Yilan-Yilan Koe 25 - ALLALA KUMƐ

Beyali Bato-Koe Isirɛla Kemini-Banu Bolo

¹ Isirɛla mɔgɛnu ya anu daga makɛ Akasiya lɛɛ rɔ wati min, Isirɛla keminɛ-mɛsɛnu ya a dabira ka Mohabu musinu maki nyɔ.

² Mohabu musi wonu ya anu kele ka ta anuta saraka-bɔ-tolon rɔ, anu si anuna bɛsɛnu kɔ kan min. Anu kera nyɔ tumɛ min, Isirɛla mɔgɛnu ya anuna saraka-soge wonu dɔn anu fɛ nyɔ

³ ka anuta bɛsi Beyali kɔ Piyɔri kɔnkɛ kuma. Mari fonde bɔra anu kuma kati!

⁴ Woletɔ Mari ya a fɔ Musa ye ko, “I ni nta kumɛ bira ka ko-yogoma-kɛlɛnuna karan-mɔgɛ wonu faga nyama bɛɛsi yala. Ni i ya wo ma, n fonde ti to bɔla wo kuma wo rɔ.”

⁵ Wo le ya a ma gbɛ, Musa ya bɔnsɔn-kun-tiginu kele ka a fɔ anu ye ko, “Wole kelen-kelennamɛ-bɛɛsi minnu ya Beyali kɔ, wo ni ko-yogoma-kɛlɛ wonu faga ka bɔ wo bɔnsɔnnu tɔ.”

⁶ Anu banta mɔgɛ wonu fagala tumɛ min, anu donta diyi-kɛ rɔ. Isirɛla kei do nara Midiyan musi do la a bolo.

¹⁴ (Kei wo tɔgɛ le Simiri. A fa tɔgɛ le Salu min bi Simiyɔnna kebilɛ do kun-tigiyɛ la.

¹⁵ Musi wo fanan tɔgɛ le Kɔsibi. Kɔsibi fa wo fanan tɔgɛ le Suru. Midiyan mɔgɛ donuna kebila-kunyɛ le wo la.) Isirɛla kei wo ya musi wo bi ka don a la a nyɛrɛ wara bɔn la Musa anubɛ mɔgɛnu yala serr!

⁷ Saraka-Masɔla-Kun-Tigi Ɛliyasala dan Finihasi ya kei anubɛ musi wo yen donna bɔn la tumɛ min, a ya a lasɔ ka bɔ ladɛn rɔ. A tara tanbɛ bi

⁸ ka bila kei anubɛ musi wonu fɛ bɔn la. A ya kei anubɛ musi sɔgɔ tanbɛ la ha tanbɛ bɔra anu mɔgɔ fila bɛɛ kɔma. Wo le ya a ma, tɔn sigira Isirɛla mɔgɛnuna tɔrɔyɛ la.

⁹ Kɔnɔ samani tɔn ni sigi anuna tɔrɔyɛ la, mɔgɔ waga mogan-ni-nani (24,000) nyɔgɔn bara faga.

¹⁰ Mari ya a fɔ Musa ye ko,

¹¹ “Kamasɔrɔn Finihasi ara min ma, nna diminyɛ ara bɔ Isirɛla mɔgɛnu kuma. Finihasi ara nta keliyɛ kɛ n ye bawo a ma sɔn anu ni bɛsɛnu kɔ fɔ nde, Mari kelen pe! Woletɔ n ma Isirɛla mɔgɛ bɛɛsi faga nna diminyɛ la.

^12-13 Bawo Finihasi ara kɛ sufa ma n ye ka a ma, Isirɛla mɔgɛnu hakɛ yama ni togon, woletɔ n bara mɔgɛnu hakɛ makoto. Ale anubɛ ala dannu si ma saraka-masɔlɛnu na n ye. Habadan-lanyiri le kɛ la mabɛ Finihasi tɛma.”

¹⁶ Mari ya a fɔ Musa ye ko,

¹⁷ “Wo ni ta Midiyan mɔgɛnu bira ka anu faga ko filala ko la.

¹⁸ A fɔlɔtɛ, anu bara ko-yoge kɛ wo la ka wo yanfa Piyɔri kɔnkɔ-kolo-wɛ kun tɛma. A fila nyɔgɛ ka anu faga Midiyan musila ko la min fagara Isirɛla kei do fɛ wo tumɛ Isirɛla mɔgɛnu fanan bi fagala.”