Yilan-Yilan Koe 35 - ALLALA KUMƐ

Dugi Do Sɔrɔn-Koe Lifayi Bɔnsɔn-Mɔgɛnu Bolo

¹ Wo tumɛ Isirɛla mɔgɛnu bi Mohabu lɛɛ rɔ Yorodan bɛ dafɛ Yɛrikɔ ya-telen ma, Mari ya a fɔ Musa ye ko,

² “Isirɛla mɔgɛnu ba ban anuta nyamanɛ sɔrɔnna tumɛ min, anu si so bi-nani ani so fila di Lifayi mɔgɛnu ma. Anu si soe wonuna foolɛ dugi fanan di anu ma alako anuna kolo-fannu ni anu de-nyini-tinɛnu sɔrɔn.

³ Soe wonu si to Lifayi mɔgɛnu ye dɔrɔn. Anuna soela foolɛ si to anuna kolo-fannu fanan ye dɔrɔn.

⁴ Ka a fɔlɔ anuna tarɛnu ma, anuna kolo-fan de-nyini-tinɛnu si ma kian-nya waga kelen, kɛmɛ loli la a tɔnkɔn nanɛ bɛɛ rɔ.

⁵ A yanyɛ si ma kian-nya waga sawa la. A kɔnɛ si ma kian-nya waga sawa la fanan. Anuna soe wonu si to kɛnu tɛma gben!

⁶ Wo si so-kun wɔrɔ-gbɛrɛ fanan di anu ma min si ma lakisi-soenu na anu ye. Ni gbalo sara mɔgɛ do bole ma ka fagalɛ kɛ, wo tigi si a buri ka ta lakisi-soe wo do rɔ.

⁷ Lifayi mɔgɛnuna soenu anubɛ lakisi-soenu nakofunɛ yatɛ bɛnta so bi-nani ani so segin ma.

⁸ Bɔnsɔn kɛnu si soenu di Lifayi mɔgɛnu ma iko anuna nyamanɛ kolo nya min. Ni soe siyaman bi bɔnsɔn minnu bolo, wonu si siyaman bɔ wonutɛ la ka wonu di Lifayi mɔgɛnu ma. Ni bɔnsɔn minnuta soe ma siya, wonu si doni bɔ wonutɛ la ka wonu di Lifayi mɔgɛnu ma.”

Mɔgɔ-Fagalɛnuna Tɔnnu

⁹ Mari ya a fɔ Musa ye ko,

¹⁰ “N kuman-kan kɛ latenbi Isirɛla mɔgɛnu ma ko ni anu ya Yorodan bɛ tɛgɛ tumɛ min ka ta sigi Kenan nyamanɛ rɔ,

¹¹ anu si soe donu yabɔ minnu si ma lakisi-soenu na. Ni gbalo sara mɔgɛ do bole ma ka mɔgɛ do faga, wo tigi si a buri ka ta nyɔ.

¹² Ni mɔgɛ wo ara ke lakisi-soe wo rɔ, furi wo na-kelen-nyɔgɛ ti ke a tayili sarala wati wo ma, alako anu si mɔgɔ fagalɛ wo kiti sa nya min. Mɔgɔ-wo-mɔgɔ ti a bole tugu mɔgɔ-fagalɛ wo la fɔ anu ba ata kiti fɔ.

^13-14 Wo ni so-kun sawa bi Yorodan tele bɔɛ. Wo ni so-kun sawa bi Kenan nyamanɛ rɔ fanan. Wonu nakofunɛ bɛnnɛ so-kun wɔrɔ ma.

¹⁵ Lakisi-soe kɛnu bi dugurannu anubɛ sundannu ye. Ni mɔgɛ do fagara mɔgɛ bolo, a ma a lawuli a ma, wo si a buri ka ta nyɔ.

^16-18 “Kɔnɔ ni mɔgɔ ya marafan do bi, a mara fen-wo-fen sufa la, a mara nɛgɛ-kundi la wo, a mara kuru-kundi la wo, a mara gbeleka-kundi la wo, a ni a bi ka a ta-nyɔgɛ faga wo la, wo ni a yiliki. Anu si wo tigi faga kamasɔrɔn a ya mara-koe tɛgɛ.

¹⁹ Furi wo na-kelen-nyɔgɔ-bɛrɛbɛrɛ si a lasɔ kumɛ wo la ka a na-kelen-nyɔgɛ tayili sara. Ni a ya mɔgɛ wo lasɔrɔn, ale fanan si wo faga.

^20-21 “Ni mɔgɛ bɛɛsi ya a lɔn ko mɔgɔla gboyanayɛ ye mɔgɛ do rɔ, wonubɛ wo tigi ni kɛlɛ, a ni faga mɔgɛ wo bolo, anu si a yiliki. Ni a ya a latosokoro bawo a ara a kɔnkɔn a ma nun, ka, ni a ya fan do lakɛ a ma, ka, ni a ya a bole lagbu ka a tugu wo la, anu si wo tigi yiliki. Furi wo na-kelen-nyɔgɔ-bɛrɛbɛrɛ si a lasɔ kumɛ wo la ka a na-kelen-nyɔgɛ tayili sara. Ni a ya mɔgɛ wo lasɔrɔn, ale fanan si wo faga.

^22-23 “Ni gbalo sara mɔgɛ do bolo ma, a ni mɔgɛ do faga kɔnɔ gboyanayɛ sa anu tɛma, ado a kɔnkɔnni ma a ma kɔrɔma la, kiti-tɛgɛlɛnu si wo kiti sa a kilɛ fɛ. Ni mɔgɛ wo ya kuri lakɛ, a ni ta bɛn mɔgɛ do la, ado a yogo ma a la, ni a fagara, anu si wo kiti sa. Ni mɔgɛ wo ya a latosokoro kɔnɔ a ma a ma diminyɛ ma, a wa faga, anu ni a kiti sa.

²⁴ Ni ko sufa wonu mara kiti la mɔgɛ wo ma, kiti-tɛgɛlɛnu si a fɔ worɔ ko a ma ko tinya bawo a ma a lawuli a ma. Mɔgɔ-faganɛ wo na-kelen-nyɔgɔ-bɛrɛbɛrɛ ti yo sɔrɔn ko-tinyanɛ wo ma.

²⁵ Anu si mɔgɔ-fagalɛ wo bi ka sɛgi a la lakisi-soe wo rɔ a bɔra kan min. A siginɛ si to soe wo burɔ ha saraka-masɔla-kun-tigi-wɛ wo ni faga tumɛ min.

^26-27 Kɔnɔ ni a bɔra soe wo kɔma doni bɛrɛni, anubɛ mɔgɔ-faganɛ wo na-kelen-nyɔgɔ bɛrɛ ni bɛn soe wo kɔma kilɛ la, wo si ale fanan faga, ado wo yoe le wo la pɛ! Kɔnɔ ni a sigini tora lakisi-soe wo burɔ, mɔgɔ-wo-mɔgɔ mako sa a la nyɔ. Saraka-masɔla-kun-tigi-wɛ wa faga tumɛ min,

²⁸ mɔgɔ-fagalɛ wo si sɛgi a warɛ iko fɛɛbɔnɛ.

²⁹ Wo tara kan-bo-kan, tɔn le kɛ la ka a fɔlɔ wole ma ha wo kegeyɛnu.

³⁰ “Ni anu nara mɔgɛ do maburi ko ale ara mɔgɔ-fagɛ kɛ, anu ti ke a yilikila mɔgɔ kelanta sereyɛ ma, fɔ sereyɛ wa tenbi mɔgɔ kelen na.

³¹ “Ni min ya mɔgɛ do faga ka a lawuli a ma, wo tigi ti to a niyi la mumɛ! A ti wodi bɔ mɔgɛ wo niyila ko la alako ale ni kisi. Fɔ wo ni a nyɛrɛ faga le serr!

³² “Ni fɛɛbɔnɛ ya a buri ka ta lakisi-soe burɔ, wo kana sɔn, a ni wodi bɔ alako a ni sɛgi a warɛ soe burɔ. Saraka-masɔlɛ wa faga tumɛ min, a ni to sɛgila a warɛ kɔnɔ a ti fenfen bɔ wo rɔ.

³³ “Ni mɔgɛ do ya mara-koe tɛgɛ, a ni yele do labɔ mɔgɛ ma ha mɔgɛ wo ni faga, mɔgɛ wo yele si nyamanɛ wo latinya. Wo dugi ma ti ku fɔ mɔgɛ min ya fagalɛ kɛ ka yele labɔ, wo fanan yele ni bɔ ka faga le serr!

³⁴ Wo kana wola nyamanɛ kɔsɔ bawo nde, Mari fanan bi wo tɛma yan.”