1 Reyes 11 - Li Santil hu

¹ Usta ac cuan lix rabin laj faraón chokꞌ rixakil laj Salomón, abanan toj cuanqueb cuiꞌchic nabaleb li ixk jalaneb xtenamit quixraheb. Ut quixcꞌameb chokꞌ rixakil. Eb li ixk aꞌan, jalan jala̱nk xtenamiteb. Aꞌaneb laj Moab, laj Amón, laj Edom, laj Sidón ut eb laj hetea.

² Aꞌan eb li tenamit li quixye li Dios reheb laj Israel nak incꞌaꞌ ta̱ru̱k teꞌxcꞌam chokꞌ rixakileb xban nak eb li tenamit aꞌan nequeꞌxlokꞌoni li jalanil dios. Quixye li Dios chi joꞌcan xban nak ac naxnau nak cui teꞌxcꞌam chokꞌ rixakileb eb li ixk aꞌan, teꞌoc chixlokꞌoninquil lix dioseb aꞌan. Abanan laj Salomón quixcꞌameb chokꞌ rixakil eb li ixk aꞌan.

³ Laj Salomón quisumla riqꞌuin cuukub ciento li ixk xrabineb rey. Ut quicuan ajcuiꞌ riqꞌuin oxib ciento chic li ixk ma̱cuaꞌ tzꞌakal rixakil. Ut saꞌ xcꞌabaꞌeb li ixk aꞌan, laj Salomón quixcanab xlokꞌoninquil li Dios.

⁴ Nak ac ti̱x chic laj Salomón quijala xcꞌaꞌux xbaneb li rixakil ut qui-oc chixlokꞌoninquil li jalanil dios. Ut incꞌaꞌ yo̱ chixba̱nunquil li ti̱quilal chi anchal xchꞌo̱l chiru li Ka̱cuaꞌ joꞌ quixba̱nu laj David lix yucuaꞌ.

⁵ Laj Salomón quixlokꞌoni lix dioseb laj Sidón, lix Astoret xcꞌabaꞌ. Ut quixlokꞌoni ajcuiꞌ laj Milcom lix dioseb laj Amón, ut kꞌaxal yibru queꞌxba̱nu nak queꞌxlokꞌoni aꞌan.

⁶ Laj Salomón quixba̱nu li incꞌaꞌ us chiru li Ka̱cuaꞌ xban nak incꞌaꞌ quixpa̱b li Ka̱cuaꞌ chi anchal xchꞌo̱l joꞌ quixba̱nu laj David lix yucuaꞌ.

⁷ Ut laj Salomón quixtakla xyi̱banquil lix naꞌajeb li jalanil dios Quemos ut Moloc saꞌ li tzu̱l li cuan jun pacꞌal li tenamit Jerusalén bar na-el cuiꞌ li sakꞌe. Laj Quemos, aꞌan lix dioseb laj Moab. Ut laj Moloc aꞌan lix dioseb laj Amón, li kꞌaxal yibru nequeꞌxba̱nu nak nequeꞌxlokꞌoniheb.

⁸ Joꞌcan quixba̱nu laj Salomón reheb chixjunileb li rixakil, li jalan xtenamiteb. Quixyi̱b li naꞌajej re teꞌxcꞌat li pom ut teꞌmayejak chiruheb lix dioseb.

⁹ Cꞌajoꞌ nak quijoskꞌoꞌ li Ka̱cuaꞌ Dios saꞌ xbe̱n laj Salomón xban nak quixcanab xlokꞌoninquil li Dios li nequeꞌxlokꞌoni laj Israel, li quixcꞌutbesi rib chiru caꞌ sut.

¹⁰ Li Dios quixye re nak incꞌaꞌ tixlokꞌoni jalanil dios. Abanan laj Salomón quixkꞌet li ra̱tin li Dios.

¹¹ Li Ka̱cuaꞌ Dios quixye re laj Salomón: —Xban nak incꞌaꞌ xaba̱nu li cꞌaꞌru xinye a̱cue saꞌ lin contrato ut xakꞌet lin chakꞌrab, joꞌcan nak la̱in tincuisi la̱ cuanquil ut tinqꞌue re li yo̱ chi cꞌanjelac cha̱cuu.

¹² Abanan saꞌ xcꞌabaꞌ laj David la̱ yucuaꞌ incꞌaꞌ tinmakꞌ cha̱cuu la̱ cuanquil nak toj yoꞌyo̱kat. Tinba̱nu ban nak la̱ cualal ta̱oc saꞌ xcuanquil.

¹³ La̱ cualal incꞌaꞌ chic ta̱takla̱nk saꞌ xbe̱neb chixjunileb li tenamit. Jun te̱peb ajcuiꞌ li ralal xcꞌajol laj Israel li tincanab rubel xcuanquil. Tinba̱nu chi joꞌcaꞌin xban nak ninra laj David laj cꞌanjel chicuu ut xban nak ninra li tenamit Jerusalén li sicꞌbil ru inban, chan li Ka̱cuaꞌ.

¹⁴ Li Dios quixqꞌue jun li cui̱nk re nak xicꞌ ta̱ril laj Salomón. Li cui̱nk aꞌan aj Hadad xcꞌabaꞌ xcomoneb li ralal xcꞌajol lix reyeb laj Edom.

¹⁵ Xicꞌ quiril laj Salomón xban nak junxil laj David quinumta saꞌ xbe̱neb laj Edom. Ut laj Joab, li nataklan saꞌ xbe̱neb lix soldados, queꞌco̱eb chixmukbaleb li camenak. Nak cuanqueb aran quilajeꞌxcamsi chixjunileb li cui̱nk li cuanqueb Edom.

¹⁶ Quicana aran cuakib po laj Joab rochbeneb chixjunileb laj Israel toj retal queꞌxsach ruheb chixjunileb li cui̱nk li cuanqueb Edom.

¹⁷ Abanan laj Hadad, li sa̱j al, quie̱lelic ut co̱ Egipto rochbeneb cuib oxib laj Edom li queꞌcꞌanjelac chiru lix yucuaꞌ.

¹⁸ Queꞌel saꞌ li naꞌajej Madián ut queꞌco̱eb Parán. Aran queꞌxjunaji ribeb riqꞌuineb li cuanqueb Parán ut queꞌco̱eb Egipto. Laj faraón quixqꞌue lix chꞌochꞌ laj Hadad. Ut quixqꞌue ajcuiꞌ li rochoch ut lix tzacae̱mkeb.

¹⁹ Laj faraón quisahoꞌ xchꞌo̱l riqꞌuin laj Hadad. Joꞌcan nak quixsumub riqꞌuin li ri̱tzꞌin lix Tahpenes, li rixakil.

²⁰ Li ri̱tzꞌin li reina Tahpenes quicuan jun lix cꞌulaꞌal riqꞌuin laj Hadad. Aj Genubat xcꞌabaꞌ li cꞌulaꞌal. Ut lix Tahpenes quixqꞌuiresi saꞌ li palacio rochbeneb li ralal laj faraón.

²¹ Nak cuan Egipto, laj Hadad quirabi resil nak ac camenak chic li rey David, joꞌ ajcuiꞌ laj Joab li nataklan saꞌ xbe̱neb lix soldado. Joꞌcan nak laj Hadad quixye re laj faraón: —Qꞌue inlese̱ns re nak naru tinsukꞌi̱k saꞌ lin tenamit, chan.

²² Quixye laj faraón: —¿Cꞌaꞌut nak ta̱cuaj xic? ¿Ma pa̱lt cꞌaꞌru a̱cue cuiqꞌuin? chan. Laj Hadad quixye re: —Ma̱cꞌaꞌ napaltoꞌ chicuu. Caꞌaj cuiꞌ nacuaj nak tina̱canab chi xic saꞌ lin tenamit, chan.

²³ Li Dios quixba̱nu nak laj Rezón, li ralal laj Eliada, quijoskꞌoꞌ riqꞌuin laj Salomón ut xicꞌ chic ta̱ilekꞌ xban. Laj Rezón, aꞌan li quie̱lelic chiru laj Hadad-ezer lix reyeb laj Soba.

²⁴ Laj Rezón, aꞌan li nacꞌamoc be chiruheb jun chꞌu̱tal li cui̱nk incꞌaꞌ useb xnaꞌleb. (Aꞌin quicꞌulman junxil nak laj David ac xsach ruheb li tenamit Soba.) Laj Rezón ut eb li rochben queꞌco̱eb chi cua̱nc aran Damasco. Ut laj Rezón qui-oc chokꞌ xreyeb laj Damasco, li cuan saꞌ xcue̱nt Siria.

²⁵ Laj Rezón quicuan ajcuiꞌ chokꞌ xreyeb laj Siria. Ut xicꞌ quirileb laj Israel joꞌ najtil quicuan chokꞌ rey laj Salomón. Laj Hadad, aꞌan jun chic li cui̱nk xicꞌ na-iloc reheb laj Israel.

²⁶ Joꞌcan ajcuiꞌ laj Jeroboam, li ralal laj Nebat, quixkꞌetkꞌeti rib chiru li rey Salomón nak yo̱ chi cꞌanjelac chiru. Laj Jeroboam, aꞌan xcomoneb li ralal xcꞌajol laj Efraín. Sereda lix tenamit. Lix naꞌ, aꞌan xma̱lcaꞌan, Zerúa xcꞌabaꞌ.

²⁷ Aꞌan aꞌin lix ya̱lal nak quijoskꞌoꞌ saꞌ xbe̱n li rey laj Jeroboam: Li rey Salomón yo̱ chixyi̱banquil li cab Milo joꞌ ajcuiꞌ li tzꞌac li sutsu cuiꞌ lix tenamit laj David lix yucuaꞌ.

²⁸ Li rey Salomón quixqꞌue retal nak laj Jeroboam, aꞌan jun sa̱j cui̱nk cuan xnaꞌleb ut cau natrabajic. Joꞌcan nak quixxakab laj Jeroboam chi takla̱nc saꞌ xbe̱neb li mo̱s li yo̱queb chi cꞌanjelac saꞌ xya̱nkeb li ralal xcꞌajol laj José.

²⁹ Saꞌ jun cutan laj Jeroboam qui-el chak Jerusalén ut quicꞌuleꞌ saꞌ be xban li profeta Ahías, Silo xtenamit. Laj Ahías lanlo chak saꞌ jun li tꞌicr toj acꞌ. Xjuneseb nak queꞌxcꞌul ribeb saꞌ cꞌaleba̱l.

³⁰ Li profeta Ahías quirisi li aqꞌuil tꞌicr li lanlo cuiꞌ ut quixpej. Cablaju peda̱s quirisi nak quixpej.

³¹ Ut quixye re laj Jeroboam: —Xoc chokꞌ a̱cue li laje̱b peda̱s xban nak li Ka̱cuaꞌ, lix Dioseb laj Israel, naxye a̱cue, “La̱in tinmakꞌ chiru laj Salomón lix cuanquilal ut la̱at chic tatinqꞌue chi takla̱nc saꞌ xbe̱neb li laje̱b xte̱pal li ralal xcꞌajol laj Israel.

³² Jun te̱peb ajcuiꞌ li ralal xcꞌajol laj Israel tincanab rubel xcuanquil. Tinba̱nu chi joꞌcaꞌin xban nak ninra laj David laj cꞌanjel chicuu ut xban nak ninra li tenamit Jerusalén li sicꞌbil ru inban saꞌ xya̱nkeb chixjunil li tenamit, chan li Ka̱cuaꞌ.

³³ Tinjach ruheb lin tenamit xban nak eb laj Israel quineꞌxtzꞌekta̱na ut queꞌxlokꞌoniheb li jalanil dios, lix Astoret lix dioseb laj Sidón, laj Quemos lix dioseb laj Moab, ut laj Moloc lix dioseb laj Amón. Incꞌaꞌ queꞌxba̱nu li cꞌaꞌru quinye reheb chi moco queꞌcuan saꞌ ti̱quilal chicuu. Incꞌaꞌ queꞌxba̱nu li cꞌaꞌru quinye saꞌ lin contrato ut saꞌ lin chakꞌrab, joꞌ quixba̱nu laj David lix yucuaꞌ laj Salomón.

³⁴ Abanan, la̱in incꞌaꞌ tinmakꞌ chiru laj Salomón lix cuanquil. Ta̱cua̱nk ban xcuanquil joꞌ najtil yoꞌyo̱k. Tinba̱nu chi joꞌcan saꞌ xcꞌabaꞌ laj David laj cꞌanjel chicuu, li quinsicꞌ ru la̱in. Aꞌan junelic quixba̱nu li cꞌaꞌru quinye saꞌ lin contrato joꞌ ajcuiꞌ saꞌ lin chakꞌrab.

³⁵ Tinmakꞌ chiru li ralal laj Salomón lix cuanquilal, ut la̱at chic tatinqꞌue chi takla̱nc saꞌ xbe̱neb li laje̱b xte̱pal li ralal xcꞌajol laj Israel.

³⁶ Li ralal laj Salomón tinxakab chi takla̱nc saꞌ xbe̱n jun te̱p li ralal xcꞌajol laj Israel re nak junelic cua̱nk junak reheb li ralal xcꞌajol laj David li ta̱oc chokꞌ rey aran Jerusalén, li tenamit li sicꞌbil ru inban li tineꞌxlokꞌoni cuiꞌ.

³⁷ At Jeroboam, anakcuan la̱at tatinxakab chi takla̱nc saꞌ xbe̱neb laj Israel. Ut la̱at naru nacattaklan saꞌ xbe̱n chixjunil joꞌ ta̱cuaj la̱at.

³⁸ Cui la̱at ta̱ba̱nu li cꞌaꞌru tatintakla cuiꞌ, ut cui tatcua̱nk saꞌ ti̱quilal chicuu, ut cui ta̱ba̱nu li cꞌaꞌru naxye lin chakꞌrab joꞌ quixba̱nu laj David laj cꞌanjel chicuu, la̱in cua̱nkin a̱cuiqꞌuin. Ut tinxakab saꞌ xnaꞌaj la̱ cuanquilal, la̱at joꞌ eb ajcuiꞌ la̱ cualal a̱cꞌajol, joꞌ nak quinxakab xcuanquil laj David.

³⁹ La̱in tebinqꞌue chi cꞌuluc raylal li ralal xcꞌajol laj David xban li ma̱c quixba̱nu laj Salomón. Abanan moco chi junaj cua ta,” chan li Ka̱cuaꞌ.—

⁴⁰ Joꞌcan nak laj Salomón quiraj xcamsinquil laj Jeroboam. Abanan laj Jeroboam quie̱lelic ut co̱ Egipto riqꞌuin li rey Sisac. Ut aran quicana toj quicam laj Salomón.

⁴¹ Chixjunil li cꞌaꞌru quixba̱nu li rey Salomón, joꞌ ajcuiꞌ lix naꞌleb, tzꞌi̱banbil saꞌ li hu Crónicas, li tzꞌi̱banbil cuiꞌ retalil li quilajxba̱nu laj Salomón nak cuan chokꞌ rey.

⁴² Laj Salomón quicuan chokꞌ rey caꞌcꞌa̱l chihab aran Jerusalén ut quitaklan saꞌ xbe̱neb chixjunileb laj Israel.

⁴³ Laj Salomón quicam ut quimukeꞌ saꞌ lix tenamit laj David lix yucuaꞌ, li queꞌmukeꞌ cuiꞌ lix xeꞌto̱nil yucuaꞌ. Ut laj Roboam, li ralal, aꞌan chic li qui-oc chokꞌ rey chokꞌ re̱kaj.