1 Corintios 6 - Li Santil hu

Me̱cꞌameb le̱ rech aj pa̱banelil saꞌ rakleb a̱tin

¹ Cui cuan junak saꞌ e̱ya̱nk cuan xchꞌaꞌajquilal riqꞌuin junak xherma̱n, ¿ma ta̱ru̱k ta biꞌ ta̱xic chiruheb laj rakol a̱tin re li ruchichꞌochꞌ? ¿Ma incꞌaꞌ raj us nak riqꞌuineb laj pa̱banel ta̱xic?

² ¿Ma incꞌaꞌ nequenau nak saꞌ jun cutan la̱o aj pa̱banel torakok a̱tin saꞌ xbe̱neb chixjunileb li cuanqueb saꞌ ruchichꞌochꞌ? Ut cui la̱o torakok a̱tin saꞌ xbe̱neb li cuanqueb saꞌ ruchichꞌochꞌ, ¿cꞌaꞌut nak incꞌaꞌ ta̱ru̱k takayi̱b ru li kachꞌaꞌajquilal saꞌ xya̱lal chi kibil kib?

³ ¿Ma incꞌaꞌ nequenau nak saꞌ jun cutan torakok a̱tin saꞌ xbe̱neb li ángel? Ut cui torakok a̱tin saꞌ xbe̱neb li ángel, ¿cꞌaꞌut nak incꞌaꞌ ta̱ru̱k torakok a̱tin saꞌ xbe̱n li kachꞌaꞌajquilal arin saꞌ ruchichꞌochꞌ?

⁴ Cui cuan li ple̱t saꞌ e̱ya̱nk, ¿cꞌaꞌut nak nequeqꞌue chi rakoc a̱tin saꞌ e̱be̱n li ma̱cuaꞌeb aj pa̱banel?

⁵ Nequecꞌut e̱xuta̱n nak nequeqꞌue chi rakoc a̱tin saꞌ e̱be̱n li ma̱cuaꞌeb aj pa̱banel. ¿Ma ma̱cꞌaꞌ ta biꞌ junak saꞌ e̱ya̱nk cuan xnaꞌleb re ta̱rakok a̱tin saꞌ e̱be̱n la̱ex aj pa̱banel?

⁶ Abanan la̱ex nequecꞌam le̱ rech aj pa̱banelil chiru junak aj rakol a̱tin ma̱cuaꞌ aj pa̱banel.

⁷ Nak nequecꞌam le̱ rech aj pa̱banelil saꞌ rakleb a̱tin nacꞌutun nak toj ma̱jiꞌ nequetau xya̱lal. Kꞌaxal us raj nak te̱cuy li rahobtesi̱c ut li elkꞌa̱c ut incꞌaꞌ texxic riqꞌuin aj rakol a̱tin.

⁸ Abanan la̱ex incꞌaꞌ nequecuy. La̱ex ban chic li nequex-elkꞌac ut nequeba̱nu li ma̱usilal reheb le̱ rech aj pa̱banelil.

⁹ ¿Ma incꞌaꞌ nequenau nak eb li incꞌaꞌ ti̱queb xchꞌo̱l incꞌaꞌ teꞌre̱chani lix nimajcual cuanquilal li Dios? Me̱balakꞌi e̱rib. Eb laj coꞌbe̱t ut eb laj yumbe̱t incꞌaꞌ teꞌre̱chani lix nimajcual cuanquilal li Dios, chi moco li nequeꞌlokꞌonin re li jalanil dios, chi moco eb laj muxul caxa̱r. Ut eb li cui̱nk li nequeꞌma̱cob riqꞌuineb li rech cui̱nkilal incꞌaꞌ ajcuiꞌ teꞌre̱chani lix nimajcual cuanquilal li Dios. Joꞌcan nak me̱balakꞌi e̱rib chi xcꞌoxlanquil nak us yo̱quex cui toj yo̱quex chixba̱nunquil li ma̱usilal aꞌin.

¹⁰ Eb laj e̱lkꞌ ut eb li nequeꞌxrahi ru li biomal incꞌaꞌ teꞌre̱chani lix nimajcual cuanquilal li Dios, chi moco laj calajenak, chi moco laj majecuanel, chi moco laj balakꞌ teꞌre̱chani lix nimajcual cuanquilal li Dios.

¹¹ Usta cuanqueb junju̱nk saꞌ e̱ya̱nk joꞌcan queꞌxba̱nu chak, abanan anakcuan cuybil sachbil chic lix ma̱queb. Santobresinbileb chic ut ti̱cobresinbileb chic lix chꞌo̱l saꞌ xcꞌabaꞌ li Ka̱cuaꞌ Jesucristo ut xban li Santil Musikꞌej.

Chenima ru li Dios riqꞌuin le̱ yehom e̱ba̱nuhom

¹² Cuan li nequeꞌyehoc: La̱in naru tinba̱nu chixjunil li cꞌaꞌru tincuaj xba̱nunquil. Ya̱l nak naru xba̱nunquil chixjunil abanan moco chixjunil ta us xba̱nunquil. La̱in naru ninba̱nu chixjunil li nacuaj, abanan incꞌaꞌ tinba̱nu cui nacuecꞌa nak junes aꞌan ta̱xic inchꞌo̱l chirix.

¹³ Li Dios quixyi̱b li tzacae̱mk re li kasaꞌ ut quixyi̱b li kasaꞌ re li tzacae̱mk. Ya̱l ajcuiꞌ, aban ta̱cuulak xkꞌehil nak li Dios tixsach li tzacae̱mk joꞌ ajcuiꞌ li katibel. Li Dios incꞌaꞌ coxyoꞌobtesi re li coꞌbe̱tac yumbe̱tac. Coxyoꞌobtesi ban re nak tocꞌanjelak chiru li Ka̱cuaꞌ. Ut li Ka̱cuaꞌ aꞌan li na-iloc ke.

¹⁴ Li Dios li quicuaclesin re li Ka̱cuaꞌ Jesucristo chi yoꞌyo saꞌ xya̱nkeb li camenak, aꞌan ajcuiꞌ ta̱cuaclesi̱nk ke chi yoꞌyo riqꞌuin lix cuanquil.

¹⁵ ¿Ma incꞌaꞌ nequenau nak la̱o aj pa̱banel joꞌ li rok rukꞌ li Ka̱cuaꞌ Jesucristo? ¿Ma ta̱ru̱k ta biꞌ takajunaji kib riqꞌuineb li ixk li nequeꞌxcꞌayi rib? Ma̱ jokꞌe naru xban nak la̱o rok rukꞌ li Cristo ut junajo chic riqꞌuin nak cuanco.

¹⁶ ¿Ma incꞌaꞌ nequenau nak li ani nama̱cob riqꞌuin junak ixk aj ma̱c junajeb chi tzꞌejcualej nequeꞌcana? Tzꞌi̱banbil saꞌ li Santil Hu nak junajakeb chi tzꞌejcualej chi xcabichaleb.

¹⁷ Ut ani naxjunaji rib riqꞌuin li Ka̱cuaꞌ, aꞌan junaj chic riqꞌuin saꞌ musikꞌej.

¹⁸ Me̱ba̱nu chic li ma̱usilal. Chixjunil li cꞌaꞌak re ru chi ma̱quil kꞌaxal yibru. Abanan li coꞌbe̱tac yumbe̱tac kꞌaxal cuiꞌchic yibru xban nak li ani nama̱cob chi toj ma̱jiꞌ sumsu, li jun aꞌan naxmux rib xjunes rib.

¹⁹ ¿Ma incꞌaꞌ nequenau nak la̱ex rochochex li Santil Musikꞌej xban nak li Santil Musikꞌej li quixqꞌue e̱re li Dios cuan e̱riqꞌuin? Joꞌcan nak moco la̱ex ta nequetakla e̱rib e̱junes. La̱ex rehex chic li Dios.

²⁰ Lokꞌbilex chic chi terto e̱tzꞌak. Joꞌcan nak ti̱cak le̱ yuꞌam ut chelokꞌoni li Dios xban nak rehex chic.