1 Corintios 14 - Li Santil hu

Li a̱tinac saꞌ jalanil a̱tin li incꞌaꞌ natauman ru

¹ Joꞌcan nak ninye e̱re, cheqꞌuehak e̱chꞌo̱l chi rahoc ut chesicꞌak le̱ ma̱tan li naxqꞌue li Santil Musikꞌej. Li ma̱tan li kꞌaxal lokꞌ, aꞌan xyebal resil li cꞌaꞌru yo̱ chi xcꞌutbal che̱ru li Dios.

² Li ani naa̱tinac saꞌ jalanil a̱tin incꞌaꞌ naa̱tinac riqꞌuin li rech cristianil. Riqꞌuin ban li Dios naa̱tinac. Ut ma̱ ani nataꞌoc ru li cꞌaꞌru naxye. Riqꞌuin xcuanquil li Santil Musikꞌej naxye lix ya̱lal li incꞌaꞌ natauman ru.

³ Ut li ani naxye resil li nacꞌuteꞌ chiru xban li Dios, li jun aꞌan naxtenkꞌaheb li rech aj pa̱banelil saꞌ lix pa̱ba̱leb. Naxchꞌolob xya̱lal chiruheb ut naxcꞌojobeb xchꞌo̱l.

⁴ Li ani naa̱tinac saꞌ jalanil a̱tin naxtenkꞌa rib xjunes rib. Abanan li ani naxchꞌolob xya̱lal li ra̱tin li Dios, li jun aꞌan naxtenkꞌaheb li rech aj pa̱banelil saꞌ lix pa̱ba̱leb.

⁵ Nacuaj raj nak che̱junilex tex-a̱tinak ta saꞌ jalanil a̱tin li incꞌaꞌ natauman ru. Abanan kꞌaxal cuiꞌchic nacuaj raj nak che̱junilex te̱ye resil reheb le̱ ras e̱ri̱tzꞌin saꞌ le̱ ra̱tinoba̱l cꞌaꞌru quicꞌuteꞌ che̱ru xban li Dios. Kꞌaxal us nak te̱ye li ra̱tin li Dios saꞌ le̱ ra̱tinoba̱l chiru li a̱tinac saꞌ jalanil a̱tin li incꞌaꞌ natauman ru. Abanan cui junak naa̱tinac saꞌ jalanil a̱tin, tento nak ta̱jalma̱nk ru li ra̱tin re nak eb laj pa̱banel teꞌxtau ru li cꞌaꞌru tixye ut teꞌtenkꞌa̱k xban.

⁶ Ex inherma̱n, ¿cꞌaꞌru ta̱oc cuiꞌ e̱re nak tincuulak e̱riqꞌuin ut tina̱tinak e̱riqꞌuin saꞌ jalanil a̱tin li incꞌaꞌ natauman ru? Ma̱cꞌaꞌ aj e. Abanan cui tina̱tinak e̱riqꞌuin saꞌ le̱ ra̱tinoba̱l, texintenkꞌa nak tinchꞌolob xya̱lal che̱ru joꞌ quicꞌuteꞌ chicuu xban li Dios. Ut ta̱cꞌanjelak che̱ru cui tinye e̱re li ra̱tin li Dios ut tinye e̱re cꞌaꞌru ta̱cꞌulma̱nk joꞌ tzꞌi̱banbil saꞌ li Santil Hu.

⁷ Ut joꞌcan ajcuiꞌ li cꞌaꞌak re ru incꞌaꞌ yoꞌyo joꞌ li xo̱lb ut li arpa. Cui incꞌaꞌ nachꞌeꞌman chi tzꞌakal incꞌaꞌ nacꞌutun li cꞌaꞌru yo̱ chixya̱basinquil ut ma̱cꞌaꞌ rajbal nak nachꞌeꞌman.

⁸ Ut nak ta̱ya̱basi̱k li trompeta re xbokbaleb li soldado, cui incꞌaꞌ chꞌolchꞌo ru lix ya̱b, ¿ma teꞌxcauresi ta biꞌ rib chi xic chi pletic?

⁹ Ut joꞌcan ajcuiꞌ la̱ex cui incꞌaꞌ nequex-a̱tinac chi tzꞌakal re ru, ¿chanru nak ta̱tauma̱nk ru li cꞌaꞌru yo̱quex chixyebal? Yal na-osoꞌ saꞌ ikꞌ ut ma̱cꞌaꞌ rajbal li te̱ye.

¹⁰ Ya̱l nak qꞌuila pa̱y chi a̱tinoba̱l cuan saꞌ ruchichꞌochꞌ ut chixjunil cuan xya̱lal ut natauman ru.

¹¹ Abanan cui la̱in incꞌaꞌ nintau ru li ra̱tinoba̱l junak, li jun aꞌan ma̱cꞌaꞌ rajbal nak yo̱k chi a̱tinac cuiqꞌuin ut ma̱cꞌaꞌ ajcuiꞌ rajbal nak yo̱kin chi a̱tinac riqꞌuin.

¹² La̱ex nequeraj xcꞌulbal li ma̱tan naxqꞌue li Santil Musikꞌej. Abanan la̱in ninye e̱re chesicꞌak li ma̱tan li natenkꞌan reheb chixjunileb laj pa̱banel.

¹³ Ut li ani cuan xma̱tan chi a̱tinac saꞌ jalanil a̱tin, li incꞌaꞌ natauman ru, chixtzꞌa̱mahak chiru li Dios re nak ta̱ru̱k tixye xya̱lal li cꞌaꞌru quixye saꞌ li jalanil a̱tin re nak ta̱ru̱k tixchꞌolob xya̱lal chiruheb li rech aj pa̱banelil.

¹⁴ Cui la̱in tintijok saꞌ jalanil a̱tin lin musikꞌ ta̱tijok ut la̱in incꞌaꞌ nintau ru li cꞌaꞌru tinye chi moco tixtenkꞌaheb li cuech aj pa̱banelil.

¹⁵ ¿Cꞌaꞌru tinba̱nu chi joꞌcanan? Tintijok riqꞌuin lin musikꞌ chi incꞌaꞌ tintau ru li tinye ut tento ajcuiꞌ nak tintijok riqꞌuin lin cꞌaꞌux re nak ta̱tauma̱nk ru li cꞌaꞌru tinye. Ut tinbicha̱nk riqꞌuin lin musikꞌ chi incꞌaꞌ tintau ru li tinye ut tinbicha̱nk ajcuiꞌ riqꞌuin lin cꞌaꞌux re nak ta̱tauma̱nk ru li cꞌaꞌru tinye.

¹⁶ Cuan li incꞌaꞌ nequeꞌxtau ru lix ya̱lal chirix li jalanil a̱tin. Cui yo̱cat chixlokꞌoninquil li Dios caꞌaj cuiꞌ riqꞌuin la̱ musikꞌ, eb aꞌan incꞌaꞌ teꞌxtau ru li ta̱ye xban nak yo̱cat chi a̱tinac saꞌ jalanil a̱tin. ¿Chan put ru nak teꞌxye “joꞌcan taxak” cui incꞌaꞌ nequeꞌxtau ru li yo̱cat chixyebal?

¹⁷ Ya̱l nak yo̱cat chixlokꞌoninquil li Dios, abanan li jun chic incꞌaꞌ ta̱tenkꞌa̱k xban la̱ tij xban nak incꞌaꞌ naxtau ru li cꞌaꞌru yo̱cat chixyebal.

¹⁸ Ninbantioxi chiru li Dios nak nabal sut nina̱tinac saꞌ jalanil a̱tin. La̱ex incꞌaꞌ quex-a̱tinac nabal sut saꞌ jalanil a̱tin joꞌ la̱in.

¹⁹ Aban la̱in ninye nak saꞌ xya̱nkeb laj pa̱banel kꞌaxal us raj nak tinye cuib oxibak chi a̱tin li teꞌxtau ru re nak tebintzol chi tzꞌakal chiru nak tinye laje̱bak mil chi a̱tin saꞌ jalanil a̱tin ut incꞌaꞌ teꞌxtau ru li tinye.

²⁰ Ex inherma̱n, chanchanakex li cꞌulaꞌal xban nak eb li cꞌulaꞌal incꞌaꞌ nequeꞌxba̱nu li ma̱usilal. Abanan mexcꞌoxlac joꞌ nequeꞌcꞌoxlac li cocꞌal. Tzꞌakalak ban re ru le̱ cꞌaꞌux xban nak moco cocꞌalex ta chic.

²¹ Joꞌcaꞌin tzꞌi̱banbil saꞌ li Santil Hu li quixye li Dios najter chirixeb laj Israel: Eb lin tenamit incꞌaꞌ nequeꞌraj rabinquil li cua̱tin. Joꞌcan nak saꞌ jalan a̱tinoba̱l tincua̱tinaheb. Tintakla jalan xtenamit chixyebal li cua̱tin reheb. Abanan chi moco chi joꞌcan tineꞌrabi, chan li Ka̱cuaꞌ. (Isa. 28:11-12)

²² Riqꞌuin a a̱tin aꞌin nakanau nak li ma̱tan re a̱tinac saꞌ jalan a̱tinoba̱l, aꞌan qꞌuebil joꞌ retalil lix cuanquilal li Dios chiruheb li ma̱cuaꞌeb aj pa̱banel. Ut li ma̱tan re xyebal li cꞌaꞌru naxcꞌutbesi li Dios, aꞌan qꞌuebil re xtenkꞌanquileb laj pa̱banel.

²³ Nak eb laj pa̱banel teꞌxchꞌutub ribeb ut cui chixjunileb teꞌoc chi a̱tinac saꞌ jalan a̱tin incꞌaꞌ natauman ru, cui teꞌoc aran li ma̱cuaꞌeb aj pa̱banel malaj teꞌoc aran li incꞌaꞌ nequeꞌxtau ru li naꞌleb aꞌin, teꞌxye nak lo̱queb ru.

²⁴ Abanan cui eb laj pa̱banel teꞌxchꞌolob xya̱lal li cꞌaꞌru quiyeheꞌ reheb xban li Dios, nak tox-oc saꞌ xya̱nkeb junak ma̱cuaꞌ aj pa̱banel malaj li toj ma̱jiꞌ naxtau ru lix ya̱lal aꞌan, li jun aꞌan tixqꞌue retal nak aꞌan aj ma̱c ut tixqꞌue ajcuiꞌ retal li cꞌaꞌru yo̱ chirabinquil.

²⁵ Li Dios tixcꞌut chiru chi tzꞌakal cꞌaꞌru cuan saꞌ xchꞌo̱l. Ut li jun aꞌan tixcuikꞌib rib ut tixlokꞌoni li Dios ut tixye nak relic chi ya̱l li Dios cuan saꞌ xya̱nkeb laj pa̱banel.

Tzꞌakal re ru te̱ba̱nu nak te̱chꞌutub e̱rib

²⁶ Ex herma̱n, aꞌan aꞌin li nacuaj xyebal e̱re. Nak te̱chꞌutub e̱rib chixlokꞌoninquil li Dios, jalan jala̱nk te̱ba̱nu che̱ju̱nkalex. Cuan tixcꞌam chak junak bich; cuan li ta̱qꞌuehok naꞌleb; cuan li ta̱yehok re li quicꞌuteꞌ chiru xban li Dios; cuan li ta̱yehok junak naꞌleb riqꞌuin jalanil a̱tin ut cuan ajcuiꞌ li ta̱jalok ru li ta̱yema̱nk saꞌ li jalanil a̱tin. Abanan chixjunil li te̱ba̱nu, cheba̱nuhak re xtenkꞌanquileb laj pa̱banel chi qꞌui̱c saꞌ lix pa̱ba̱leb.

²⁷ Cui cuanqueb li teꞌraj a̱tinac saꞌ jalanil a̱tin, naru nequeꞌa̱tinac cuibak malaj oxibak ut chixju̱nkaleb teꞌa̱tinak. Ut cua̱nk ajcuiꞌ junak chic li ta̱jalok ru li teꞌxye.

²⁸ Abanan cui ma̱ ani naru ta̱jalok ru li jalanil a̱tin, incꞌaꞌ teꞌa̱tinak saꞌ jalanil a̱tin saꞌ li chꞌutubaj ib. Yal saꞌ xchꞌo̱leb ban teꞌa̱tinak chiru li Dios.

²⁹ Cheqꞌueheb chi a̱tinac cuibak malaj oxibak li profeta li nequeꞌyehoc resil li cꞌaꞌru quicꞌuteꞌ chiruheb xban li Dios, ut li jun chꞌol chic teꞌtzꞌilok a̱tin chirix re xnaubal ma riqꞌuin na li Dios xchal chak li xeꞌxye.

³⁰ Ut cui cuan cꞌaꞌru ta̱cꞌutekꞌ xban li Dios chiru li ani cꞌojcꞌo aran saꞌ li chꞌutubaj ib, li jun aꞌan tixtzꞌa̱ma chiru li yo̱ chi a̱tinac nak tixye li cꞌaꞌru xcꞌuteꞌ chiru xban li Dios. Ut li ani yo̱ chi a̱tinac chixqꞌuehak xnaꞌaj re ta̱a̱tinak.

³¹ Che̱junju̱nkalex ta̱ru̱k te̱ye li cꞌaꞌru xcꞌuteꞌ che̱ru xban li Dios re nak chixjunileb laj pa̱banel teꞌxtzol rib ut ta̱cacuu̱k xchꞌo̱leb saꞌ lix pa̱ba̱leb.

³² Cui ya̱l nak li Dios xcꞌutuc che̱ru li cꞌaꞌru te̱ye, li Dios textenkꞌa chiroybeninquil jokꞌe tex-oc chi a̱tinac re nak chi joꞌcan che̱junju̱nkalex tex-a̱tinak.

³³ Li Dios incꞌaꞌ naraj nak ta̱cua̱nk li poꞌoj ib saꞌ xya̱nkeb laj pa̱banel. Naraj ban nak cua̱nk li tuktu̱quil usilal saꞌ xya̱nkeb.

³⁴ Eb li ixk incꞌaꞌ teꞌa̱tinak saꞌ li chꞌutubaj ib re xlokꞌoninquil li Dios. Teꞌxpa̱b aꞌin xban nak joꞌcan tzꞌi̱banbil saꞌ lix chakꞌrabeb laj judío. Joꞌcaꞌin na-uxman saꞌ xya̱nkeb chixjunileb laj pa̱banel yalak bar.

³⁵ Cui cuan cꞌaꞌ re ru teꞌraj xnaubal cheꞌxpatzꞌak reheb lix be̱lom nak teꞌcuulak saꞌ rochocheb ut aꞌan tixchꞌolob xya̱lal. Xuta̱nal chokꞌ reheb cui ta̱a̱tinak junak ixk saꞌ xya̱nkeb nak chꞌutchꞌu̱queb chixlokꞌoninquil li Dios.

³⁶ Chijulticokꞌ e̱re nak ma̱cuaꞌex la̱ex quextiquiban chak re li ra̱tin li Dios. Ac cuan ajcuiꞌ chalen chak junxil. Ut moco caꞌaj cuiꞌ ta la̱ex quex-abin re.

³⁷ Ma̱re cuan saꞌ e̱ya̱nk li naxcꞌoxla nak aꞌan profeta malaj naxcꞌoxla nak cuan jun chic xma̱tan qꞌuebil re xban li Santil Musikꞌej. Cui joꞌcan naxcꞌoxla, chixnauhak nak li yo̱quin chixtzꞌi̱banquil saꞌ li hu aꞌin, aꞌan ajcuiꞌ li chakꞌrab qꞌuebil cue xban li Dios.

³⁸ Ut cui cuan junak incꞌaꞌ naxpa̱b li yo̱quin chixtzꞌi̱banquil, la̱ex incꞌaꞌ ajcuiꞌ te̱pa̱b li cꞌaꞌru tixye aꞌan.

³⁹ Joꞌcan ut ex inherma̱n, cheqꞌuehak e̱chꞌo̱l chixchꞌolobanquil xya̱lal li cꞌaꞌru quicꞌuteꞌ che̱ru xban li Dios ut me̱ram chiru li ani naraj a̱tinac saꞌ jalanil a̱tin.

⁴⁰ Abanan li cꞌaꞌru te̱ba̱nu nak te̱chꞌutub e̱rib, cheba̱nuhak chixjunil chi tzꞌakal re ru ut saꞌ xya̱lal.