Vabalaniya 9 - Ibibiliya mu Shimakonde Imbodi Yaambi na dimbande dya Imbodi Yakala

Lyutu lyakwilimyanga mushilambo amu

¹ Mwenu, imbodi itandi yo indívanavo upangaji wake wakulipudidya na lyutu lyakwilimyanga mushilambo amu.

² Doni, vandípanganianga yema na isemu itandi indípagwa ikalaboi, imesha na magung'u akumuumidya Nnungu; lyutu alyo, vashishema Lyutu Lyakwilimyanga.

³ Panyuma inguvo yambili indípagwa isemu yavashema Lyutu Lyakwilimyanga-uti,

⁴ kushinu kushipagwa alutali lwashaabu lwakututumididya lubani pamo na lishanduku lyaimbodi lyavambumbukidyenge kula upande na shaabu. Lishanduku ali, shindípagwa shombo shashaabu shivénavo manaa, ipimbo imwe Aloni íshiipukila, namomo kupagwa mabau aimbodi.

⁵ Pashanya lishanduku alyo vandípagwa makelubi valishangelo, vimbedi vyave vishindainikidya lyutu lyakudimanga shitundi shake Nnungu. Kwaing'ano yavinu avi, ambi apa hatuulula kutadyalyedya uti.

⁶ Mwenu, vinu pavapanganianga shana, vakulangalalela-shadaka vandáinjila isemu itandi yamwiyema kenga mwanamaduva vatandedya utumika wave kwakulipudya.

⁷ Kanji isemu yambili ainjila gweka nkúlangalalela-shadaka nkumene, jojo jo ainjila mwanda umo kwamwaka. Painjila po, hanainjila bila myadi vyakumuumidya Nnungu kwamwaa wake jo mwene na kwamwaa washimadambi shavatandile venentete kwabila kulimanya.

⁸ Doni, Imumu Wanashwe ankulodya ìpagwite avi isemu itandi, indila yuka Lyutu Lyakwilimyanga-uti hainava kuunguligwa.

⁹ Au ni mpano ulilódya wakati au kenga dinudyo na vyadaka vyúma, havyulula kutadya awikile popo makumbukililo amuntima ankúlipudya ajo:

¹⁰ vyovyo vyo, vishamba vyakulya, vyakukumbila na mwakunavangila medi; malailililo ala mwakushungila mili andipagwa mpaka muwakati waupangaji waambi.

Klistu ni likameko lyakwambola kúkamalilika

¹¹ Napane Klistu paumilidile kenga nkúlangalalela-shadaka nkumene wavinu vyambone vipagwíte ambi apa, nae andipita isemu itandi yamwiyema ing'umene na yakulinganana ipúnda ailá inji yákakandyenge munu, yani íkave yashilambo ashi,

¹² andiinjila Lyutu Lyakwilimyanga-uti kwamwanda umo tu bai i kwaindila yamyadi vyavambudi kwali vyavang'ombe kanji kwamyadi vyake jo mwene kutwala kuva likameko lyakwambola kúkamalilika.

¹³ Mwenu, pakuva tundimanya kenga kunyunyangiligwa kwamyadi vyambudi, vyang'ombe na liu lyang'ombe namako kunkuvatadya vailimyangigwe vanu vambukishígwe ushapu kwakuushaniangigwa ushapu wamumili,

¹⁴ kushi napane myadi vimwe Klistu áukile ndalijaula jo mwene kwaindila ya Imumu ákamalilika pakave makosha kwaupande wa Nnungu, hayululika kutuushanianga vitendo vyakupela mmakumbukililo etu amuntima kwambangidya tuntumike Nnungu mumi?

¹⁵ Napavedoni, nae ni nkúdumangila waimbodi yaambi kwa avalá vashamégwa namu Nnungu pakulota vapate akulá kulivikila, yani maleko ákamalilika kwoda kupela kwake kundivaambola mumakosha avatandile mwimbodi itandi.

¹⁶ Mwaa papagwite malailililo amaleko, hanatumika akanapela aijá mwene nkúlaililila;

¹⁷ malailililo amaleko andatumika bai kukaumilila kupela kumwe aijá nkúlaililila mwaa hayulukika kutumika muwakati wanama mwene.

¹⁸ Ni ashi, ata yo imbodi itandi hayukile ndatunduvangilika kwabila kujaa myadi.

¹⁹ Mwaa Musha paukile ndamalila kuvavalangangila venentete uti kula lilamulo, nae andítwala myadi vyavang'ombe na vyavambudi pamo na medi, pamba wanauvi na mishasha vyannandi wavashema ishopu kutwala kumyajangila lyo lyene libuku pamo na venentete uti aashidoni,

²⁰ “Avi ni myadi vyaimbodi, yo yakuvile Nnungu kwenu mwenu.”

²¹ Yadavo momo paukile ndaalaliya yema na vyombo uti vyakulipudidya, andímyajangila myadi.

²² Doni, kwakwodananavo lilamulo na mpaka vinu uti vinkuushaniangigwa ushapu kwamyadi na kwabila kujaa myadi hakupali kulivalivigwa kwamadambi.

²³ Napavedoni indivaikila malodyo avinu vivéle kuwa auke akaushaniangigwe ushapu kwashitendo ashi kanji vinu viu vyakuwa vindaushaniangigwa ushapu kwavyadaka vyamana vyakupunda avi.

²⁴ Mwaa Klistu hainjidile Lyutu Lyakwilimyanga-uti lyavakandyenge vanu lìvele lilodyo vila lya alilá liu; nae andiinjila akulá kuwa kwene-kwene, nadoni ambi apa ankupagwa pamevo pake Nnungu yetu wetu.

²⁵ Kanji napane i pakulota atende alyumya jo mwene shadaka aujila-ujila kenga mwatandela nkúlangalalela-shadaka nkumene painjila Lyutu Lyakwilimyanga-uti kula mwaka kwamyadi vyajunji.

²⁶ Leka ìvele yamyadi vyajunji, Klistu akandyuvauvanga aujila-ujila kutunduvangila tangu pashikandyangigwe shilambo. Kanji napane pauwikidile popo wakati, nae andyumilila kwamwanda umo tu bai kwambangidya amalidye lidambi kwashadaka shalyumidye jo mwene.

²⁷ Kula munu andipangigwa kupela mwanda umo tu bai kutwala ling'oto lya apo, kupagwa muukumu.

²⁸ Nimumo momo Klistu andilyumya shadaka mwanda umo tu bai alitika madambi avanu voe na nae andauja mwanda wambili i kwalidambi kanji pakulota kuvaambola avalá vannindíla na mweshe.