Yilan-Yilan Koe 29 - ALLALA KUMƐ

Buri-Fɛ-Ladɛn

¹ “San-bo-san, a karɛ wɔrɔnfilɛ tele fɔlɛ ma, wo si wola wɔlɛnu boloka ka wo ladɛn wo nyɔgɔn fɛ ka Mari bato. Tele wo nyɛrɛ rɔ, saraka-masɔlɛ si buri fɛ.

⁶ Wo tenbi tele-wo-tele-sarakɛ bɔla, wo si karɛ tele fɔlɔtɛ sarakɛ sa wo kuma. Wo kɔma, wo si Buri-Fɛ-Ladɛn-Sarakɛ kofu wo ma.

² Wo ni tura-bulun kelen bi anubɛ saga-kɔndɔn kelen anubɛ san-kelen-saga-yigi wɔrɔnfila, fɛɛ sa minnu na. Wo ni wonu ma saraka-mintantɛ la Mari ye. Wo sumɛ si diya Mari ye bɛrɛkɛ!

^3-4 Min tenbi nala tura-bulan la a bolo, wo tigi ni na dɛgɛ-munke pani-kunbɛ-nya sawa la min tamaganɛ tuli la ka a sa tura-sarakɛ kɛnu kuma. Min tenbi nala saga-kɔndɔn la a bolo, wo tigi ni na dɛgɛ-munke pani-kunbɛ-nya fila la min tamaganɛ tuli la ka a sa saga-kɔndɔn-sarakɛ kɛ kuma. Min tenbi nala saga-yigi kelen-kelen na wo bolo, wo ni na dɛgɛ-munke pani-kunbɛ-nya kelen-kelen na min tamaganɛ tuli la ka a sa saga-yigi-sarakɛ kɛnu kuma.

⁵ Wo wa ban kɛnu bɔla tumɛ min, wo si baa-kɔrɔn kelen bɔ ka a ma wo hakɛ-sarakɛ la min si ma wo hakɛ-yamatogon-fan la. Wo si wo sɛninya Mari yala iko tɔn ya a fɔ nya min.

Hakɛ-Yamatogon-Tele

⁷ “Karɛ wɔrɔnfilɛ kɛ tele tan ma, wo kana wɔli-wo-wɔli kɛ wulɔn hali ka fen-dɔn-kɛ. Wo si wo ladɛn ka Mari bato.

⁸ Wo ni tura-bulun kelen bi anubɛ saga-kɔndɔn kelen anubɛ san-kelen-saga-yigi wɔrɔnfila, fɛɛ sa minnu na. Wo si wonu ma saraka-mintantɛ la Mari ye. Wo sumɛ si diya Mari ye bɛrɛkɛ!

^9-10 Wo tenbi nala tura-bulan la wo bolo, wo ni na dɛgɛ-munke pani-kunbɛ-nya sawa la min tamaganɛ tuli la ka a sa tura-sarakɛ kɛ kuma. Wo tenbi nala saga-kɔndɔn la wo bolo, wo ni na dɛgɛ-munke pani-kunbɛ-nya fila la min tamaganɛ tuli la ka a sa saga-kɔndɔn-sarakɛ kɛnu kuma. Wo tenbi nala saga-yigi kelen-kelen na wo bolo, wo ni na dɛgɛ-munke pani-kunbɛ-nya kelen-kelen na min tamaganɛ tuli la ka a sa saga-yigi sarakɛ kɛnu kuma.

¹¹ Wo wa ban kɛnu bɔla tumɛ min, wo si baa-kɔron fila ma wo hakɛ-sarakɛ la. Hali wo, wo kana nyina ka sɔgɔma-sarakɛ anubɛ wurala-sarakɛ bɔ anubɛ wo nyɔgɔn dɛgɛ-munke-yabasannɛ anubɛ wo nyɔgɔn nɔnbɔ-gbɔ-yi fanan.

Lele-Sɔɛ-Ladɛn

¹² “Ka a fɔlɔ karɛ wɔrɔnfilɛ kɛ tele tan-ni-loli ma ha ka a sigi a tele mogan-ni-fila nyɔgɛ ma, wo kana wɔlɛ mumɛ kɛ. Wo si wo ladɛn ka Mari bato lɔgɔkun kelan wo kɔrɔ.

¹³ Wo si sarakɛ mintan Mari ye lɔgɔkunyɛ wo tele karɛ fɔlɔtɛ ma. A sumɛ si diya a ye. Wo si tura-bulun tan-ni-sawa bɔ anubɛ saga-kɔndɔn fila anubɛ san-kelen-saga-yigi tan-ni-nani, fɛɛ sa minnu na.

^14-15 Wo tenbi nala tura-bulun kelen-kelen na wo bolo, wo ni na dɛgɛ-munke pani-kunbɛ-nya sawa-sawa la min tamaganɛ tuli la ka a sa tura-sarakɛ kɛnu kuma. Wo tenbi nala saga-kɔndɔn kelen-kelen na wo bolo, wo ni na dɛgɛ-munke pani-kunbɛ-nya fila-fila la min tamaganɛ tuli la ka a sa saga-kɔndɔn-sarakɛ kɛnu kuma. Wo tenbi nala saga-yigi kelen-kelen na wo bolo, wo ni na dɛgɛ-munke pani-kunbɛ-nya kelen-kelen na min tamaganɛ tuli la ka a sa saga-yigi-sarakɛ kɛnu kuma.

¹⁶ Wo wa ban kɛnu bɔla tumɛ min, wo si baa-kɔrɔn kelen bɔ. Hali wo, wo kana nyina ka sɔgɔma-sarakɛ anubɛ wurala-sarakɛ bɔ anubɛ wo nyɔgɛ dɛgɛ-munke-yabasannɛ anubɛ wo nyɔgɛ nɔnbɔ-gbɔ-yi fanan ka ma wo hakɛ-sarakɛ la.

¹⁷ “A tele fila nyɔgɛ, wo si na tura-bulun tan-ni-fila la anubɛ saga-kɔndɔn fila anubɛ san-kelen-saga-yigi tan-ni-nani, fɛɛ sa minnu na.

^18-19 Wo si dɛgɛ-munke-yabasannɛ anubɛ nɔnbɔ-gbɔ-yi bi ka a sa sarakɛ kɛnu kuma iko wo ya a tele fɔlɔtɛ ma nya min.

²⁰ “A tele sawa nyɔgɛ, wo si na tura-bulun tan-ni-kelen na anubɛ saga-kɔndɔn fila anubɛ san-kelen-saga-yigi tan-ni-nani, fɛɛ sa minnu na.

^21-22 Wo si dɛgɛ-munke-yabasannɛ anubɛ nɔnbɔ-gbɔ-yi bi ka a sa sarakɛ kɛnu kuma iko wo ya a tele fɔlɔtɛ ma nya min.

²³ “A tele nani nyɔgɛ, wo si na tura-bulun tan na anubɛ saga-kɔndɔn fila anubɛ san-kelen-saga-yigi tan-ni-nani, fɛɛ sa minnu na.

^24-25 Wo si dɛgɛ-munke-yabasannɛ anubɛ nɔnbɔ-gbɔ-yi bi ka a sa sarakɛ kɛnu kuma iko wo ya a tele fɔlɔtɛ ma nya min.

²⁶ “A tele loli nyɔgɛ, wo si na tura-bulun kɔnɔntɔ la anubɛ saga-kɔndɔn fila anubɛ san-kelen-saga-yigi tan-ni-nani, fɛɛ sa minnu na.

^27-28 Wo si dɛgɛ-munke-yabasannɛ anubɛ nɔnbɔ-gbɔ-yi bi ka a sa sarakɛ kɛnu kuma iko wo ya a tele fɔlɔtɛ ma nya min.

²⁹ “A tele wɔrɔ nyɔgɛ, wo si na tura-bulun segin na anubɛ saga-kɔndɔn fila anubɛ san-kelen-saga-yigi tan-ni-nani, fɛɛ sa minnu na.

^30-31 Wo si dɛgɛ-munke-yabasannɛ anubɛ nɔnbɔ-gbɔ-yi bi ka a sa sarakɛ kɛnu kuma iko wo ya a tele fɔlɔtɛ ma nya min.

³² “A tele wɔrɔnfila nyɔgɛ, wo si na tura-bulun wɔrɔnfila la anubɛ saga-kɔndɔn fila anubɛ san-kelen-saga-yigi tan-ni-nani, fɛɛ sa minnu na.

^33-34 Wo si dɛgɛ-munke-yabasannɛ anubɛ nɔnbɔ-gbɔ-yi bi ka a sa sarakɛ kɛnu kuma iko wo ya a tele fɔlɔtɛ ma nya min.

³⁵ “A tele segin nyɔgɛ wo kana wɔlɛ mumɛ kɛ fɔ ka wo kundɛn ka Mari bato.

³⁶ Wo si na tura-bulun kelen na anubɛ saga-kɔndɔn kelen anubɛ san-kelen-saga-yigi wɔrɔnfila, fɛɛ sa minnu na.

^37-38 Wo si dɛgɛ-munke-yabasannɛ anubɛ nɔnbɔ-gbɔ-yi bi ka a sa sarakɛ kɛnu kuma iko wo ya a tele fɔlɔtɛ ma nya min.

³⁹ “Sarakɛ minnu bi bɔla san-bo-san, wonuta tɔn le kɛnu na. Wo kana nyina fanan ka kɔ-fannu di wo hɛnikɛ la anubɛ wo si kɔ-fan min di Mari ma lanyiri wa kanbali wati min.”

⁴⁰ Mari ya min bɛɛ fɔ Musa ye, a ya wo bɛɛ latenbi Isirɛla mɔgɛnu ma.