1 Reyes 4 - Li Santil hu

¹ Laj Salomón, aꞌan li cuan chokꞌ xreyeb chixjunileb laj Israel.

² Ut aꞌaneb aꞌin li queꞌtenkꞌan re: Laj Azarías, aꞌan li ralal laj Sadoc laj tij.

³ Laj Elihoref ut laj Ahías, eb li ralal laj Sisa, aꞌan eb li queꞌtzꞌi̱ban re li cꞌaꞌru quicꞌulman; ut laj Josafat li ralal laj Ahilud, aꞌan laj tzꞌi̱b li quicꞌanjelac chiru li rey.

⁴ Laj Benaía li ralal laj Joiada, aꞌan li quitaklan saꞌ xbe̱neb li soldados; laj Sadoc ut laj Abiatar, aꞌaneb laj tij.

⁵ Laj Azarías li ralal laj Natán, aꞌan li kꞌaxal nim xcuanquil saꞌ xbe̱neb li nequeꞌtaklan. Ut laj Zabud, aꞌan jun chic ralal laj Natán, aꞌan li quiqꞌuehoc xnaꞌleb li rey ut tzꞌakal rami̱g.

⁶ Laj Ahisar, aꞌan li qui-iloc re li rochoch li rey; ut laj Adoniram li ralal laj Abda, aꞌan laj titzꞌol toj.

⁷ Li rey Salomón quixxakabeb cablaju li cui̱nk re teꞌtakla̱nk saꞌ li junju̱nk chi tenamit aran Israel. Li junju̱nk chi tenamit queꞌqꞌuehoc re lix tzacae̱mk li rey ut eb li cuanqueb saꞌ li rochoch. Jun po saꞌ li chihab quitzꞌak li junju̱nk.

⁸ Aꞌaneb aꞌin lix cꞌabaꞌeb li cui̱nk ut li naꞌajej li queꞌcꞌanjelac cuiꞌ: Laj Ben-hur quicꞌanjelac saꞌ xnaꞌajeb li ralal xcꞌajol laj Efraín, li tzu̱l ru.

⁹ Laj Ben-decar quicꞌanjelac aran Maaca, joꞌ ajcuiꞌ saꞌ eb li tenamit Saalbim, Bet-semes, Elón, ut Bet-hanán.

¹⁰ Laj Ben-hesed quicꞌanjelac aran Arubot joꞌ ajcuiꞌ aran Soco ut saꞌ chixjunil li naꞌajej Hefer.

¹¹ Laj Ben-abinadab quicꞌanjelac saꞌ chixjunil li naꞌajej Dor. Li rixakil, aꞌan lix Tafat, lix rabin laj Salomón.

¹² Laj Baana li ralal laj Ahilud quicꞌanjelac saꞌ eb li tenamit Taanac, ut Meguido, ut saꞌ chixjunil li naꞌajej Bet-seán li cuan chixcꞌatk li naꞌajej Saretán, li cuan saꞌ li sur re li tenamit Jezreel. Naticla Bet-seán ut nacuulac toj Abel-mehola ut naxic toj jun pacꞌal Jocmeam.

¹³ Laj Ben-geber quicꞌanjelac aran Ramot, li cuan saꞌ xcue̱nt Galaad. Quicꞌanjelac ajcuiꞌ saꞌ eb li cꞌaleba̱l re laj Jair li ralal laj Manasés li cuanqueb saꞌ xcue̱nt Galaad. Quicꞌanjelac ajcuiꞌ saꞌ li naꞌajej Argob li cuan Basán. Aran cuanqueb oxcꞌa̱l li ni̱nki tenamit, li sutsu̱queb saꞌ tzꞌac ut cuan li chꞌi̱chꞌ bronce saꞌ eb li oqueba̱l.

¹⁴ Laj Ahinadab li ralal laj Iddo quicꞌanjelac aran Mahanaim.

¹⁵ Laj Ahimaas quicꞌanjelac saꞌ lix naꞌajeb li ralal xcꞌajol laj Neftalí. Aꞌan li quisumla riqꞌuin lix Basemat, lix rabin laj Salomón.

¹⁶ Laj Baana li ralal laj Husai quicꞌanjelac saꞌ eb li tenamit Aser ut Alot.

¹⁷ Laj Josafat li ralal laj Parúa quicꞌanjelac saꞌ lix naꞌajeb li ralal xcꞌajol laj Isacar.

¹⁸ Laj Simei li ralal laj Ela quicꞌanjelac saꞌ lix naꞌajeb li ralal xcꞌajol laj Benjamín.

¹⁹ Laj Geber li ralal laj Uri quicꞌanjelac saꞌ li naꞌajej Galaad, saꞌ lix tenamit li rey Sehón, lix reyeb laj amorreo, ut saꞌ li naꞌajej Basán li quicuan cuiꞌ chokꞌ rey laj Og. Caꞌaj cuiꞌ laj Geber quitaklan saꞌ eb li naꞌajej aꞌin.

²⁰ Eb laj Israel ut eb laj Judá kꞌaxal nabaleb joꞌ xqꞌuial li cocꞌ ru li samaib chire li palau. Nequeꞌcuaꞌac ut nequeꞌucꞌac chi sa saꞌ xchꞌo̱leb.

²¹ Laj Salomón cuan xcuanquil saꞌ chixjunil li naꞌajej li naticla cuan cuiꞌ li nimaꞌ Éufrates ut nacuulac toj cuanqueb cuiꞌ laj filisteo ut nacuulac toj saꞌ li nuba̱l re li tenamit Egipto. Eb aꞌan cuanqueb rubel xcuanquil li rey Salomón ut nequeꞌxtoj chiru li rey li joꞌ qꞌuial tento xtojbal joꞌ najtil yoꞌyo.

²² Aꞌan aꞌin xqꞌuial li cꞌaꞌak re ru li nacꞌanjelac chiru li rey Salomón rajlal cutan: numenak oxlaju xcaꞌcꞌa̱l (33) quintal li cha̱bil cꞌaj, numenak bele̱laju roxcꞌa̱l (99) quintal li cꞌaj re trigo,

²³ laje̱b li cuacax li ni̱nk xtibeleb, junmay li cuacax li junes ichaj queꞌxcuaꞌ, ut jun ciento li carner. Ma̱cꞌaꞌeb saꞌ ajl li quej, li yuc, ut li acꞌach ut li caxlan li ni̱nk xtibeleb.

²⁴ Laj Salomón quicuan xcuanquil saꞌ xbe̱n chixjunil li naꞌajej li cuan saꞌ li oeste. Naticla cuan cuiꞌ li nimaꞌ Éufrates. Naticla saꞌ li naꞌajej Tifsa ut nacuulac toj Gaza. Chixjunileb li rey li cuanqueb saꞌ eb li naꞌajej aꞌin cuanqueb rubel xcuanquil laj Salomón. Quicuan saꞌ usilal riqꞌuineb chixjunileb li cuanqueb chi xjun sutam.

²⁵ Nak cuan chokꞌ rey laj Salomón chixjunileb li cuanqueb saꞌ eb li naꞌajej Israel ut Judá saheb saꞌ xchꞌo̱l chalen saꞌ li tenamit Dan toj saꞌ li tenamit Beerseba. Li junju̱nk cabal cuan li racui̱mkeb uvas ut higos.

²⁶ Laj Salomón cuan caꞌcꞌa̱l mil (40,000) lix cacua̱y saꞌ lix naꞌajeb. Aꞌaneb li nequeꞌquelon re lix carruajes. Ut cuanqueb ajcuiꞌ cablaju mil (12,000) li cui̱nk li nequeꞌcꞌamoc re li carruajes.

²⁷ Li cablaju li queꞌxakaba̱c chi takla̱nc queꞌxcꞌam li cꞌaꞌak re ru li ta̱cꞌanjelak re xtzacae̱mk li rey Salomón ut xtzacae̱mkeb li nequeꞌcuaꞌac rochben. Ac chꞌolchꞌo cꞌaꞌru chi pohil ta̱cha̱lk li junju̱nk chi cui̱nk riqꞌuin li cꞌaꞌru ta̱cꞌanjelak chiru laj Salomón re nak ma̱cꞌaꞌ ta̱paltok chiru.

²⁸ Ut queꞌxcꞌam ajcuiꞌ li cebada ut li qꞌuim li ta̱cꞌanjelak reheb li cacua̱y ut eb li xul li nequeꞌi̱kan. Ac chꞌolchꞌo cꞌaꞌru chi pohil teꞌcha̱lk li junju̱nk chixchꞌolaninquileb.

²⁹ Kꞌaxal nabal lix naꞌleb laj Salomón quiqꞌueheꞌ re xban li Dios. Chanchan xqꞌuial li samaib chire li palau. Naxnau xcꞌoxlanquil li cꞌaꞌru naxba̱nu ut chixjunil naxtau ru.

³⁰ Kꞌaxal cuiꞌchic cuan xnaꞌleb laj Salomón chiruheb li cuanqueb Egipto ut chiruheb ajcuiꞌ li cuanqueb saꞌ li este.

³¹ Laj Salomón, aꞌan li kꞌaxal nabal xnaꞌleb chiruheb li cuanqueb xnaꞌlebeb, joꞌ laj Etán aj ezraíta, ut laj Hemán ut laj Calcol ut laj Darda, eb li ralal laj Mahol. Naꞌno ru laj Salomón saꞌ chixjunileb li naꞌajej li cuanqueb chi xjun sutam.

³² Laj Salomón quixye oxib mil (3,000) li cha̱bil a̱tin proverbios xcꞌabaꞌ. Ut jun mil riqꞌuin o̱b (1,005) li bich li quixyi̱b.

³³ Quia̱tinac chirixeb chixjunil li pim ut li cheꞌ li cuan saꞌ ruchichꞌochꞌ, joꞌ li cocꞌ, joꞌ li ni̱nk. Quia̱tinac chirix li hisopo li nayoꞌla chiru li tzꞌac ut quia̱tinac chirixeb li ni̱nki cheꞌ chacalteꞌ li cuan Líbano. Ut quia̱tinac ajcuiꞌ chirixeb chixjunileb li xul. Quia̱tinac ajcuiꞌ chirixeb li xul li nequeꞌrupupic, ut chirixeb li nequeꞌxjucuqui rib saꞌ chꞌochꞌ, ut chirixeb ajcuiꞌ li car.

³⁴ Eb li rey li cuanqueb yalak bar queꞌrabi resil nak laj Salomón cuan xnaꞌleb ut queꞌcuulac li tenamit chirabinquil li naꞌleb li naxqꞌue. Joꞌcan ajcuiꞌ eb li tenamit queꞌcuulac chirabinquil.