1 Corintios 5 - Li Santil hu

Li rakoc a̱tin saꞌ xbe̱neb laj coꞌbe̱t ut laj yumbe̱t

¹ Yalak bar x-abiman resil nak cuan li joꞌ ma̱joꞌil naꞌleb saꞌ e̱ya̱nk xban nak jun li cui̱nk quixmakꞌ rixakil lix yucuaꞌ. Cꞌajoꞌ xyibal ru li yo̱queb chixba̱nunquil saꞌ e̱ya̱nk. Eb li ma̱cuaꞌeb aj pa̱banel incꞌaꞌ nequeꞌxba̱nu chi joꞌcan. ¿Ma tojaꞌ ta chic la̱ex texba̱nu̱nk re chi joꞌcan?

² La̱ex nequekꞌetkꞌeti e̱rib ut toj cuan li ma̱c saꞌ e̱ya̱nk. Narahoꞌ raj e̱chꞌo̱l ut nayotꞌeꞌ raj e̱chꞌo̱l xban xyibal ru li ma̱c li yo̱ xba̱nunquil saꞌ e̱ya̱nk. Li ani xma̱cob chi joꞌcan xerisi raj saꞌ e̱ya̱nk.

³ Usta najt cuanquin e̱riqꞌuin junelic yo̱quin che̱cꞌoxlanquil. La̱in ninnau nak li cui̱nk aꞌan cuan xma̱c. Usta ma̱ anihin chak e̱riqꞌuin, abanan li Cristo quixcꞌut chicuu nak li jun aꞌan cuan xma̱c ut tento nak tixtoj rix lix ma̱c.

⁴ Kꞌaxal us raj nak te̱chꞌutub e̱rib saꞌ xcꞌabaꞌ li Jesucristo ut te̱cꞌu̱b cꞌaꞌru te̱ba̱nu chirix aꞌan. Chanchan nak cua̱nkin e̱riqꞌuin xban nak yo̱quin chi tijoc che̱rix. Ut lix nimal xcuanquil li Jesucristo chicua̱nk e̱riqꞌuin ut chextenkꞌa.

⁵ Isihomak li cui̱nk aꞌan saꞌ e̱ya̱nk. Nak cua̱nk chic saꞌ rukꞌ laj tza tixcꞌul li raylal ut riqꞌuin li raylal tixcꞌul, tixcanab taxak xba̱nunquil li ma̱usilal re nak naru ta̱colekꞌ nak tol-e̱lk cuiꞌchic li Jesucristo.

⁶ Me̱nimobresi e̱rib riqꞌuin xcꞌoxlanquil nak us yo̱quex chixba̱nunquil. La̱ex nequexinjuntakꞌe̱ta riqꞌuin xkꞌemal li caxlan cua. La̱ex nequenau nak usta caꞌchꞌin ajcuiꞌ lix chꞌamal naqꞌueman, naxchꞌamobresi chixjunil li kꞌem. Naraj naxye nak incꞌaꞌ naru nacuan li ma̱c saꞌ xya̱nkeb laj pa̱banel re nak incꞌaꞌ teꞌxcꞌam xbeheb li jun chꞌol chic chi ma̱cobc.

⁷ Canabomak chi junaj cua li najteril naꞌleb re nak ma̱cꞌaꞌak chic li ma̱c e̱riqꞌuin. Chanchanakex chic lix kꞌemal li caxlan cua ma̱cꞌaꞌ xchꞌamal xban nak li Jesucristo quirisi le̱ ma̱c. Eb laj judío queꞌxmayeja li carner re xjulticanquil li pascua ut joꞌcan ajcuiꞌ li Jesucristo aꞌan lix carner li Dios li quixmayeja rib re risinquil li kama̱c.

⁸ Joꞌcan nak chikacanabak li najter naꞌleb li naqꞌuehoc ke chi ma̱cobc. Li najter naꞌleb aꞌan chanchan lix chꞌamal li caxlan cua. Ut la̱o chanchanako li xkꞌemal li caxlan cua ma̱cꞌaꞌ xchꞌamal. Naraj naxye nak ti̱cak chic li kachꞌo̱l ut tzꞌakal re ru li kayuꞌam.

⁹ Saꞌ li hu li quintzꞌi̱ba e̱riqꞌuin junxil, la̱in xinye e̱re nak incꞌaꞌ te̱junaji e̱rib riqꞌuineb laj coꞌbe̱t ut laj yumbe̱t.

¹⁰ Nak xinye e̱re chi joꞌcan moco yo̱quin ta chi a̱tinac chirixeb laj coꞌbe̱t ut laj yumbe̱t li toj ma̱jiꞌ nequeꞌpa̱ban. Yo̱quin ban chi a̱tinac chirixeb li nequeꞌxye rib nak aj pa̱baneleb ut toj nequeꞌxra ru biomal ut nequeꞌelkꞌac ut toj nequeꞌlokꞌonin jalanil dios. Cui ta xinye e̱re nak incꞌaꞌ texcua̱nk saꞌ xya̱nkeb li toj ma̱jiꞌ nequeꞌpa̱ban, incꞌaꞌ raj naru texcua̱nk saꞌ ruchichꞌochꞌ.

¹¹ Li cꞌaꞌru xinye, aꞌan chirixeb li nequeꞌxye rib nak aj pa̱baneleb ut yo̱queb chixba̱nunquil li moco uxc ta naraj. Ma̱re naxye rib nak aj pa̱banel ut aꞌan aj yumbe̱t ut aj coꞌbe̱t malaj aj rahol ru biomal. Ma̱re nalokꞌonin jalanil dios, malaj aj hobonel. Ma̱re aj calajenak malaj aj e̱lkꞌ. Incꞌaꞌ texcua̱nk saꞌ xya̱nkeb aꞌan chi moco texcuaꞌak rochbeneb.

¹² Ma̱cuaꞌ la̱in tinrakok a̱tin saꞌ xbe̱neb li toj ma̱jiꞌ nequeꞌpa̱ban. Aꞌ li Dios, aꞌan li ta̱rakok a̱tin saꞌ xbe̱neb.

¹³ Abanan la̱o torakok a̱tin saꞌ xbe̱neb li kech aj pa̱banelil li yo̱queb chi ma̱cobc saꞌ kaya̱nk. Joꞌcan nak tento te̱risi saꞌ e̱ya̱nk li cui̱nk aꞌan li yo̱ chi ma̱cobc.