1 Corintios 13 - Li Santil hu

Li rahoc, aꞌan li kꞌaxal lokꞌ

¹ Cui ta la̱in qꞌuebil inma̱tan xban li Dios chi a̱tinac saꞌ ra̱tinoba̱leb li cui̱nk ut cui ta cuan inma̱tan chi a̱tinac saꞌ ra̱tinoba̱leb li ángel, abanan cui incꞌaꞌ ninraheb li cuas cui̱tzꞌin, la̱in chanchanin li chꞌi̱chꞌ natamba̱c xya̱b ut chanchanin li campana natzintzot xya̱b chi ma̱cꞌaꞌ rajbal.

² Ut cui ta qꞌuebil inma̱tan xban li Dios chixyebal li naxcꞌut chicuu, ut cui ta ninnau chixjunil li cꞌaꞌak re ru ut cui ta nintau ru lix ya̱lal, abanan cui incꞌaꞌ ninraheb li cuas cui̱tzꞌin ma̱cꞌaꞌ nin-oc cuiꞌ. Ut cui ta cuan tzꞌakal inpa̱ba̱l re nak ta̱jalekꞌ xnaꞌaj junak li tzu̱l, abanan cui incꞌaꞌ ninraheb li cuas cui̱tzꞌin, ma̱cꞌaꞌ nin-oc cuiꞌ.

³ Cui ta tinsi chixjunil li cꞌaꞌru cuan cue re tinqꞌueheb chi cuaꞌac li nebaꞌ ut cui ta tinkꞌaxtesi cuib chi cꞌatecꞌ xban lin pa̱ba̱l, ut cui incꞌaꞌ ninraheb li cuas cui̱tzꞌin, ma̱cꞌaꞌ na-oc cuiꞌ li ninba̱nu.

⁴ Li ani narahoc, naxcuy li raylal ut kꞌaxal cha̱bil. Li ani narahoc incꞌaꞌ nacakalin, incꞌaꞌ naxnimobresi rib ut incꞌaꞌ naxkꞌetkꞌeti rib.

⁵ Li ani narahoc incꞌaꞌ nahoboc. Incꞌaꞌ naxsicꞌ xcha̱bilal xjunes rib. Li ani narahoc incꞌaꞌ najoskꞌoꞌ ut incꞌaꞌ naxqꞌue saꞌ xchꞌo̱l li cꞌaꞌru naxcꞌul.

⁶ Li ani narahoc incꞌaꞌ nasahoꞌ xchꞌo̱l nak eb li ras ri̱tzꞌin nequeꞌxba̱nu li incꞌaꞌ us. Nasahoꞌ ban xchꞌo̱l nak cuanqueb saꞌ xya̱lal.

⁷ Li ani narahoc incꞌaꞌ narahoꞌ xchꞌo̱l xban li cꞌaꞌru na-ux re xbaneb li ras ri̱tzꞌin. Junelic ban cau xchꞌo̱l chirixeb. Li ani narahoc incꞌaꞌ nachꞌinan xchꞌo̱l. Naxcuy ban xnumsinquil chixjunil li raylal.

⁸ Li rahoc ta̱cua̱nk chi junelic. Ta̱cuulak xkꞌehil nak incꞌaꞌ chic ta̱cꞌanjelak li ma̱tan re cua̱nc chi profetil ut ta̱cuulak xkꞌehil nak incꞌaꞌ chic ta̱cꞌanjelak li ma̱tan re a̱tinac saꞌ jalanil a̱tin. Ut ta̱cuulak xkꞌehil nak incꞌaꞌ chic ta̱cꞌanjelak li ma̱tan re xtaubal ru chixjunil. Abanan li rahoc incꞌaꞌ nalaj, incꞌaꞌ na-osoꞌ. Cua̱nk ban chi junelic.

⁹ Usta cuanqueb li cuan xma̱taneb anakcuan re xnaubal li cꞌaꞌak re ru, abanan caꞌchꞌin ajcuiꞌ nequeꞌxnau. Usta cuanqueb li cuan xma̱taneb chixyebal li cꞌaꞌru nacꞌutbesi̱c chiruheb xban li Dios, abanan caꞌchꞌin ajcuiꞌ li nacꞌuteꞌ chiruheb.

¹⁰ Ut nak ta̱tzꞌaklok ru chixjunil li naraj xba̱nunquil li Dios, incꞌaꞌ chic teꞌcꞌanjelak eb li ma̱tan aꞌin li incꞌaꞌ tzꞌakal re ru.

¹¹ Nak toj caꞌchꞌinin chak quina̱tinac joꞌ nequeꞌa̱tinac li cocꞌal. Quincꞌoxlac joꞌ nequeꞌcꞌoxlac li cocꞌal. Ut quinba̱nu joꞌ nequeꞌxba̱nu li cocꞌal. Abanan nak quincui̱nkiloꞌ quincanab xba̱nunquil lix naꞌlebeb li cocꞌal.

¹² Anakcuan caꞌchꞌin ajcuiꞌ nakanau. Chanchan nak noco-iloc saꞌ junak lem moymoy ru. Abanan saꞌ jun cutan takil ru li Dios ut takanau chic chixjunil chi tzꞌakal joꞌ nak li Dios naxnau ku la̱o.

¹³ Joꞌcan nak li pa̱ba̱l, li yoꞌoni̱nc ut li rahoc cua̱nk chi junelic. Abanan li kꞌaxal nim xcuanquil saꞌ xya̱nkeb li oxib aꞌin, aꞌan li rahoc.