1 Corintios 4 - Li Santil hu

Qꞌuebilo chi cꞌanjelac chiru li Ka̱cuaꞌ

¹ Joꞌcan nak chenauhak nak la̱o yal aj cꞌanjelo chiru li Cristo ut qꞌuebil saꞌ kabe̱n xchꞌolobanquil lix ya̱lal li colba-ib li quiqꞌueheꞌ ke xban li Dios. Li xya̱lal aꞌin mukmu nak quicuan chak junxil.

² Li ani sicꞌbil ru chixchꞌolobanquil lix ya̱lal tento nak ti̱cak xchꞌo̱l.

³ La̱in ma̱cꞌaꞌ nacuaj re cui yo̱quex chixsicꞌbal a̱tin chicuix ut ma̱cꞌaꞌ nacuaj re cui junak aj rakol a̱tin ta̱tzꞌilok a̱tin chicuix. Chi moco la̱in naru tincuechꞌ rix lin cꞌanjel.

⁴ La̱in nacuecꞌa nak ma̱cꞌaꞌ inma̱c. Abanan moco xban ta aꞌan nak tinye nak ti̱c inchꞌo̱l. Aꞌ li ta̱rakok a̱tin saꞌ inbe̱n aꞌan li Ka̱cuaꞌ, ut aꞌan ta̱yehok re ma us xinba̱nu malaj incꞌaꞌ.

⁵ Joꞌcan nak mexrakoc a̱tin chirix le̱ ras e̱ri̱tzꞌin. Cheroybeni toj ta̱cuulak xkꞌehil nak tol-e̱lk cuiꞌchic li Ka̱cuaꞌ Jesucristo ut aꞌan tixcꞌutbesi li incꞌaꞌ nanauman anakcuan. Tixcꞌutbesi li cꞌaꞌru nanumeꞌ saꞌ xchꞌo̱l li junju̱nk. Ut li Dios tixqꞌue xlokꞌal li junju̱nk aꞌ yal chanru lix yehom xba̱nuhom.

⁶ Ex herma̱n, chixjunil li xinye chirix laj Apolos ut chicuix re e̱tenkꞌanquil nak xinye. Nacuaj nak te̱tau ru li cꞌaꞌru xinye. Chetzol e̱rib kiqꞌuin re nak te̱ba̱nu joꞌ tzꞌi̱banbil saꞌ li Santil Hu. Incꞌaꞌ naru te̱nimobresi e̱rib xban nak nequeta̱ke li jun ut nequetzꞌekta̱na li jun chic.

⁷ ¿Ma jalanex ta biꞌ la̱ex chiruheb li jun chꞌol chic nak nequerecꞌa e̱rib? ¿Ma ma̱cuaꞌ ta biꞌ li Dios quiqꞌuehoc e̱re li cꞌaꞌru cuan e̱re? ¿Cꞌaꞌut nak nequenimobresi e̱rib chixyebal nak cuan cꞌaꞌru e̱re? Incꞌaꞌ naru te̱nimobresi e̱rib xban nak yal xema̱tani li cꞌaꞌru cuan e̱re riqꞌuin li Dios.

⁸ Ac xcꞌojla e̱chꞌo̱l xban nak saꞌ e̱chꞌo̱l la̱ex nak ac xetau e̱naꞌleb. Chanchanex li biom saꞌ le̱ pa̱ba̱l nak nequecꞌoxla. ¿Ma la̱ex chic rey nak nequecꞌoxla? Saꞌ e̱chꞌo̱l la̱ex nak ma̱cꞌaꞌ kacuanquil. Us raj ac ta cuan xetau e̱naꞌaj chokꞌ rey, re nak tocua̱nk ajcuiꞌ raj la̱o chi takla̱nc e̱rochben.

⁹ Nak nincꞌoxla la̱in li Dios xoxqꞌue la̱o li apóstol chi ma̱cꞌaꞌ kacuanquil. Chanchano junak aj ma̱c li ac xteneba̱c ca̱mc saꞌ xbe̱n ut qꞌuebilo chiruheb li ángel ut chiruheb li cui̱nk re toeꞌril.

¹⁰ La̱ex nequecꞌoxla nak ma̱cꞌaꞌ kanaꞌleb xban nak nakachꞌolob resil li Cristo ut la̱ex cuan e̱naꞌleb xban nak nequenau nabal chirix li Cristo nak nequecꞌoxla. La̱o ma̱cꞌaꞌ kacuanquil ut la̱ex cuan e̱cuanquil nak nequecꞌoxla. Saꞌ e̱chꞌo̱l la̱ex nak la̱ex nequex-oxlokꞌi̱c ut la̱o tzꞌekta̱nanbilo.

¹¹ Toj chalen anakcuan yo̱co chixcuybal kasaꞌ ut ta̱chakik ke. Ma̱cꞌaꞌ chic kakꞌ. Sacꞌbilo ut ma̱cꞌaꞌ kochoch.

¹² Cau nocotrabajic re xnumsinquil li cutan junju̱nk. Nak nequeꞌxba̱nu ma̱usilal ke, la̱o nakaba̱nu usilal reheb. Ra nequeꞌxba̱nu ke li xicꞌ nequeꞌiloc ke ut nakacuy xnumsinquil li raylal li nequeꞌxba̱nu ke.

¹³ Nak nocohobeꞌ incꞌaꞌ nakasume ru. Nequeꞌka̱tina ban saꞌ usilal. Chalen anakcuan tzꞌekta̱nanbilo xbaneb chixjunileb. Ma̱cꞌaꞌ noco-oc cuiꞌ nak nocoeꞌril. Chanchano li mul chiruheb.

¹⁴ Ma̱cuaꞌ re xcꞌutbal e̱xuta̱n nak yo̱quin chixyebal e̱re chi joꞌcaꞌin. Re ban xqꞌuebal e̱naꞌleb xban nak chanchanex li cualal incꞌajol chicuu ut raro̱quex inban.

¹⁵ Usta cuan laje̱bak mil li nequeꞌchꞌoloban xya̱lal li Cristo che̱ru, abanan la̱in li xinyehoc e̱re resil li colba-ib junxil nak xexpa̱ban. Joꞌcan nak la̱in le̱ yucuaꞌ saꞌ xcꞌabaꞌ li Jesucristo.

¹⁶ Joꞌcan ut nak nintzꞌa̱ma che̱ru nak te̱tzol e̱rib cuiqꞌuin ut te̱ba̱nu joꞌ ninba̱nu la̱in.

¹⁷ Aꞌan aj e nak xintakla e̱riqꞌuin laj Timoteo. Aꞌan tixjultica e̱re nak li cꞌaꞌru yo̱quin chixchꞌolobanquil chirix li Cristo, aꞌan ajcuiꞌ li yo̱quin chixba̱nunquil. Ninchꞌolob chi tzꞌakal lix ya̱lal yalak bar chiruheb chixjunileb laj pa̱banel. Laj Timoteo chanchan li cualal ut raro inban. Tzꞌakal re ru lix pa̱ba̱l saꞌ xcꞌabaꞌ li Jesucristo.

¹⁸ Cuan li xeꞌkꞌetkꞌetoꞌ saꞌ e̱ya̱nk. Eb aꞌan nequeꞌxye nak ninxucuac. Joꞌcan nak incꞌaꞌ chic ninxic e̱riqꞌuin.

¹⁹ Aꞌan moco ya̱l ta. Cui li Dios naxqꞌue cue, chi se̱b tincuulak e̱riqꞌuin. Aran toxintau xya̱lal. Tincuil ma caꞌaj cuiꞌ a̱tinac nequeꞌxnau li kꞌetkꞌeteb. Toj aran tincuil ma ya̱l na nak cuan xcuanquil li Dios riqꞌuineb.

²⁰ Lix nimajcual cuanquilal li Dios, tento ta̱cꞌutu̱nk saꞌ li kayuꞌam. Moco caꞌaj cuiꞌ ta riqꞌuin ka̱tin ta̱cꞌutu̱nk xcuanquil li Dios.

²¹ La̱in ninpatzꞌ e̱re cꞌaꞌru te̱raj. ¿Ma te̱raj nak texinkꞌus chi cau nak tincuulak e̱riqꞌuin? ¿Malaj ut te̱yi̱b le̱ yuꞌam re nak tincuulak riqꞌuin rahoc ut tu̱lanil?