Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

1 Reyes 21 - Li Santil hu

1 Aran Samaria cuan jun li cui̱nk aj Nabot xcꞌabaꞌ. Jezreel xtenamit. Li cui̱nk aꞌan cuan jun xsir li racui̱mk uvas nachꞌ riqꞌuin lix palacio laj Acab, lix reyeb laj Samaria.

2 Saꞌ jun li cutan li rey Acab quixye re laj Nabot: —Qꞌue cue lix naꞌaj la̱ cuacui̱mk uvas. Nachꞌ cuan riqꞌuin lin palacio. La̱in nacuaj raubal li cuacui̱mk aran. Tinqꞌue jun chic li naꞌajej chokꞌ re̱kaj malaj ut tintoj cha̱cuu riqꞌuin tumin, chan.

3 Abanan laj Nabot quixye re: —Incꞌaꞌ taxak chixqꞌue inlese̱ns li Dios chixcꞌayinquil a̱cue li naꞌajej aꞌin xban nak la̱in xcue̱chani riqꞌuin lin xeꞌto̱nil yucuaꞌ, chan.

4 Laj Acab co̱ saꞌ xpalacio chi ra saꞌ xchꞌo̱l ut chi yo̱ xjoskꞌil xban nak laj Nabot quixye re nak incꞌaꞌ tixqꞌue re li naꞌajej li quire̱chani riqꞌuin lix xeꞌto̱nil xyucuaꞌ. Nak quicuulac saꞌ rochoch, quixyocob rib saꞌ xcuarib ut yo̱ chi iloc chiru li tzꞌac ut incꞌaꞌ quiraj cuaꞌac.

5 Ut lix Jezabel, li rixakil, quicuulac riqꞌuin ut quixye re: —¿Cꞌaꞌut nak ra saꞌ a̱chꞌo̱l? ¿Cꞌaꞌut nak incꞌaꞌ nacacuaj cuaꞌac? chan.

6 Laj Acab quixye re: —Xina̱tinac riqꞌuin laj Nabot, Jezreel xtenamit. Xinye re nak tixcꞌayi chokꞌ cue lix naꞌaj lix uvas, malaj ut tinjal chiru. Abanan aꞌan xye cue nak incꞌaꞌ tixqꞌue cue, chan.

7 Ut lix Jezabel li rixakil quixye re: —La̱at li rey. La̱at nacattaklan arin Israel. Cuaclin ut cuaꞌin. Cꞌojob a̱chꞌo̱l. La̱in tinsicꞌ xya̱lal chanru tinba̱nu re nak aꞌan tixqꞌue a̱cue lix naꞌaj li racui̱mk, chan.

8 Ut lix Jezabel quixtzꞌi̱ba li hu saꞌ xcꞌabaꞌ li rey Acab ut quixqꞌue li retalil lix matkꞌab chiru. Quixtakla li hu aꞌan riqꞌuineb laj cꞌamol be ut riqꞌuineb li nequeꞌtaklan saꞌ lix tenamit laj Nabot.

9 Saꞌ eb li hu aꞌan quixye: —Yehomak resil nak ta̱cua̱nk li ayu̱n. Te̱chunub laj Nabot chiruheb li tenamit.

10 Te̱sicꞌ cuibakeb li cui̱nk li incꞌaꞌ useb xnaꞌleb. Te̱cꞌam chak chiru laj Nabot re teꞌxye nak xmajecua li Dios ut xmajecua ajcuiꞌ li rey Acab. Chirix aꞌan te̱cꞌam laj Nabot chire tenamit ut te̱cuti chi pec toj retal ta̱ca̱mk, chan saꞌ li hu.

11 Eb li nequeꞌcꞌamoc be ut eb li nequeꞌtaklan saꞌ lix tenamit laj Nabot queꞌxba̱nu joꞌ queꞌtakla̱c cuiꞌ xban lix Jezabel joꞌ quixtzꞌi̱ba saꞌ li hu li quixtakla riqꞌuineb.

12 Queꞌxye resil nak teꞌxba̱nu x-ayu̱n li tenamit ut queꞌxchunub laj Nabot chiruheb.

13 Ut queꞌcuulac li cui̱nk li incꞌaꞌ useb xnaꞌleb. Queꞌchunla chiru laj Nabot ut queꞌxye li ticꞌtiꞌ chiruheb li tenamit. Queꞌxye nak laj Nabot quixmajecua li Dios ut quixmajecua ajcuiꞌ li rey. Ut queꞌxcꞌam laj Nabot chire tenamit ut queꞌxcuti chi pec toj retal quicam.

14 Chirix chic aꞌan queꞌxtakla resil riqꞌuin lix Jezabel ut queꞌxye re nak queꞌxcuti chi pec laj Nabot ut quicam.

15 Nak quirabi resil lix camic, lix Jezabel quixye re laj Acab: —Ayu ut chap chokꞌ a̱cue lix naꞌaj lix uvas laj Nabot li incꞌaꞌ quixcꞌayi a̱cue xban nak laj Nabot ma̱ ani chic. Xcam, chan.

16 Nak laj Acab quirabi resil nak xcam laj Nabot, co̱ chixchapbal lix naꞌaj lix uvas re tixcꞌam chokꞌ re.

17 Ut li Ka̱cuaꞌ quia̱tinac riqꞌuin li profeta Elías, Tisbe xtenamit, ut quixye re:

18 —Tatxic chixtaubal laj Acab lix reyeb laj Israel, li cuan Samaria. Anakcuan cuan saꞌ lix naꞌaj lix uvas laj Nabot xban nak co̱ chixchapbal chokꞌ re.

19 Ta̱ye re, “Joꞌcaꞌin xye li Ka̱cuaꞌ: ¿Ma ma̱cuaꞌ ta biꞌ la̱at li xatcamsin re laj Nabot? Ut anakcuan yo̱cat chixchapbal lix naꞌaj li racui̱mk chokꞌ a̱cue”. Ut ta̱ye ajcuiꞌ re, “Joꞌcaꞌin xye li Ka̱cuaꞌ. Saꞌ li naꞌajej li xeꞌxrekꞌ cuiꞌ lix quiqꞌuel laj Nabot eb li tzꞌiꞌ, aran ajcuiꞌ teꞌxrekꞌ la̱ quiqꞌuel la̱at, at rey,” chaꞌkat re laj Acab.—

20 Nak laj Elías quicuulac aran, laj Acab quixye re: —At Elías, la̱at li xicꞌ nacat-iloc cue. Xina̱tau chixba̱nunquil li incꞌaꞌ us, chan. Ut laj Elías quixye re: —Ya̱l. Xatintau chixba̱nunquil li incꞌaꞌ us xban nak la̱at cꞌaynakat chixba̱nunquil li ma̱usilal chiru li Ka̱cuaꞌ.

21 Joꞌcan nak li Ka̱cuaꞌ xye a̱cue chi joꞌcaꞌin: “La̱in tinqꞌue raylal saꞌ a̱be̱n. Tinsach ruheb chixjunileb la̱ cualal a̱cꞌajol li cuanqueb Israel ut tinsach ruheb chixjunileb li cui̱nk li cuanqueb saꞌ la̱ cuochoch, joꞌ mo̱s joꞌ ajcuiꞌ li ma̱cuaꞌeb mo̱s.

22 Tinsach ruheb la̱ cualal a̱cꞌajol joꞌ quinba̱nu reheb li ralal xcꞌajol li rey Jeroboam li ralal laj Nabat. Teꞌxcꞌul joꞌ quixcꞌul laj Baasa li ralal laj Ahías xban nak xachikꞌ injoskꞌil nak xacꞌameb xbe laj Israel chi ma̱cobc chicuu”, chan li Dios.

23 Li Dios x-a̱tinac ajcuiꞌ chirix li tixcꞌul lix Jezabel. Quixye: —Lix tibel lix Jezabel ta̱cꞌuxekꞌ xbaneb li tzꞌiꞌ cuan cuiꞌ li tzꞌac li sutsu cuiꞌ li tenamit Jezreel.

24 Ut eb la̱ cualal a̱cꞌajol li teꞌca̱mk saꞌ tenamit teꞌcꞌuxekꞌ xbaneb li tzꞌiꞌ. Ut eb li teꞌca̱mk saꞌ cꞌaleba̱l teꞌcꞌuxekꞌ xbaneb li soꞌsol, chan li Dios.

25 Kꞌaxal quinumta li ma̱usilal quixba̱nu laj Acab chiru li Dios. Ma̱ ani junak reheb li rey quixba̱nu ma̱usilal joꞌ quixba̱nu aꞌan. Ut lix Jezabel li rixakil, aꞌan li quicꞌamoc be chiru chixba̱nunquil li ma̱usilal.

26 Kꞌaxal yibru li quixba̱nu laj Acab nak quixlokꞌoniheb li yi̱banbil dios joꞌ queꞌxba̱nu eb laj amorreo li queꞌisi̱c xban li Ka̱cuaꞌ saꞌ lix tenamiteb laj Israel.

27 Nak laj Acab quirabi li quixye li Dios, quixpej li rakꞌ. Ut quixqꞌue chirix li kꞌes ru tꞌicr ut quixba̱nu lix ayu̱n. Quicuar chirix li kꞌes ru tꞌicr ut kꞌaxal ra saꞌ xchꞌo̱l.

28 Ut li Ka̱cuaꞌ quixye re laj Elías, Tisbe xtenamit:

29 —¿Ma xaqꞌue retal nak laj Acab xcubsi rib chicuu? Xban nak xcubsi rib, la̱in incꞌaꞌ tintakla li raylal saꞌ xbe̱neb li ralal xcꞌajol nak toj yoꞌyo̱k. Abanan tinqꞌue li raylal saꞌ xbe̱neb li ralal xcꞌajol nak ac cuan chic li ralal chokꞌ rey, chan.

© 2019, Wycliffe Bible Translators. All rights reserved.

Wycliffe Bible Translators, Inc.
ကြှနျုပျတို့နောကျလိုကျပါ:



ကြော်ငြာတွေ