Maono 7 - Ibibiliya mu Shimakonde Imbodi Yaambi na dimbande dya Imbodi Yakala

Kuvikigwa kwanamakong'o vatumika vake Nnungu

¹ Napanelo vikapite avyo, ndívona vanjelo nsheshe vàimilenge mumatununa nsheshe amushilambo vàkamwile dimepo nsheshe dyamushilambo vadivilila kwambangidya hadinapungile shilambo, ata imanga na ata nnandi woewoe.

² Namomo ndímwona njelo junji akwela kwalyalakela liduva ànyukete shinu shakuntaila namakong'o wa Nnungu mumi. Nae andítangola pashanya po avaulila vanjelo nsheshe avalá vavapéle shimadengo shakwananganga shilambo, imanga

³ aashidoni, “Hamunaanangange shilambo, imanga ata milandi mpaka apalá patulota kummika namakong'o pavyenye vyavatumika vake Nnungu.”

⁴ Napane ndígwa ishabu yavanu avalá vavikígwe namakong'o, vanu avo vavele imiya imo alubaini na nsheshe alupu kwamakola uti avanaishilaeli.

⁵ Likola limwe Yuda vavikígwe namakong'o vavele vanu kumi na mbili alupu, limwe Lubeni kumi na mbili alupu, limwe Gadi kumi na mbili alupu,

⁶ likola limwe Asheli kumi na mbili alupu, limwe Naputali kumi na mbili alupu, limwe Manasheshe kumi na mbili alupu,

⁷ likola limwe Shimiyau kumi na mbili alupu, limwe Lawi kumi na mbili alupu, limwe Ishakali kumi na mbili alupu,

⁸ likola limwe Shebuluni kumi na mbili alupu, limwe Yoshe kumi na mbili alupu namomo likola limwe Benjameni vanu kumi na mbili alupu ni vavikígwe namakong'o.

Dimbumba dyakwalakela muvilambo uti

⁹ Napanelo vikapite vinu avyo ndílola, mwe! Ndyóna dimbumba díkaululika kuvalangika; adyo dyakwalakela kula shilambo, makola uti, venentete na dinangodi vàimilenge mushu shiteng'u na mwa Ngandolo vàgwalenge dikanju dyanashwe, mmakono mwave vànyakatenge malala.

¹⁰ Vashindatangola pashanya po vaashidoni, “Kwambwalegwa kunkwalakela kwa Nnungu wetu, aijá áikele pashiteng'u na kwa Ngandolo.”

¹¹ Vanjelo uti vandíimilanga vàtang'anadidye shiteng'u, vanang'olo pamo na avalá viumbi nsheshe kutwala kuguguvala vyenye kundondya pai valipudya kwa Nnungu

¹² vaashidoni, “Ame. Litumbyangilidyo na lishangelo, limanyilo na lilambwalalelo, ishima, dimongo na lyululilo vive kumwe Nnungu wetu ngwengwe ngwengwe. Ame.”

¹³ Kutwala nang'olo jumo pakati pavanang'olo aníngudya, “Da ava vagwalénge dikanju dyanashwe vananyani na vaalakadilé kwashi?”

¹⁴ Nangu kushidoni, “Nang'olo, wako ni úmanyite.” Nae doni, “Ava ni avalá vaalakadíle mmauvilo akujowa, vashapénge dikanju dyave mumyadi vya Ngandolo kutwala kuva dyanashwe.

¹⁵ “Ni ashi shitádya vapagwe mushu shiteng'u sha Nnungu; vanavo vankutumika shilo na mui mwing'ande yake; aijá áikele pashiteng'u andavakunjupulila yema yake.

¹⁶ Vanu avo mwiko haivakola indala kavili, inyota na ata pavakona kupiya liduva kwali kuuduwa.

¹⁷ Mwaa Ngandolo ávele shing'ati shiteng'u andavashunga na andavaukanavo papandukenge medi ashingumi na Nnungu andavapukutanga myodi uti kumevo kwave.”