Yilan-Yilan Koe 19 - ALLALA KUMƐ

Sɛninya-Yi Rabasan-Koe

¹ Mari ya a fɔ Musa anubɛ Aruna ye ko,

² “Ni mɔgɔ sɛninyani ma iko tɔn ya a fɔ nya min, yi min si mɔgɛ wo sɛninya, wo rabasan-bole le kɛ la alako mɔgɛ wo si sɛninya nya min. Isirɛla mɔgɛnu si na yɛrɛ-wulen kelen na, fɛɛ sa min na, min ma saradaba-wɔlɛ kɛ wɛ.

³ Anu ni a bi ka a don Saraka-Masɔla Ɛliyasa bolo. Wo kɔma, anu si yɛrɛ wo bi ka bɔ a la dagɛ kɔma ka a faga nyɔ Ɛliyasa yala.

⁴ Ɛliyasa si a yele do bi a bolo-nɔlɔnɛ la iko wɔrɔnfila ka a pusen nta Fani-Bɔn wara la iko wɔrɔnfila.

⁵ Saraka-masɔlɛ do si a gbole mintan anubɛ a soge nyɛrɛ, anubɛ a yele, hali a nugi fanan. Wo dama si mintan gburr! Kɔnɔ ninki-soge kɛ tenbi mintanna, a si mintan Ɛliyasa yala.

⁶ Ɛliyasa si kɔlɔma bolɔn do bi min tɔgɔ sida anubɛ kɔlɔma-wurumɛ do, anu bi min kelela ko hisɔpu anubɛ yili-kolo-wulan. A si kɛ mumɛ bi ka a lakɛ ninki fɛ tɛ rɔ. Wonu dama si mintan anu nyɔgɔn fɛ.

^7-8 “Kɛ mumɛ wa ban mintanna tumɛ min, Ɛliyasa anubɛ saraka-masɔlɛ min ya ninki mintan, anu si anuna kurɛ wonu ku ka anu bagbuyi fanan ku. Wo kɔma, anu si ta dagɛ rɔ kɔnɔ anu sɛninyani ma iko tɔn ya a fɔ nya min ha wurɛ la.

⁹ “Mɔgɔ-gbɛrɛ min sɛninyanɛ iko tɔn ya a fɔ nya min, wo fanan si ta-gbangban wo mumɛ bɛɛ ladɛn ka a sa dinkira-sɛnimɛ rɔ dagɛ kɔma ka a lamara nyɔ. Anu si ninki-mintannɛ ta-gbangban wo do bi ka a kɛ yi rɔ. Nde Marita sɛninya-yi wo si a ma, mɔgɔ ni sɛninya tɔn bolo.

¹⁰ Wo kɔma, mɔgɛ min bi ta-gbangban wo makɔla, wo tigi nyɛrɛ si ala kurɛnu ku. Wo sɛninyabɛlɛ si to ha wurɛ la. Tɔn kɛ si to wo kuma ka a dabira kaka ma ha duninya si ban, a mara sundan na wo, a mara dugurɛn na wo.

Mɔgɛnu Sɛninya-Koe Marita Sɛninya-Yi La

¹¹ “Mɔgɔ-wo-mɔgɛ min bi a bole tugula furi la, wo tigi ma sɛninya tele wɔrɔnfila kɔrɔ iko tɔn ya a fɔ nya min.

¹⁷ Min si wo tigi sɛninya, a si yɛrɛ ta-gbangban wo do bi ka wo kɛ dagɛ do rɔ ka yi kɛ a kuma.

¹⁸ Mɔgɛ min sɛninyanɛ iko tɔn ya a fɔ nya min, wo si kɔlɔma-wurumɛ wo kelen tɛgɛ a la min tɔgɔ hisɔpu. A si kɔlɔma wo bi ka a sungban sɔ yi wo rɔ. Wo kɔma, a si yi wo sosa mɔgɔ-sɛninyabɛlɛ wo ma kɔlɔma wo la.

¹² A si yi wo sosa mɔgɛ wo ma a tele sawa nyɔgɛ anubɛ a tele wɔrɔnfila nyɔgɛ ma. Kɔnɔ ni a ma sɔn ka yi wo kɛ a ma a tele sawa nyɔgɛ anubɛ a tele wɔrɔnfila nyɔgɛ ma, a ti sɛninya wo rɔ iko tɔn ya a fɔ nya min.

¹³ Mɔgɔ-wo-mɔgɔ min si a bole tugu furi la kɔnɔ wo tigi ma sɔn ko yi kɛ ni kɛ a ma iko tɔn ya a fɔ nya min, wo si a ma iko a ya nde, Marita Fani-Bɔn latinya. Wo si mɔgɛ wo bɔ wo kurun tɔ.

¹⁴ “Ni mɔgɛ do fagara a nyɛrɛta fani-bɔn la, mɔgɛ min bɛɛsi ye fani-bɔn wo la anubɛ min bi tala a kunyɛ ladonna bɔn wo la, wonu fenfen ti sɛninya tɔn bolo tele wɔrɔnfila kɔrɔ.

¹⁵ Hali dagɛ min da latogonbɛlɛ, wo fanan ma sɛninya.

¹⁶ Wo kɔma, mɔgɔ-sɛninyanɛ si kɔlɔma wo bi ka a sɔ nde, Marita sɛninya-yi wo rɔ ka wo pusen fani-bɔn wo ma anubɛ mɔgɛ minnu bi bɔn wo burɔ anubɛ bonna-miran bɛɛsi. A tele wɔrɔnfila nyɔgɛ wo ma, mɔgɔ-sɛninyabɛlɛ wo si ala kurɛnu ku ka a bagbuyi fanan ku. Tele-kolo-wulan wati wa tenbi, a si sɛninya. “Ni mɔgɛ ya a bole tugu a hadama-den-nyɔgɛ furi do la hali min fagara a nyɛrɛ ma, ni wo ma, min fagara setanɛ bolo, wo tigi ma sɛninya. A hadama-den-kole wo, a kaburu-kɔrɛ wo, ni a bole tugura wo fenfen na, wo tigi fanan ma sɛninya tele wɔrɔnfila kɔrɔ. Mɔgɛ min sɛninyanɛ si nde, Marita yi-sɛnimɛ wo bi ka a pusen mɔgɔ-sɛninyabɛlɛ wo ma kɔlɔma la.

¹⁹ A si wo ma a tele sawa nyɔgɛ anubɛ a tele wɔrɔnfila nyɔgɛ ma. A tele wɔrɔnfila nyɔgɛ wo ma, mɔgɛ min ma sɛninya, wo si ala kurɛnu ku ka a bagbuyi fanan ku. Tele-kolo-wulen-wati wa tenbi, a si sɛninya.

²⁰ “Mɔgɔ-wo-mɔgɔ min ti sɔn ka a nyɛrɛ sɛninya nde, Marita sɛninya-yi wo la, wo si ma iko wo tigi nyɛrɛ ya nta Fani-Bɔn latinya. Anu si mɔgɛ wo bɔ anu kurun tɔ.

^21-22 Mɔgɛ min si nde, Marita yi-sɛnimɛ pusen mɔgɔ-sɛninyabɛlɛnu ma, hali wo fanan si ata kurɛnu ku. Mɔgɔ-wo-mɔgɔ min si a bole tugu nde, Marita yi wo la, wo fanan sɛninyabɛlɛ si to ha wurɛ la. Mɔgɔ-sɛninyabɛlɛ si a bole tugu fan min na, wo fanan sɛninyabɛlɛ si to ha wurɛ la. Min si a bole tugu fan wo fanan na tun, wo fanan tigi sɛninyabɛlɛ si to ha wurɛ la. Tɔn le kɛ la min ti bɔ wo kuma ha duninya si ban.”