Yilan-Yilan Koe 30 - ALLALA KUMƐ

Dakan Don-Koe Mari Ye

¹ Musa ya a fɔ Isirɛla bɔnsɔn-kun-tiginu ye ko, “Mari ya kɛ le fɔ n ye ko

² ni kei do ya a dakan don ka lanyiri kiri Mari ye ko a si fen di a ma, wo tigi ni dakan wo kanbali. Ni kei do ya a dakan don ko a si a fara koe do la, a kana wo lanyiri tinya.

^3-5 “Ni sunkurɔn do ye a fa warɛ bɔn la, wo ni a dakan don ka lanyiri kiri Mari ye ko a ni fen di Mari ma, wo tigi ni a dakan wo kanbali. Ni sunkurɔn wo ya a dakan don ko a si a fara koe do la, a kana wo lanyiri tinya. Ni a fa ya wo lɔn tumɛ min kɔnɔ a ma kuma, fɔ a ni lanyiri wo kanbali. Kɔnɔ ni a fa ma sɔn wo ma, Mari si a makoto a fala ko la.

^6-8 “Ni a taranta, musi do mabiranɛ kei do bolo, musi wo ni a dakan don Mari ye koe dola ko la, wo ni bɛn ala kei-wara-sigi ma, musi wo ni a dakan kanbali, hali a mara yuwaya-dakan la. Ni musi wo ya a dakan don ko a si a fara koe do la, a kana wo lanyiri tinya. Ni ala kei ya wo lɔn tumɛ min kɔnɔ a ma kuma, fɔ a ni lanyiri wo kanbali. Kɔnɔ ni ala kei ma sɔn wo ma, Mari si a makoto ala keila ko la.

⁹ “Ni a taranta musi do ye nyɔ, kɛɛ-musi le a la, ni wo ma, ala kei ara a yilibɔ, ni wo ya a dakan don, fɔ a ni lanyiri wo kanbali.

^10-11 “Ni furu-musi do ya a dakan don ka lanyiri kiri Mari ye, furu-musi wo ni a dakan wo kanbali. Ni ala kei ya wo lɔn tumɛ min kɔnɔ a ma kuma, fɔ musi wo ni lanyiri wo kanbali.

¹² Kɔnɔ ni ala kei ma sɔn wo ma, Mari si musi wo makoto ala keila ko la

¹³ bawo sereya ye kei bolo ka a ban ala musila dakan wo ma. Sereya ye a bolo fanan ka sɔn wo ma.

¹⁴ Ni ala kei ma kuma fɔlɔn, fɔ ala musi wo ni lanyiri wo kanbali. Ala kei sɔnta lanyiri wo ma bawo a ma kuma.

¹⁵ Kɔnɔ tɔ-a-la, a ni a ban, kiti wo si to kei wo kuma.”

¹⁶ Tɔn sereya le kɛnu na Mari ya min fɔ Musa ye dakan don koela ko la musinuna koe rɔ. Ni a donta furu-musu anubɛ ala kei tɛma wo, ni a donta musu-mabirani anubɛ a mabiralɛ tɛma wo, ni a donta sunkurun anubɛ a fa tɛma, wonuna tɔn le kɛnu na.