1 Corintios 9 - Li Santil hu

Tento nak tixcꞌul xtojbal laj cꞌanjel chiru li Dios

¹ ¿Ma incꞌaꞌ ta biꞌ naru tinba̱nu li cꞌaꞌru nacuaj la̱in? ¿Ma incꞌaꞌ ta biꞌ la̱in apóstol? La̱in quicuil ru li Ka̱cuaꞌ Jesucristo. Ut saꞌ incꞌabaꞌ la̱in nak xexpa̱ban xban nak la̱in xinyehoc e̱re resil li colba-ib.

² Ma̱re cuan li incꞌaꞌ nequeꞌqꞌuehoc incuanquil nak la̱in apóstol. Abanan relic chi ya̱l nak la̱in apóstol xban nak la̱in xinyehoc e̱re resil li colba-ib. Joꞌcan nak xepa̱b li Cristo.

³ Riqꞌuin li a̱tin aꞌin nequebinsume li nequeꞌyehoc re nak ma̱cuaꞌin apóstol.

⁴ ¿Ma incꞌaꞌ ta biꞌ raj tento ajcuiꞌ nak tine̱tenkꞌa la̱in riqꞌuin lin tzacae̱mk?

⁵ Eb li ri̱tzꞌin li Ka̱cuaꞌ Jesucristo cuanqueb rixakil ut nequeꞌxcꞌam chirixeb bar nequeꞌxic. Ut joꞌcan ajcuiꞌ naxba̱nu li apóstol Pedro. ¿Ma incꞌaꞌ ta biꞌ raj ta̱ru̱k tinsumla̱k riqꞌuin junak ixk aj pa̱banel la̱in ut tincꞌam chicuix bar tinxic joꞌ nequeꞌxba̱nu eb li apóstol jun chꞌol chic?

⁶ Malaj ut nequecꞌoxla nak caꞌaj cuiꞌ la̱in ut laj Bernabé cau totrabajik re nak takasicꞌ katzacae̱mk.

⁷ Junak soldado, ¿ma incꞌaꞌ ta biꞌ tixcꞌul lix tojbal? Ut junak aj acuinel, ¿ma incꞌaꞌ ta biꞌ tixtzaca li ru li racui̱mk? Ut junak aj qꞌuiresinel cuacax, ¿ma incꞌaꞌ ta biꞌ ta̱rucꞌ re lix leche lix cuacax?

⁸ Li cꞌaꞌru yo̱quin chixyebal ma̱cuaꞌ yal xcꞌaꞌux cui̱nk. Aꞌan tzꞌi̱banbil saꞌ li chakꞌrab li quiqꞌueheꞌ re laj Moisés.

⁹ Tzꞌi̱banbil saꞌ lix chakꞌrab laj Moisés chi joꞌcaꞌin: Ma̱bacꞌ xtzꞌu̱mal re li bo̱yx nak yo̱ chi cꞌanjelac re risinquil rix li trigo. Li Dios ma̱cuaꞌ caꞌaj cuiꞌ chirix li bo̱yx naa̱tinac.

¹⁰ ¿Ma ma̱cuaꞌ ta biꞌ chikix la̱o aj cꞌanjel chiru li Dios yo̱ chi a̱tinac? ¿Ma incꞌaꞌ ta biꞌ ta̱ru̱k takacꞌul katojbal la̱o aj cꞌanjel chiru li Dios? Li ani na-au naroybeni ru li racui̱mk ut joꞌcan ajcuiꞌ laj kꞌolonel naroybeni ajcuiꞌ nak ta̱tzꞌak ru li acui̱mk.

¹¹ La̱o xoyehoc resil li colba-ib e̱re. ¿Ma incꞌaꞌ ta biꞌ naru nocoe̱tenkꞌa la̱ex riqꞌuin li cꞌaꞌru takaj la̱o re xnumsinquil li cutan junju̱nk?

¹² Cui la̱ex nequetenkꞌa li jun chꞌol chic li kech aj cꞌanjelil, ¿ma tojaꞌ ta chic la̱o incꞌaꞌ toe̱tenkꞌa? La̱o incꞌaꞌ xkatzꞌa̱ma e̱re nak toe̱tenkꞌa. Xkacuy ban xnumsinquileb li cutan yal chi joꞌcan xban nak la̱o incꞌaꞌ xkaj nak ta̱chꞌina̱nk e̱chꞌo̱l chirabinquil li resil li Cristo.

¹³ ¿Ma incꞌaꞌ ta biꞌ nequenau nak eb laj judío li nequeꞌcꞌanjelac saꞌ rochoch li Dios, tento ajcuiꞌ nak nequeꞌtzꞌak li cꞌaꞌru namayeja̱c saꞌ rochoch li Dios? Aꞌan naraj naxye nak eb li nequeꞌcꞌanjelac saꞌ li artal nequeꞌtzꞌak ajcuiꞌ lix tibel li mayejanbil xul.

¹⁴ Joꞌ nak nequeꞌtenkꞌa̱c eb laj judío li nequeꞌcꞌanjelac saꞌ rochoch li Dios, joꞌcan ajcuiꞌ nak teꞌxcꞌul lix tenkꞌanquileb li yo̱queb chi cꞌanjelac chiru li Dios anakcuan xban nak joꞌcan quixye li Ka̱cuaꞌ.

¹⁵ Abanan la̱in incꞌaꞌ xintzꞌa̱ma e̱re nak tine̱tenkꞌa, chi moco yo̱quin ta chixyebal aꞌin re nak tine̱tenkꞌa. Incꞌaꞌ nacuaj tintojekꞌ xban nak nasahoꞌ saꞌ inchꞌo̱l nak ninye resil li colba-ib chi ma̱cꞌaꞌ intojbal. Us raj nak tinca̱mk xban tzꞌoca̱c chiru nak tine̱toj ut tinsach li sahil chꞌo̱lejil li nincꞌul xban xyebal resil li colba-ib chi ma̱cꞌaꞌ intojbal.

¹⁶ La̱in incꞌaꞌ ninnimobresi cuib xban nak ninchꞌolob xya̱lal li colba-ib. Taklanbilin chi cꞌanjelac xban li Dios. Kꞌaxal ra raj chokꞌ cue cui ta incꞌaꞌ ninjultica resil.

¹⁷ Cui ta yo̱quin chixba̱nunquil yal xban nak nacuaj la̱in, tinyoꞌoni raj intojbal. Abanan yo̱quin chixba̱nunquil lin cꞌanjel xban nak tenebanbil saꞌ inbe̱n xban li Dios xyebal resil li colba-ib.

¹⁸ ¿Cꞌaꞌru inkꞌajca̱munquil yo̱quin chixcꞌulbal? Caꞌaj cuiꞌ li sahil chꞌo̱lejil naxqꞌue cue li Dios xban nak ninjultica resil li colba-ib chi ma̱cꞌaꞌ intojbal. La̱in ta̱ru̱k raj tincꞌul intojbal e̱riqꞌuin abanan incꞌaꞌ nacuaj.

Laj Pablo quixnau cꞌanjelac saꞌ xya̱nkeb li jalan jala̱nk xnaꞌlebeb

¹⁹ La̱in moco taklanbilin ta xban cui̱nk, abanan ninqꞌue cuib chi cꞌanjelac chiruheb chixjunileb re nak teꞌxpa̱b li Cristo inban la̱in.

²⁰ Nak cuanquin saꞌ xya̱nkeb laj judío la̱in ninba̱nu joꞌ nequeꞌxba̱nu laj judío re nak teꞌxpa̱b li Cristo. Cuan li toj nequeꞌxqꞌue xcuanquil lix chakꞌrab laj Moisés. Nak cuanquin saꞌ xya̱nkeb aꞌan, ninba̱nu li naxye lix chakꞌrab laj Moisés re nak teꞌxpa̱b li Cristo inban la̱in.

²¹ Eb li ma̱cuaꞌeb aj judío moco cuanqueb ta rubel xcuanquil lix chakꞌrab laj Moisés. Nak cuanquin saꞌ xya̱nkeb aꞌan, ninba̱nu joꞌ nequeꞌxba̱nu eb aꞌan re nak teꞌxpa̱b li Cristo inban la̱in. Abanan aꞌan incꞌaꞌ naraj naxye nak incꞌaꞌ ninba̱nu li naxye li Dios. Incꞌaꞌ ninba̱nu li incꞌaꞌ us. La̱in ninba̱nu li naxye li Cristo.

²² Nak cuanquin saꞌ xya̱nkeb li toj kꞌuneb xchꞌo̱l saꞌ lix pa̱ba̱l, nincubsi cuib chiruheb re nak teꞌcacuu̱k xchꞌo̱l saꞌ xpa̱ba̱leb inban la̱in. Naraj naxye nak ninjuntakꞌe̱ta cuib riqꞌuin chixjunileb re nak naru tinchꞌolob xya̱lal chiruheb. Ninba̱nu chi joꞌcan re nak teꞌcolekꞌ.

²³ Chixjunil aꞌin nalajinba̱nu re nak naru tinchꞌolob xya̱lal li colba-ib chiruheb li cuas cui̱tzꞌin ut re nak tintzꞌako̱nk ajcuiꞌ la̱in riqꞌuin li naxyechiꞌi li Dios.

Laj Pablo quixqꞌue xchꞌo̱l chi cꞌanjelac chiru li Dios

²⁴ Nequexinjuntakꞌe̱ta riqꞌuineb li nequeꞌxyal xkꞌe chi a̱linac. ¿Ma incꞌaꞌ ta biꞌ nequenau nak eb li nequeꞌa̱linac chixjunileb nequeꞌxyal xkꞌe chi a̱linac? Abanan jun ajcuiꞌ naxcꞌul xma̱tan. Joꞌcan ut la̱ex cheqꞌuehak e̱chꞌo̱l chi pa̱ba̱nc re nak te̱cꞌul e̱ma̱tan riqꞌuin li Dios.

²⁵ Li ani naxyal xkꞌe chi a̱linac naxcuy li raylal re nak ta̱cacuu̱k xmetzꞌe̱u. Nequeꞌxba̱nu aꞌan re xcꞌulbal junak ma̱tan na-osoꞌ. Joꞌcan ajcuiꞌ la̱o aj pa̱banel nakacuy li raylal ut nakacꞌul ajcuiꞌ kama̱tan. Abanan li ma̱tan nakacꞌul la̱o incꞌaꞌ na-osoꞌ. Aꞌan cuan chi junelic.

²⁶ Li ani naa̱linac naxyal xkꞌe re nak tixcꞌul lix ma̱tan. Joꞌcan ajcuiꞌ la̱in. Ninqꞌue inchꞌo̱l chi cꞌanjelac chiru li Dios re nak tincꞌul inma̱tan. Moco yo̱quin ta chixyalbal inmetzꞌe̱u joꞌ li nasacꞌoc saꞌ ikꞌ chi ma̱cꞌaꞌ rajbal. Ninqꞌue ban inchꞌo̱l chi cꞌanjelac saꞌ xya̱lal chiru li Dios.

²⁷ Nintacuasi cuib ut ninqꞌue inchꞌo̱l chi cꞌanjelac. Incꞌaꞌ ninba̱nu li nacuaj la̱in. Ninba̱nu ban li naraj li Dios. Incꞌaꞌ nacuaj nak la̱in chic incꞌaꞌ tincꞌul lin ma̱tan mokon nak acak xinye resil li colba-ib reheb li cuas cui̱tzꞌin.