1 Reyes 3 - Li Santil hu

Li rey Salomón quixtzꞌa̱ma chiru li Dios nak tixqꞌue xnaꞌleb

¹ Li rey Salomón quixba̱nu li contrato riqꞌuin laj faraón lix reyeb laj Egipto ut quisumla riqꞌuin lix rabin laj faraón. Quixcꞌam li rixakil Jerusalén saꞌ lix Tenamit laj David nak toj yo̱queb chixchoybal xyi̱banquil li rochoch ut li templo, joꞌ ajcuiꞌ li tzꞌac li sutsu cuiꞌ li tenamit Jerusalén.

² Eb li cristian yo̱queb chixqꞌuebal lix mayej saꞌ eb li tzu̱l li najt xteram xban nak toj ma̱jiꞌ quiyi̱ba̱c lix templo li Dios saꞌ eb li cutan aꞌan.

³ Laj Salomón quixra li Ka̱cuaꞌ Dios ut quixba̱nu li cꞌaꞌru naxye saꞌ li chakꞌrab li xakabanbil xcuanquil xban laj David lix yucuaꞌ. Abanan naxmayeja li xul ut naxcꞌat li incienso saꞌ eb li artal li yi̱banbil saꞌ li tzu̱l.

⁴ Co̱ Gabaón chixqꞌuebal lix cꞌatbil mayej xban nak li naꞌajej aꞌan najt xteram ut kꞌaxal lokꞌ chiruheb. Ut aran quixmayeja jun mil li xul saꞌ li artal.

⁵ Saꞌ jun li kꞌojyi̱n li Ka̱cuaꞌ Dios quixcꞌutbesi rib chiru laj Salomón saꞌ li naꞌajej Gabaón nak yo̱ chi cua̱rc ut quixye re: —Tzꞌa̱ma li cꞌaꞌru ta̱cuaj ut la̱in tinqꞌue a̱cue, chan.

⁶ Laj Salomón quixye re: —Junelic cacuuxta̱na ru laj David lin yucuaꞌ, laj cꞌanjel cha̱cuu xban nak junelic quixqꞌue xchꞌo̱l chi cua̱nc saꞌ xya̱lal cha̱cuu. Aꞌan ti̱c xchꞌo̱l ut quixba̱nu li us. Joꞌcan nak catenkꞌa ut caqꞌue li ralal chokꞌ rey chokꞌ re̱kaj aꞌan.

⁷ At Ka̱cuaꞌ, at inDios, la̱at catxakaban cue chokꞌ rey chokꞌ re̱kaj laj David lin yucuaꞌ. Abanan la̱in toj sa̱jin. Toj ma̱cꞌaꞌ innaꞌleb re tincꞌanjelak chokꞌ rey.

⁸ Abanan quina̱xakab chokꞌ xreyeb li nimla tenamit li sicꞌbileb ru a̱ban. Incꞌaꞌ naru rajlanquileb xban xqꞌuialeb.

⁹ Nintzꞌa̱ma cha̱cuu nak ta̱qꞌue taxak innaꞌleb re nak tinnau takla̱nc saꞌ xbe̱neb la̱ tenamit saꞌ ti̱quilal. Tinnau taxak xqꞌuebal retal bar cuan li us ut bar cuan li incꞌaꞌ us. Cui incꞌaꞌ tina̱tenkꞌa, ¿chan ta cuiꞌ ru nak ta̱ru̱k tintakla̱nk saꞌ xbe̱neb li tenamit aꞌin? chan laj Salomón.

¹⁰ Li Ka̱cuaꞌ quicuulac chiru li cꞌaꞌru quixtzꞌa̱ma laj Salomón.

¹¹ Quixye re: —La̱at incꞌaꞌ xatzꞌa̱ma nak tinnajtobresi rok la̱ yuꞌam, chi moco xatzꞌa̱ma a̱biomal, chi moco xatzꞌa̱ma chicuu nak teꞌca̱mk li xicꞌ nequeꞌiloc a̱cue. Xatzꞌa̱ma ban chicuu nak tinqꞌue a̱naꞌleb re nak tattakla̱nk saꞌ xya̱lal saꞌ xbe̱neb lin tenamit.

¹² Joꞌcan nak la̱in tinqꞌue a̱cue li cꞌaꞌru xatzꞌa̱ma. Kꞌaxal nabal la̱ naꞌleb tinqꞌue. Ma̱ ani junak ta̱cua̱nk xnaꞌleb joꞌ la̱ naꞌleb la̱at. Chi moco anakcuan chi moco mokon ta̱cua̱nk junak joꞌ la̱at.

¹³ Tinqꞌue a̱lokꞌal ut tinqꞌue a̱biomal usta incꞌaꞌ xatzꞌa̱ma chicuu. Ma̱ jun chic rey ta̱cua̱nk joꞌ la̱at joꞌ najtil yoꞌyo̱kat saꞌ ruchichꞌochꞌ.

¹⁴ La̱in tinnajtobresi rok la̱ yuꞌam cui ta̱ba̱nu li cꞌaꞌru tinye a̱cue ut cui ta̱ba̱nu li cꞌaꞌru naxye saꞌ li chakꞌrab joꞌ quixba̱nu laj David la̱ yucuaꞌ, chan.

¹⁵ Nak qui-aj ru laj Salomón quixqꞌue retal nak li Ka̱cuaꞌ quixcꞌutbesi rib chiru saꞌ xmatcꞌ. Co̱ Jerusalén ut quixakli chiru lix Lokꞌlaj Ca̱x li Ka̱cuaꞌ ut quixmayeja lix cꞌatbil mayej. Quixqꞌue ajcuiꞌ lix mayej re xcꞌambaleb rib saꞌ usilal riqꞌuin li Ka̱cuaꞌ. Chirix aꞌan quixba̱nu jun li ninkꞌe reheb chixjunileb li nequeꞌcꞌanjelac chiru.

¹⁶ Saꞌ jun li cutan queꞌcuulac riqꞌuin li rey Salomón cuib li ixk xcomoneb li nequeꞌxcꞌayi rib.

¹⁷ Jun li ixk quixye re: —At rey, li ixk aꞌin ut la̱in cuanco saꞌ jun chi cab. Quiyoꞌla jun incꞌulaꞌal chꞌina te̱lom ut li ixk aꞌin cuan cuochben.

¹⁸ Ac xnumeꞌ oxib cutan xyoꞌlajic lin cꞌulaꞌal la̱in nak quiyoꞌla lix cꞌulaꞌal aꞌan. Kajunes cuanco saꞌ li cab. Ma̱ ani chic cuan aran.

¹⁹ Saꞌ jun li kꞌojyi̱n lix cꞌulaꞌal li ixk aꞌin quicam xban nak aꞌan quiyocla saꞌ xbe̱n nak yo̱ chi cua̱rc.

²⁰ Tuktu na kꞌojyi̱n nak quicuacli chirisinquil lin cꞌulaꞌal chincꞌatk. Quixqꞌue chixcꞌatk aꞌan ut li cꞌulaꞌal li camenak quixqꞌue chincꞌatk la̱in nak yo̱quin chi cua̱rc.

²¹ Ac sake̱uc re nak quincuacli chixqꞌuebal xtuꞌ lin cꞌulaꞌal. Quinqꞌue retal nak camenak. Nak ac cutan chic quicuil nak ma̱cuaꞌ cue li cꞌulaꞌal, chan.

²² Ut li ixk jun chic quixye: —Moco ya̱l ta li cꞌaꞌru nacaye. Li cꞌulaꞌal li yoꞌyo cue la̱in. Aꞌ li camenak, aꞌan la̱ cꞌulaꞌal la̱at, chan. Ut li ixk jun chic quixye: —Incꞌaꞌ. Moco ya̱l ta li nacaye. Li cꞌulaꞌal yoꞌyo, aꞌan li cue la̱in. Li camenak, aꞌan a̱cue la̱at, chan. Ut yo̱queb chixcuechꞌinquil ribeb chiru li rey.

²³ Li rey Salomón quixye: —Li jun naxye nak li cꞌulaꞌal yoꞌyo re aꞌan ut li camenak, aꞌan re li jun chic. Ut li jun chic ixk naxye nak li yoꞌyo re aꞌan, ut li camenak re li jun, chan.

²⁴ Ut li rey quixye reheb li nequeꞌtenkꞌan re: —Cꞌamomak chak junak li chꞌi̱chꞌ, chan. Ut queꞌxcꞌam chak li chꞌi̱chꞌ riqꞌuin li rey.

²⁵ Ut li rey quixye: —Jach saꞌ xyi li cꞌulaꞌal. Jun jachal ta̱qꞌue re li ixk jun ut li jun jachal chic ta̱qꞌue re li ixk jun chic, chan.

²⁶ Abanan li tzꞌakal naꞌbej cꞌajoꞌ nak quirahoꞌ xchꞌo̱l xban nak quixra lix cꞌulaꞌal. Quixye: —At rey, nintzꞌa̱ma cha̱cuu nak incꞌaꞌ ta̱camsi li cꞌulaꞌal. Qꞌue re li ixk aꞌan, chan. Abanan li ixk jun chic quixye re: —Incꞌaꞌ. Ma̱qꞌue cue, chi moco ta̱qꞌue re aꞌan. Jach saꞌ xyi li cꞌulaꞌal, chan.

²⁷ Ut li rey Salomón quixye re li cui̱nk: —Ma̱camsi li cꞌulaꞌal. Qꞌue re li ixk li incꞌaꞌ naraj nak ta̱camsi̱k xban nak aꞌan li tzꞌakal xnaꞌ, chan.

²⁸ Nak eb laj Israel queꞌrabi resil li cꞌaꞌru quixba̱nu li rey, chixjunileb queꞌxqꞌue saꞌ xnakꞌ ruheb. Queꞌxqꞌue retal nak li Ka̱cuaꞌ quiqꞌuehoc xnaꞌleb re nak ta̱rakok a̱tin saꞌ ti̱quilal.