1 Reyes 12 - Li Santil hu

Laj Roboam qui-oc chokꞌ xreyeb laj Judá

¹ Co̱ laj Roboam Siquem xban nak aran co̱eb chixjunileb laj Israel re teꞌxxakab chokꞌ rey.

² Laj Jeroboam, li ralal laj Nabat, cuan chak Egipto nak quirabi resil xban nak aran co̱ nak quie̱lelic chiru li rey Salomón.

³ Queꞌxtakla xbokbal laj Jeroboam. Ut aꞌan quichal ut chixjunileb laj Israel queꞌa̱tinac riqꞌuin laj Roboam ut queꞌxye re:

⁴ —La̱ yucuaꞌ kꞌaxal cau xtaklan saꞌ kabe̱n. Abanan la̱at naru tattakla̱nk chi kꞌun caꞌchꞌinak saꞌ kabe̱n re nak ta̱ru̱k tohila̱nk caꞌchꞌinak riqꞌuin li cacuil cꞌanjel quixqꞌue saꞌ kabe̱n la̱ yucuaꞌ. Cui ta̱ba̱nu chi joꞌcan, la̱o tocꞌanjelak cha̱cuu, chanqueb.

⁵ Ut laj Roboam quixye reheb li tenamit: —Sukꞌinkex anakcuan ut chiru oxib cutan texcha̱lk cuiꞌchic cuiqꞌuin, chan. Ut eb li tenamit queꞌco̱eb.

⁶ Ut li rey Roboam quixpatzꞌ xnaꞌleb riqꞌuineb li che̱quel cui̱nk li queꞌcꞌanjelac riqꞌuin lix yucuaꞌ nak toj yoꞌyo. Quixpatzꞌ reheb: —¿Cꞌaꞌru us tinsumeheb cuiꞌ li tenamit? chan.

⁷ Ut eb li che̱quel cui̱nk queꞌxye: —Cui la̱at tattakla̱nk saꞌ xbe̱neb li tenamit saꞌ xya̱lal, ut cui ta̱cua̱tinaheb riqꞌuin kꞌunil a̱tin, eb aꞌan junelic teꞌcꞌanjelak cha̱cuu, chanqueb.

⁸ Abanan laj Roboam incꞌaꞌ quixba̱nu li cꞌaꞌru quiyeheꞌ re xbaneb li che̱quel cui̱nk. Co̱ ban riqꞌuineb li sa̱j cui̱nk li xeꞌqꞌui rochben, li nequeꞌcꞌanjelac chiru.

⁹ Ut quixye reheb: —¿Cꞌaꞌru nequeye la̱ex? ¿Chanru nak tebinsume li tenamit aꞌin, li yo̱queb chixyebal cue nak tincuisi li cacuil trabaj li quiqꞌueheꞌ saꞌ xbe̱neb xban lin yucuaꞌ? chan.

¹⁰ Eb li sa̱j cui̱nk li queꞌqꞌui rochben queꞌxye re laj Roboam: —Joꞌcaꞌin ta̱sumeheb cuiꞌ li tenamit li yo̱queb chixtzꞌa̱manquil cha̱cuu nak incꞌaꞌ cau tattakla̱nk saꞌ xbe̱neb. La̱at ta̱ye reheb, “Cui lin yucuaꞌ cau xtaklan saꞌ e̱be̱n, la̱in kꞌaxal cuiꞌchic cau tintakla̱nk saꞌ e̱be̱n.

¹¹ Cui lin yucuaꞌ xqꞌue li cacuil trabaj saꞌ e̱be̱n, la̱in kꞌaxal cuiꞌchic cau li trabaj tinqꞌue. Lin yucuaꞌ xexsacꞌ chi tzꞌu̱m, abanan la̱in texinsacꞌ riqꞌuin li tzꞌu̱m li cuan chꞌi̱chꞌ saꞌ ruꞌuj,” chaꞌkat reheb.—

¹² Saꞌ rox li cutan eb li tenamit rochben laj Jeroboam queꞌchal riqꞌuin li rey Roboam xban nak joꞌcan quiyeheꞌ reheb xban li rey.

¹³ Li rey Roboam cau quira̱tinaheb li tenamit ut incꞌaꞌ quixba̱nu li cꞌaꞌru quiyeheꞌ re xbaneb li che̱quel cui̱nk.

¹⁴ Li rey quixye reheb li tenamit li cꞌaꞌru queꞌxye li sa̱j cui̱nk. Quixye reheb: —Lin yucuaꞌ cau quitaklan saꞌ e̱be̱n. Ut la̱in kꞌaxal cuiꞌchic cau tintakla̱nk saꞌ e̱be̱n. Aꞌan riqꞌuin tzꞌu̱m quexrahobtesi. Abanan la̱in riqꞌuin li tzꞌu̱m cuan chꞌi̱chꞌ saꞌ ruꞌuj texinrahobtesi, chan.

¹⁵ Li rey incꞌaꞌ quixba̱nu li queꞌxtzꞌa̱ma li tenamit xban nak ac joꞌcan chak saꞌ xchꞌo̱l li Dios. Ut re ajcuiꞌ nak ta̱tzꞌaklok ru li cꞌaꞌru quiyeheꞌ re laj Jeroboam, li ralal laj Nabat xban li profeta Ahías Silo xtenamit nak quixye re li cꞌaꞌru quixye li Dios.

¹⁶ Eb li tenamit queꞌril nak incꞌaꞌ quirabi li rey li queꞌxtzꞌa̱ma chiru. Eb aꞌan queꞌxye re: —¿Cꞌaꞌru takara la̱o riqꞌuineb li ralal xcꞌajol laj David? La̱o ma̱cꞌaꞌ junak cꞌaꞌak re ru teꞌxqꞌue ke. Joꞌcan nak la̱o takil kib kajunes. Ut la̱at taklan saꞌ xbe̱neb li ralal xcꞌajol laj David, chanqueb. Ut eb aꞌan queꞌsukꞌi saꞌ lix naꞌajeb.

¹⁷ Joꞌcan nak laj Roboam quitaklan saꞌ xbe̱neb laj Israel li cuanqueb aran Judá.

¹⁸ Li rey Roboam quixtakla laj Adoram, li xakabanbil chi takla̱nc saꞌ xbe̱neb li qꞌuebileb chi cꞌanjelac chi cau. Abanan laj Adoram quicamsi̱c chi pec xbaneb laj Israel. Tojoꞌnak laj Roboam quie̱lelic. Qui-oc saꞌ xcarruaje ut co̱ Jerusalén.

¹⁹ Joꞌcaꞌin nak queꞌrisi ribeb laj Israel rubel xcuanquil li ralal xcꞌajol laj David toj chalen anakcuan.

²⁰ Nak eb laj Israel queꞌrabi nak quisukꞌi chak laj Jeroboam, queꞌxchꞌutub ribeb. Queꞌxbok riqꞌuineb laj Jeroboam ut queꞌxxakab chokꞌ xreyeb. Caꞌaj cuiꞌ eb laj Judá queꞌcana rubel xcuanquil laj Roboam, li ri laj David.

²¹ Nak laj Roboam quicuulac Jerusalén quixchꞌutubeb chixjunileb laj Judá joꞌ eb ajcuiꞌ li ralal xcꞌajol laj Benjamín. Cuanqueb jun ciento mil riqꞌuin ca̱cꞌa̱l mil chi cui̱nk li quixchꞌutubeb re teꞌxic chi pletic riqꞌuineb laj Israel, li rech tenamitil. Ut re ajcuiꞌ nak teꞌsukꞌi̱k cuiꞌchic rubel xcuanquil laj Roboam li ralal laj Salomón.

²² Abanan li Dios quia̱tinac riqꞌuin laj Semaías laj cꞌanjel chiru, ut quixye re:

²³ —Tat-a̱tinak riqꞌuin laj Roboam li ralal laj Salomón, li cuan chokꞌ rey aran Judá, ut riqꞌuineb li ralal xcꞌajol laj Judá ut eb li ralal xcꞌajol laj Benjamín ut chixjunileb li tenamit li cuanqueb aran.

²⁴ Ta̱ye reheb, “Joꞌcaꞌin xye li Ka̱cuaꞌ. Mexxic chi pletic riqꞌuineb laj Israel le̱ rech tenamitil. Sukꞌinkex ban saꞌ le̱ rochoch che̱junilex xban nak la̱in xinba̱nun re li cꞌaꞌru quicꞌulman,” chan li Dios. Ut eb aꞌan queꞌxba̱nu li quixye li Ka̱cuaꞌ. Queꞌsukꞌi saꞌ rochocheb joꞌ quiyeheꞌ reheb xban li Dios.

²⁵ Ut laj Jeroboam quixtakla xyi̱banquil chi cha̱bil li tenamit Siquem li cuan saꞌ li tzu̱l aran Efraín ut quicana chi cua̱nc aran. Ut quixyi̱b ajcuiꞌ chi cha̱bil li tenamit Penuel.

²⁶ Quixye saꞌ xchꞌo̱l laj Jeroboam: —Anakcuan ma̱re li tenamit teꞌraj sukꞌi̱c rubel xcuanquil li ralal xcꞌajol laj David.

²⁷ Cui yo̱keb chi xic chi mayejac chiru li Ka̱cuaꞌ saꞌ li templo aran Jerusalén, ma̱re teꞌxcꞌam cuiꞌchic ribeb saꞌ usilal riqꞌuin laj Roboam li cuan chokꞌ rey aran Judá. Ut tineꞌxcamsi la̱in ut teꞌxxakab cuiꞌchic laj Roboam chokꞌ xreyeb, chan saꞌ xchꞌo̱l laj Jeroboam.

²⁸ Joꞌcan nak laj Jeroboam quixpatzꞌ xnaꞌleb riqꞌuin laj qꞌuehol naꞌleb ut quixba̱nu joꞌ queꞌxye. Quixqꞌue chi yi̱ba̱c cuib li cuacax oro ut quixye reheb li tenamit: —La̱ex aj Israel, nabal sut ac xexcuulac chak Jerusalén chi lokꞌoni̱nc. Joꞌcan nak anakcuan arin chic texlokꞌoni̱nk. Arin cuan le̱ dios. Aꞌaneb aꞌin li xeꞌisin chak e̱re saꞌ li naꞌajej Egipto, chan laj Jeroboam reheb.

²⁹ Quixyi̱b xnaꞌaj jun li cuacax oro aran Bet-el ut li jun chic quixyi̱b xnaꞌaj aran Dan.

³⁰ Ut riqꞌuin aꞌan eb laj Israel queꞌma̱cob xban nak queꞌco̱eb aran Bet-el ut aran Dan chi lokꞌoni̱nc.

³¹ Laj Jeroboam quixyi̱b rochocheb li yi̱banbil dios saꞌ eb li naꞌajej najt xteram. Ut saꞌ xya̱nkeb li tenamit quixsiqꞌueb ru li quixxakab chokꞌ aj tij li ma̱cuaꞌeb ralal xcꞌajol laj Leví.

³² Ut quixye nak saꞌ li oꞌlaju xbe li cuakxak li po teꞌxba̱nu jun li nimla ninkꞌe. Chanchan li ninkꞌe li nequeꞌxba̱nu aran Judá. Ut quimayejac chiru li artal aran Bet-el chiru li cuacax oro li quixqꞌue chi yi̱ba̱c. Ut quixxakab eb ajcuiꞌ aj tij re teꞌcꞌanjelak saꞌ eb li naꞌajej li najt xteram li quixyi̱b.

³³ Joꞌcan ut nak laj Jeroboam quixba̱nu li ninkꞌe reheb laj Israel saꞌ li oꞌlaju xbe lix cuakxak li po joꞌ quixcꞌoxla xjunes. Co̱ aran Bet-el ut quimayejac saꞌ li artal li quixyi̱b ut quixcꞌat li pom.