1 Corintios 11 - Li Santil hu

¹ Joꞌcan ut nak la̱ex chetzolak e̱rib cuiqꞌuin xban nak la̱in xintzol cuib riqꞌuin li Cristo.

² Ex inherma̱n, cꞌajoꞌ nasahoꞌ saꞌ inchꞌo̱l nak ninjulticoꞌ e̱re ut yo̱quex chixba̱nunquil li tijleb xexintzol cuiꞌ.

³ Abanan cuan chic cꞌaꞌ re ru nacuaj xyebal e̱re. Aꞌan aꞌin: li be̱lomej, aꞌan najolomin re li rixakil ut li Cristo, aꞌan najolomin re li cui̱nk ut li Dios, aꞌan najolomin re li Cristo.

⁴ Cui junak cui̱nk incꞌaꞌ narisi lix punit nak na-oc chi tijoc ut nak na-oc chixyebal ra̱tin li Dios, li jun aꞌan incꞌaꞌ naxqꞌue xlokꞌal li Cristo.

⁵ Ut cui junak ixk incꞌaꞌ naxtzꞌap lix jolom nak ta̱tijok ut nak tixye ra̱tin li Dios, li ixk aꞌan naxcꞌut xxuta̱n lix be̱lom. Chanchaneb li ixk li besbileb chixjunil li rismal xjolom.

⁶ Joꞌcan nak cui li ixk incꞌaꞌ naxtzꞌap xjolom, chixbesak chixjunil li rismal xjolom. Ut cui incꞌaꞌ naraj xbesbal li rismal xjolom xban nak naxcꞌoxla nak xuta̱nal chokꞌ re, kꞌaxal us chokꞌ re li ixk aꞌan cui tixtzꞌap lix jolom.

⁷ Incꞌaꞌ us nak tixtzꞌap xjolom li cui̱nk xban nak li cui̱nk yi̱banbil joꞌ li riloba̱l li Dios ut naxcꞌut xlokꞌal li Dios. Aꞌut li ixk naxcꞌut xlokꞌal lix be̱lom.

⁸ Li cui̱nk incꞌaꞌ quiyoꞌobtesi̱c chak xban li Dios riqꞌuin li ixk; aban li ixk quiyoꞌobtesi̱c chak riqꞌuin li cui̱nk.

⁹ Ut li cui̱nk incꞌaꞌ quiyoꞌobtesi̱c saꞌ xcꞌabaꞌ li ixk. Li ixk ban quiyoꞌobtesi̱c saꞌ xcꞌabaꞌ li cui̱nk.

¹⁰ Joꞌcan nak li ixk tixtzꞌap lix jolom ut aꞌan retalil chiruheb li ángel nak li cui̱nk cuan xcuanquil saꞌ xbe̱n.

¹¹ Chiru li Ka̱cuaꞌ ma̱ jun cuan xcuanquil chi moco li cui̱nk chi moco li ixk xban nak juntakꞌe̱teb chiru li Dios.

¹² Ut joꞌ nak li ixk quiyoꞌobtesi̱c riqꞌuin li cui̱nk, joꞌcan ajcuiꞌ li cui̱nk nayoꞌla riqꞌuin li ixk. Li cui̱nk joꞌ ajcuiꞌ li ixk yoꞌobtesinbileb xban li Dios joꞌ ajcuiꞌ chixjunil li cꞌaꞌak re ru cuan.

¹³ ¿Cꞌaꞌru nequecꞌoxla la̱ex? ¿Ma us nak li ixk ta̱tijok chiru li Dios cui incꞌaꞌ tixtzꞌap lix jolom?

¹⁴ Ac nequenau nak ac re li cui̱nk nak incꞌaꞌ tixcanab chi chamocꞌ li rismal xjolom. Xuta̱nal chokꞌ re li cui̱nk cui naxcanab chi chamocꞌ li rismal xjolom.

¹⁵ Abanan li ixk aꞌan xlokꞌal nak cham li rismal xjolom xban nak qꞌuebil re xban li Dios re xtzꞌapbal lix jolom.

¹⁶ Ut cui cuan junak e̱re naraj cuechꞌi̱nc chirix aꞌin, la̱in tinye re aꞌan nak la̱o li apóstol joꞌ ajcuiꞌ eb laj pa̱banel cꞌaynako chixba̱nunquil chi joꞌcan yalak bar.

Li Lokꞌoni̱nc re Xjulticanquil lix Camic li Jesucristo

¹⁷ Nacuaj ajcuiꞌ xyebal e̱re nak cuan li incꞌaꞌ us yo̱quex chixba̱nunquil. Nak nequechꞌutub e̱rib chixlokꞌoninquil li Dios ma̱cuaꞌ li us nequeba̱nu. Aꞌ chic li incꞌaꞌ us nequeba̱nu.

¹⁸ Li xbe̱n tinye e̱re, aꞌan aꞌin: xcuabi resil nak incꞌaꞌ junaj le̱ chꞌo̱l ut junes xcuechꞌinquil e̱rib nequeba̱nu nak nequechꞌutub e̱rib chi lokꞌoni̱nc re xjulticanquil lix camic li Jesucristo. Ut la̱in nincꞌoxla nak ma̱re ya̱l ajcuiꞌ li cꞌaꞌru xcuabi.

¹⁹ Nak nacuan li cuechꞌi̱nc ib saꞌ e̱ya̱nk, riqꞌuin aꞌan nacꞌutun ani li tzꞌakal aj pa̱banel ut ani incꞌaꞌ.

²⁰ La̱ex nequechꞌutub e̱rib chi tzaca̱nc ut nequeye nak yo̱quex chixba̱nunquil li lokꞌoni̱nc. Abanan ma̱cuaꞌ chic xjulticanquil lix camic li Ka̱cuaꞌ nequeba̱nu. Aꞌ ban chic le̱ re nequeba̱nu.

²¹ Cuan li nequeꞌxse̱ba rib chixcꞌulbal lix cua ut incꞌaꞌ nequeꞌxcꞌoxla li jun chꞌol chic. Xban aꞌan cuan li nabal nequeꞌtzꞌak ut cuan li nequeꞌcala ut cuan li nequeꞌcana chi teꞌtzꞌoca̱k xban nak incꞌaꞌ nequeꞌtzꞌak.

²² ¿Ma ma̱cꞌaꞌ ta biꞌ e̱rochoch bar textzaca̱nk cuiꞌ nak nequeba̱nu chi joꞌcan? Yo̱quex chixtzꞌekta̱nanquileb le̱ rech aj pa̱banelil ut yo̱quex chixcꞌutbal xxuta̱neb li ma̱cꞌaꞌ cuanqueb re. ¿Cꞌaꞌru tinye e̱re? ¿Ma tinye e̱re nak us yo̱quex chixba̱nunquil? Ma̱ jokꞌe tinye nak us yo̱quex.

²³ Ac xincꞌut che̱ru lix ya̱lal li cuaꞌac re xjulticanquil lix camic li Jesucristo. Aꞌan ajcuiꞌ li quixcꞌut chicuu li Ka̱cuaꞌ. Saꞌ ajcuiꞌ li kꞌojyi̱n nak toj ma̱jiꞌ quikꞌaxtesi̱c li Ka̱cuaꞌ Jesucristo quixchap li caxlan cua.

²⁴ Ut nak quixbantioxi chiru li Dios, quixjachi li caxlan cua ut quixye reheb: Tzacahomak. Aꞌan aꞌin lin tibel rahobtesinbil saꞌ e̱cꞌabaꞌ la̱ex. Cheba̱nuhak li caxlan cua aꞌin re xjulticanquil li usilal xinba̱nu e̱re, chan.

²⁵ Ut nak queꞌrakeꞌ chi cuaꞌac quixchap ajcuiꞌ li secꞌ ut quixye: Li ucꞌa aꞌin, aꞌan retalil li Acꞌ Contrato riqꞌuin li Dios. Ta̱xakaba̱nk re xcuanquil xban lin quiqꞌuel ta̱hoyekꞌ. Rajlal nak te̱rucꞌ xsaꞌ li secꞌ aꞌin, cheba̱nuhak re xjulticanquil lin camic saꞌ e̱cꞌabaꞌ la̱ex, chan li Jesús.

²⁶ Joꞌcan nak ninye e̱re rajlal nak te̱tzaca a caxlan cua aꞌin ut te̱rucꞌ xsaꞌ li secꞌ aꞌin, te̱jultica xcamic li Cristo. Cheba̱nuhak aꞌan toj ta̱cꞌulu̱nk cuiꞌchic li Ka̱cuaꞌ Jesucristo.

²⁷ Joꞌcan ut li ani tixcuaꞌ li caxlan cua ut ta̱rucꞌ li ucꞌa re xjulticanquil lix camic li Ka̱cuaꞌ Jesucristo ut incꞌaꞌ naxqꞌue xlokꞌal li Cristo, li jun aꞌan yo̱ chi ma̱cobc chiru li Ka̱cuaꞌ ut yo̱ chixtzꞌekta̱nanquil xcuanquil lix camic li Ka̱cuaꞌ Jesucristo.

²⁸ Joꞌcan ut li junju̱nk tento tixqꞌue retal ma ti̱c lix yuꞌam saꞌ lix pa̱ba̱l nak toj ma̱jiꞌ naxcꞌul li caxlan cua ut li ucꞌa.

²⁹ Li ani naxcꞌul li caxlan cua ut li ucꞌa chi incꞌaꞌ naxqꞌue xcuanquil lix camic li Ka̱cuaꞌ Jesucristo, tojba ma̱c naxbok saꞌ xbe̱n.

³⁰ Aꞌin ut xya̱lal nak nabal yajeb ut ma̱cꞌaꞌeb xmetzꞌe̱u saꞌ e̱ya̱nk ut cuanqueb ajcuiꞌ ac xeꞌcam.

³¹ Abanan cui nakecꞌa kib nak ti̱c li kayuꞌam nak nakatzaca incꞌaꞌ tento nak li Ka̱cuaꞌ tixrak a̱tin saꞌ kabe̱n.

³² Ut nak narakman a̱tin saꞌ kabe̱n xban li Ka̱cuaꞌ nocokꞌuseꞌ re nak incꞌaꞌ tzꞌekta̱nanbilako kochbeneb li incꞌaꞌ nequeꞌpa̱ban.

³³ Joꞌcan ut ex inherma̱n, nak te̱chꞌutub e̱rib chixba̱nunquil li lokꞌoni̱nc re xjulticanquil lix camic li Ka̱cuaꞌ Jesucristo, cheroybeni e̱rib chi ribil e̱rib re nak saꞌ comonil te̱ba̱nu.

³⁴ Cui cuan junak saꞌ e̱ya̱nk ta̱tzꞌoca̱k, chicuaꞌak chak saꞌ rochoch re nak incꞌaꞌ te̱bok raylal saꞌ e̱be̱n nak te̱chꞌutub e̱rib. Toj cuan chic cꞌaꞌak re ru incꞌaꞌ xinye e̱re. Nak tincuulak che̱rilbal tinchꞌolob xya̱lal che̱ru li toj ma̱jiꞌ xinye e̱re.