Yilan-Yilan Koe 31 - ALLALA KUMƐ

Tayili-Sara-Koe Isirɛla Mɔgɛnu Bolo Midiyan Mɔgɛnu Na

¹ Mari ya a fɔ Musa ye ko, “Wo ni wo rabɛn kɛlɛ-kɛ-koe la.

² Wo ni ta Midiyan mɔgɛnu bira ka anu halaki kamasɔrɔn anu ya min ma nde, Mari la. Wo wa ban Midiyan mɔgɛnu kɛlɛla tumɛ min, wo kɔma, ile Musa si so-sɛgi-kɛ.”

³ Musa ya a fɔ Isirɛla mɔgɛnu ye ko, “Wo ni wo rabɛn Midiyan mɔgɛnu kɛlɛ-koe la ka ma tayili sara Marita sɛnbɛ la.

⁴ Kɛlɛ-dan mɔgɔ waga kelen-kelen ni bɔ Isirɛla bɔnsɔn bɛɛsi rɔ.”

⁵ Bɔnsɔnnu ya kɛlɛ-dan wonu bɔ, wonu nakofunɛ yatɛ bɛnta mɔgɔ waga tan-ni-fila (12,000) ma.

⁶ Musa ya Saraka-Masɔla Ɛliyasala dan Finihasi bi ka a sɔ mɔgɛ wonu yarɔ. Samani anu ni ta, Finihasi ya Marita bon-miran donu bi anubɛ burinu alako anu si mɔgɛnu nalɔn anu na. Musa ya anu nata kɛlɛ rɔ.

^7-8 Anu tara Midiyan mɔgɛnu kɛlɛ ka kei bɛɛsi faga, hali Midiyan mansa lolɛ minnu tɔgɛ le Ɛfi, Rɛkɛm, Suri, Huri, anubɛ Reba. Anu ya Beyorila dan Nɛbi Belam fanan faga.

⁹ Isirɛla mɔgɛnu ya Midiyan musinu bira. Anu ya anuna dennɛnu anubɛ anuna kolo-fannu anubɛ anu bolo-fan mumɛ bɛɛsi bi.

¹⁰ Wo kɔma, anu ya anuna soenu anubɛ anuna daga makɛ tinɛnu mintan gburr!

^11-12 Anu nara wo bɛɛsi la Musa anubɛ Ɛliyasa ma anuna dagɛ rɔ Mohabu lɛɛ rɔ Yorodan bɛ dafɛ Yɛrikɔ ya-telen ma.

Kɛlɛ-Dannu Sɛgi-Koe Musa Ma

¹³ Nɛbi Musa anubɛ Ɛliyasa anubɛ Isirɛla mɔgɔ-banu tara kɛlɛ-kɛlɛnu nabɛn tinɛ kilɛ la tumɛ min,

¹⁴ Musa diminyara kɛlɛ-den-kun-tiginu ma.

¹⁵ A ya anu manyinika ko, “Nfen ya a to, wo ya musi kɛnu kɛndɛ to?

¹⁶ Wo ya a lɔn serr, ko musi kɛnu denu bilara Nɛbi Belam kuman-kan fɛ alako mɔgɛnu ni Beyali kɔ Piyɔri kɔnkɛ kuma.

¹⁷ Wo le ya a ma, Mari ya ata mɔgɛ donu faga wo wati rɔ. Wo ni Midiyan den-kei bɛɛsi faga anubɛ a musi minnu bara kei-koe lɔn.

¹⁸ Kɔnɔ a sunkurun-mɛsɛnu anubɛ musi do minnu ma kei-koe lɔn bɛ, wo ni wonu kɛndɛ to wo nyɛrɛ ye.

¹⁹ Wole minnu ya mɔgɛ faga kɛlɛ rɔ, anubɛ minnu ya anu bole tugu mɔgɔ-faganɛnu na, wonu ni to dagɛ kɔma. A tele sawɛ anubɛ a tele wɔrɔnfilɛ kɔrɔ, wonu ni sɛninya iko tɔn ya a fɔ nya min. Hali wo ya musi minnu bi wo nyɛrɛ ye fanan, wole damasi ni wo sɛninya iko tɔn ya a fɔ nya min.

²⁰ Fan minnu nadannɛ gbolo-kolonɛ la wo, baa-siyi la wo, kɔlɔma-malɛsɛnɛ la wo, anubɛ wola kurɛnu, wo ni wonu damasi sɛninya iko tɔn ya a fɔ nya min.”

²¹ Ɛliyasa ya a fɔ kɛlɛ-dannu ye ko, “Tɔn le kɛnu na Mari ya min di Musa ma.

^22-23 Tɛ ti ke fan minnu mintanna iko sɛnɛ, wodi-gbɛ, silɛɛ, fukan, nɛgɛ anubɛ dandakuyi, wo si wonu sɛninya tɛ la. Wo kɔma, wo si Marita yi-sɛninyanɛ kɛ anu ma. Tɛ si ke fan minnu mintanna, wo ni wonu sɛninya sɛninya-yi la dɔrɔn iko tɔn ya a fɔ nya min!

²⁴ A tele wɔrɔnfila nyɔgɛ, wo si wola kurɛnu ku. Wo le si a ma, wo si sɛninya ka ta dagɛ rɔ iko Mari ya a fɔ nya min.”

Kɛlɛla Kolo-Fen Biranɛnu Tala-Koe

²⁵ Mari ya a fɔ Musa ye ko,

²⁶ “Ile anubɛ Ɛliyasa anubɛ Isirɛla bɔnsɔn-kun-tiginu, wo ni fan kɛnu dan anu ya minnu bira kɛlɛ rɔ, mɔgɛnu anubɛ kolo-fannu.

²⁷ Wo ni a ratala sigi tina fila la. Wo si a tɔnkɔn kelan di kɛlɛ-dannu ma. A tɔnkɔn kelen si to Isirɛla mɔgɛ toenu ye.

²⁸ Ni kɛlɛ-dannutɛ mara mɔgɔ kɛmɛ loli la, wo si kelen bi ka wo di nde, Mari ma. Ni a mara ninki kɛmɛ loli la, wo si kelen di nde ma. Ni a mara baanu na, wo si kelen di nde, Mari ma. Ni a mara sagɛnu na, wo si kelen di nde ma. Ni a mara sofɛlɛnu na, wo si kelen di nde, Mari ma.

²⁹ Wo ye kelen-kelen min dila, wo ni wonu don Saraka-Masɔla Ɛliyasa bolo ka wonu ma kɔ-fan la nde, Mari ye.

³⁰ Ni Isirɛla mɔgɛ toe wonu ya anutɛ wo rasigi bi-loli bi-lolinyɛ ma, anu si kelen-kelen bɔ wonu tɔ ka wonu di nde ma, a mara mɔgɔ la wo, a mara kolo-fan la wo. Wo si wonu di Lifayi mɔgɛnu ma minnu bi ndeta wɔlɛ kɛla Fani-Bɔn kɛ la.”

³¹ Musa anubɛ Ɛliyasa ya wo bɛɛ ma iko Mari ya a fɔ anu ye nya min.

^36-40 Kɛlɛ-dannu ya sagɛ anubɛ baa minnu yatɛ sɔrɔn, wo bɛnta waga kɛmɛ sawa ani waga bi-sawa, waga wɔrɔnfila, kɛmɛ loli (337,500) ma. Anu ya kɛmɛ wɔrɔ ani bi-wɔrɔnfila ani loli (675) bi wonu tɔ ka a di Mari ma. Anu ya ninki minnu yatɛ sɔrɔn, wo bɛnta waga bi-sawa ani waga wɔrɔ (36,000) ma. Anu ya ninki bi-wɔrɔnfilɛ ani ninki fila (72) bi wonu tɔ ka wonu di Mari ma. Anu ya sofɛlɛ minnu yatɛ sɔrɔn, wo bɛnta waga bi-sawa ani kɛmɛ loli (30,500) ma. Anu ya sofɛlɛ bi-wɔrɔ ani kelen (61) di Mari ma. Anu ya sunkurun-nasɔlɔnɛ minnu yatɛ sɔrɔn, wo bɛnta mɔgɔ waga tan-ni-wɔrɔ (16,000) ma. Anu ya mɔgɔ bi-sawa ani mɔgɔ fila (32) di Mari ma.

⁴¹ Musa ya fan kɛ mumɛ di Ɛliyasa ma iko Mari ya a fɔ a ye nya min.

^42-46 Mɔgɛnu ya minnu sɔrɔn anubɛ kɛlɛ-dannu ya minnu sɔrɔn, wonu takɛn de!

⁴⁷ Musa ya kelen-kelen bi mɔgɔ bi-loli bi-lolinu tɔ. Wo kɔma, a ya kelen-kelen bɔ kolo-fen bi-loli bi-lolinu tɔ ka wonu di Lifayi bɔnsɔn-mɔgɛnu ma minnu bi Marita Fani-Bɔn-wɔlɛ kɛla.

^32-35 Kɛlɛ-dannu ya fan minnu bira kɛlɛ rɔ, wonu yatɛ le kɛnu na. Hali anu ya minnu bi anu nyɛrɛ ye, wonu bɔnɛ a la. Sagɛnu anubɛ baanu, wonu yatɛ bɛnta waga kɛmɛ wɔrɔ, waga bi-wɔrɔnfila ani waga loli (675,000) ma. Ninkinu yatɛ bɛnta waga bi-wɔrɔnfila ani waga fila (72,000) ma. Sofɛlɛnu yatɛ bɛnta waga bi-wɔrɔ ani waga kelen (61,000) ma. Sunkurun-nasɔlɔnɛnu yatɛ bɛnta waga bi-sawa ani waga fila (32,000) ma.

⁴⁸ Kɛlɛ-den-kun-tiginu nara anu dantɛgɛ Musa ye. Anu ko,

⁴⁹ “N fa, ma ara kɛlɛ-dannu dan. Hali mɔgɔ kelen ma tunu ma rɔ.

⁵⁰ Woletɔ ma ara sɛnɛ minnu sɔrɔn kɛ la, ma si na matɛ wonu di Mari ma. Ma ya sɛnɛ bolo-kalama-dɛɛnnu sɔrɔn, anubɛ sɛnɛ-dɛɛn-kɔlɔnɛnu, anubɛ sɛnɛ-forenu anubɛ sɛnɛ kanna-fannu, anubɛ sɛnɛ-mɔlɔnɛnu anu si minnu sa anuna durukinu ma, ma si wonu di Mari ma alako ma hakɛ yama ni togon.”

^51-52 Kun-tigi wonu ya sɛnɛ minnu sɔrɔn kɛlɛ rɔ, anu ya wonu nabɔ. Musa anubɛ Ɛliyasa ya sɛnɛ wo bɛɛsi bira. Wo mumɛ lakofunɛ gbiliyɛ manɛ le iko yi kalɔn bi-sawa ani lolɛta gbiliyɛ ye nya min.

^53-54 Musa anubɛ Ɛliyasa ya sɛnɛ-gbilimɛ wonu bi ka ta a la Marita Fani-Bɔn la alako Mari ni a miri anu ma. Kun-tigi ma minnu na, wonu ya anu bolo-fannu namara anu nyɛrɛ ye.