1 Reyes 16 - Li Santil hu

¹ Li Ka̱cuaꞌ quia̱tinac riqꞌuin li profeta Jehú, li ralal laj Hanani ut quixye re nak tixye re li rey Baasa nak incꞌaꞌ us yo̱.

² Laj Jehú quixye re laj Baasa: —Joꞌcaꞌin quixye a̱cue li Ka̱cuaꞌ. “La̱at ma̱cꞌaꞌ a̱cuanquil nak xatcuan. La̱in xinqꞌue a̱cuanquil nak xatinxakab chi takla̱nc saꞌ xbe̱neb laj Israel, lin tenamit. Abanan la̱at xaba̱nu li ma̱usilal joꞌ quixba̱nu laj Jeroboam. Xacꞌameb xbe laj Israel chi ma̱cobc. Xban li ma̱c xaba̱nu, xachikꞌ injoskꞌil.

³ Joꞌcan nak la̱in tinsach a̱cuu ut tinsach ruheb la̱ cualal a̱cꞌajol joꞌ nak xinsach ru laj Jeroboam, li ralal laj Nabat, joꞌ eb ajcuiꞌ li ralal xcꞌajol.

⁴ Eb la̱ cualal a̱cꞌajol li teꞌca̱mk saꞌ tenamit teꞌtiꞌekꞌ xbaneb li tzꞌiꞌ. Ut eb li teꞌca̱mk saꞌ cꞌaleba̱l teꞌtiꞌekꞌ xbaneb li soꞌsol,” chan li Ka̱cuaꞌ.—

⁵ Chixjunil li quixba̱nu li rey Baasa ut chanru nak quicuan saꞌ xcuanquil, tzꞌi̱banbil retalil saꞌ li hu Crónicas, li tzꞌi̱banbil cuiꞌ li quilajeꞌxba̱nu lix reyeb laj Israel.

⁶ Laj Baasa quicam ut quimukeꞌ Tirsa. Ut aꞌ chic laj Ela, li ralal, qui-oc saꞌ xcuanquil chokꞌ re̱kaj.

⁷ Li profeta Jehú, li ralal laj Hanani, quixye li cꞌaꞌru quiyeheꞌ re xban li Ka̱cuaꞌ chirix laj Baasa ut chirixeb ajcuiꞌ li ralal xcꞌajol xban li ma̱usilal li quixba̱nu chiru li Ka̱cuaꞌ. Laj Baasa quixba̱nu joꞌ quixba̱nu laj Jeroboam ut quixchikꞌ xjoskꞌil li Dios xban li ma̱c quixba̱nu ut xban ajcuiꞌ nak quixsach ruheb li ralal xcꞌajol laj Jeroboam.

⁸ Nak yo̱ cuakib xcaꞌcꞌa̱l (26) chihab roquic chokꞌ xreyeb laj Judá laj Asa, laj Ela, li ralal laj Baasa, qui-oc chokꞌ xreyeb laj Israel. Cuib chihab quicuan saꞌ xcuanquil aran Tirsa.

⁹ Laj Zimri, li nacꞌanjelac chiru laj Ela, quixcꞌu̱b ru chanru nak tixcamsi. Laj Zimri, aꞌan li nataklan saꞌ xbe̱neb yi jach lix carruaje laj Ela. Saꞌ jun li cutan laj Ela cuan saꞌ rochoch laj Arsa, li na-iloc re lix jun cablal. Qui-ucꞌac ut quicala.

¹⁰ Laj Zimri qui-oc cuan cuiꞌ laj Ela ut quixcamsi. Chirix aꞌan laj Zimri qui-oc chokꞌ xreyeb laj Judá chokꞌ re̱kaj laj Ela. Aꞌin quicꞌulman nak yo̱ cuukub xcaꞌcꞌa̱l (27) chihab roquic chokꞌ xreyeb laj Judá laj Asa.

¹¹ Nak laj Zimri qui-oc saꞌ xcuanquil quixcamsiheb chixjunileb li ralal xcꞌajol laj Baasa. Chixjunileb li cui̱nk, joꞌ rechꞌalal, joꞌ rami̱g, queꞌcamsi̱c.

¹² Quicꞌulman joꞌ quixye li Dios re li profeta Jehú chirix laj Baasa. Laj Zimri quixcamsi chixjunileb li ralal xcꞌajol laj Baasa.

¹³ Queꞌcamsi̱c laj Baasa ut laj Ela li ralal xban li ma̱c queꞌxba̱nu ut xban ajcuiꞌ nak queꞌxcꞌam xbeheb laj Israel chi ma̱cobc nak queꞌxlokꞌoni li jalanil dios li ma̱cꞌaꞌ nequeꞌoc cuiꞌ ut queꞌxchikꞌ xjoskꞌil li Dios.

¹⁴ Chixjunil li quixba̱nu li rey Ela tzꞌi̱banbil retalil saꞌ li hu Crónicas, li tzꞌi̱banbil cuiꞌ li quilajeꞌxba̱nu lix reyeb laj Israel.

¹⁵ Nak yo̱ cuukub xcaꞌcꞌa̱l (27) chihab roquic chokꞌ xreyeb laj Judá laj Asa, laj Zimri qui-oc saꞌ xcuanquil. Cuukub cutan quicuan chokꞌ rey aran Tirsa. Eb lix soldados laj Israel cuanqueb Gibetón, saꞌ lix tenamiteb laj filisteo.

¹⁶ Eb li soldados aj Israel queꞌrabi resil nak laj Zimri quixcamsi li rey Ela. Saꞌ junpa̱t queꞌxxakab laj Omri chokꞌ xreyeb laj Israel saꞌ li naꞌajej li cuanqueb cuiꞌ. Laj Omri, aꞌan li quitaklan saꞌ xbe̱neb li soldados nak toj ma̱jiꞌ na-oc chokꞌ rey.

¹⁷ Chirix aꞌan laj Omri rochbeneb chixjunileb laj Israel queꞌel saꞌ li tenamit Gibetón ut queꞌco̱eb chi pletic saꞌ li tenamit Tirsa.

¹⁸ Laj Zimri quixqꞌue retal nak queꞌoc chi pletic saꞌ li tenamit. Joꞌcan nak co̱ saꞌ li palacio ut quixloch xxamlel. Ut aran quicꞌat laj Zimri saꞌ li palacio.

¹⁹ Quicam xban li ma̱c quixba̱nu. Quixba̱nu li ma̱usilal chiru li Ka̱cuaꞌ, joꞌ quixba̱nu laj Jeroboam. Quixchikꞌ xjoskꞌil li Dios xban nak quixcꞌam xbeheb laj Israel chi ma̱cobc chiru li Ka̱cuaꞌ.

²⁰ Chixjunil li quixba̱nu li rey Zimri tzꞌi̱banbil retalil saꞌ li hu Crónicas, li tzꞌi̱banbil cuiꞌ li quilajeꞌxba̱nu lix reyeb laj Israel. Tzꞌi̱banbil ajcuiꞌ retalil chanru nak quixcamsi li rey Ela.

²¹ Ut eb li ralal xcꞌajol laj Israel queꞌxjach ribeb. Yi jach queꞌajoc re nak laj Tibni li ralal laj Ginat ta̱oc chokꞌ rey ut queꞌoquen chirix. Ut li yi jach chic queꞌoquen chirix laj Omri.

²² Eb li yo̱queb chi oque̱nc chirix laj Omri queꞌnumta saꞌ xbe̱neb li jun jachal chic. Laj Tibni quicam ut laj Omri qui-oc chokꞌ rey.

²³ Nak yo̱ junlaju xcaꞌcꞌa̱l (31) chihab roquic chokꞌ xreyeb laj Judá laj Asa, laj Omri qui-oc chokꞌ xreyeb laj Israel. Cablaju chihab quicuan chokꞌ rey. Li xbe̱n cuakib chihab quicuan saꞌ li tenamit Tirsa.

²⁴ Laj Omri quixlokꞌ riqꞌuin laj Semer li tzu̱l li cuan Samaria. Quixlokꞌ chi jun ciento riqꞌuin o̱b roxcꞌa̱l (145) libras li plata. Ut saꞌ li naꞌajej aꞌan quixyi̱b jun li tenamit chi cha̱bil. Samaria quixqꞌue chokꞌ xcꞌabaꞌ li tenamit aꞌan. Quixqꞌue li xcꞌabaꞌ aꞌan xban nak aj Semer xcꞌabaꞌ laj e̱chal re li naꞌajej junxil.

²⁵ Laj Omri quixba̱nu li ma̱usilal chiru li Ka̱cuaꞌ. Kꞌaxal cuiꞌchic yibru quixba̱nu chiru li queꞌxba̱nu eb li rey li quilajeꞌcuan.

²⁶ Quixba̱nu li ma̱usilal joꞌ quixba̱nu laj Jeroboam. Quixchikꞌ xjoskꞌil li Ka̱cuaꞌ xban li ma̱c quixba̱nu ut xban ajcuiꞌ nak quixcꞌam xbeheb laj Israel chi ma̱cobc chiru li Ka̱cuaꞌ nak queꞌxlokꞌoni li jalanil dios.

²⁷ Chixjunil li quixba̱nu li rey Omri, joꞌ ajcuiꞌ li quixba̱nu riqꞌuin xcacuilal xchꞌo̱l, tzꞌi̱banbil retalil saꞌ li hu Crónicas, li tzꞌi̱banbil cuiꞌ li quilajeꞌxba̱nu lix reyeb laj Israel.

²⁸ Li rey Omri quicam ut quimukeꞌ saꞌ li tenamit Samaria. Ut aꞌ chic laj Acab li ralal qui-oc saꞌ xcuanquil chokꞌ re̱kaj.

²⁹ Ac yo̱ cuakxaklaju xcaꞌcꞌa̱l (38) chihab roquic chokꞌ rey laj Asa saꞌ li naꞌajej Judá nak laj Acab li ralal laj Omri qui-oc chokꞌ rey aran Israel.

³⁰ Cuib xcaꞌcꞌa̱l (22) chihab quicuan saꞌ xcuanquil saꞌ li tenamit Samaria. Quima̱cob chiru li Ka̱cuaꞌ ut kꞌaxal cuiꞌchic numtajenak li ma̱usilal li quixba̱nu chiru li queꞌxba̱nu li queꞌcuan chokꞌ rey nak toj ma̱jiꞌ na-oc saꞌ xcuanquil aꞌan.

³¹ Incꞌaꞌ quicꞌoxlac chixba̱nunquil li ma̱c li quixba̱nu laj Jeroboam li ralal laj Nabat. Ut kꞌaxal cuiꞌchic yibru quixba̱nu nak quixcꞌam chok rixakil lix Jezabel lix rabin laj Et-baal lix reyeb laj Sidón. Ut laj Acab quixlokꞌoni li jalanil dios Baal.

³² Quixqꞌue chi yi̱ba̱c jun li artal ut jun li templo aran Samaria re teꞌxlokꞌoni cuiꞌ laj Baal.

³³ Ut quixqꞌue ajcuiꞌ chi yi̱ba̱c jun li jalam u̱ch Asera xcꞌabaꞌ. Ut kꞌaxal cuiꞌchic quixtaksi xjoskꞌil li Dios xban nak kꞌaxal cuiꞌchic yibru quixba̱nu chiru li queꞌxba̱nu li rey li queꞌcuan junxil aran Israel nak toj ma̱jiꞌ na-oc laj Acab saꞌ xcuanquil.

³⁴ Chiruheb li cutan aꞌan jun li cui̱nk Bet-el xtenamit, aj Hiel xcꞌabaꞌ, quixyi̱b cuiꞌchic li tenamit Jericó. Ut nak quixqꞌue lix cimiento, quicam laj Abiram li xbe̱n ralal. Ut nak queꞌxqꞌue saꞌ xnaꞌajeb lix puertil li tzꞌac, quicam laj Segub li i̱tzꞌinbej. Joꞌcaꞌin nak quitzꞌakloc ru li quixye laj Josué li ralal laj Nun nak quixye li cꞌaꞌru quiyeheꞌ re xban li Ka̱cuaꞌ.