cuib metro riqꞌuin laje̱b xca̱cꞌa̱l centímetro xni̱nkal xsaꞌ. Ut li rox tasaleb li cab cuan oxib metro riqꞌuin oꞌlaju centímetro xni̱nkal xsaꞌ. Incꞌaꞌ mas nim ru li cab queꞌxqꞌue takꞌa re nak incꞌaꞌ coxinak li tzꞌamba chiru li tzꞌac re li templo.

⁷ Nak queꞌxyi̱b lix templo li Dios, incꞌaꞌ queꞌocsin martillo, chi moco queꞌocsin ma̱l, chi moco queꞌocsin chꞌi̱chꞌ xban nak ma̱cꞌaꞌ cꞌaꞌru queꞌxtoj chiru. Li pec li queꞌxyi̱b cuiꞌ li templo ac ti̱cobresinbileb ru chi us nak queꞌxcꞌam chak.

⁸ Lix puertil li cocꞌ cab re li xbe̱n tasal nacana saꞌ li nim re li templo. Ut li takleba̱l li naxic saꞌ li xcab ut li rox tasal li cab, aꞌan naxkꞌoti rib.

⁹ Joꞌcan nak queꞌxchoy xyi̱banquil li templo. Ut queꞌxtzꞌap li xbe̱n riqꞌuin li tzꞌalam cheꞌ chacalteꞌ.

¹⁰ Ut li cocꞌ cab li queꞌxyi̱b chirix li templo cuib metro riqꞌuin o̱b xcaꞌcꞌa̱l centímetro xteram. Ut lix tzꞌambahil li cocꞌ cab yi̱banbil riqꞌuin li cheꞌ chacalteꞌ ut nequeꞌhilan saꞌ xbe̱n li tzꞌac re li templo.

¹¹ Li Ka̱cuaꞌ quia̱tinac riqꞌuin laj Salomón ut quixye re:

¹² —Nacuaj a̱tinac a̱cuiqꞌuin chirix li templo li xayi̱b. Cui la̱at tatcua̱nk saꞌ xya̱lal chicuu ut ta̱ba̱nu joꞌ naxye lin chakꞌrab ut cui incꞌaꞌ ta̱kꞌet li cua̱tin, la̱in tinqꞌue a̱cue chixjunil li quinyechiꞌi re laj David la̱ yucuaꞌ.

¹³ La̱in tincua̱nk saꞌ li templo aꞌin saꞌ xya̱nkeb laj Israel lin tenamit. Ut incꞌaꞌ tincanabeb xjuneseb, chan li Ka̱cuaꞌ.

¹⁴ Joꞌcan nak laj Salomón quixchoy xyi̱banquil li templo.

¹⁵ Queꞌxtzꞌap li tzꞌac chi saꞌ riqꞌuin li tzꞌalam cheꞌ chacalteꞌ. Quiticla saꞌ chꞌochꞌ ut quicuulac toj saꞌ li tzꞌamba. Ut chiru li chꞌochꞌ queꞌxqꞌue li tzꞌalam cheꞌ ciprés.

¹⁶ Queꞌxyi̱b li Lokꞌlaj Santil Naꞌajej toj chi saꞌ li templo. Bele̱b metro li ru. Queꞌxyi̱b li tas riqꞌuin li tzꞌalam cheꞌ chacalteꞌ. Quiticla toj takꞌa ut quicuulac toj takecꞌ.

¹⁷ Lix nimal li naꞌajej li nacana chiru li Lokꞌlaj Santil Naꞌajej, aꞌan cuan cuakxaklaju metro xnajtil rok.

¹⁸ Chixjunil lix saꞌ li templo tzꞌaptzꞌo riqꞌuin li tzꞌalam cheꞌ chacalteꞌ. Chiru li cheꞌ yi̱banbil lix sahob ru joꞌ li ru cheꞌ ut li utzꞌuꞌuj. Tzꞌaptzꞌo chi us ut ma̱ jun li pec queꞌcana chi cutanquil.

¹⁹ Li rey Salomón quixqꞌue chi yi̱ba̱c li Lokꞌlaj Santil Naꞌajej saꞌ li templo re tixqꞌue cuiꞌ lix Lokꞌlaj Ca̱x li Ka̱cuaꞌ.

²⁰ Li Lokꞌlaj Santil Naꞌajej queꞌxyi̱b chak toj chi saꞌ li templo. Bele̱b metro xnajtil xteram, bele̱b metro xnajtil rok ut bele̱b metro xnajtil ru. Ut chi saꞌ queꞌxletz li tzꞌakal oro ut queꞌxletz ajcuiꞌ li tzꞌakal oro chiru li artal li yi̱banbil riqꞌuin li cheꞌ chacalteꞌ.

²¹ Ut queꞌxletz ajcuiꞌ li tzꞌakal oro chi saꞌ chixjunil li templo. Ut queꞌxtzꞌap li Lokꞌlaj Santil Naꞌajej riqꞌuin cadena yi̱banbil riqꞌuin tzꞌakal oro.

²² Laj Salomón quixtakla xletzbal li tzꞌakal oro saꞌ chixjunil li templo. Naticla takꞌa ut nacuulac toj takecꞌ. Joꞌcan ajcuiꞌ li artal li cuan chi saꞌ li Lokꞌlaj Santil Naꞌajej. Queꞌxletz li tzꞌakal oro chiru.

²³ Ut queꞌxyi̱b ajcuiꞌ riqꞌuin li cheꞌ olivo cuib li querubines chanchaneb li ángel. Ca̱hib metro riqꞌuin media xnajtil xteram li junju̱nk chi querubín.

²⁴ Juntakꞌe̱t xni̱nkal lix xiqꞌueb. Cuib metro riqꞌuin o̱b xcaꞌcꞌa̱l centímetro xni̱nkal li junju̱nk. Ca̱hib metro riqꞌuin media xnimal ru chi xcabichal li xicꞌ.

²⁵ Joꞌcan ajcuiꞌ li querubín jun chic. Ca̱hib metro riqꞌuin media xnimal. Juntakꞌe̱t xni̱nkaleb ut juntakꞌe̱t xyi̱banquileb li junju̱nk chi querubín.

²⁶ Ca̱hib metro riqꞌuin media xnajtil xterameb li junju̱nk chi querubines.

²⁷ Laj Salomón quixqꞌueheb li cuib chi querubines saꞌ li Lokꞌlaj Santil Naꞌajej. Lix xicꞌ li jun nocoxtau li tzꞌac jun pacꞌal. Joꞌcan cuiꞌchic li jun nocoxixtau li tzꞌac jun pacꞌal chic. Ut lix xiqꞌueb jun pacꞌal chic nequeꞌxcꞌul rib saꞌ xyi li Lokꞌlaj Santil Naꞌajej.

²⁸ Ut queꞌxletz oro chirixeb li cuib chi querubines.

²⁹ Queꞌxyi̱b ajcuiꞌ xsahob ru li templo chiruheb li tzꞌac joꞌ chi saꞌ joꞌ chirix. Chanchaneb li querubín ut li cheꞌ palmera joꞌ ajcuiꞌ li utzꞌuꞌuj.

³⁰ Ut queꞌxqꞌue ajcuiꞌ li oro chiru li cheꞌ li queꞌxqꞌue chiru chꞌochꞌ, joꞌ chi saꞌ joꞌ chirix.

³¹ Li puerta li queꞌxqꞌue saꞌ li oqueba̱l re li Santil Naꞌajej, aꞌan yi̱banbil riqꞌuin li cheꞌ olivo. Ut li cheꞌ li nachapoc re li puerta, aꞌan o̱b xucu̱t queꞌxqꞌue.

³² Li cuib chi puerta yi̱banbil riqꞌuin li cheꞌ olivo ut qꞌuebil xsahob ru chiruheb yi̱banbil riqꞌuin querubines, palmeras ut utzꞌuꞌuj. Ut queꞌxletz oro chiruheb lix sahob ru.

³³ Queꞌxqꞌue ajcuiꞌ li cheꞌ li nachapoc re lix puertil li templo. Queꞌxyi̱b chi ca̱ xucu̱t riqꞌuin li cheꞌ olivo.

³⁴ Queꞌxyi̱b riqꞌuin li cheꞌ ciprés cuib li puertas cuib pere̱l ru. Li ca̱hib pere̱l nequeꞌecꞌan saꞌ xnaꞌajeb. Naru xtebal li cuib pere̱l malaj ut li ca̱hib pere̱l.

³⁵ Ut queꞌxqꞌue ajcuiꞌ xsahob ruheb li puertas yi̱banbil riqꞌuin querubines, palmeras, ut utzꞌuꞌuj. Ut queꞌxletz oro chiruheb lix sahob ru.

³⁶ Ut queꞌxyi̱b li neba̱l li cuan chiru li templo. Queꞌxyi̱b li tzꞌac riqꞌuin li pec ti̱cobresinbil ru chi us. Oxib tzol li pec ut jun tzol li cheꞌ chacalteꞌ queꞌxqꞌue saꞌ xbe̱n li pec.

³⁷ Saꞌ li po Zif queꞌxqꞌue lix cimiento lix templo li Ka̱cuaꞌ nak ac yo̱ xca̱ chihab roquic chokꞌ rey laj Salomón.

³⁸ Nak ac yo̱ junlaju chihab roquic chokꞌ rey laj Salomón, queꞌxchoy xyi̱banquil lix templo li Ka̱cuaꞌ saꞌ li po Bul saꞌ li xcuakxak po re li chihab aꞌan. Chiru cuukub chihab queꞌxyi̱b li templo. Queꞌxyi̱b chixjunil chi tzꞌakal re ru joꞌ quiyeheꞌ reheb.