1 Juan 1 - Li Santil hu

Resil li Jesucristo li naqꞌuehoc re li kayuꞌam

¹ Nintzꞌi̱bac e̱riqꞌuin chirix li Dios Cꞌajolbej li cuan chalen chak saꞌ xticlajic li ruchichꞌochꞌ. La̱o quikil riqꞌuin xnakꞌ ku ut coa̱tinac riqꞌuin. Quikil ru aꞌan chi tzꞌakal ut xkachꞌeꞌ riqꞌuin kukꞌ. Aꞌan aꞌin li A̱tin naqꞌuehoc yuꞌam.

² Quicꞌutbesi̱c chiku li naqꞌuehoc yuꞌam. Quikil ru aꞌan. Joꞌcan nak nakachꞌolob xya̱lal che̱ru chirix aꞌan, li naqꞌuehoc yuꞌam chi junelic. Aꞌan li cuan chak riqꞌuin li Acuabej Dios. Aꞌan quixcꞌutbesi rib chiku.

³ Nakachꞌolob xya̱lal che̱ru chirix li cꞌaꞌru quikil ut li cꞌaꞌru quikabi re nak tocua̱nk chi sum a̱tin chi kibil kib. Ut tocua̱nk ajcuiꞌ chi sum a̱tin riqꞌuin li Acuabej Dios ut riqꞌuin li Jesucristo, li Ralal.

⁴ Saꞌ li hu aꞌin nakatakla xyebal e̱re re nak chitzꞌaklok ru lix sahil e̱chꞌo̱l che̱junilex, joꞌ ajcuiꞌ lix sahil kachꞌo̱l la̱o.

Li Dios, aꞌan cutan saken

⁵ Aꞌan aꞌin li a̱tin quikabi riqꞌuin li Jesucristo. Ut aꞌan li nakachꞌolob xya̱lal che̱ru. Li Dios, aꞌan li cutan saken. Riqꞌuin li Dios ma̱cꞌaꞌ kꞌojyi̱n. Ti̱c ban xchꞌo̱l li Dios. Relic chi ya̱l nak ma̱cꞌaꞌ ma̱usilal riqꞌuin.

⁶ Cui nakaye nak cuanco chi sum a̱tin riqꞌuin li Dios ut cui toj nakaba̱nu li incꞌaꞌ us, yo̱co chi ticꞌtiꞌic. Ut incꞌaꞌ nakatzol kib chixba̱nunquil li ya̱l.

⁷ Ut cui nakaba̱nu li cꞌaꞌru naraj li Dios, joꞌ naxcꞌutbesi chiku li Cristo, cuanco chic chi sum a̱tin chi kibil kib. Ut lix quiqꞌuel li Jesucristo li Ralal li Dios naxchꞌajobresi li ka̱m ut narisi chixjunil li kama̱c.

Laj cuyul laj sachol re li kama̱c

⁸ Cui nakaye nak ma̱cꞌaꞌ kama̱c, nakabalakꞌi kib ut moco ya̱l ta li yo̱co chixyebal.

⁹ Cui nakaxo̱to li kama̱c chiru li Dios, relic chi ya̱l nak aꞌan ti̱c xchꞌo̱l chixcuybal chixsachbal li kama̱c, ut ta̱risi chixjunil li kama̱usilal.

¹⁰ Cui ut nakaye nak incꞌaꞌ xoma̱cob nakaqꞌue li Dios chokꞌ aj ticꞌtiꞌ. Ut incꞌaꞌ nakapa̱b li ra̱tin.