Yilan-Yilan Koe 18 - ALLALA KUMƐ

Marita Fani-Bon-Wɔlɛ Di-Koe Aruna anubɛ A Na-Kelen-Nyɔgɛnu Ma

¹ Mari ya a fɔ Aruna ye ko, “Ni tɔn-wo-tɔn tinyanta nta bɔn kɛla ko la, n bara dunɛ wo bɛɛ sigi wobɛ ila dannu anubɛ i na-kelen-nyɔgɛnu kuma. Kɔnɔ ni tɔn-wo-tɔn tinyanta saraka-masɔ-wɔlɛla ko la, n bara wo dunɛ sigi wobɛ ila dannu dɔrɔn kuma.

² I tenbi nta Fani-Bɔn-wɔlɛ min kɛla, i si Lifayi bɔnsɔn-mɔgɛnu kele ka i dɛnbɛ luyima-wɔlɛ la.

^3-4 Anu si wo dɛnbɛ bɔn kɛwɔlɛnu na dɔrɔn kɔnɔ mɔgɔ-wo-mɔgɔ kana a gbɛrɛn nta bonna-wɔlɛ ma n ma min yabɔ. Anu si wo dɛnbɛ kɔnɔ anu kana anu bole tugu miran-sɛnimɛ fenfen na anubɛ saraka masɔ tinɛ. Ni wo do ya a bole tugu wo fenfen na, wonubɛ ile si faga.

^5-6 Nde nyɛrɛ-nyɛrɛ le ya Lifayi mɔgɛnu yabɔ Isirɛla mɔgɛnu tɛma ka ma wole dɛnbɛnɛnu na. N bara wonu di wole ma ka anu dantɛgɛ nde ma. “N bara nta bon-burɔ-wɔlɔ-dunɛ sa wobɛ ila dannu kuma anubɛ saraka-masɔ-wɔlɛ, woletɔ nta diminyɛ ti sigi Isirɛla mɔgɛnu kuma tun!

⁷ Wota dunɛ le kɛ la bawo n bara saraka-masɔ-wɔlɛ di wo ma. Mɔgɔ-wo-mɔgɔ min ma bɛn ka wɔlɛ wo kɛ, ni wo ya nyɛrɛmankolayɛ ladan, wo nyɛrɛ si faga.”

Sarakɛnu anubɛ Kɔ-Fannu Di-Koe Aruna anubɛ Ala Denbayɛnu Ma

⁸ Mari ya a fɔ Aruna ye ko, “Isirɛla mɔgɛnu bi nala sarakɛ minnu na, sarakɛ wo dama si ma woletɛ la fɔ minnu bi mintanna nde ye dɔrɔn! Kɛnu si ma wotɛ la habadan!

⁹ Ni nna mɔgɛnu nara fenfen na min si ma dɛgɛ-sarakɛ la wo, hakɛ-sarakɛ la wo, yiliki-sarakɛ la wo, wo si donu mintan nde ye. A toe si ma wolebɛ ila dannutɛ la.

¹⁰ Kɔnɔ keinu denu dɔrɔn si kɛ dɔn. Anu tenbi a dɔnna tumɛ min, anu ni anu miri a ma ko a dantɛgɛnɛ Mari ma.

¹¹ “Isirɛla mɔgɛnu si kɔ-fan minnu lente-lente ka a di nde, Mari ma, wonu si ma wobɛ ila denbayɛnuna dɔn-fan la fanan ha duninya si ban. Minnu sɛninyanɛ iko tɔn ya a fɔ nya min, wonu dɔrɔn si a dɔn.

^12-13 “Isirɛla mɔgɛnu ba na dɔntɛ kɔ-fan kun-fɔlɛ min na nde ye, wo si ma woletɛ la san-bo-san, a mara ɔlifi-tuli la wo, a mara nɔnbɔ-gbɔ-yi la wo, a mara nyɔɛ la wo. Minnu sɛninyanɛ iko tɔn ya a fɔ nya min, wonu denu dɔrɔn si a dɔn.”

Kɔ-Fannu Kunka-Koe

¹⁴ Mari ya a fɔ Aruna ye tun ko, “Ni anu ya kɔ-fan fenfen dantɛgɛ nde, Mari ma a dan na, wo si ma woletɛ la iko n ya a fɔ nya min.

¹⁵ “Wo si den-kei fɔlɔtɛ minnu di nde, Mari ma, a mara mɔgɔ la wo, a mara kolo-fen dan keima la wo, anu bi min dila nde, Mari ma, wo bɛɛ si to wole ye. Kɔnɔ fɔ wole fanan ni sɔn ko den-sɔrɔnnɛ wonu ni anuna dannu kunka wodi la. A mara kolo-fen wo kolo-fen na min ma bɛn ka ma sarakɛ la, wo ni sɔn wonu tiginu ni wonu fanan kunka wodi la.

¹⁶ Minnuna dan wa ke karɛ kelan rɔ tumɛ min, anu si a kunka anuna wodi-gbɛ-gbu loli la iko Fani-Bɔn wodi gbiliyanɛ ye nya min. (Wodi-gbɛ wo gbiliyɛ mani de iko wodi-mɛlan tan.)

^17-18 Kɔnɔ ni a mara turɛ la wo, saga-kɔndɔn la wo, baa-kɔrɔn la wo, anu kana wonu den fɔlɔtɛ wo keima fenfen kunka, fɔ ka wonu di nde, Mari ma ka wo ma sarakɛ la. Wo si wonu faga ka anu yele purupuru saraka-mintan-tinɛ kuma kɔnɔ a soge si to wole ye. Wo si a kɛɛnnu mintan, ado wo mintan-sumɛ si diya nde, Mari ye. Saraka-masɔla-kun-tigi si a bolo-nyimama-wore anubɛ a kɔgɔ-barasa-kole bi ka a lente-lente nde, Mari yakɔrɔ. Wo kɔma, a si ma wotɛ la.

¹⁹ “Isirɛla mɔgɛnu si kɔ-fan minnu di n ma, n bara wonu bɛɛ ma ile anubɛ ila denbayɛnutɛ la. Habadan-lanyiri le kɛ la min ti tinya mumɛ!”

²⁰ Mari ya a fɔ Aruna ye ko, “Wo wa ke kan tinɛ wo rɔ wo ye nala tala kan min, wobɛ ila denbayɛ ti dugu mumɛ sɔrɔn wo nyɛrɛ ye. Woleta kan tinɛ le nde nyɛrɛ la.”

Isirɛla Mɔgɛnuna Yaka Di-Koe Lifayi Mɔgɛnu Ma

²¹ Mari ya a fɔ tun ko, “Isirɛla mɔgɛnu bi yaka min bɛɛ dila nde ma, n bara wo latenbi wole Lifayi mɔgɛnu ma. Wo sarɛ le kɛ la kamasɔrɔn wo ara nta Fani-Bɔn fɛ-bira a kilɛ fɛ.

²² Kɔnɔ Isirɛla mɔgɛ toenu kana anu gbɛrɛn nta Fani-Bɔn ma. Ni min ya a gbɛrɛn wo ma, wo si faga yati!

²³ Ka a dabira bi ma, Lifayi bɔnsɔn, wonu dɔrɔn si anu gbɛrɛn nta Fani-Bɔn ma. Tɔn le kɛ la min bi wole kuma ha duninya si ban. Lifayi mɔgɛnu ti nyamanɛ wo fenfen sɔrɔn anu nyɛrɛ ye iko n ya lanyiri min kiri anu benbanu ye

²⁴ bawo mɔgɛnu bi nala yaka min bɔla, wonu bara ma woletɛ la. Woletɔ n ya a fɔ ko anu ti nyamanɛ wo fenfen sɔrɔn Isirɛla mɔgɛnu tɛma.”

Lifayi Mɔgɛnuta Yaka Di-Koe Aruna Ma

^25-26 Mari ya a fɔ Musa ye ko a ni kumɛ kɛ latenbi Lifayi bɔnsɔn-mɔgɛnu ma ko, “Isirɛla mɔgɛnu ba Marita yaka di wo ma tumɛ min, wole fanan ni wota yaka bɔ wo rɔ.

²⁷ Wota yaka, wo mani de Mari yala iko mɔgɛ minnu bi wɔlila sɛnɛ rɔ, wonuta yaka manɛ nya min.

^28-29 Wole nyɛrɛ-nyɛrɛ fanan si wota yaka di Mari ma ka bɔ Isirɛla mɔgɛnuta yaka-hakikɛ rɔ. Wole ni wota yaka wo bi ka a di Aruna ma.

³⁰ Wo wa ban yaka-hakikɛ wo bɔla tumɛ min, wo si a toe wo lamara wo nyɛrɛ ye iko sɛni-salɛ wa ban ata sɛnɛ yaka bɔla, wo si a toe lamara a nyɛrɛ ye nya min.

³¹ Ni wo ara ban wo yaka dila Mari ma, a ma yogo ni wo ya a toe dɔn mumɛ! Kɔnɔ wobɛ wola denbayɛnu si ta a toe la wo wara-bɔnnu na ka a bɛɛ dɔn fegba! Wo sarɛ le kɛ la bawo wo ye wɔlila Marita Fani-Bɔn la.

³² Ni Isirɛla mɔgɛnu ya yaka-hakikɛ bɔ ka a di wole ma kɔnɔ wole ma sɔn ka wota yaka bɔ wo rɔ, ni wole ya yaka wo dɔn, wo si yiliki sɔrɔn Mari bolo. Wo ara yaka-sɛnimɛ wonu latinya Mari yala. Ni wo ya wo ma, wo si faga yati!”