1 Pedro 4 - Li Santil hu

Joꞌcakex li cha̱bil merto̱m riqꞌuin rusilal li Dios

¹ Li Cristo quixcꞌul li raylal ut quirecꞌa tzꞌakal li raylal saꞌ kacꞌabaꞌ la̱o. Joꞌcan nak chikaqꞌue ajcuiꞌ kachꞌo̱l la̱o chixcuybal li raylal. Julticak e̱re nak ma̱cꞌaꞌ chic xcuanquil li ma̱c saꞌ xbe̱neb li nequeꞌxcuy li raylal chi ma̱cꞌaꞌ xma̱queb.

² Ut jarub cutan chic toj yoꞌyo̱kex cheba̱nuhak li cꞌaꞌru naraj li Dios, ut incꞌaꞌ chic yo̱kex chixba̱nunquil li cꞌaꞌru querahi chak ru junxil.

³ Tzꞌakal taxak li ma̱c li xeba̱nu chak. Xeba̱nu joꞌ nequeꞌxba̱nu li incꞌaꞌ nequeꞌpa̱ban chiru li Dios. Junxil nasemsot le̱ chꞌo̱l riqꞌuin li joꞌ ma̱joꞌil naꞌleb. Xeba̱nu chak li cala̱c ut li ninkꞌei̱c. Xeba̱nu chak li numcuaꞌac num ucꞌac. Ut xeba̱nu ajcuiꞌ li tzꞌekbe̱talil aj naꞌleb. Xuta̱nal xeba̱nu chak junxil nak xenima chak ruheb li yi̱banbil dios.

⁴ Aꞌut anakcuan eb li ma̱jiꞌ nequeꞌpa̱ban nequeꞌsach xchꞌo̱leb che̱rilbal. Nequeꞌxqꞌue retal nak ma̱cuaꞌex chic jun saꞌ xya̱nkeb chixba̱nunquil li ma̱usilal. Ut xban aꞌan nequexhobeꞌ.

⁵ Aban mokon eb laj hobonel tento nak teꞌxkꞌaxtesi xcue̱nt chiru li Dios riqꞌuin li cꞌaꞌru quilajeꞌxba̱nu chak. Li Dios, aꞌan li ta̱rakok a̱tin saꞌ xbe̱neb li yoꞌyo̱queb joꞌ eb ajcuiꞌ li camenakeb.

⁶ Aꞌan rajbal nak quichꞌoloba̱c xya̱lal chiruheb li tenamit. Quirakman a̱tin chirixeb ut eb aꞌan queꞌcam joꞌ nak telajeꞌca̱mk chixjunileb li cristian. Chixjunileb li queꞌpa̱ban chiru li Dios usta quilajeꞌcam, lix musikꞌeb yoꞌyo̱queb joꞌ nak yoꞌyo li Dios.

⁷ Li rosoꞌjic li ruchichꞌochꞌ ta̱se̱ba̱nk chak. Joꞌcan nak aj-ajak e̱ru, ut cheqꞌuehak e̱chꞌo̱l chi tijoc.

⁸ Li cꞌaꞌru tento te̱ba̱nu, aꞌan xra̱bal e̱rib che̱ribil e̱rib ut chi anchal e̱chꞌo̱l. Ut xban nak nequera e̱rib che̱ribil e̱rib, nequecuy ajcuiꞌ e̱ma̱c che̱ribil e̱rib.

⁹ Chexqꞌuehok ochochna̱l che̱ribil e̱rib chi sa saꞌ e̱chꞌo̱l.

¹⁰ Chikajunilo jalan jala̱nk li cꞌaꞌru ta̱ru̱k takaba̱nu. Ac kama̱tan kama̱tan qꞌuebil ke chikaju̱nkal xban li Dios. Tento nak takatenkꞌa li kas ki̱tzꞌin riqꞌuin li cꞌaꞌru nocoru chixba̱nunquil re nak incꞌaꞌ ta̱cana̱k chi ma̱cꞌaꞌ rajbal li ma̱tan qꞌuebil ke xban li Dios.

¹¹ Cui ani cuan xma̱tan chi a̱tinac, chixyehak ra̱tin li Dios. Cui ani naraj cꞌanjelac, chi cꞌanjelac aꞌ yal chanru lix cacuilal qꞌuebil re xban li Dios. Riqꞌuin chixjunil li cꞌaꞌak re ru ta̱uxma̱nk, nimanbilak taxak xcꞌabaꞌ li Dios saꞌ xcꞌabaꞌ li Jesucristo. Aꞌan laj e̱chal re li nimajcual cuanquilal ut lokꞌoninbilak taxak chi junelic kꞌe cutan. Joꞌcan taxak.

Tento xcuybal li raylal

¹² Ex inherma̱n, misach e̱chꞌo̱l nak ta̱cha̱lk li ra xi̱cꞌ saꞌ e̱be̱n. Chanchan li xam nak nachal saꞌ e̱be̱n re xyalbal rix le̱ pa̱ba̱l. Me̱cꞌoxla nak caꞌaj cuiꞌ la̱ex yo̱quex chi cꞌuluc re.

¹³ Chisahokꞌ ban saꞌ e̱chꞌo̱l nak yo̱quex chi cꞌuluc raylal joꞌ quixcꞌul li Cristo xban nak yo̱quex chi tzꞌako̱nc riqꞌuin li raylal li quixcꞌul aꞌan. Ta̱cuulak xkꞌehil nak li Jesucristo tixcꞌutbesi lix nimal xlokꞌal ut la̱ex kꞌaxal cuiꞌchic ta̱sahokꞌ saꞌ e̱chꞌo̱l.

¹⁴ Us xak e̱re cui texhobekꞌ xban nak nequepa̱b li Cristo. Aꞌan retalil nak lix Musikꞌ li Dios cuan e̱riqꞌuin ut aꞌan li kꞌaxal lokꞌ. Relic chi ya̱l nak tzꞌekta̱nanbil li Dios xbaneb li nequeꞌhoboc e̱re, abanan che̱ru la̱ex, kꞌaxal lokꞌ ut nim xcuanquil.

¹⁵ Cheqꞌuehak retal: mexma̱cob. Xuta̱nal chokꞌ e̱re nak te̱cꞌul junak raylal xban elkꞌac, malaj ut xban li camsi̱nc, malaj ut xban li yoꞌoba̱nc chꞌaꞌajquilal saꞌ xya̱nkeb le̱ ras e̱ri̱tzꞌin, malaj ut xban xba̱nunquil cꞌaꞌak chic re ru incꞌaꞌ us.

¹⁶ Cui ut nequecꞌul raylal xban nak nequepa̱b li Cristo, aꞌan moco xuta̱nal ta. Chenima̱k ban xlokꞌal li Dios xban nak la̱ex chic ralal xcꞌajol.

¹⁷ Cuulac re xkꞌehil li rakoc a̱tin. Ta̱ticla̱k kiqꞌuin la̱o, li ralal xcꞌajol li Dios. Tento nak ta̱rakekꞌ a̱tin saꞌ kabe̱n la̱o aj pa̱banel. Ut ta̱rakekꞌ ajcuiꞌ a̱tin saꞌ xbe̱neb li incꞌaꞌ nequeꞌxpa̱b li Dios. Abanan kꞌaxal numtajenak cuiꞌchic li raylal teꞌxcꞌul eb aꞌan.

¹⁸ Joꞌcaꞌin tzꞌi̱banbil chak retalil saꞌ li Santil Hu: Cui li ti̱c xchꞌo̱l elajic ta̱colekꞌ, ¿ma tojaꞌ ta chic junak laj ma̱c incꞌaꞌ elajic ta̱colekꞌ? (Prov. 11:31)

¹⁹ La̱ex li yo̱quex chi xcꞌulbal li raylal joꞌ naraj li Dios, cheqꞌuehak taxak e̱chꞌo̱l chixba̱nunquil li cha̱bilal. Chekꞌaxtesihak e̱rib saꞌ rukꞌ li Dios. Aꞌan li quiyoꞌobtesin ke ut ma̱ jokꞌe ta̱paltok chiku.