1 Reyes 19 - Li Santil hu

¹ Li rey Acab quixye re lix Jezabel, li rixakil, chixjunil li quixba̱nu li profeta Elías. Quixye re chanru nak quixcamsi chi chꞌi̱chꞌ chixjunileb lix profeta laj Baal.

² Ut lix Jezabel quixtakla jun lix takl riqꞌuin li profeta Elías chixyebal re nak tixcamsi chi chꞌi̱chꞌ joꞌ quixba̱nu reheb lix profeta lix Jezabel. Quixye: —Chineꞌxcamsihak lin dios cui toj ma̱jiꞌ nacatcam saꞌ li ho̱nal aꞌin cuulaj, chan re laj Elías.

³ Laj Elías quixqꞌue retal li chꞌaꞌajquilal cuan cuiꞌ. Qui-oc xcꞌaꞌux ut qui-el saꞌ li naꞌajej aꞌan re xcolbal rib. Co̱ toj Beerseba li cuan xcue̱nt Judá ut aran quixcanab lix mo̱s.

⁴ Ut laj Elías co̱ xjunes saꞌ li chaki chꞌochꞌ. Jun cutan quibe̱c. Nak yo̱ chi ecuu̱c, qui-oc chi hila̱nc rubel jun to̱n li cheꞌ enebro xcꞌabaꞌ. Quiraj raj ca̱mc ut xban xrahil xchꞌo̱l quixye re li Dios: —At Ka̱cuaꞌ, tzꞌakal li raylal ac xincꞌul. Us raj cui tina̱qꞌue chi ca̱mc. La̱in moco kꞌaxal cha̱bilin ta chiruheb lin xeꞌto̱nil yucuaꞌ, chan.

⁵ Laj Elías quixyocob rib rubel li cheꞌ ut quicube xcuara. Nak yo̱ chi cua̱rc, quicuulac jun x-ángel li Dios riqꞌuin ut quixtochꞌtochꞌi ut quixye re: —Ajsi a̱cuu. Cuaclin ut cuaꞌin, chan.

⁶ Ut laj Elías quiril nak cuan cuiꞌ lix jolom cuan jun li caxlan cua pombil saꞌ ru xam, ut jun xar li haꞌ. Quicuacli, quicuaꞌac qui-ucꞌac ut quicuar cuiꞌchic.

⁷ Ut quicuulac cuiꞌchic xcaꞌ sut lix ángel li Dios riqꞌuin laj Elías ut quixye re: —Ajsi a̱cuu. Cuaclin ut cuaꞌin xban nak najt tatxic, chan.

⁸ Quicuacli laj Elías, quicuaꞌac ut qui-ucꞌac. Riqꞌuin lix tzacae̱mk li quixtzaca, cau chic rib re ta̱be̱k chiru caꞌcꞌa̱l cutan ut caꞌcꞌa̱l kꞌojyi̱n toj ta̱cuulak saꞌ li tzu̱l Horeb li nequeꞌxlokꞌoni cuiꞌ li Ka̱cuaꞌ.

⁹ Nak quicuulac laj Elías cuan cuiꞌ li tzu̱l Horeb, qui-oc saꞌ li ochoch pec saꞌ li tzu̱l aꞌan ut aran quixnumsi li kꞌojyi̱n. Ut nak ac cuan aran quia̱tinac li Dios riqꞌuin ut quixye re: —At Elías, ¿cꞌaꞌru yo̱cat arin? chan.

¹⁰ Laj Elías quichakꞌoc ut quixye: —La̱in narahoꞌ saꞌ inchꞌo̱l xban nak xinqꞌue inchꞌo̱l chi cꞌanjelac cha̱cuu, at nimajcual Dios. Eb li ralal xcꞌajol laj Israel xeꞌxcanab xba̱nunquil li naxye saꞌ li contrato li xaba̱nu riqꞌuineb. Ut xelajeꞌxpoꞌ la̱ artal ut xelajeꞌxcamsi chi chꞌi̱chꞌ eb la̱ profetas. Caꞌaj chic la̱in xincana injunes ut yo̱queb ajcuiꞌ chinsicꞌbal la̱in re tineꞌxcamsi, chan laj Elías.

¹¹ Ut li Ka̱cuaꞌ quixye re: —Elen saꞌ li ochoch pec ut xaklin saꞌ xbe̱n li tzu̱l arin chicuu, chan. Saꞌ ajcuiꞌ li ho̱nal aꞌan quinumeꞌ li Ka̱cuaꞌ ut quinumeꞌ ajcuiꞌ jun cacuil ikꞌ re xcꞌutbesinquil lix cuanquil. Kꞌaxal cau quinumeꞌ li ikꞌ toj retal quilajjacheꞌ li tzu̱l ut eb li pec quilajeꞌjoreꞌ. Abanan li Dios toj ma̱jiꞌ naa̱tinac riqꞌuin laj Elías. Nak ac xnumeꞌ li ikꞌ, quixqꞌue hi̱c, abanan toj ma̱jiꞌ naa̱tinac li Ka̱cuaꞌ riqꞌuin laj Elías.

¹² Nak ac xnumeꞌ li hi̱c, quinumeꞌ li xam, abanan li Dios toj ma̱jiꞌ naa̱tinac riqꞌuin. Ut nak ac xnumeꞌ li xam, quirabi jun li ecꞌa̱nc chi timil.

¹³ Laj Elías quixtzꞌap li xnakꞌ ru riqꞌuin li rakꞌ. Qui-el saꞌ li ochoch pec ut quixakli saꞌ li oqueba̱l. Quirabi xya̱b xcux li Dios nak quiyeheꞌ re: —At Elías, ¿cꞌaꞌru yo̱cat arin? chan.

¹⁴ Laj Elías quichakꞌoc ut quixye: —La̱in narahoꞌ saꞌ inchꞌo̱l xban nak xinqꞌue inchꞌo̱l chi cꞌanjelac cha̱cuu, at nimajcual Dios. Eb li ralal xcꞌajol laj Israel xeꞌxcanab xba̱nunquil li naxye saꞌ li contrato li xaba̱nu riqꞌuineb. Ut xelajeꞌxpoꞌ la̱ artal ut xelajeꞌxcamsi chi chꞌi̱chꞌ eb la̱ profetas. Caꞌaj chic la̱in xincana injunes ut yo̱queb ajcuiꞌ chinsicꞌbal la̱in re tineꞌxcamsi, chan laj Elías.

¹⁵ Ut li Ka̱cuaꞌ Dios quixye re laj Elías: —Sukꞌin saꞌ li be li xatchal cuiꞌ ut tatxic saꞌ li chaki chꞌochꞌ li cuan xcue̱nt Damasco. Nak tatcuulak aran ta̱qꞌue li aceite saꞌ xjolom laj Hazael ut ta̱xakab chokꞌ rey aran Siria.

¹⁶ Ta̱qꞌue li aceite saꞌ xjolom laj Jehú ralal laj Nimsi re ta̱xakab chokꞌ rey aran Israel. Ut joꞌcan ajcuiꞌ laj Eliseo li ralal laj Safat li cuan aran Abel-mehola. Ta̱qꞌue li aceite saꞌ xjolom re ta̱xakab chokꞌ profeta chokꞌ a̱cue̱kaj la̱at.

¹⁷ Chi joꞌcaꞌin li joꞌ qꞌuial incꞌaꞌ teꞌcamsi̱k xban laj Hazael, aꞌan teꞌcamsi̱k xban laj Jehú. Ut eb li incꞌaꞌ teꞌcamsi̱k xban laj Jehú, aꞌan teꞌcamsi̱k xban laj Eliseo.

¹⁸ Tincanabeb chi yoꞌyo li cuukub mil laj Israel li incꞌaꞌ queꞌxcuikꞌib rib chixlokꞌoninquil laj Baal, chi moco queꞌrutzꞌ ru, chan li Ka̱cuaꞌ.

¹⁹ Joꞌcan nak laj Elías qui-el saꞌ li naꞌajej aꞌan. Coxixtau laj Eliseo li ralal laj Safat. Yo̱ chi becoc chꞌochꞌ riqꞌuin cablaju sumal li bo̱yx. Laj Eliseo yo̱ chi beresi̱nc re li cuan chak chi ixbej. Laj Elías quirisi li tꞌicr cuan saꞌ xbe̱n li rakꞌ ut quixqꞌue chirix laj Eliseo.

²⁰ Saꞌ junpa̱t quixcanab lix bo̱yx laj Eliseo ut quia̱linac chirix laj Elías ut quixye re: —Inchakꞌrabihakeb cuan chak lin naꞌ inyucuaꞌ xbe̱n cua ut chirix aꞌan tinxic cha̱cuix, chan. Ut laj Elías quixye re: —Us biꞌ. Abanan, chicua̱nk taxak saꞌ a̱chꞌo̱l li cꞌaꞌru xinba̱nu a̱cue, chan.

²¹ Laj Eliseo quisukꞌi cuan cuiꞌ lix bo̱yx. Quixcamsiheb li bo̱yx cuib ut quixchik lix tibeleb. Li cheꞌ li naqꞌueman saꞌ xcux li bo̱yx quicꞌanjelac chokꞌ xsiꞌil. Nak ac xchakꞌac li tib, laj Eliseo quixqꞌue chixtiu eb li tenamit. Chirix chic aꞌan laj Eliseo co̱ chirix laj Elías ut quicꞌanjelac chiru.