Yilan-Yilan Koe 27 - ALLALA KUMƐ

Den-Keibɔnɛnu Kɛɛ Tala-Bole

¹ Yusufu ya den-kei do sɔrɔn min tɔgɛ le Manasa. Manasa fanan ya den-kei do sɔrɔn min tɔgɔ Makiri. Wo fanan ya Kaliyadi sɔrɔn. Kaliyadi fanan ya Hifa sɔrɔn. Wo ya Silafihadi sɔrɔn. Silafihadi wo ma den-kei sɔrɔn fɔ dunmusi mɔgɔ loli pe. Wonu tɔgɛ le kɛnu na, Mala, Nowa, Hagila, Milaka, anubɛ Tirisa.

² Dunmusi wonu wulita ka sɔ Marita Fani-Bɔn don-dɛ la Musa anubɛ Saraka-Masɔla Ɛliyasa yakɔrɔ anubɛ bɔnsɔn-kun-tiginu anubɛ Isirɛla mɔgɛ bɛɛ min bi nyɔ. Dunmusi wonu ya a fɔ anu ye ko,

³ “Ma fa fagara wula-da-rakolɔn rɔ a ta-nyɔgɛnu fɛ iko Mari ya a fɔ nya min kɔnɔ a ma den-kei wo den-kei to. A ma bila Korata mɔgɛnu tɛma minnu ya murutiyɛ lawuli Mari kan ma.

⁴ A bɛnta, ma fa tɔgɛ ni tunu Isirɛla mɔgɛnu tɛma, wa? Wo yandi, wo ni kan tinɛ do di ma ma.”

⁵ Musa ya anu kuman-kan latenbi Mari ma.

⁶ Wo kɔma, Mari ya a fɔ Musa ye ko,

⁷ “Silafihadila dunmusinu bara min fɔ i ye kɛ la, tonyɛ le wo la, yɔ! Wo ni kan tinɛ do di anu ma. A bɛnta, anu fa ni min sɔrɔn, wo ni wo di anu ma.

⁸ Kɔnɔ a fɔ Isirɛla mɔgɛnu ye ko ni kei do fagara, a ma den-kei to a kɔma, a kɛɛ si to ala dunmusi ye.

⁹ Ni dunmusi sa a bolo, a si to a na-kelen-nyɔgɔ-keimɛnu ye.

¹⁰ Ni a na-kelen-nyɔgɛnu sa nyɔ, a si to a fa na-kelen-nyɔgɛnu ye.

¹¹ Ni a na-kelen-nyɔgɛ sa nyɔ, anubɛ a fa na-kelen-nyɔgɛnu sa nyɔ, a si to a kebila-nyɔgɛ do ye anubɛ min gbɛrɛnnɛ anu nyɔgɔn ma. Wo si a bi iko a halalɛ. Nde, Mari kan le kɛ la. Kɛ si ma tɔn la wobɛ Isirɛla mɔgɛnu ye. Wo ni a bira gben!”

Lanyiri-Nyamanɛ Mafɛlɛn-Koe Musa Bolo

¹² Mari ya a fɔ Musa ye tun ko, “Ta Abarim kɔnkɛ kuma. N bi nala nyamanɛ min dila Isirɛla mɔgɛnu ma, i ni wo bɛɛ mafɛlɛn.

¹³ I wa ban nyamanɛ wo mumɛ mafɛlɛnna tumɛ min, i si so-sɛgi-kɛ iko a mara i kɔrɔ Aruna la nya min

¹⁴ bawo wole mɔgɔ filɛ ya n kuman-kan tinya wo tumɛ wo ye Sini wulɛ rɔ. Mɔgɔ damasi ya gbunya-kumɛ fɔ n ma Sɔnkɔ-Sɔnkɔ Tenke dafɛ. Wo ma sɔn ka nta gbiliyɛ anubɛ nta fanka yira mɔgɛnu na.” (Sɔnkɔ-Sɔnkɔ Tenke kɛ le Sini wulɛ rɔ Kɛdɛsi soe dala.)

Yasowa Sigi-Koe Musa Gbɛ Rɔ

¹⁵ Musa ya a fɔ Mari Alla ye gbɛ ko,

¹⁶ “E, Allatala, ile min si niyi di mɔgɔ ma anubɛ ile min si niyi bɔ mɔgɔ rɔ, n bi i manyinikala ko kelen pe lela ko la. I ni ita mɔgɛ do yabɔ min si sɔ Isirɛla mɔgɛ kɛnu yarɔ kɛlɛ rɔ.

¹⁷ Isirɛla mɔgɛ kɛnu kana ma iko sagɛ minnu kandanna sa.”

^18-19 Mari ya Musa yabi ko, “N bara a lɔn ka a fɔ ko Nunna den Yasowa, wo si ke le ka sɔ mɔgɛ kɛnu yarɔ. A kele. A ni a sɔ Saraka-Masɔla Ɛliyasa yakɔrɔ anubɛ Isirɛla mɔgɛ bɛɛsi yakɔrɔ. Ile, Musa ni i bole sa a kun tɛma ka a dantɛgɛ nde, Mari ma. I si ale yira mɔgɛnu na.

²⁰ Ita sɛnbɛ do di Yasowa ma. Wo le si a ma, Isirɛla mɔgɛnu si anu tolo masɔ a la.

²¹ A si a yɛ bɛn Ɛliyasa ma. Wo si ke ka nde diyana-koe lɔn fen fila fɛ min bi saraka-masɔla-wɛla kɔgɔ-dala-kurɛ ma. Yasowa anubɛ Isirɛla mɔgɛnu si min ma, kɛnu si a ma, Ɛliyasa ni wo rakaran anu ye.”

²² Musa ya a ma iko Mari ya a fɔ a ye nya min. A ya a ma, Yasowa sɔra Ɛliyasa anubɛ mɔgɛnu yakɔrɔ iko Mari ya a fɔ nya min.

²³ Musa ya a bole sa Yasowa kun tɛma ka a dantɛgɛ Mari ma. A ya a fɔ Isirɛla mɔgɔ damasi ye ko, “Wo ara Yasowa kɛ yen? Kɛ le nde, Musa gbɛ rɔ gbɛ, yɔ!”