Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

1 Reyes 10 - Li Santil hu


Li reina li cuan Sabá quicuulac chirulaꞌaninquil laj Salomón

1 Li reina li cuan aran Sabá quirabi resil nak kꞌaxal cuan xnaꞌleb laj Salomón xban nak naxqꞌue xlokꞌal li Dios. Joꞌcan nak co̱ aran Jerusalén chi patzꞌoc riqꞌuin re rilbal ma tixsume tana li patzꞌoc li kꞌaxal chꞌaꞌaj xsumenquil.

2 Joꞌcan nak co̱ Jerusalén riqꞌuin laj Salomón rochbeneb nabal aj cꞌanjel chiru. Ut nabaleb li camellos li yo̱queb chi i̱ka̱nc re li cꞌaꞌru quixcꞌam. Nabal li sununquil ban quixcꞌam ut nabal li oro. Ut quixcꞌam ajcuiꞌ li terto̱quil pec. Nak quicuulac riqꞌuin laj Salomón quixye re li joꞌ qꞌuial li cuan saꞌ xchꞌo̱l nak tixye.

3 Li rey Salomón quixsume chixjunil li cꞌaꞌru quixpatzꞌ li reina. Ut ma̱ jun li patzꞌoc incꞌaꞌ ta quixsume.

4 Li reina re Sabá quixqꞌue retal nak laj Salomón cuan xnaꞌleb ut quixqꞌue ajcuiꞌ retal li palacio li quixyi̱b.

5 Ut quixqꞌue ajcuiꞌ retal li tzacae̱mk li nequeꞌxtzaca joꞌ ajcuiꞌ lix naꞌajeb li nequeꞌcꞌanjelac chiru laj Salomón. Quixqꞌue ajcuiꞌ retal li rakꞌeb li nequeꞌtaklan, joꞌ ajcuiꞌ li rakꞌeb li nequeꞌcꞌanjelac. Ut quixqꞌue ajcuiꞌ retal li cꞌatbil mayej li naxqꞌue saꞌ lix templo li Ka̱cuaꞌ. Riqꞌuin chixjunil li quiril, quisach xchꞌo̱l.

6 Ut li reina quixye re li rey Salomón: —Tzꞌakal ya̱l li quicuabi resil saꞌ lin tenamit nak nabal li cꞌaꞌru a̱cue ut kꞌaxal cuiꞌchic cuan a̱naꞌleb.

7 La̱in incꞌaꞌ ninpa̱b toj xinchal arin ut riqꞌuin xnakꞌ cuu xcuil chixjunil. Ya̱l nak kꞌaxal cuan a̱naꞌleb ut nabal li cꞌaꞌru a̱cue. Ya̱l li cꞌaꞌru quicuabi resil cha̱cuix. Riqꞌuin aꞌin ninqꞌue retal nak moco tzꞌakal ta yi jach li queꞌxserakꞌi cue.

8 Us xak reheb chixjunileb li cuanqueb a̱cuiqꞌuin. Us xak reheb li nequeꞌcꞌanjelac cha̱cuu xban nak junelic yo̱queb chirabinquil li cha̱bil naꞌleb a̱cuiqꞌuin.

9 Lokꞌoninbil taxak ru li Ka̱cuaꞌ la̱ Dios xban nak xcꞌojob xchꞌo̱l saꞌ a̱be̱n ut xatxxakab saꞌ li cuanquilal saꞌ xbe̱neb laj Israel. Li Ka̱cuaꞌ junelic naxraheb laj Israel. Joꞌcan nak xatxxakab chokꞌ xreyeb re nak tattakla̱nk saꞌ xbe̱neb saꞌ xya̱lal ut saꞌ ti̱quilal, chan.

10 Li reina re li tenamit Sabá quixsi re li rey Salomón caꞌchꞌin chic ma̱ jun ciento quintal li oro. Ut quixsi ajcuiꞌ re nabal li sununquil ban joꞌ ajcuiꞌ li terto̱quil pec. Ma̱ jun sut quisiheꞌ nabal li sununquil ban re li rey Salomón joꞌ li quixsi li reina.

11 Eb li jucub li quixtakla li rey Hiram, li quicꞌamoc chak re li oro aran Ofir, queꞌxcꞌam ajcuiꞌ chak nabal li cha̱bil cheꞌ sándalo xcꞌabaꞌ joꞌ ajcuiꞌ li terto̱quil pec.

12 Li cha̱bil cheꞌ sándalo quicꞌanjelac chiru laj Salomón re xyi̱banquileb li gradas re li templo ut re ajcuiꞌ li palacio. Ut quixyi̱beb ajcuiꞌ li arpa chiru joꞌ ajcuiꞌ li salterio re ta̱cꞌanjelak chiruheb li nequeꞌcuajbac. Ma̱ jun sut chic quicuulac li cha̱bil cheꞌ aran Israel ut ma̱ jun sut chic queꞌril ru toj chalen anakcuan.

13 Li rey Salomón quixqꞌue xma̱tan li reina re Sabá ut quixsi ajcuiꞌ re li joꞌ qꞌuial quiraj. Ut quixqꞌue ajcuiꞌ re chixjunil li joꞌ qꞌuial quixpatzꞌ re. Chirix aꞌan li reina quisukꞌi saꞌ lix tenamit rochbeneb lix mo̱s.

14 Numenak o̱b ciento quintal li oro li naxcꞌul laj Salomón rajlal chihab.

15 Ut ma̱cꞌaꞌ saꞌ ajl li naxcꞌul riqꞌuineb laj yaconel ut eb laj cꞌay, joꞌ eb ajcuiꞌ li naxcꞌul riqꞌuineb chixjunileb li rey re Arabia joꞌ eb ajcuiꞌ li nequeꞌtaklan saꞌ li junju̱nk chi tenamit.

16 Riqꞌuin li oro aꞌan quixtakla xyi̱banquil cuib ciento li chꞌi̱chꞌ li nequeꞌxcol cuiꞌ re xchꞌo̱leb li soldados. Numenak oxlaju libra li cha̱bil oro li queꞌxyi̱b cuiꞌ li junju̱nk chi ni̱nki chꞌi̱chꞌ.

17 Ut quixqꞌue ajcuiꞌ chi yi̱ba̱c oxib ciento li cocꞌ chꞌi̱chꞌ li nequeꞌxcol cuiꞌ reheb xchꞌo̱l. Numenak oxib libra li cha̱bil oro li queꞌxyi̱b cuiꞌ li junju̱nk chi chꞌi̱chꞌ. Chixjunileb li chꞌi̱chꞌ aꞌin quixoqueꞌ saꞌ li palacio “Qꞌuicheꞌ re Líbano” xcꞌabaꞌ.

18 Li rey quixtakla ajcuiꞌ xyi̱banquil jun li nimla cꞌojariba̱l riqꞌuin marfil ut queꞌxletz li cha̱bil oro chiru.

19 Li cꞌojariba̱l aꞌan cuan cuakib tasal lix takleba̱l. Ut lix cꞌa̱n li rix aꞌan sursu. Xcaꞌ pacꞌalil cuan xnaꞌaj li rukꞌ. Ut yi̱banbil retalil li cakcoj chiru li cꞌojariba̱l saꞌ xcaꞌ pacꞌalil.

20 Ut saꞌ xbe̱neb li takleba̱l yi̱banbileb retalil cablaju li cakcoj. Junju̱nk saꞌ xcaꞌ pacꞌalil. Ma̱ jun reheb li tenamit queꞌxyi̱b jun li cꞌojariba̱l joꞌ li cꞌojariba̱l aꞌan.

21 Chixjunil lix secꞌ li rey Salomón, aꞌan junes cha̱bil oro, joꞌ eb ajcuiꞌ chixjunil li secꞌ li cuan saꞌ li palacio “Qꞌuicheꞌ re Líbano” xcꞌabaꞌ. Ma̱cꞌaꞌ li secꞌ plata riqꞌuin xban nak li plata saꞌ eb li cutan aꞌan ma̱cꞌaꞌ xtzꞌak.

22 Rajlal oxib chihab lix jucub laj Salomón nequeꞌchal chak Tarsis joꞌ eb ajcuiꞌ lix jucub li rey Hiram ut nequeꞌxcꞌam chak li oro, li plata, ut li marfil. Ut nequeꞌxcꞌam ajcuiꞌ chak li batzꞌ ut li pavo real.

23 Li rey Salomón aꞌan li kꞌaxal cuan xnaꞌleb ut kꞌaxal biom chiruheb chixjunileb li rey li cuanqueb saꞌ ruchichꞌochꞌ.

24 Chixjunileb li cristian li cuanqueb saꞌ ruchichꞌochꞌ queꞌraj xnaubal ru laj Salomón. Ut queꞌraj rabinquil li naꞌleb li qꞌuebil re xban li Dios.

25 Rajlal chihab nabaleb li nequeꞌxic chirilbal laj Salomón nequeꞌxcꞌam xma̱tan. Nequeꞌxsi re li cꞌaꞌak re ru yi̱banbil riqꞌuin oro ut plata, li tꞌicr, li sununquil ban, li chꞌi̱chꞌ re pletic, joꞌ eb ajcuiꞌ li cacua̱y ut eb li mu̱l.

26 Laj Salomón quixchꞌutubeb lix carruajes ut eb lix soldados li nequeꞌxic chirix cacua̱y. Cuanqueb jun mil riqꞌuin ca̱hib ciento (1,400) lix carruajes ut cablaju mil (12,000) li cui̱nk li nequeꞌxic chirix cacua̱y. Cuan li quixcꞌameb saꞌ li tenamit li quixyi̱b re xxocbaleb lix carruaje ut cuan queꞌcana Jerusalén cuan cuiꞌ li rey.

27 Nak cuan chokꞌ rey laj Salomón aran Jerusalén, quixchꞌutub nabal li plata. Chanchan xqꞌuial li pec. Joꞌcan ajcuiꞌ li cheꞌ chacalteꞌ. Nabal cuan. Chanchan xqꞌuial li cheꞌ higo li cuan aran Sefela.

28 Li cacua̱y li naxlokꞌ li rey Salomón nequeꞌchal chak aran Egipto. Li jun chꞌu̱taleb lix mo̱s laj Salomón nequeꞌxic saꞌ li tenamit aꞌan chixlokꞌbal li cacua̱y.

29 Nequeꞌchal nequeꞌxic aran Egipto chi lokꞌoc. Nequeꞌxlokꞌ li carruaje aran Egipto chi cuakib ciento (600) chi tumin plata. Ut li cacua̱y nequeꞌxlokꞌ chi jun ciento riqꞌuin mero ciento (150). Joꞌcan nequeꞌxlokꞌ cuiꞌ eb aꞌan. Ut eb lix reyeb laj heteo, ut eb li rey re Siria nequeꞌxlokꞌ li cacua̱y ut li carruaje riqꞌuineb aꞌan.

© 2019, Wycliffe Bible Translators. All rights reserved.

Wycliffe Bible Translators, Inc.
ကြှနျုပျတို့နောကျလိုကျပါ:



ကြော်ငြာတွေ