1 Reyes 5 - Li Santil hu

Laj Salomón quixyi̱b lix templo li Dios

¹ Laj Hiram lix reyeb laj Tiro quirabi resil nak laj Salomón quixakaba̱c chokꞌ rey chokꞌ re̱kaj laj David lix yucuaꞌ. Joꞌcan nak quixtakla lix takl riqꞌuin. Laj Hiram junelic naxra laj David.

² Joꞌcan nak laj Salomón quixtakla xyebal re laj Hiram:

³ —La̱at nacanau nak laj David lin yucuaꞌ incꞌaꞌ quiru xyi̱banquil lix templo li Ka̱cuaꞌ lix Dios xban nak junelic yo̱ chi pletic riqꞌuineb li xicꞌ nequeꞌiloc re toj retal nak li Ka̱cuaꞌ quixkꞌaxtesiheb saꞌ rukꞌ.

⁴ Abanan anakcuan li Ka̱cuaꞌ lin Dios quinixtenkꞌa. Cuanco saꞌ tuktu̱quil usilal chikajunilo joꞌ eb ajcuiꞌ li tenamit li cuanqueb yalak bar. Ma̱ ani xicꞌ nequeꞌiloc ke ut ma̱cꞌaꞌ chꞌaꞌajquilal.

⁵ Joꞌcan nak la̱in tinyi̱b li templo li ta̱lokꞌoni̱k cuiꞌ li Ka̱cuaꞌ lin Dios xban nak li Dios quixye re laj David lin yucuaꞌ, “La̱ cualal, li tinxakab chokꞌ rey chokꞌ a̱cue̱kaj, aꞌan li ta̱yi̱ba̱nk re li templo re tinlokꞌoni̱k cuiꞌ,” chan.

⁶ Joꞌcan nak nintzꞌa̱ma cha̱cuu nak ta̱taklaheb aran Líbano li nequeꞌcꞌanjelac cha̱cuu re nak teꞌxyocꞌ li ni̱nki cheꞌ chacalteꞌ. La̱in tintojeb la̱ mo̱s li joꞌ nimal ta̱cuaj la̱at. Eb li nequeꞌcꞌanjelac chicuu incꞌaꞌ nequeꞌxnau xcꞌanjelanquil chi cha̱bil li cheꞌ, abanan teꞌxtenkꞌaheb li cuanqueb Sidón, li nequeꞌxnau xcꞌanjelanquil chi us li chacalteꞌ.—

⁷ Cꞌajoꞌ nak quisahoꞌ saꞌ xchꞌo̱l laj Hiram nak quirabi li cꞌaꞌru quixye laj Salomón ut quixye: —¡Lokꞌoninbil taxak li Ka̱cuaꞌ xban nak quixqꞌue jun ralal li rey David cuan xnaꞌleb ut aꞌan li xxakaba̱c chi takla̱nc saꞌ li nimla tenamit aꞌin! chan.

⁸ Ut laj Hiram quixtakla xyebal re laj Salomón: —Xoleꞌxye cue li cꞌaꞌru xatakla chak xyebal cue. La̱in tinba̱nu li cꞌaꞌru xatzꞌa̱ma chicuu. Tintakla a̱cue li cheꞌ chacalteꞌ ut li cheꞌ ciprés.

⁹ Eb li nequeꞌcꞌanjelac chicuu teꞌxyocꞌ li cheꞌ aran Líbano ut teꞌxcꞌam toj saꞌ li palau. Aran teꞌxyi̱b li poyteꞌ ut teꞌxtakla toj saꞌ junak li naꞌajej li ta̱ye la̱at nak us. Aran teꞌxhit li poyteꞌ ut ta̱takla xxocbal li cheꞌ. Caꞌaj cuiꞌ nintzꞌa̱ma cha̱cuu nak ta̱takla xtzacae̱mkeb li cuanqueb saꞌ li cuochoch, chan laj Hiram.

¹⁰ Joꞌcan nak laj Hiram quixtakla chixjunil li cheꞌ li quiraj laj Salomón. Quixtakla li cheꞌ chacalteꞌ ut li cheꞌ ciprés.

¹¹ Ut li rey Salomón quixtakla lix tzacae̱mkeb li cuanqueb saꞌ li rochoch laj Hiram. Rajlal chihab quixtakla junmay mil bis li trigo ut cuukub mil riqꞌuin ca̱hib ciento litros li cha̱bil aceite.

¹² Li Ka̱cuaꞌ Dios quixqꞌue xnaꞌleb laj Salomón joꞌ quixyechiꞌi re. Li rey Salomón ut li rey Hiram queꞌxcꞌam ribeb saꞌ usilal ut queꞌxba̱nu li contrato chi ribileb rib.

¹³ Saꞌ chixjunil li naꞌajej Israel laj Salomón quixchꞌutub ruheb laje̱b xcaꞌcꞌa̱l mil (30,000) chi cui̱nk ut quixtaklaheb chi cꞌanjelac.

¹⁴ Laje̱b mil nequeꞌxic chi cꞌanjelac jun po aran Líbano. Chirix aꞌan nequeꞌsukꞌi saꞌ rochocheb chi cꞌanjelac cuib po. Rajlal po nequeꞌxjal ribeb. Laj Adoniram, aꞌan li quixakaba̱c chi takla̱nc saꞌ xbe̱neb.

¹⁵ Laj Salomón quixxakabeb laje̱b xca̱cꞌa̱l mil (70,000) chi cui̱nk re teꞌi̱ka̱nk ut ca̱cꞌa̱l mil (80,000) chi cui̱nk re teꞌisi̱nk pec saꞌ eb li tzu̱l.

¹⁶ Ut cuanqueb ajcuiꞌ oxib mil riqꞌuin oxib ciento (3,300) chi cui̱nk li nequeꞌtaklan saꞌ xbe̱neb li yo̱queb chi cꞌanjelac.

¹⁷ Li rey Salomón quixtakla xcꞌambaleb chak li ni̱nki pec li kꞌaxal cha̱bil re teꞌcꞌanjelak chokꞌ xcimiento li templo. Ut quixtakla ajcuiꞌ xcꞌambal li pec li ti̱cobresinbil ruheb.

¹⁸ Eb li nequeꞌcꞌanjelac chiru laj Salomón ut eb li nequeꞌcꞌanjelac chiru laj Hiram ut eb li cui̱nk li queꞌchal aran Gebal queꞌxyocꞌ ut queꞌxpechꞌ li cheꞌ. Ut queꞌxyi̱b li pec li ta̱cꞌanjelak re xyi̱banquil li templo.