1 Reyes 14 - Li Santil hu

¹ Saꞌ eb li cutan aꞌan quiticla xyajel laj Abías li ralal laj Jeroboam.

² Laj Jeroboam quixye re li rixakil: —Tikib a̱cuib chi jalan re nak incꞌaꞌ teꞌxnau nak la̱at li cuixakil. Ut tatxic aran Silo riqꞌuin li profeta Ahías xban nak aꞌan li quiyehoc cue nak la̱in tin-oc chokꞌ rey saꞌ li tenamit aꞌin.

³ Ut ta̱cꞌam laje̱b li caxlan cua joꞌ ajcuiꞌ li caxlan cua corech rix ut jun chꞌina cuc li yaꞌal cab. Ta̱qꞌue re, re nak aꞌan tixye a̱cue cꞌaꞌru ta̱cana̱k cuiꞌ li chꞌina al aꞌin, chan laj Jeroboam.

⁴ Ut li rixakil laj Jeroboam quixba̱nu li cꞌaꞌru quiyeheꞌ re. Co̱ aran Silo saꞌ rochoch laj Ahías. Laj Ahías, aꞌan incꞌaꞌ chic saken na-iloc xban nak ti̱x chi us.

⁵ Abanan li Ka̱cuaꞌ Dios quia̱tinac riqꞌuin laj Ahías ut quixye re nak li rixakil laj Jeroboam ta̱cuulak riqꞌuin chixpatzꞌbal re cꞌaꞌru tixba̱nu riqꞌuin li chꞌina al yaj. Li Dios quixye ajcuiꞌ re nak li ixk aꞌan ta̱cuulak chi jalan xtikibanquil re nak incꞌaꞌ teꞌxnau nak aꞌan li rixakil laj Jeroboam. Ut quixye re cꞌaꞌru tixsume cuiꞌ li ixk.

⁶ Laj Ahías quirabi li rok li ixk nak yo̱ chak chi oc saꞌ li oqueba̱l ut quixye re: —Ocan chak, at rixakil laj Jeroboam. ¿Cꞌaꞌut nak nacaqꞌue a̱cuib chi jalan? Li Dios xtakla jun esilal a̱cue ra rabinquil.

⁷ Ayu ut ye re laj Jeroboam: —Joꞌcaꞌin xye li Ka̱cuaꞌ lix Dioseb laj Israel, “La̱in xinsicꞌoc a̱cuu saꞌ xya̱nkeb li tenamit ut xatinxakab chi takla̱nc saꞌ xbe̱n lin tenamit Israel.

⁸ La̱in xcuisiheb li tenamit aꞌin rubel xcuanquil li ralal xcꞌajol laj David ut xinkꞌaxtesi rubel a̱cuanquil la̱at. Abanan la̱at incꞌaꞌ yo̱cat chi takla̱nc saꞌ ti̱quilal saꞌ xbe̱neb joꞌ quixba̱nu laj David laj cꞌanjel chicuu. Aꞌan quixba̱nu joꞌ naxye saꞌ lin chakꞌrab ut quicuan saꞌ xya̱lal chicuu. Junelic quicuan saꞌ ti̱quilal chicuu chi anchal xchꞌo̱l.

⁹ La̱at kꞌaxal cuiꞌchic yibru xaba̱nu chiruheb li queꞌcuan junxil. Xachikꞌ injoskꞌil nak xayi̱b a̱jalanil dios. Xayi̱b a̱jalam u̱ch chꞌi̱chꞌ ut xina̱tzꞌekta̱na la̱in.

¹⁰ Joꞌcan nak anakcuan la̱in tinqꞌue li raylal saꞌ xbe̱neb li ralal xcꞌajol laj Jeroboam. Tinsach ruheb chixjunileb li ralal, joꞌ cocꞌ joꞌ ni̱nk. Tinsach ruheb chi junaj cua joꞌ nak namesuman li mul saꞌ junak cab. Ma̱ jun chic tebincanab.

¹¹ Eb li ralal xcꞌajol laj Jeroboam li teꞌca̱mk saꞌ tenamit teꞌtiꞌekꞌ xbaneb li tzꞌiꞌ. Ut eb li teꞌca̱mk saꞌ cꞌaleba̱l teꞌtiꞌekꞌ xbaneb li soꞌsol xban nak joꞌcan xye li Ka̱cuaꞌ.”

¹² Ut la̱at, at ixk, ayu saꞌ la̱ cuochoch. Ut nak yo̱kat chi cuulac saꞌ li tenamit, ta̱ca̱mk li chꞌina al.

¹³ Chixjunileb laj Israel teꞌya̱bak chirix nak teꞌxmuk. Caꞌaj cuiꞌ aꞌan li ta̱mukekꞌ saꞌ xya̱lal xban nak li Dios xqꞌue retal nak caꞌaj cuiꞌ aꞌan li us xchꞌo̱l saꞌ xya̱nkeb li ralal xcꞌajol laj Jeroboam.

¹⁴ Li Ka̱cuaꞌ tixxakab jun chic li cui̱nk chokꞌ xreyeb laj Israel. Li rey aꞌan tixsach ruheb chi junaj cua li ralal xcꞌajol laj Jeroboam saꞌ ajcuiꞌ li cutan nak ta̱xakaba̱k chokꞌ rey.

¹⁵ Li Ka̱cuaꞌ tixqꞌueheb chi rahobtesi̱c laj Israel. Chanchan nak na-ecꞌasi̱c li caxlan ajl xban li haꞌ nak teꞌisi̱k saꞌ li cha̱bil naꞌajej li quixqꞌue li Dios reheb lix xeꞌto̱nil xyucuaꞌeb. Tixchaꞌchaꞌi ruheb ut tixtaklaheb jun pacꞌal li nimaꞌ Éufrates xban nak queꞌxchikꞌ xjoskꞌil li Dios nak queꞌxyi̱b lix dios Asera ut queꞌxlokꞌoni.

¹⁶ Li Ka̱cuaꞌ tixkꞌaxtesiheb laj Israel saꞌ rukꞌeb li jalaneb xtenamiteb xban nak quima̱cob laj Jeroboam ut xban ajcuiꞌ nak laj Jeroboam, aꞌan li quicꞌamoc be chiruheb laj Israel re nak teꞌma̱cobk ajcuiꞌ eb aꞌan, chan li profeta Ahías.

¹⁷ Nak quirabi li cꞌaꞌru quixye laj Ahías, li rixakil laj Jeroboam quicuacli ut co̱ saꞌ li tenamit Tirsa. Nak yo̱ chi oc saꞌ li rochoch, li chꞌina al quicam.

¹⁸ Queꞌxmuk li camenak ut chixjunileb laj Israel queꞌya̱bac joꞌ quixye li Dios re li profeta Ahías li nacꞌanjelac chiru.

¹⁹ Chixjunil li quilajxba̱nu li rey Jeroboam, joꞌ ajcuiꞌ li ple̱t quixba̱nu, tzꞌi̱banbil retalil saꞌ li hu Crónicas, li tzꞌi̱banbil cuiꞌ chixjunil li quilajeꞌxba̱nu lix reyeb laj Israel.

²⁰ Laj Jeroboam quicuan chokꞌ rey cuib xcaꞌcꞌa̱l chihab. Quicam ut quimukeꞌ saꞌ li naꞌajej li queꞌmukeꞌ cuiꞌ lix xeꞌto̱nil xyucuaꞌ. Aꞌ chic laj Nadab li ralal qui-oc saꞌ xcuanquil chokꞌ re̱kaj.

Eb lix rey laj Judá

²¹ Jun roxcꞌa̱l chihab cuan re laj Roboam, li ralal laj Salomón, nak qui-oc chokꞌ rey aran Judá. Cuuklaju chihab quicuan saꞌ xcuanquil aran Jerusalén, li tenamit li sicꞌbil ru xban li Dios saꞌ xya̱nkeb lix te̱paleb li ralal xcꞌajol laj Israel. Li Dios quixsicꞌ ru li tenamit Jerusalén re nak aran ta̱lokꞌoni̱k. Lix naꞌ laj Roboam, aꞌan lix Naama. Amón xtenamit.

²² Eb li cuanqueb Judá queꞌma̱cob chiru li Ka̱cuaꞌ. Kꞌaxal cuiꞌchic yibru li queꞌxba̱nu chiru li queꞌxba̱nu lix xeꞌto̱nil xyucuaꞌeb. Riqꞌuin aꞌin, queꞌxchikꞌ xjoskꞌil li Dios.

²³ Queꞌxyi̱b li naꞌajej najt xteram re teꞌxlokꞌoniheb li jalanil dios. Ut queꞌxyi̱b riqꞌuin pec ut cheꞌ li yi̱banbil dios Asera ut queꞌxlokꞌoni saꞌ chixjunil li tzu̱l ut rubel chixjunileb li cheꞌ li ni̱nk xmuheb.

²⁴ Eb li ixk ut eb li cui̱nk kꞌaxal cuiꞌchic yibru queꞌxba̱nu chiribileb rib re xqꞌuebal xlokꞌal lix dioseb li queꞌxyi̱b. Queꞌxba̱nu joꞌ queꞌxba̱nu li jalan xtenamiteb li incꞌaꞌ nequeꞌxpa̱b li Dios, li queꞌisi̱c xban li Ka̱cuaꞌ saꞌ li naꞌajej li queꞌoc cuiꞌ eb laj Israel.

²⁵ Nak yo̱ roꞌ chihab roquic chokꞌ rey laj Roboam, laj Sisac lix reyeb laj Egipto quichal Jerusalén chi pletic riqꞌuineb.

²⁶ Ut quixcꞌam chokꞌ re chixjunil li terto xtzꞌak li xocxo saꞌ li palacio, joꞌ ajcuiꞌ li xocxo saꞌ li templo. Ut quixcꞌam eb ajcuiꞌ li chꞌi̱chꞌ li nequeꞌxram cuiꞌ re xchꞌo̱l, li quixyi̱b riqꞌuin oro laj Salomón.

²⁷ Ut li rey Roboam quixyi̱b riqꞌuin bronce re̱kajeb li chꞌi̱chꞌ li nequeꞌxram cuiꞌ re xchꞌo̱leb ut quixkꞌaxtesi reheb li nequeꞌtaklan saꞌ xbe̱neb li soldado li nequeꞌcꞌacꞌalen re li oqueba̱l re li rochoch li rey.

²⁸ Rajlal nak naxic saꞌ lix templo li Dios li rey, eb li soldados li nequeꞌcꞌacꞌalen re nequeꞌxcꞌam li chꞌi̱chꞌ aꞌan ut mokon queꞌxxoc cuiꞌchic saꞌ li naꞌajej li nequeꞌxoqueꞌ cuiꞌ.

²⁹ Chixjunil li quilajxba̱nu li rey Roboam tzꞌi̱banbil retalil saꞌ li hu Crónicas, li tzꞌi̱banbil cuiꞌ li quilajeꞌxba̱nu lix reyeb laj Judá.

³⁰ Rajlal queꞌxpleti ribeb laj Roboam riqꞌuin laj Jeroboam.

³¹ Laj Roboam quicam ut quimukeꞌ saꞌ li naꞌajej li queꞌmukeꞌ cuiꞌ lix xeꞌto̱nil xyucuaꞌ saꞌ lix tenamit laj David. Lix naꞌ laj Roboam, aꞌan lix Naama. Amón xtenamit. Ut aꞌ chic laj Abiam li ralal qui-oc saꞌ xcuanquil chokꞌ re̱kaj.