1 Corintios 3 - Li Santil hu

Yal aj cꞌanjelo chiru li Dios

¹ Ex inherma̱n, nak cuanquin e̱riqꞌuin incꞌaꞌ quiru quina̱tinac e̱riqꞌuin joꞌ nina̱tinac riqꞌuineb li ac cauheb xchꞌo̱l saꞌ lix pa̱ba̱leb. La̱ex chanchan ma̱cꞌaꞌ li Santil Musikꞌej e̱riqꞌuin. Joꞌcan nak nina̱tinac e̱riqꞌuin joꞌ nak nina̱tinac riqꞌuineb li toj kꞌun xchꞌo̱leb saꞌ lix pa̱ba̱leb.

² Li xya̱lal xinchꞌolob che̱ru chanchan nak leche xinqꞌue cherucꞌ. Moco cacuil tzacae̱mk ta xinqꞌue e̱re xban nak la̱ex toj ma̱jiꞌ nequexqꞌui. Naraj naxye nak toj ma̱jiꞌ ninchꞌolob che̱ru li naꞌleb li chꞌaꞌaj xtaubal ru xban nak toj ma̱jiꞌ nequexqꞌui saꞌ le̱ pa̱ba̱l ut ma̱min te̱tau ru.

³ Incꞌaꞌ texru̱k xtaubal ru anakcuan xban nak toj nequeba̱nu li cꞌaꞌru naxrahi ru le̱ chꞌo̱l. Nak toj cuan li cakali̱nc ib ut li cuechꞌi̱nc ib saꞌ e̱ya̱nk, ¿ma incꞌaꞌ ta biꞌ yo̱quex chixba̱nunquil li cꞌaꞌru naxrahi ru le̱ chꞌo̱l? Ut la̱ex nequejuntakꞌe̱ta e̱rib riqꞌuineb li toj ma̱cꞌaꞌ li Santil Musikꞌej riqꞌuineb.

⁴ La̱ex toj ma̱jiꞌ junaj le̱ chꞌo̱l. Cuan li nequeꞌxye, “la̱in ninta̱ke laj Pablo”. Ut cuan cuiꞌchic li nequeꞌxye, “la̱in ninta̱ke laj Apolos”. Cui joꞌcan yo̱quex chixyebal, ¿ma incꞌaꞌ ta biꞌ toj yo̱quex chixjuntakꞌe̱tanquil e̱rib riqꞌuineb li toj ma̱jiꞌ nequeꞌpa̱ban?

⁵ ¿Ani ta biꞌ laj Apolos? Ut, ¿anihin ta biꞌ la̱in? La̱o yal aj cꞌanjelo chiru li Ka̱cuaꞌ. Xkachꞌolob xya̱lal che̱ru nak xepa̱b li Ka̱cuaꞌ. Ut chi kacabichalo nococꞌanjelac joꞌ taklanbilo cuiꞌ xban li Ka̱cuaꞌ.

⁶ Chanchano aj acuinel nak nococꞌanjelac chiru li Dios. Chanchan a̱uc xinba̱nu nak xinye resil li colba-ib e̱re. Ut chanchan tꞌakresi̱nc quixba̱nu laj Apolos nak quixchꞌolob lix ya̱lal che̱ru. Abanan aꞌ li Dios quiqꞌuehoc lix mokic.

⁷ Joꞌcan nak chi moco laj acuinel chi moco laj tꞌakresinel cuan xcuanquil. Caꞌaj cuiꞌ li Dios li naqꞌuehoc xmokic cuan xcuanquil.

⁸ Laj acuinel ut laj tꞌakresinel juntakꞌe̱teb xcuanquil chiru li Dios ut chi xju̱nkaleb teꞌxcꞌul xkꞌajca̱munquil aꞌ ya̱l chanru lix cꞌanjeleb.

⁹ La̱o kech aj cꞌanjelil kib chiru li Dios. Ut la̱ex chanchanex li chꞌochꞌ li nakacꞌanjela ru. Ut li Dios aꞌan laj e̱chal re li chꞌochꞌ. Ut chanchanex ajcuiꞌ jun li cab yo̱co chixyi̱banquil ut li Dios, aꞌan laj e̱chal re li cab aꞌan.

¹⁰ Xban nak sicꞌbil cuu xban li Dios chi cꞌanjelac chiru joꞌ jun aj tzꞌac cha̱bil, joꞌcan nak xinnau xjolominquil li cꞌanjel. Chanchan nak xinyi̱b xcimiento li cab nak xinye resil li colba-ib ut jalan chic teꞌcablak saꞌ xbe̱n nak teꞌxchꞌolob lix ya̱lal che̱ru. Ut li junju̱nk chixqꞌuehak retal nak tzꞌakal re ru lix cꞌanjel tixba̱nu.

¹¹ Tixqꞌue retal chanru lix cꞌanjel xban nak ac qꞌuebil lix cimiento li cab. Ut ma̱ ani naru tixqꞌue junak chic li cimiento chiru li ac qꞌuebil. Ut aꞌan li Ka̱cuaꞌ Jesucristo.

¹² Cuan li teꞌcablak saꞌ xbe̱n li cimiento aꞌan riqꞌuin li cꞌaꞌak re ru najt naxcuy joꞌ li oro, li plata ut li terto̱quil pec. Ut cuan li teꞌcablak saꞌ xbe̱n riqꞌuin li incꞌaꞌ naxcuy joꞌ li cheꞌ, li cu̱c ut li qꞌuim. Lix ya̱lal aꞌan, aꞌin: nak cuan li teꞌcꞌanjelak chi cha̱bil chiru li Dios ut cuan incꞌaꞌ.

¹³ Lix cꞌanjel li junju̱nk ta̱cꞌutu̱nk nak tol-e̱lk cuiꞌchic li Ka̱cuaꞌ Jesucristo chi rakoc a̱tin. Chanchan nak ta̱numsi̱k saꞌ xam lix cꞌanjel naxba̱nu re rilbal ma ta̱osokꞌ malaj incꞌaꞌ.

¹⁴ Cui lix cꞌanjel incꞌaꞌ ta̱sachekꞌ, nacꞌutun nak us lix cꞌanjel ut li jun aꞌan tixcꞌul lix kꞌajca̱munquil.

¹⁵ Cui ut lix cꞌanjel junak incꞌaꞌ tzꞌakal re ru, lix cꞌanjel ta̱sachk chanchan cꞌatbil nak ta̱osokꞌ. Ut li jun aꞌan ta̱colekꞌ, abanan chanchan ta̱numekꞌ saꞌ xam nak ta̱colekꞌ.

¹⁶ ¿Ma incꞌaꞌ ta biꞌ nequenau nak la̱ex rochochex li Dios? ¿Ma incꞌaꞌ ta biꞌ nequenau nak li Santil Musikꞌej cuan e̱riqꞌuin?

¹⁷ Li rochoch li Dios aꞌan santo. Cui ani naxtiquib li jachoc ib saꞌ e̱ya̱nk, li jun aꞌan yo̱ chixjucꞌbal rochoch li Dios xban nak la̱ex aj pa̱banel rochochex chic li Dios. Ut li Dios tixsach li ani naxtiquib xjachbal ruheb laj pa̱banel.

¹⁸ Ma̱ ani taxak tixbalakꞌi rib xjunes. Cui cuan junak saꞌ e̱ya̱nk narecꞌa nak cuan xnaꞌleb saꞌ li ruchichꞌochꞌ aꞌin, chixcubsihak rib ut tixba̱nu joꞌ li ma̱cꞌaꞌ naxnau re nak tixtau xnaꞌleb chi tzꞌakal.

¹⁹ Lix naꞌleb li ruchichꞌochꞌ, aꞌan to̱ntil naꞌleb chiru li Dios. Joꞌcaꞌin tzꞌi̱banbil saꞌ li Santil Hu: Li Dios naxcanabeb chixsachbaleb rib xban lix se̱baleb xchꞌo̱l li ani nequeꞌrecꞌa nak cuanqueb xnaꞌleb xjuneseb rib. (Job 5:13)

²⁰ Ut tzꞌi̱banbil ajcuiꞌ saꞌ li Santil Hu li naxye: Li Dios naxnau nak ma̱cꞌaꞌ na-oc cuiꞌ lix cꞌaꞌuxeb li nequeꞌxye nak cuanqueb xnaꞌleb xjuneseb rib. (Sal. 94:11)

²¹ Joꞌcan nak ma̱ ani tixnimobresi ru junak cui̱nk riqꞌuin li cꞌaꞌru naxba̱nu xban nak chixjunil li cꞌaꞌak re ru qꞌuebil e̱re xban li Dios re nak ta̱cꞌanjelak che̱ru.

²² Usta laj Apolos, usta la̱in, usta laj Pedro, la̱o yal aj cꞌanjelo che̱ru. Usta li ruchichꞌochꞌ, usta li yuꞌam, usta li ca̱mc, e̱re ajcuiꞌ re nak teꞌcꞌanjelak che̱ru. Chixjunil li cuan anakcuan e̱re la̱ex ut e̱re ajcuiꞌ li toj cha̱lel chiku.

²³ Chixjunil li cꞌaꞌak re ru, e̱re la̱ex. Abanan la̱ex rehex li Cristo ut li Cristo, aꞌan re li Dios.