Yilan-Yilan Koe 20 - ALLALA KUMƐ

Yi Bɔ-Koe Fara-Kole Rɔ

¹ Isirɛla mɔgɛnu bɔɛ Iyipiti san bi-sawa ani san kɔnɔntɔ (39) tenbira min kɛ, a san bi-nani nyɔgɛ (40) karɛ fɔlɛ ma, anu kera Sini wulɛ rɔ. Anu ya anu daga makɛ kan tinɛ do rɔ min tɔgɔ Kɛdɛsi. Musa tirisan-musi Miriyam fagara nyɔ le. Anu ya a togon.

² Kɔnɔ yi mumɛ sa kan tinɛ wo rɔ. Mɔgɛ min damasi ye dagɛ wo rɔ, wonu damasi ya anu nadɛn Musa anubɛ Aruna kan ma. Anu donta gbunya-kuma-fɔɛ rɔ ko,

³ “A fisa nun hali ma fagara Marita Fani-Bɔn wo yakɔrɔ, ma ta-nyɔgɛnu fagara kan min.

⁴ Nfen ya a to, wo nara ma la wula-da-rakolɔn kɛ rɔ? A sɔgɛ ye wo la, mabɛ mala kolo-fannu damasi ni faga yan tɔ?

⁵ Nfen ya a to, wo bɔra ma la Iyipiti nyamanɛ rɔ ka na ma la kan-tina-yogoma-wɛ kɛ rɔ. Dugu-latinyanɛ le kɛ la. Fui-fen sa yan, ki-fen sa yan, hali yi, a sa ma bolo yan ka ma min.”

⁶ Musa anubɛ Aruna ya anu masɛgi nyama la ka anu sɔ Marita Fani-Bɔn don-dɛ la. Anu ya anu maburun dugi ma. Marita ta-waan bɔra gbɛ rɔ anu ye.

⁷ Mari ya a fɔ Musa ye ko,

⁸ “Ta Arunata sewuri wo bi min bi tɔn-kenkirɛ kɔrɔ. Wo kɔma, wo ni Isirɛla mɔgɛ bɛɛsi kele. Wo ni kuma farɛ wo ye mɔgɛ bɛɛsi yakɔrɔ. Wo kɔma, yi si bɔ farɛ wo rɔ ka tugu a rɔ ka wo damasi wasa anubɛ wola kolo-fannu.”

⁹ Musa tara sewuri wo bi iko Mari ya a fɔ a ye nya min.

¹⁰ Musa anubɛ Aruna ya mɔgɔ damasi kele ka na anu sɔ farɛ wo dafɛ ka a fɔ anu ye ko, “Wo ni wo tole masɔ, wole mɔgɔ-faratiyanɛnu! Fɔ male ni na yi labɔ farɛ kɛ rɔ wole ye, wa?”

¹¹ A banta kumɛ kɛ fɔla tumɛ min, a ya Arunala sewuri wo layɛlɛ a kun tɛma ka farɛ wo gbesi wo la iko fila dɛgɛdɛgɛ! Kaka wo rɔ, yi tugura a rɔ. Mɔgɛ min bɛɛ ye nyɔ, anubɛ anuna kolo-fannu, wonu damasi ya anu min yi wo la ka wasa.

¹² Kɔnɔ Mari kumara Musa anubɛ Aruna ma. A ya a fɔ anu ye ko, “Bawo wo ma la n na ka nta kumɛ bira ka nta gbiliyɛ anubɛ nta fanka yira mɔgɛnu na min kɛ, woletɔ wo ti sɔ mɔgɛ kɛnu yarɔ ka ta anu na lanyiri-nyamanɛ rɔ n bara min di wo ma.”

¹³ Mari ya ata telenbagayɛ yira anu na nyɔ. Anu ya yi kɛ tɔgɔ sa “Sɔnkɔ-Sɔnkɔ Tenke” bawo Isirɛla mɔgɛnu kumara Mari ma nyɔ.

Idɔm Mɔgɛnu Ban-Koe Isirɛla Mɔgɛnuna Tenbi-Koe ma anuna Nyamanɛ Rɔ

¹⁴ Musa ya kilayɛ lata ka bɔ Kɛdɛsi dagɛ rɔ ka ta ke Idɔm nyamanɛ mansɛ ma. Kilayɛ ya a dantɛgɛ mansɛ wo ye ko, “Kumɛ kɛ bɔra i na-kelen-nyɔgɛ Isirɛla mɔgɛnu bolo. Anu ko, ‘Wo ara mata tɔrɔyɛ kɛ lamɔɛn.

¹⁵ Ma benbanu tara Iyipiti tumɛ min, ma ya san siyaman bɔ nyɔ. Iyipiti mɔgɛnu ma ma bira a kin na nyɔ, ado anu ya ma tɔrɔ kosɛbɛ!

¹⁶ Ma dira ko Mari ni ma dɛnbɛ min kɛ, Mari ya ma di-kɛ-kan wo lamɔɛn. A ya melika lana ka ma labɔ Iyipiti nyamanɛ rɔ. Kɔnɔ kaka, ma ye Kɛdɛsi dagɛ rɔ ila nyamanɛ dala.

¹⁷ “ ‘I yandi, i ni sɔn ma ni tenbi ila nyamanɛ kɛ rɔ, mabɛ mala kolo-fannu. Ma ti kila-wɛ madasa mumɛ! Ma ti ta wola ki-fannu tɔ anubɛ wola sɛnɛnu tɔ mumɛ! Hali wola kɔlɔnnu, ma ti yi bi anu tɔ ka ma min anubɛ ka a di mala kolo-fannu ma. Ma ye tala ma ya-telen tɔ ha ma si tenbi ila nyamanɛ la.’ ”

¹⁸ Idɔm mɔgɛnu ya a fɔ anu ye ko, “Ma ti sɔn wo ni tenbi mala nyamanɛ rɔ mumɛ, ado ni wo ya wo tui ka wo ma, ma si na wo kɛlɛ tinɛ.”

¹⁹ Kilayɛnu ya madiyali kɛ tun ko, “Ma ye tagamana kila-kole le dɔrɔn fɛ. Hali wo, mabɛ mala kolo-fannu, ma ya yi-wo-yi min, ma si wo sara, alako tun, male ni kilɛ sɔrɔn.”

²⁰ Idɔm mɔgɛnu ya a fɔ tun ko, “Male sa wo rɔ.” Wo kɔma, anu ya anuna kɛlɛ-nyananu bi ka ta Isirɛla mɔgɛnu nabɛn tinɛ kɛlɛ la.

²¹ Idɔm mɔgɛnu ma sɔn min kɛ ko anu ni tenbi kilɛ wo fɛ, woletɔ anu ya kila-gbɛrɛkɛ nyini ka ta wo fɛ.

Aruna Faga-Koe Hɔ Kɔnkɛ Kuma

²² Isirɛla mɔgɛnu ya Kɛdɛsi dagɛ boloka ka ta ha Hɔ kɔnkɛ kɔrɔ,

²³ min bi Idɔm nyamanɛ-dan la. Mari ya a fɔ Musa ye Aruna yala ko,

²⁴ “Aruna ti don lanyiri-nyamanɛ wo rɔ. A ye so-sɛgi-kɛla yan de bawo wo murutiyara n ma Sɔnkɔ-Sɔnkɔ Tenke dafɛ.

²⁵ Woletɔ i ni Aruna anubɛ ala den Ɛliyasa bi ka ta anu na Hɔ kɔnkɛ kuma.

²⁶ Wo wa ke kɔnkɛ kuma nyɔ tumɛ min, i si saraka-masɔ-duruki bɔ Aruna kan na ka a bila ala den Ɛliyasa kan na. Aruna si faga nyɔ le gbɛ!”

²⁷ Musa ya a ma iko Mari ya a fɔ a ye nya min. Anu bi yɛlɛla kɔnkɛ wo kuma wati min, Isirɛla mɔgɛ bɛɛsi ya anu yɛ gbala anu na.

²⁸ A ya Arunala saraka-masɔ-duruki bɔ a kan na ka a don ala den Ɛliyasa kan na. Aruna fagara kɔnkɛ kuma nyɔ min kɛ, Musa anubɛ Ɛliyasa yigira.

²⁹ Isirɛla mɔgɛ bɛɛsi ya a lɔn min kɛ ko Aruna ara faga, anu damasi dira ala ko la ha tele bi-sawa.