1 Reyes 15 - Li Santil hu

¹ Yo̱ cuakxaklaju (18) chihab roquic chokꞌ xreyeb laj Israel laj Jeroboam li ralal laj Nabat, nak laj Abiam qui-oc chokꞌ rey aran Jerusalén.

² Oxib chihab quicuan saꞌ xcuanquil aran Jerusalén. Lix naꞌ laj Abiam, aꞌan lix Maaca, lix rabin laj Abisalom.

³ Laj Abiam quixba̱nu li ma̱usilal joꞌ quixba̱nu laj Roboam lix yucuaꞌ. Incꞌaꞌ quixlokꞌoni li Ka̱cuaꞌ chi anchal xchꞌo̱l joꞌ quixba̱nu laj David lix xeꞌto̱nil xyucuaꞌ.

⁴ Li Ka̱cuaꞌ Dios incꞌaꞌ quirisi lix cuanquileb li ralal xcꞌajol laj David. Quixqꞌue ban jun li ralal laj Abiam chi oc chokꞌ rey chokꞌ re̱kaj re nak tixcol li tenamit Jerusalén. Quixba̱nu aꞌan xban nak naxra laj David laj cꞌanjel chiru.

⁵ Li Ka̱cuaꞌ quixba̱nu chi joꞌcan xban nak laj David quicuan saꞌ ti̱quilal chiru. Junelic quixba̱nu li cꞌaꞌru quixye li Ka̱cuaꞌ toj chalen nak quicam. Caꞌaj cuiꞌ quima̱cob chiru laj Urías laj heteo.

⁶ Junelic queꞌpletic chi ribileb rib laj Roboam ut laj Jeroboam toj chalen nak quicam laj Roboam.

⁷ Ut queꞌxpleti ajcuiꞌ ribeb laj Abiam ut laj Jeroboam. Chixjunil li quilajxba̱nu laj Abiam tzꞌi̱banbil retalil saꞌ li hu Crónicas li tzꞌi̱banbil cuiꞌ retalil li quilajeꞌxba̱nu lix reyeb laj Judá.

⁸ Laj Abiam quicam ut quimukeꞌ saꞌ lix tenamit laj David saꞌ li mukleba̱l li queꞌmukeꞌ cuiꞌ lix xeꞌto̱nil xyucuaꞌ. Ut aꞌ chic laj Asa, li ralal, qui-oc saꞌ xcuanquil chokꞌ re̱kaj laj Abiam.

⁹ Nak yo̱ junmay chihab roquic chokꞌ xreyeb laj Israel laj Jeroboam, laj Asa qui-oc chokꞌ xreyeb laj Judá.

¹⁰ Laj Asa quicuan saꞌ xcuanquil aran Jerusalén jun roxcꞌa̱l (41) chihab. Lix naꞌ, aꞌan lix Maaca, lix rabin laj Abisalom.

¹¹ Laj Asa quicuan saꞌ ti̱quilal chiru li Dios joꞌ quixba̱nu laj David lix xeꞌto̱nil xyucuaꞌ.

¹² Quirisi saꞌ li tenamit eb li ixk ut eb li cui̱nk li kꞌaxal yibru queꞌxba̱nu chi ribileb rib re xqꞌuebal xlokꞌal lix dioseb li queꞌxyi̱b. Ut quirisiheb ajcuiꞌ chixjunil li yi̱banbil dios li quilajeꞌxyi̱b lix xeꞌto̱nil xyucuaꞌeb.

¹³ Ut quirisi xcuanquil chokꞌ reina lix Maaca lix naꞌ xban nak quixyi̱b jun lix dios Asera. Laj Asa quixjor lix dios ut quixcꞌat chire li haꞌ Cedrón.

¹⁴ Usta incꞌaꞌ quixpoꞌ chixjunileb li naꞌajej li queꞌxlokꞌoni cuiꞌ li jalanil dios, abanan laj Asa junelic cuan saꞌ ti̱quilal chiru li Dios toj chalen nak quicam.

¹⁵ Ut quixqꞌue cuiꞌchic saꞌ lix templo li Dios li cꞌaꞌru terto xtzꞌak, li oro ut li plata li quixkꞌaxtesi lix yucuaꞌ re li Ka̱cuaꞌ, joꞌ ajcuiꞌ li quixkꞌaxtesi aꞌan.

¹⁶ Laj Asa, lix reyeb laj Judá, ut laj Baasa, lix reyeb laj Israel, junelic queꞌxpleti ribeb chi ribileb rib toj chalen nak queꞌcam.

¹⁷ Laj Baasa, lix reyeb laj Israel, co̱ Judá chi pletic. Quixyi̱b chi cha̱bil li tenamit Ramá re nak ma̱ ani ta̱ru̱k ta̱oc ut ma̱ ani ta̱ru̱k ta̱e̱lk riqꞌuin laj Asa, lix reyeb laj Judá.

¹⁸ Joꞌcan nak li rey Asa quixchap li oro, li plata ut chixjunil li terto xtzꞌak li xocxo saꞌ lix templo li Ka̱cuaꞌ, ut quixcꞌam ajcuiꞌ li cuan saꞌ li palacio. Ut quixtakla chirixeb li nequeꞌcꞌanjelac chiru re teꞌxcꞌam aran Damasco ut teꞌxsi re laj Ben-adad lix reyeb laj Siria. Laj Ben-adad, aꞌan li ralal laj Tabrimón. Ut laj Tabrimón, aꞌan li ralal laj Hezión.

¹⁹ Laj Asa quixtakla xyebal re laj Ben-adad: —Kaba̱nuhak junak li contrato chi kibil kib joꞌ queꞌxba̱nu lin yucuaꞌ riqꞌuin la̱ yucuaꞌ. Xintakla li oro ut li plata chokꞌ a̱cue. Nintzꞌa̱ma cha̱cuu nak incꞌaꞌ chic ta̱qꞌue xcuanquil li contrato li xaba̱nu riqꞌuin laj Baasa, lix reyeb laj Israel, re nak incꞌaꞌ chic toxchꞌiꞌchꞌiꞌi, chan laj Asa.

²⁰ Li rey Ben-adad quixcꞌul xchꞌo̱l li quixye laj Asa. Joꞌcan nak quixtaklaheb lix soldado joꞌqueb ajcuiꞌ li nequeꞌtaklan saꞌ xbe̱neb re nak teꞌpletik aran Israel. Ut queꞌnumta saꞌ xbe̱neb li tenamit Ijón, Dan, Abel-bet-maaca, ut quinumta ajcuiꞌ saꞌ xbe̱neb chixjunileb li naꞌajej Cineret joꞌ ajcuiꞌ chixjunil lix naꞌajeb li ralal xcꞌajol laj Neftalí.

²¹ Nak li rey Baasa quirabi resil li cꞌaꞌru quicꞌulman, quixcanab xyi̱banquil li tenamit Ramá ut quisukꞌi cuiꞌchic Tirsa.

²² Li rey Asa quixtakla xbokbaleb chixjunileb li cuanqueb Judá ut quixye reheb nak ma̱ jun ta̱paltok. Ut quixtaklaheb aran Ramá chixxocbal li pec ut li cheꞌ li yo̱ chi cꞌanjelac chiru laj Baasa re xyi̱banquil chi cha̱bil li tenamit Ramá. Ut riqꞌuin aꞌan li rey Asa quixyi̱b chi cha̱bil li cuib chi tenamit Mizpa ut Geba, lix naꞌajeb li ralal xcꞌajol laj Benjamín.

²³ Chixjunil li quilajxba̱nu li rey Asa, ut chanru nak quicuan saꞌ xcuanquil, tzꞌi̱banbil retalil saꞌ li hu Crónicas, li tzꞌi̱banbil cuiꞌ li quilajeꞌxba̱nu lix reyeb laj Judá. Ut tzꞌi̱banbil ajcuiꞌ retalileb li tenamit li quixyi̱b. Nak ac ti̱x chic, quiyajer nak quirahoꞌ li rok.

²⁴ Ut laj Asa quicam ut quimukeꞌ saꞌ lix tenamit laj David saꞌ li mukleba̱l li queꞌmukeꞌ cuiꞌ lix xeꞌto̱nil xyucuaꞌ. Ut aꞌ chic laj Josafat, li ralal, qui-oc saꞌ xcuanquil chokꞌ re̱kaj.

Eb lix rey laj Israel

²⁵ Nak yo̱ xcab chihab roquic laj Asa chokꞌ xreyeb laj Judá, laj Nadab li ralal laj Jeroboam qui-oc chokꞌ xreyeb laj Israel. Cuib chihab quicuan saꞌ xcuanquil.

²⁶ Laj Nadab quixba̱nu li ma̱usilal chiru li Ka̱cuaꞌ joꞌ quixba̱nu lix yucuaꞌ nak quicꞌamoc be chiruheb laj Israel chi ma̱cobc chiru li Ka̱cuaꞌ.

²⁷ Laj Baasa, li ralal laj Ahías, aꞌan xcomoneb li ralal xcꞌajol laj Isacar. Quixcꞌu̱b ru chanru nak tixcamsi li rey Nadab. Quixcamsi nak laj Nadab ut lix soldados queꞌoc chi pletic saꞌ li tenamit Gibetón. Li tenamit Gibetón, aꞌan xnaꞌajeb laj filisteo.

²⁸ Laj Nadab quicamsi̱c nak ac yo̱ rox chihab roquic laj Asa chokꞌ xreyeb laj Judá. Laj Baasa qui-oc chokꞌ xrey eb laj Israel chokꞌ re̱kaj laj Nadab.

²⁹ Laj Baasa ticto qui-oc chixcamsinquileb chixjunileb li ralal xcꞌajol laj Jeroboam. Quicꞌulman joꞌ quixye li Dios re li profeta Ahías, Silo xtenamit. Chixjunileb li ralal xcꞌajol laj Jeroboam quilajeꞌcamsi̱c. Ma̱ jun chic quicana chi yoꞌyo.

³⁰ Queꞌcamsi̱c xban nak laj Jeroboam quixchikꞌ xjoskꞌil li Ka̱cuaꞌ, lix Dioseb laj Israel nak quixba̱nu li ma̱usilal ut xban nak quixcꞌameb xbe laj Israel chi ma̱cobc chiru li Ka̱cuaꞌ.

³¹ Chixjunil li quixba̱nu li rey Nadab tzꞌi̱banbil retalil saꞌ li hu Crónicas li tzꞌi̱banbil cuiꞌ li quilajeꞌxba̱nu lix reyeb laj Israel.

³² Laj Asa, lix reyeb laj Judá, ut laj Baasa, lix reyeb laj Israel, junelic queꞌpletic chi ribil ribeb toj chalen nak queꞌcam.

³³ Nak yo̱ rox chihab roquic chokꞌ xreyeb laj Judá laj Asa, laj Baasa li ralal laj Ahías, qui-oc chokꞌ xreyeb chixjunileb laj Israel. Ca̱hib xcaꞌcꞌa̱l (24) chihab quicuan saꞌ xcuanquil laj Baasa aran Tirsa.

³⁴ Laj Baasa quixba̱nu li ma̱usilal chiru li Ka̱cuaꞌ joꞌ quixba̱nu laj Jeroboam ut quixcꞌam xbeheb laj Israel chi ma̱cobc chiru li Ka̱cuaꞌ.