Yilan-Yilan Koe 28 - ALLALA KUMƐ

Tele-wo-Tele-Sarakɛnu

¹ Mari ya a fɔ Musa ye ko,

² “I ni Isirɛla mɔgɛnu nabila saraka-bɔ-nya la. Anu si sarakɛ bɔ nde, Mari ye a wati-latɛgɛnɛ rɔ. Ni anu ya minnu mintan nde ye, wo sumɛ si a diya don n tɔ.” Musa ya sarakanɛ kɛ latenbi Isirɛla mɔgɛnu ma iko Mari ya a fɔ a ye nya min. A ko,

³ “Saraka-mintantɛ le kɛ la wo si min dantɛgɛ Mari ma. Tele-wo-tele, wo si na saga-yigi fila la wo bolo. Sagɛ wonu si ma san-kelen-sagɛ la fɛɛ sa minnu na.

⁴ Sɔgɔma, wo si kelen mintan gburr! Suyi rɔ, wo si kelen fanan mintan gburr!

⁵ Wo kɔma, wo si dɛgɛ-munke pani-kunbɛ-nya kelen bi ka a ramaga tulu-hakikɛ kilasi-nya nani na ka wo sa saga-sarakɛ wonu kuma.

^6-8 Wo ni nɔnbɔ-gbɔ-yi-feremɛ kilasi-nya nani bi ka a kɛ saraka-bɔ-tinɛ kuma sarakɛ wonu fɛ. Wo ni sarakɛ bɔ wurɛ la iko wo si sɔgɔmatɛ ma nya min. Wo si wo damasi mintan anu nyɔgɔn fɛ Mari ye gburr, anu bi minnu fɔlɔn bɔla sarakayɛ la Sinayi kɔnkɛ kuma. Wonu sumɛ si diya Mari ye bɛrɛkɛ!

Sulen-Tele-Sarakɛnu

⁹ “Wola Sulen-Tele ma, wo si na saga-yigi fila la wo bolo. Sagɛ wonu si ma san-kelen-sagɛ la fɛɛ sa minnu na. Wo kɔma, wo si dɛgɛ-munke pani-kunbɛ-nya kelen bi ka a ramaga tulu-hakikɛ kilasi-nya fila la ka wo sa saga-sarakɛ wonu kuma anubɛ wo nyɔgɔn nɔnbɔ-gbɔ-yi.

¹⁰ Wo si wo ma saraka-mintantɛ la Mari ye ka to wo sufa mala Sulen-Tele wo Sulen-Tele. Kɛnu si sa tele-wo-tele-sarakɛnu kuma.

Karɛnu Tele-Fɔlɔtɛ-Sarakɛnu

¹¹ “Karɛ-wo-karɛ a tele fɔlɔtɛ ma, wo si na tura-bulun fila la anubɛ saga-kɔndɔn kelen na anubɛ san-kelen-saga-yigi wɔrɔnfila la wo bolo ka wonu ma saraka-mintantɛ la Mari ye.

^12-14 Wo si dɛgɛ-munke yabasan tuli la ka wo ma kɔ-fan la. Wo tenbi nala sarakɛ la, ni a mara turɛ la, wo si na dɛgɛ-munke pani-kunbɛ-nya sawa la anubɛ nɔnbɔ-gbɔ-yi kilasi-nya nani la wo bolo. Ni a mara saga-kɔndɔn la, wo si na dɛgɛ-munke pani-kunbɛ-nya fila la anubɛ nɔnbɔ-gbɔ-yi kilasi-nya sawa la wo bolo. Ni a mara san-kelen-saga-yigi la, wo ni na dɛgɛ-munke pani-kunbɛ-nya kelen na anubɛ nɔnbɔ-gbɔ-yi kilasi-nya fila la wo bolo. Wo si wo damasi mintan anu nyɔgɔn fɛ Mari ye gburr! Wonu sumɛ si diya a ye kosɛbɛ!

¹⁵ Wo kɔma, karɛ-wo-karɛ a tele karɛ fɔlɔt, wo si baa-kɔrɔn kelen ma hakɛ-sarakɛ la ka a sa kɛnu kuma.

Biredi-Yɛlɛbɛlɛ-Dɔn-Ladɛn

¹⁶ “San-bo-san, a karɛ fɔlɔtɛ tele tan-ni-nanɛ ma, wo si Kanan-Ko-Ladiyɛ kɛ Mari ye.

¹⁷ A tele tan-ni-loli nyɔgɛ, wo si tele wɔrɔnfilɛ ladɛn dabira. Tele wo mumɛ kɔrɔ, wo kana biredi-wo-biredi dɔn fɔ biredi-yɛlɛbɛlɛ isiti sa min tɔ.

¹⁸ Tele wɔrɔnfilɛ wo, a tele karɛ fɔlɔt ma, wo si Marita ladɛn kɛ. Wo kana wɔli-wo-wɔli kɛ wo tele rɔ wo nyɛrɛ ye iko wo duruta a kɛla nya min.

¹⁹ Wo ni tura-bulun fila bi anubɛ saga-kɔndɔn kelen anubɛ san-kelen-saga-yigi wɔrɔnfila, fɛɛ sa minnu na ka wonu ma saraka-mintantɛ la Mari ye.

^20-21 Min tenbi nala tura-bulun kelen-kelen na a bolo, wo tigi ni na dɛgɛ-munke pani-kunbɛ-nya sawa-sawa la min tamaganɛ tuli la ka a sa tura-sarakɛ kɛnu kuma. Min tenbi nala saga-kɔndɔn la a bolo, wo tigi ni na dɛgɛ-munke pani-kunbɛ-nya fila la min tamaganɛ tuli la ka a sa saga-kɔndɔn-sarakɛ kɛnu kuma. Min tenbi nala saga-yigi kelen-kelen na a bolo, wo tigi ni na dɛgɛ-munke pani-nya kelen-kelen na min tamaganɛ tuli la ka a sa saga-yigi sarakɛ kɛnu kuma.

²² Wo wa ban kɛnu bɔla tumɛ min, wo si baa-kɔrɔn kelen bɔ hakɛ-sarakayɛ la min si ma wo hakɛ-yamatogon-fan la. Wo si wo sɛninya Mari yala iko tɔn ya a fɔ nya min.

²³ Wo ni kɛnubɛ sɔgɔma-saraka-mintantɛnu bɔ anu nyɔgɔn fɛ.

²⁴ Wo si to sarakɛ kɛnu mintanna tele-wo-tele ha tele wɔrɔnfila da si fa. Wo sumɛ si diya Mari ye worɔ bɛrɛkɛ!

²⁵ Wo si kundɛn tele wɔrɔnfilɛ ladɛn rɔ. A tele wɔrɔnfilɛ ma, wo si Mari bato.

Dɔn-Fen-Kurɛ-Tɛgɛ-Ladɛn

²⁶ “Wo wa Dɔn-Fen-Kurɛ-Ladɛn tɛgɛ kɛ, wo si wola dɔn-fen-kun-fɔlɛnu ma kɔ-fan la Mari ye. Wo ni wo fara wo nyɛrɛta wɔlɛ la ka Mari bato wo tele nyɛrɛ rɔ.

²⁷ Wo ni saraka-mintantɛ bɔ min sumɛ si diya Mari ye. Wo ni tura-bulun fila bi anubɛ saga-kɔndɔn kelen anubɛ san-kelen-saga-yigi wɔrɔnfila ka wonu mintan Mari ye. Wo wa ban sɔgɔma-sarakɛ bɔla, wo ni tura-bulun fila bi anubɛ saga-kɔndɔn kelen anubɛ san-kelen-saga-yigi wɔrɔnfila, fɛɛ sa minnu na. Wo ni wonu ma saraka-mintantɛ la Mari ye.

^28-29 Min tenbi nala tura-bulun kelen na a bolo, wo tigi ni na dɛgɛ-munke pani-kunbɛ-nya sawa-sawa la min tamaganɛ tuli la ka a sa tura-sarakɛ kɛnu kuma. Min tenbi nala saga-kɔndɔn na a bolo, wo tigi ni na dɛgɛ-munke pani-kunbɛ-nya fila la min tamaganɛ tuli la ka a sa saga-kɔndɔn-sarakɛ kɛ kuma. Min tenbi nala saga-den kelen na a bolo, wo tigi ni na dɛgɛ-munke pani-kunbɛ-nya kelen na min tamaganɛ tuli la ka a sa saga-dan-sarakɛ kɛnu kuma.

³⁰ Wo wa ban kɛnu bɔla tumɛ min, wo si baa-kɔrɔn kelen bɔ hakɛ-sarakayɛ la min si ma wo hakɛ-yamatogon-fan la. Wo si wo sɛninya Mari yala iko tɔn ya a fɔ nya min.

³¹ Wo kɔma, wo si sarakɛ wonu nyɔgɔn nɔnbɔ-gbɔ-yi bɔ ka a sa tele-wo-tele-sarakɛ wonu kuma.