1 Reyes 17 - Li Santil hu

Li profeta Elías

¹ Quicuan jun li profeta aj Elías xcꞌabaꞌ. Lix tenamit, aꞌan Tisbe li cuan saꞌ xcue̱nt Galaad. Laj Elías quixye re li rey Acab: —Saꞌ xcꞌabaꞌ li Ka̱cuaꞌ, lix Dioseb laj Israel li nincꞌanjelac chiru, la̱in ninye a̱cue nak chiru cuib oxib chihab incꞌaꞌ chic tixqꞌue li hab toj tinye la̱in, chan.

² Joꞌcan nak li Ka̱cuaꞌ quixye re laj Elías:

³ —Tat-e̱lk saꞌ li naꞌajej aꞌin. Tatxic saꞌ li este, li na-el cuiꞌ li sakꞌe ut ta̱muk a̱cuib nachꞌ riqꞌuin li haꞌ Querit li cuan jun pacꞌal li nimaꞌ Jordán.

⁴ La̱in tintakla li tzꞌok chixqꞌuebal la̱ cua nak cua̱nkat aran. Ut saꞌ li rok haꞌ tat-ucꞌak, chan li Dios.

⁵ Ut laj Elías quixba̱nu li cꞌaꞌru quiyeheꞌ re xban li Ka̱cuaꞌ. Co̱ chi cua̱nc aran cuan cuiꞌ li rok haꞌ Querit, li cuan jun pacꞌal li nimaꞌ Jordán.

⁶ Ut eb li tzꞌok nequeꞌxcꞌam lix cua ut lix tib rajlal ekꞌela ut rajlal ecuu. Ut laj Elías quirucꞌ li haꞌ li cuan saꞌ li rok haꞌ Querit.

⁷ Abanan mokon chic li rok haꞌ quichakic xban nak incꞌaꞌ chic quixqꞌue li hab.

⁸ Ut li Ka̱cuaꞌ quixye re laj Elías:

⁹ —Tat-e̱lk saꞌ li naꞌajej aꞌin ut tatxic saꞌ li tenamit Sarepta li cuan saꞌ xcue̱nt Sidón ut aran tatcua̱nk. Saꞌ li naꞌajej aꞌan cuan jun li xma̱lcaꞌan. Ac xinye re nak aꞌan ta̱chꞌolani̱nk a̱cue, chan li Dios.

¹⁰ Joꞌcan nak laj Elías qui-el saꞌ li naꞌajej aꞌan ut co̱ saꞌ li tenamit Sarepta. Nak quicuulac saꞌ li oqueba̱l re li tenamit, quiril jun li xma̱lcaꞌan yo̱ chixxocbal xsiꞌ. Quixbok li ixk ut quixye re: —Ba̱nu usilal, cꞌam chak bayak inhaꞌ re tincuucꞌ, chan re.

¹¹ Ac yo̱ chi xic li ixk nak laj Elías quixbok cuiꞌchic ut quixye re: —Ta̱ba̱nu usilal, ta̱cꞌam ajcuiꞌ chak caꞌchꞌinak incaxlan cua, chan re.

¹² Li ixk quichakꞌoc ut quixye re laj Elías: —Ma̱cꞌaꞌ caxlan cua cuiqꞌuin ac yi̱banbil. Li Ka̱cuaꞌ la̱ Dios naxnau nak ya̱l li yo̱quin chixyebal. Caꞌchꞌin ajcuiꞌ li cꞌaj cuan saꞌ jun li ucꞌal ut caꞌchꞌin ajcuiꞌ li aceite cuan saꞌ lin chꞌina cuc. Ut anakcuan xinchal xxocbal coꞌxibak insiꞌ re nak tinyi̱b li caxlan cua chokꞌ re lin yum ut chokꞌ cue ajcuiꞌ la̱in. Nak takachoy aꞌan, ma̱re toca̱mk xban katzꞌocajic xban nak ma̱cꞌaꞌ chic cuan ke, chan.

¹³ Laj Elías quixye re: —Matcꞌoxlac. Ayu saꞌ la̱ cuochoch. Ba̱nu joꞌ xaye. Abanan xbe̱n cua ta̱yi̱b jun chꞌina caxlan cua ut ta̱cꞌam chak chokꞌ cue. Chirix aꞌan ta̱yi̱b re la̱ yum ut la̱ cue la̱at.

¹⁴ Ba̱nu chi joꞌcan xban nak joꞌcaꞌin quixye li Ka̱cuaꞌ Dios li nakalokꞌoni la̱o aj Israel: Incꞌaꞌ ta̱lajk li cꞌaj li cuan saꞌ li ucꞌal chi moco ta̱osokꞌ li aceite li cuan saꞌ cuc toj tixqꞌue chak li hab saꞌ ruchichꞌochꞌ li Ka̱cuaꞌ, chan laj Elías.

¹⁵ Li ixk quixba̱nu joꞌ quiyeheꞌ re xban laj Elías. Ut quicuan xtzacae̱mkeb laj Elías, li ixk ut lix yum re nabal cutan.

¹⁶ Ut quicꞌulman joꞌ quixye li Ka̱cuaꞌ re laj Elías. Li cꞌaj li cuan saꞌ li ucꞌal incꞌaꞌ qui-osoꞌ chi moco li aceite li cuan saꞌ li chꞌina cuc.

¹⁷ Mokon chic quiyajer lix yum li xma̱lcaꞌan. Quiniman xyajel toj retal quicam.

¹⁸ Li naꞌbej quixye re laj Elías: —¿Cꞌaꞌru inma̱c cha̱cuu, at xprofeta li Dios? ¿Ma xatchal cuiqꞌuin chixjulticanquil lin ma̱c ut chixcamsinquil lin chꞌina yum? chan.

¹⁹ Laj Elías quixye re: —Qꞌue cue la̱ chꞌina yum, chan. Quixcꞌul li chꞌina al chiru ut quixcꞌam takecꞌ saꞌ xcaꞌ tasalil li cab cuan cuiꞌ lix cuariba̱l ut quixyocob chiru lix cuarib.

²⁰ Quitijoc chiru li Ka̱cuaꞌ ut quixye re: —At Ka̱cuaꞌ, at inDios, ¿cꞌaꞌut nak xaqꞌue li raylal saꞌ xbe̱n li xma̱lcaꞌan aꞌin li yo̱ chi qꞌuehoc innaꞌaj saꞌ rochoch? ¿Cꞌaꞌut nak xaqꞌue chi ca̱mc lix chꞌina yum? chan.

²¹ Quixhupub rib saꞌ xbe̱n li chꞌina al oxib sut ut quixya̱ba xcꞌabaꞌ li Ka̱cuaꞌ. Quixye re: —At Ka̱cuaꞌ, at inDios, chaqꞌue ta cuiꞌchic lix yuꞌam li chꞌina al aꞌin, chan.

²² Li Ka̱cuaꞌ quirabi lix tij li profeta Elías ut quixqꞌue cuiꞌchic lix yuꞌam ut quiyoꞌla cuiꞌchic.

²³ Laj Elías quixkꞌalu cuiꞌchic li chꞌina al ut quixcꞌam cuiꞌchic takꞌa saꞌ li naꞌajej li cuan cuiꞌ lix naꞌ. Quixkꞌaxtesi re li naꞌbej ut quixye re: —Cueꞌ la̱ chꞌina yum yoꞌyo chic, chan.

²⁴ Ut li xma̱lcaꞌan quixye re: —Riqꞌuin aꞌin ninqꞌue retal nak la̱at xprofeta li Dios ut chixjunil li nacaye, aꞌan ya̱l xban nak li Ka̱cuaꞌ naxcꞌut cha̱cuu, chan.