1 Corintios 12 - Li Santil hu

Li kama̱tan qꞌuebil ke xban li Santil Musikꞌej

¹ Ex inherma̱n, la̱in nacuaj nak te̱tau ru lix ya̱lal li ma̱tan li naxqꞌue li Santil Musikꞌej re li junju̱nk re nak ta̱cꞌanjelak chiru li Dios.

² Nak toj ma̱jiꞌ nequexpa̱ban chak queqꞌue chak xcuanquil li yi̱banbil dios li incꞌaꞌ nequeꞌa̱tinac ut queqꞌue e̱rib chi balakꞌi̱c riqꞌuin xpa̱banquileb.

³ Joꞌcan nak nacuaj te̱nau nak li ani cuan li Santil Musikꞌej riqꞌuin, ma̱ jokꞌe tixmajecua li Jesús. Ut ma̱ ani ta̱ru̱k tixye chi anchal xchꞌo̱l nak li Jesús aꞌan li Ka̱cuaꞌ cui ma̱cꞌaꞌ li Santil Musikꞌej riqꞌuin.

⁴ Jalan jala̱nk li kama̱tan naxqꞌue ke li Santil Musikꞌej re nak tocꞌanjelak chiru li Ka̱cuaꞌ. Abanan li Santil Musikꞌej jun ajcuiꞌ ut aꞌan naqꞌuehoc re chixjunil.

⁵ Jalan jala̱nk li kacꞌanjel chiru li Ka̱cuaꞌ abanan jun ajcuiꞌ li Ka̱cuaꞌ cuan saꞌ kabe̱n ut caꞌaj cuiꞌ chiru aꞌan nococꞌanjelac.

⁶ Jalan jala̱nk li cꞌanjel nocoxqꞌue cuiꞌ li Dios. Abanan jun ajcuiꞌ li Dios ut aꞌan li natenkꞌan ke chi xba̱nunquil li cꞌanjel li naxqꞌue ke.

⁷ Riqꞌuin li ma̱tan qꞌuebil re li junju̱nk nacꞌutun nak cuan li Santil Musikꞌej riqꞌuin, ut li ma̱tan aꞌan qꞌuebil re, re xtenkꞌanquileb chixjunileb laj pa̱banel.

⁸ Cuan li qꞌuebileb xma̱tan xban li Santil Musikꞌej re qꞌuehoc cha̱bil naꞌleb ut cuan li qꞌuebileb xma̱tan xban li Santil Musikꞌej re xchꞌolobanquil li ya̱l. Abanan jun ajcuiꞌ li Santil Musikꞌej li naqꞌuehoc re xma̱tan li junju̱nk.

⁹ Cuan li qꞌuebileb xma̱tan xban li Santil Musikꞌej chi xpa̱banquil nak teꞌxcꞌul li cꞌaꞌru nequeꞌxtzꞌa̱ma chiru li Dios. Ut cuan ajcuiꞌ qꞌuebileb xma̱tan xban li Santil Musikꞌej re xqꞌuirtesinquileb li yaj. Abanan jun ajcuiꞌ li Santil Musikꞌej li naqꞌuehoc xma̱tan li junju̱nk.

¹⁰ Cuan qꞌuebileb xma̱tan chi ba̱nu̱nc milagro ut cuan qꞌuebileb xma̱tan chi xchꞌolobanquil resil li cꞌaꞌru quicꞌutbesi̱c chiru xban li Dios. Ut cuan qꞌuebileb xma̱tan re xtaubal ru cui li Santil Musikꞌej cuan riqꞌuin junak malaj ut cuan li ma̱us aj musikꞌej riqꞌuin. Ut cuan qꞌuebileb xma̱tan chi a̱tinac saꞌ jalan a̱tin incꞌaꞌ natauman ru ut cuan ajcuiꞌ qꞌuebileb xma̱tan chi jaloc ru li jalanil a̱tin.

¹¹ Abanan chixjunil li ma̱tan aꞌin qꞌuebil ke xban li jun chi Santil Musikꞌej. Aꞌan naqꞌuehoc xma̱taneb li junju̱nk joꞌ naraj aꞌan.

Junajo nak cuanco riqꞌuin li Cristo

¹² Li jun chi tzꞌejcualej tzꞌakal re ru. Cuan rok rukꞌ. Cuan chixjunil. Usta jalan jala̱nk lix chaꞌal cuan, abanan jun ajcuiꞌ chi tzꞌejcualej nak cuan. Joꞌcan ajcuiꞌ la̱o aj pa̱banel. Nabalo, abanan junajo chi tzꞌejcualej riqꞌuin li Cristo.

¹³ Chikajunilo junajo riqꞌuin li Cristo usta aj judío, usta ma̱cuaꞌ aj judío, usta lokꞌbil mo̱s, usta incꞌaꞌ. Xkacꞌul li cubi haꞌ saꞌ xcꞌabaꞌ li jun chi Santil Musikꞌej ut chikajunilo cuan li Santil Musikꞌej kiqꞌuin. Joꞌcan nak junajo riqꞌuin li Cristo.

¹⁴ Li jun chi tzꞌejcualej moco jun ta ajcuiꞌ lix chaꞌal cuan. Nabal pa̱y ru lix chaꞌal cuan re ut jalan jala̱nk xcꞌanjel li junju̱nk.

¹⁵ Cui naru raj ta̱a̱tinak li rok junak li tzꞌejcualej, ¿ma naru tixye ma̱cuaꞌin xcomon li tzꞌejcualej xban nak ma̱cuaꞌin li rukꞌ? ¿Ma yal xban ta biꞌ nak ma̱cuaꞌ ukꞌej nak ma̱cuaꞌak xcomon li tzꞌejcualej?

¹⁶ Cui lix xic junak li tzꞌejcualej tixye: ma̱cuaꞌin xcomon li tzꞌejcualej xban nak ma̱cuaꞌin li xnakꞌ ru, ¿ma yal ta biꞌ xban nak ma̱cuaꞌ xnakꞌ u nak ma̱cuaꞌak xcomon li tzꞌejcualej?

¹⁷ Cui ta chixjunil li tzꞌejcualej xnakꞌ u, ¿chan raj ru nak to-abi̱nk? Ut cui ta chixjunil li tzꞌejcualej xic, ¿chan raj ru nak takutzꞌ li cꞌaꞌak re ru?

¹⁸ Abanan li Dios quixqꞌue saꞌ xnaꞌaj chi tzꞌakal re ru lix chaꞌal li katzꞌejcual joꞌ quiraj aꞌan.

¹⁹ Cui ta jun pa̱y ajcuiꞌ ru lix chaꞌal li tzꞌejcualej, li tzꞌejcualej aꞌan incꞌaꞌ raj tzꞌakal re ru nak cuan.

²⁰ Abanan nabal pa̱y xchaꞌal li tzꞌejcualej cuan, ut li tzꞌejcualej jun ajcuiꞌ.

²¹ Cui naru raj ta̱a̱tinak li xnakꞌ u incꞌaꞌ naru tixye re li ukꞌej: la̱at incꞌaꞌ nacatcꞌanjelac chicuu. Chi moco naru tixye li jolomej re li okej: la̱ex incꞌaꞌ nequexcꞌanjelac chicuu.

²² Kꞌaxal ban chic nabal xcꞌanjeleb lix chaꞌal li katzꞌejcual li chanchan ma̱cꞌaꞌeb xcꞌanjel.

²³ Cuan xchaꞌal li katzꞌejcual naka-oxlokꞌi ut cuan ajcuiꞌ xchaꞌal li katzꞌejcual nocoxuta̱na̱c xban ut nakatzꞌap re xqꞌuebal xlokꞌal.

²⁴ Ut lix chaꞌal li katzꞌejcual li incꞌaꞌ nocoxuta̱na̱c xban, aꞌan incꞌaꞌ nakatzꞌap. Abanan li Dios quixqꞌue chixjunil lix chaꞌal li katzꞌejcual ut quixqꞌue xlokꞌal li junju̱nk.

²⁵ Quixqꞌue xlokꞌal chixjunil xchaꞌal li tzꞌejcualej re nak ma̱cꞌaꞌak xchꞌaꞌajquilal li tzꞌejcualej. Chixjunil ban lix chaꞌal li tzꞌejcualej teꞌxtenkꞌa rib chi ribileb rib.

²⁶ Cui junak xchaꞌal li tzꞌejcualej ra naxcꞌul, narahoꞌ ajcuiꞌ chixjunil li tzꞌejcualej. Ut cui junak xchaꞌal li tzꞌejcualej naqꞌueheꞌ xlokꞌal, chixjunil li tzꞌejcualej naqꞌueman ajcuiꞌ xlokꞌal.

²⁷ Joꞌcan ajcuiꞌ la̱o aj pa̱banel. Junajo chi tzꞌejcualej riqꞌuin li Cristo. Chikaju̱nkalo la̱o rok rukꞌ li Cristo ut li junju̱nk cuan xcꞌanjel chiru li Dios.

²⁸ Li xchalal li tzꞌejcualej jalan jala̱nk xcꞌanjel li junju̱nk. Joꞌcan ajcuiꞌ nak jalan jala̱nk xma̱taneb laj pa̱banel qꞌuebileb re xban li Dios re nak teꞌcꞌanjelak chiru. Xbe̱n, cuanqueb li qꞌuebileb xma̱tan chi cꞌanjelac chokꞌ apóstol. Xcab, cuanqueb li qꞌuebileb xma̱tan chi cꞌanjelac chokꞌ profeta. Rox, cuanqueb li qꞌuebileb xma̱tan chi cꞌanjelac chokꞌ aj tzolonel. Ut cuanqueb li qꞌuebileb xma̱tan chixba̱nunquileb li milagro. Cuanqueb li qꞌuebileb xma̱tan chixqꞌuirtesinquileb li yaj; cuanqueb li qꞌuebileb xma̱tan chixtenkꞌanquileb li ras ri̱tzꞌin. Cuanqueb li qꞌuebileb xma̱tan chi takla̱nc; ut cuanqueb ajcuiꞌ qꞌuebileb xma̱tan chi a̱tinac saꞌ jalanil a̱tin incꞌaꞌ natauman ru.

²⁹ ¿Ma chixjunileb ta biꞌ apostoleb? ¿Ma chixjunileb ta biꞌ profeteb? ¿Ma chixjunileb ta biꞌ nequeꞌxchꞌolob xya̱lal li ra̱tin li Dios? ¿Ma chixjunileb ta biꞌ nequeꞌba̱nun milagro?

³⁰ ¿Ma chixjunileb ta biꞌ nequeꞌqꞌuirtesin yaj? ¿Ma chixjunileb ta biꞌ nequeꞌa̱tinac saꞌ jalanil a̱tin? ¿Ma chixjunileb ta biꞌ nequeꞌjaloc ru li jalanil a̱tin?

³¹ Moco juntakꞌe̱t ta xma̱taneb li junju̱nk. Jalan jala̱nk ban xma̱taneb. Chesicꞌak le̱ ma̱tan li kꞌaxal cha̱bil re xtenkꞌanquileb le̱ rech aj pa̱banelil. Anakcuan tinye e̱re jun li naꞌleb kꞌaxal cuiꞌchic tento xba̱nunquil. Ut aꞌan aꞌin: nak te̱ra e̱rib chi ribil e̱rib.