1 Corintios 7 - Li Santil hu

Xchꞌolobanquil xya̱lal chirix li sumla̱c ut li cua̱nc chokꞌ aj pa̱banel

¹ Xetakla chak xpatzꞌbal cue chirix li sumla̱c ut anakcuan tinsume le̱ hu. Us raj chokꞌ re li cui̱nk nak ma̱cꞌaꞌak rixakil.

² Abanan us cui ta̱sumla̱k re nak incꞌaꞌ ta̱ma̱cobk. Teꞌsumla̱k re nak li cui̱nk teꞌcua̱nk rixakil chi xju̱nkaleb ut li ixk teꞌcua̱nk xbe̱lom chi xju̱nkaleb.

³ Tento nak li cui̱nk ta̱cua̱nk riqꞌuin li rixakil ut li ixk ta̱cua̱nk riqꞌuin lix be̱lom joꞌ nequeꞌraj chi ribileb rib.

⁴ Li ixakilbej moco aꞌan ta yal re saꞌ xbe̱n xjunes rib; aban chic lix be̱lom yal re saꞌ xbe̱n. Joꞌcan ajcuiꞌ li be̱lomej. Moco aꞌan ta yal re saꞌ xbe̱n xjunes rib; aꞌ ban chic li rixakil yal re saꞌ xbe̱n.

⁵ Cui li be̱lomej naraj cua̱nc riqꞌuin li rixakil, li ixakilbej incꞌaꞌ naru tixye incꞌaꞌ. Ut cui li ixakilbej naraj cua̱nc riqꞌuin lix be̱lom, li be̱lomej incꞌaꞌ naru tixye incꞌaꞌ. Naru teꞌxcꞌu̱b chi ribileb rib nak teꞌx-oxlokꞌi rib chi ribileb rib jarubak cutan re nak teꞌxqꞌue xchꞌo̱leb chi tijoc. Abanan teꞌcua̱nk cuiꞌchic mokon chi ribileb rib re nak incꞌaꞌ teꞌa̱le̱k xban laj tza xban nak incꞌaꞌ teꞌxcuy cua̱nc xjuneseb.

⁶ La̱in yal e̱naꞌleb yo̱quin chixqꞌuebal. Moco yo̱quin ta chixyebal e̱re nak tento te̱ba̱nu. La̱ex yal e̱re chanru te̱raj te̱ba̱nu.

⁷ La̱in nacuaj raj nak ma̱cꞌaꞌak e̱rixakil joꞌ la̱in ma̱cꞌaꞌ cuixakil. Abanan moco juntakꞌe̱to ta chikajunilo. Li junju̱nk cuan xma̱tan qꞌuebil re xban li Dios. Joꞌcan nak cuan li nequeꞌsumla xban nak joꞌcan naraj li Dios ut cuan li incꞌaꞌ nequeꞌsumla ut saheb saꞌ xchꞌo̱l xjuneseb xban nak joꞌcan naraj li Dios.

⁸ Ut ninye reheb li incꞌaꞌ sumsu̱queb ut reheb li xma̱lcaꞌan nak us raj chokꞌ reheb nak teꞌcana̱k xjuneseb joꞌ la̱in.

⁹ Ut cui incꞌaꞌ naru nequeꞌxcuy rib, sumla̱keb. Kꞌaxal us nak ta̱sumla̱k junak chiru nak yo̱k chixra̱bal ru junak re nak ta̱cua̱nk riqꞌuin chi incꞌaꞌ sumsu̱queb.

¹⁰ Anakcuan tinye reheb li ac sumsu̱queb nak li ixakilbej incꞌaꞌ naru tixjach rib riqꞌuin lix be̱lom. Li chakꞌrab aꞌin ma̱cuaꞌ la̱in xinyehoc re injunes. Qꞌuebil ban xban li Ka̱cuaꞌ.

¹¹ Ut cui li ixakilbej tixjach rib riqꞌuin lix be̱lom, li ixk aꞌan ta̱cua̱nk xjunes ut incꞌaꞌ chic tixsicꞌ jalan cui̱nk. Abanan us raj cui tixcꞌam cuiꞌchic rib saꞌ usilal riqꞌuin lix be̱lom. Ut joꞌcan ajcuiꞌ li be̱lomej, incꞌaꞌ ajcuiꞌ naru tixjach rib riqꞌuin li rixakil.

¹² La̱in nacuaj xqꞌuebal caꞌchꞌinak chic le̱ naꞌleb. Aꞌin ma̱cuaꞌ xyehom li Ka̱cuaꞌ, aban la̱in ninnau nak us xba̱nunquil. Cui junak cui̱nk naxpa̱b li Dios ut li rixakil toj ma̱jiꞌ napa̱ban ut naxcꞌul xchꞌo̱l li ixk cua̱nc riqꞌuin, li cui̱nk aꞌan incꞌaꞌ naru tixcanab chi moco tixjach rib riqꞌuin li rixakil.

¹³ Ut cui junak ixk naxpa̱b li Dios ut lix be̱lom toj ma̱jiꞌ napa̱ban, ut naxcꞌul xchꞌo̱l li cui̱nk cua̱nc riqꞌuin, li ixk aꞌan incꞌaꞌ naru tixcanab chi moco tixjach rib riqꞌuin lix be̱lom.

¹⁴ Us cui incꞌaꞌ teꞌxjach rib. Li be̱lomej li toj ma̱jiꞌ napa̱ban, aꞌan lokꞌ chiru li Dios saꞌ xcꞌabaꞌ li rixakil. Ut li ixakilbej li toj ma̱jiꞌ napa̱ban, aꞌan lokꞌ chiru li Dios saꞌ xcꞌabaꞌ lix be̱lom li napa̱ban. Cui ta incꞌaꞌ joꞌcan, lix cocꞌal eb aꞌan chanchaneb raj lix cocꞌaleb li ma̱cuaꞌeb ralal xcꞌajol li Dios. Abanan cui incꞌaꞌ teꞌxjach rib, lix cocꞌaleb lokꞌ chiru li Dios saꞌ xcꞌabaꞌ li jun li napa̱ban.

¹⁵ Cui li be̱lomej ma̱cuaꞌ aj pa̱banel ut incꞌaꞌ chic naraj cua̱nc riqꞌuin li rixakil xban nak aj pa̱banel chic li ixk, naru teꞌxjach rib. Ut cui li ixakilbej ma̱cuaꞌ aj pa̱banel ut incꞌaꞌ chic naraj cua̱nc riqꞌuin lix be̱lom xban nak li cui̱nk aj pa̱banel chic, naru ajcuiꞌ teꞌxjach rib. Chi joꞌcan ta̱cana̱k laj pa̱banel chi ma̱cꞌaꞌ chic ta̱chꞌiꞌchꞌiꞌi̱nk re xban nak li Dios naraj nak tocua̱nk saꞌ xya̱lal.

¹⁶ At ixakilbej, la̱at incꞌaꞌ nacanau ma ta̱pa̱ba̱nk la̱ be̱lom a̱ban. Joꞌcan ajcuiꞌ la̱at, be̱lomej, incꞌaꞌ nacanau ma ta̱pa̱ba̱nk la̱ cuixakil a̱ban.

¹⁷ Li junju̱nk chicua̱nk joꞌ naraj li Dios. Us cui cuan a̱cuixakil nak xapa̱b li Cristo. Cui ma̱cꞌaꞌ a̱cuixakil, us ajcuiꞌ. Tatcana̱k joꞌ nak cuancat nak xatpa̱ban. Aꞌan aꞌin li nequebinchakꞌrabi cuiꞌ chixjunileb laj pa̱banel yalak bar.

¹⁸ Cui junak ac xcꞌul li circuncisión nak ta̱pa̱ba̱nk, li jun aꞌan incꞌaꞌ tixcꞌoxla xjalbal li retalil li circuncisión. Ut cui junak ta̱pa̱ba̱nk ut toj ma̱jiꞌ naxcꞌul li circuncisión, li jun aꞌan incꞌaꞌ ajcuiꞌ tento nak tixcꞌul li circuncisión.

¹⁹ Li ani naxcꞌul li circuncisión juntakꞌe̱t riqꞌuin li ani incꞌaꞌ naxcꞌul xban nak li circuncisión ma̱cꞌaꞌ xcuanquil. Li kꞌaxal us xba̱nunquil, aꞌan xpa̱banquil lix chakꞌrab li Dios.

²⁰ Joꞌ nak cuan junak nak quisiqꞌueꞌ ru xban li Dios, joꞌcan ajcuiꞌ ta̱cana̱k.

²¹ Cui cuancat rubel xcuanquil la̱ patrón nak li Dios quixsicꞌ a̱cuu, matcꞌoxlac chirix aꞌan. Abanan cui naxqꞌue rib nak tat-e̱lk rubel xcuanquil la̱ patrón, naru nacat-el saꞌ xya̱lal.

²² Li ani cuan rubel xcuanquil lix patrón nak quisiqꞌueꞌ ru xban li Ka̱cuaꞌ, li jun aꞌan libre chic cuan chiru li Dios. Ut li jun li incꞌaꞌ cuan rubel xcuanquil lix patrón nak quisiqꞌueꞌ ru, lokꞌbil chic xban li Cristo chi cꞌanjelac chiru.

²³ Joꞌcan ajcuiꞌ la̱ex. Lokꞌbilex chic xban li Cristo chi terto e̱tzꞌak. Joꞌcan nak me̱qꞌue chic e̱rib rubel xcuanquil li incꞌaꞌ useb xnaꞌleb. Me̱qꞌue e̱rib chi takla̱c re xba̱nunquil li incꞌaꞌ naraj li Dios.

²⁴ Ex herma̱n, joꞌ nak cuanquex nak quisiqꞌueꞌ e̱ru xban li Dios, joꞌcan ajcuiꞌ texcana̱k.

²⁵ La̱in tinye e̱re li nincꞌoxla chirixeb li sa̱j ixk ut li sa̱j cui̱nk. Usta ma̱cuaꞌ ra̱tin li Ka̱cuaꞌ, us cui tex-abi̱nk chicuu xban nak riqꞌuin xnimal ruxta̱n li Ka̱cuaꞌ naxqꞌue innaꞌleb chixyebal e̱re lix ya̱lal.

²⁶ Xban li rahobtesi̱c cuan saꞌ kabe̱n, nincꞌoxla nak us cui incꞌaꞌ teꞌsumla̱k li toj ma̱jiꞌ sumsu̱queb.

²⁷ Abanan cui sumsu̱quex, me̱canab le̱ rixakil. Ut cui incꞌaꞌ sumsu̱quex, us ajcuiꞌ cui incꞌaꞌ te̱sicꞌ e̱rixakil.

²⁸ Abanan cui texsumla̱k moco ma̱c ta aꞌan. Ut joꞌcaneb ajcuiꞌ li sa̱j ixk. Moco ma̱c ta cui teꞌsumla̱k. Abanan kꞌaxal cuiꞌchic nabal li raylal saꞌ xbe̱neb li sumsu̱queb. La̱in incꞌaꞌ raj nacuaj nak te̱cꞌul li raylal.

²⁹ Ex inherma̱n, li bar cuan nacuaj xyebal, aꞌan aꞌin: Yo̱queb chi numecꞌ li cutan saꞌ junpa̱t. Joꞌcan nak la̱ex li cuan e̱rixakil ma̱cuaꞌ caꞌaj cuiꞌ le̱ rixakil te̱cꞌoxla. Cheqꞌuehak ban e̱chꞌo̱l chi cꞌanjelac chiru li Ka̱cuaꞌ.

³⁰ Usta sa saꞌ kachꞌo̱l, usta ra saꞌ kachꞌo̱l, usta cuan kabiomal usta ma̱cꞌaꞌ, chikaqꞌuehak ban kachꞌo̱l chi cꞌanjelac chiru li Ka̱cuaꞌ Dios.

³¹ Me̱qꞌue e̱chꞌo̱l chirix li cꞌaꞌru cuan e̱re saꞌ li ruchichꞌochꞌ aꞌin, xban nak chixjunil li cꞌaꞌru cuan saꞌ ruchichꞌochꞌ ta̱osokꞌ.

³² Nacuaj raj nak ma̱cꞌaꞌ cꞌaꞌru ta̱xic cuiꞌ e̱chꞌo̱l. Li cui̱nk li ma̱cꞌaꞌ rixakil naxqꞌue xchꞌo̱l chi cꞌanjelac chiru li Ka̱cuaꞌ Dios ut chixba̱nunquil li bar cuan naraj li Ka̱cuaꞌ Dios.

³³ Ut li cui̱nk cuan rixakil tento nak tixqꞌue xchꞌo̱l chi cꞌanjelac re nak ta̱cua̱nk cꞌaꞌru reheb ut tixqꞌue xchꞌo̱l chixba̱nunquil li naraj li rixakil re nak sahak saꞌ xchꞌo̱l. Joꞌcan nak cuib ru lix cꞌaꞌux xban nak naxcꞌoxla li Ka̱cuaꞌ Dios ut naxcꞌoxla li rixakil.

³⁴ Joꞌcan ajcuiꞌ li ixk li cuan xbe̱lom. Cuib ru lix cꞌaꞌux xban nak naxcꞌoxla li Ka̱cuaꞌ Dios ut tento ajcuiꞌ nak tixcꞌoxla lix cꞌanjel saꞌ rochoch ut naxba̱nu cꞌaꞌru naraj lix be̱lom. Ut li ixk li ma̱cꞌaꞌ xbe̱lom naxqꞌue xchꞌo̱l chi cꞌanjelac chiru li Ka̱cuaꞌ Dios ut naxba̱nu joꞌ naraj li Dios.

³⁵ Moco re ta nak incꞌaꞌ texsumla̱k nak ninye e̱re chi joꞌcaꞌin. Re ban e̱tenkꞌanquil. La̱in nacuaj nak te̱ba̱nu li us. Nacuaj nak te̱kꞌaxtesi e̱rib chi cꞌanjelac chiru li Ka̱cuaꞌ chi anchal e̱chꞌo̱l.

³⁶ Cui junak yucuaꞌbej naxcꞌoxla nak us ta̱sumla̱k lix rabin xban nak ac cuan xchihab, us nak tixba̱nu li naxcꞌoxla xba̱nunquil. Tixsumub lix rabin. Moco ma̱c ta cui ta̱sumla̱k.

³⁷ Li yucuaꞌbej ma̱ ani naminoc ru. Naru tixba̱nu li naxcꞌoxla nak us xba̱nunquil. Ut cui na-ala saꞌ xchꞌo̱l nak incꞌaꞌ tixsumub lix rabin, cha̱bil ajcuiꞌ naxba̱nu nak incꞌaꞌ tixsumub.

³⁸ Joꞌcan nak li ani naxsumub lix rabin, cha̱bil naxba̱nu. Ut li incꞌaꞌ naxsumub lix rabin, kꞌaxal cuiꞌchic us naxba̱nu.

³⁹ Li ixk li sumsu tento nak ta̱cua̱nk riqꞌuin lix be̱lom aꞌ yal joꞌ najtil yoꞌyo̱k lix be̱lom. Ut cui nacam lix be̱lom aꞌan chic yal re ani aj iqꞌuin ta̱sumla̱k. Abanan cui naraj sumla̱c, tento nak riqꞌuin junak aj pa̱banel ta̱sumla̱k.

⁴⁰ Abanan nincꞌoxla la̱in nak kꞌaxal us raj nak li xma̱lcaꞌan ta̱cana̱k xjunes ut incꞌaꞌ chic ta̱sumla̱k. Li naꞌleb aꞌin li xinye e̱re, aꞌan qꞌuebil cue xban li Santil Musikꞌej.