Yilan-Yilan Koe 34 - ALLALA KUMƐ

Kenan Nyamanɛ Mumɛ Bɛɛ Dan-Tɛgɛ-Koe

^1-2 Mari ya kuman-kan kɛ don Musa da rɔ ka a fɔ Isirɛla mɔgɛnu ye ko, “N bi nala Kenan nyamanɛ min dila wo ma, wo dan denu bi kɛnu na.

^3-5 Ka a fɔlɔ dugula wara la, wola nyamani-dan si a dabira Dalɛ-Faganɛ ma ha ka ke Akiribin Don-Dɛ ma ka tenbi Sin wulɛ rɔ ka ta a labila Idɔm nyamani-dan ma min bi Kɛdɛsi-Baniya dugula-waralɛ rɔ. Dan wo le ye tala ha kan tinɛ do anu bi a fɔla min ma ko Hasa-Ada, tarɛnu bi kan min. Dan wo le ye tala tun ka bila yi-dɔgɔmɛ do fɛ min bi Iyipiti dan la ka ke kɔgɔ-yi ma.

⁶ Wola nyamani-dan si ma Mɛdetereniyan kɔgɔ-yi la tele-yigi wara la.

^7-8 “Wola dan wo le ye a fɔlɔla Mɛdetereniyan kɔgɔ-yi ma kantɔ-wara la tun ha ka ta ke Hɔ kɔnkɛ ma min bi Hɛrɔman kɔnkɛ dafɛ. Dan wo tara ha Hamati kɔnkɔ-gbɛran la ka ta ha Sidadi soe ma.

⁹ Wo le tara fanan ha Sifarɔn soe ma ka ta ha ka dan Hasar-Inan soe la. Kantɔ-waralɛ-dan le wo la.

¹⁰ “Tele-bɔɛ-waralɛ-dan fɔlɔtɛ ya a dabira Hasar-Inan soe ma

¹¹ ka ta Sifam soe ma ka ta ha Ribila soe ma min bi Eyin soe tele-bɔɛ wara la. Wo le tara fanan ha Kalili dalɛ ma ka a labila

¹² Yorodan bɛ ma. Wo le tara tun ha Dalɛ-Faganɛ ma ka dan nyɔ. “Fan minnu bɛɛsi ye dan kɛnu burɔ yɛ, wo dama si ma wotɛ la.”

^13-15 Musa ya Marita sarakanɛ kɛ latenbi Isirɛla mɔgɛnu ma ko, “Rubɛn bɔnsɔn wo, Kadi bɔnsɔn wo, anubɛ Manasa bɔnsɔn tɔnkɔn kelan, wonu bara ban anuta nyamanɛ sɔrɔnna Yorodan bɛ tele-bɔɛ wara la yan. Kɔnɔ Kenan nyamanɛ si to bɔnsɔn kɔnɔntɛ anubɛ Manasa bɔnsɔn tɔnkɔn kelan bolo ka a tala koron-nakɛ fɛ wo wa Yorodan bɛ tɛgɛ wati min. A si ma wo ye iko Mari ya a fɔ nya min.”

^16-18 Mari ya a fɔ Musa ye ko, “Saraka-Masɔla Ɛliyasa anubɛ Nunna dan Yasowa si nyamanɛ tala bɔnsɔnnu tɛma. Wo si kun-tigi kelen-kelen bɔ bɔnsɔn kɛnu tɔ ka wo dɛnbɛ wɔlɛ kɛla.

¹⁹ Kun-tigi min bɔra Yuda bɔnsɔn rɔ, wo le Yɛfunɛla dan Kelabu la.

²⁰ Kun-tigi min bɔra Simiyɔn bɔnsɔn rɔ, wo le Amihudila dan Sɛmuwɛli la.

²¹ Kun-tigi min bɔra Bɛnyamɛ bɔnsɔn rɔ, wo le Kisilɔnila dan Ilaidadi la.

²² Kun-tigi min bɔra Dan bɔnsɔn rɔ, wo le Yogolila dan Buki la.

²³ Kun-tigi min bɔra Manasa bɔnsɔn rɔ, wo le Ifɔdila dan Haniyɛli la.

²⁴ Kun-tigi min bɔra Ifɛrɛm bɔnsɔn rɔ, wo le Sifitanila dan Kɛmuwɛli la.

²⁵ Kun-tigi min bɔra Sɛbulɔn bɔnsɔn rɔ, wo le Panakala dan Ilaisefan la.

²⁶ Kun-tigi min bɔra Isakari bɔnsɔn rɔ, wo le Asanla dan Palɛtiyɛli la.

²⁷ Kun-tigi min bɔra Asɛra bɔnsɔn rɔ, wo le Sɛlimila dan Ahayihudi la.

²⁸ Kun-tigi min bɔra Nafatali bɔnsɔn rɔ, wo le Amihudila dan Pɛdahɛli la.”

²⁹ Kun-tigi wonu denu bi kɛnu na nde, Mari ya minnu yabɔ wo ye.