Vabalaniya 5 - Ibibiliya mu Shimakonde Imbodi Yaambi na dimbande dya Imbodi Yakala

¹ Mwaa kula nkúlangalalela-shadaka nkumene ankutandalegwa pakati pavenentete na vammika pakulota aitike yavenentete muvinu vimwámba Nnungu aumya dinudyo na vyadaka kwamwaa washimadambi.

² Nae ankuulula kuvatanana vákave limanyilo na vaashalánga kwaupole pakuva jo mwene nanae momo avé mwina muungalyulula.

³ Napavedoni nae inimmaikila aumye shadaka kwamwaa washimadambi shake jo mwene kulingana kenga mwaumidya shavenentete.

⁴ Hapali hanalitwalila ishima ai jo mwene ila ashamegwe na Nnungu kenga mwaivalaléle kumwe Aloni.

⁵ Nimumo momo, Klistu halikwadidye jo mwene aling'a lishangelo yakulitenda kuva nkúlangalalela-shadaka nkumene kanji andipangigwa na aijá ámwaulidile doni, “Wako Umwanangu, nangu nelo ndikuvaleka.”

⁶ Namomo mwimbande inji atédoni, “Wako ni nkúlangalalela-shadaka ngwengwe kwodananavo upangaji umwe Malikishadeki.”

⁷ Yesu mumaduva anamile mushilambo amu, andílyumya mukushwali na mukujugwangila annamadikila pashanya po akuno alila anjugwa aijá áulula amwambole mukupela kutwala nae kumwigwa mwaa wakunjopa Nnungu.

⁸ Ata ikava kenga nae ni Mwanamunu, andilipundisha kwigwilila kwaindila yamauvilo ya avilá vyauvauvenge.

⁹ Namomo pantadidye awikile popo nae anditadya ave ntipu wakwambolegwa kúkamalilika kwa avalá uti vamwigwilíla,

¹⁰ avikigwa na Nnungu kuva nkúlangalalela-shadaka nkumene kwodananavo aulá upangaji umwe Malikishadeki.

Shijaidyo shakwambukanga lilove lya Nnungu

¹¹ Kwashitendo ashi tunkuvanavo vyoe vyakulota kuvalanganga, vinu vikamadyánga kwaulangila mwaa mwenu mundiva mmanu mmakukakova kwigwa.

¹² Ata ikava kenga wakati au ivaikidile muve mmamwalimu kanji inkuloteka munu ampundishe kavili vitunduvangilo vitandi vyamalove ake Nnungu. Ambi apa immaikidilé mujong'e mavele i shakulya shakukama.

¹³ Aijá álishigwa mavele nae mpaka ambi nunu nadoni havenavo mang'amung'amu alilove lyaishaliya.

¹⁴ Kanji shakulya shakukama ni shavanu vakulumwíke, vanavo kwamwaa wakulidyavalakedya ngwengwe, vankuvanavo lyululilo lyakupambula wambone na wakunyata.