Yilan-Yilan Koe 22 - ALLALA KUMƐ

Belam Madiya-Koe Mohabu Mansɛ Bolo

¹ Isirɛla mɔgɛnu wulita tun ka ta anu daga makɛ Mohabu lɛɛ rɔ Yorodan bɛ tele-bɔɛ wara la Yɛrikɔ ya-telen ma.

² Sipɔla dan Mohabu Mansa Balaki ya a lamɔɛn tumɛ min ko Isirɛla mɔgɛnu bara Amora mɔgɛnu anubɛ anuna mansɛnu faga min kɛ, ado Isirɛla mɔgɛnu siya duk,

³ wo ya a ma, anubɛ ala mɔgɛnu kilanta dɔgɔma-ma-de, ha anu kumakɔra.

⁴ Mohabu mɔgɛnu ya kilayɛ lata Midiyan mɔgɔ-banu ma. Anu ko, “Isirɛla mɔgɔ-sɛrɛmɛ kɛnu si male tinya iko turɛ tenbi binyɛ dɔnna gbɛkole ma.”

⁵ Mansa Balaki ya mɔgɔ-ba donu nata Beyorila dan Belam kele tinɛ. Belam siginɛ Petori soe burɔ min bi Yufereti bɛ dala Amɔ nyamanɛ rɔ. Mansa Balaki ya sarakanɛ kɛ lata ko, “A sɔgɛ ye n na, i ni a lɔn ko mɔgɛ donu bɔra Iyipiti. Mɔgɛ wonu denu bara nyɛnsɛn kan tinɛ kɛ bɛɛsi rɔ, ado a manɛ iko anu bi nyamanɛ kɛ bɔla ma bolo.

⁶ A sɔgɛ ye n na, i ni na ka mɔgɛ kɛnu danka n ye. Ni i ya wo ma, tumado ma si mɔgɛ kɛnu nɔ ka anu gben. N ya a lɔn ko ni ile ya mɔgɛ minnu danka, wonu si taran dankɛ kɔrɔ. Ni i duwara minnu ye, duwɛ si to yigila wonu kuma.”

⁷ Mohabu anubɛ Midiyan mɔgɔ-banu tara dankali-kɛlɛta sarɛ la. Anu ya wo don Belam bolo ka Balakita sarakanɛ fɔ a ye.

⁸ Belam ya a fɔ anu ye ko, “Wo ni ki yan. Yanni sina Mari ya fenfen fɔ n ye, n si wo dantɛgɛlɛ sa wo ye.” Anu kira Belam fɛ nyɔ rɔ.

⁹ Alla nara a fɔ Nɛbi Belam ye ko, “Yon bi mɔgɛ kɛnu na minnu bi yiyala i warɛ kɛ la?”

¹⁰ A ya Alla yabi ko, “Mohabununa Mansɛ Balaki, wo le ya mɔgɛ kɛnu sɔ ka na a fɔ n ye ko

¹¹ mɔgɛ donu bara na ka bɔ Iyipiti nyamanɛ rɔ. A ko wonu denu ta ara tii mala nyamanɛ kuma pu! A sɔgɛ ye mansɛ wo la ko nde ni mɔgɛ wonu danka ale ye alako a ni ke mɔgɛ wonu kɛlɛla ka anu gben.”

¹² Alla ya a fɔ Belam ye ko, “I kana ta mɔgɛ kɛnu fɛ hali! I kana Isirɛla mɔgɛ wonu danka mumɛ, bawo nta duwɛ ye anu fɛ.”

¹³ Banda kara tumɛ min, Belam ya a fɔ kilayɛnu ye ko, “Wo sɛgi wo warɛ. Mari ma sɔn ko n ni bila wo fɛ.”

¹⁴ Anu ya anu kɔ sɛgi tun Mansa Balaki wara ka anu dantɛgɛ a ye ko, “Belam ma sɔn nala ma fɛ mumɛ!”

¹⁵ Balaki ya mɔgɔ-ba-sɛbɛnɛ siyaman nata tun Belam ma.

¹⁶ Anu bara mansɛla kilayɛ lake a ma ka a fɔ a ye ko, “I yandi, fenfen kana i lasɛgi nyɔ ta koe ma.

¹⁷ I wa ta tumɛ min, a si fen-siyaman di i ma. I ya a manyinika fenfenna ko la, a si wo kɛ i ye.” A ko, “I yandi, i ni ta mɔgɛ wonu danka a ye.”

¹⁸ Belam ya a fɔ anu ye ko, “Wo ta a fɔ Mansa Balaki ye ko hali a ya a bolo-fan bɛɛsi di n ma, n ti ke nta Mari Alla sɔsɔla hali doni bɛrɛni!

¹⁹ Kɔnɔ hali wo, wole fanan ni ki yan iko wo ta-nyɔgɛnu fanan ya a ma nya min. Tumado Mari si kuma-gbɛrɛ fɔ n ye tun.”

²⁰ Wo suyi nyɛrɛ rɔ, Alla nara a fɔ Belam ye ko, “Ni mɔgɛ kɛnu nara a fɔ i ye ko i ni ta, ta kɔnɔ alako tun, a ma iko n ya a fɔ i ye nya min.”

²¹ Bandɛ kara tumɛ min, Belam ya ala kirikɛ bi ka a sa sofɛlɛ kɔ tɛma ka bila Mohabu mɔgɔ-ba-sɛbɛnɛnu fɛ.

Belam anubɛ Ala Sofɛlɛ Ta-Koe

²² Alla fonde bɔra Belam kuma ala ta-koe la. Belam anubɛ ata wɔli-kɛlɛnu tamatoe Mohabu Mansa Balaki warɛ, Marita melika ya kilɛ tɛgɛ a ma.

²³ Melika sɔra kilɛ la faan biranɛ a bolo tɔ kɔnɔ sofɛlɛ le dɔrɔn ya a yen. A ya a yen nya min wo, a ya kila-kole masangba ka ta binyɛ rɔ. Woletɔ Belam ya gbeleka-kundi bi ka sofɛlɛ gbesi alako a ni na kila-kole la.

²⁴ Anu tara min kɛ doni, melika ya a sɔ anu yarɔ tun kila-kolo-tagbɛrɛnnɛ la, kuru-sansan donnɛ kila-tɔnkɔn filɛ bɛɛ rɔ. Ki-fannu bi sansan wonu burɔ.

²⁵ Sofɛlɛ ya melika yen tun tumɛ min, a tara yasɛ wara la ka Belam kian gbɛrɛn yasɛ kɔn ma nyɔ. Belam ya sofɛlɛ gbesi nyɔ tun.

²⁶ Anu tara tun. Anu ya a taran, melika sɔnɛ kila-ragbɛrɛnnɛ la.

²⁷ Sofɛlɛ ya a yen nkɛkuna, melika masangba tina mumɛ sa tun, a ya a sa kila kole la kelenna! Wo le ya a ma, Belam yisi bɔra ka a dan-natenbi. A ya sofɛlɛ gbesi dabira.

²⁸ Mari ya sɛnbɛ di sofɛlɛ wo ma ka mɔgɔni-gbu-kan fɔ ko, “N ya nfen ma ile la? A sawa nyɔgɛ le kɛ la gbɛ, i ye n gbesila.”

²⁹ Belam ya a yabi ko, “I wara n nayarabi. Ni faan taranta n bɔgɔla nun, n si i kan tɛgɛ a dagɛ rɔ.”

³⁰ Sofɛlɛ ya a fɔ a ye ko, “Ila sofɛlɛ le ma nde le la? I sa i sigila nde la tuma-wo-tuma? Ha bi, n bara kɛ nyɔgɔn ma i la nun?” Belam ya a fɔ ko, “Ade.”

³¹ Mari ya a ma, Belam nyɛrɛ ya melika anubɛ faan sɔnɛ yen kila-kole la, yɔ! Belam ya a sa dugi ma melika kɔrɔ.

³² Melika ya a manyinika a fanka la, a ko, “Nfen ya a to gbɛ, i wara ila sofɛlɛ gbesi kɛ nya na iko sawa dɛgɛdɛgɛ? N bara na kilɛ tɛgɛ tinɛ i ma. I ye tala koe min na kɛ la, wo ma n hɛnɛ mumɛ!

³³ Ila sofɛlɛ le ya a ma, n ma i faga. Ni a ma a kan-kɔ sɔ nun iko sawa, n si ile faga nun ka sofɛlɛ kɛ kɛndɛ to.”

³⁴ Belam ya a fɔ melika ye ko, “N bara hakɛ kɛ i la. N ma a lɔn nun ko ile le sɔnɛ n yarɔ nun ka n nasɛgi. Ni ile lara a la ko a ma bɛn n ni ta, a fɔ n ye. N ni sɛgi n kɔma kelenna!”

³⁵ Kɔnɔ melika ya a fɔ a ye ko, “Ta mɔgɛ kɛnu fɛ kɔnɔ alako tun, i ni a fɔ iko Alla ya a fɔ i ye nya min dɔrɔn!” Belam tara gbɛ!

Belam Sɛnibɔ-Koe Mansa Balaki Bolo

³⁶ Balaki ya a lamɔɛn min kɛ ko Belamnu bi kilɛ la, a tara anu nabɛn tinɛ Ari soe burɔ Mohabu nyamanɛ rɔ. Soe wo ye Amora nyamanɛ dafɛ Anɔn bɛ dala.

³⁷ Balaki ya a sɛnibɔ. A ya a manyinika ko, “N ya i kele min kɛ a fɔlɔtɛ rɔ, nfen ya a to, i ma na? Ile ma la a la ko n si ke i sarala a kilɛ fɛ, wa?”

³⁸ Belam ya a yabi ko, “Nde le ma kɛ la gbɛ? N si ke kumɛ do latɛgɛla n nyɛrɛ ye, wa? Alla ye min fɔla n ye, n si wo le dɔrɔn fɔ wo ye.”

³⁹ Mansa Balaki tara Belam na a bolo Husɔti soe burɔ.

⁴⁰ Balaki ya ninkinu anubɛ sagɛnu faga ka Belam anubɛ mɔgɔ-ba-sɛbɛnɛ wonu fanda wonu na.

Belamta Wɔlɔyiya Fɔlɔtɛ

⁴¹ Wo wulun sɔgɔma, Mansa Balaki ya Belam bi ka ta a la Mohabu kɔnkɛ do kuma, anu si anuta bɛsɛ donu kɔ kan min. Anuta bɛsɛ tɔgɛ le Beyali. Anu tenbi kɔnkɛ wo kuma, anu si Isirɛla mɔgɛ donu yen wula-yan bɛ la.