Yilan-Yilan Koe 17 - ALLALA KUMƐ

Arunata Kɔrɔ-Sɔ-Sewuri

¹ Mari ya a fɔ Musa ye ko,

² “A sɔgɛ ye n na, n ni gbunya-kumɛ ban wo tɛma. A fɔ Isirɛla mɔgɛnu ye ko bɔnsɔn tan-ni-fila kun-tigi kelen-kelennamɛ-bɛɛ ni na anuta kɔrɔ-sɔ-sewurinu na anu bolo. Anu ba na kɔlɔma wonu na tumɛ min, i si bɔnsɔn-kun-tigi kelen-kelan tɔgɔ sɛbɛ ata kɔlɔma ma.

³ Aruna si ma Lifayi bɔnsɔn-kun-tigi la ka ale tɔgɛ sɛbɛ anuna kɔrɔ-sɔ-sewurinu ma.

⁴ I si kɔrɔ-sɔ-sewuru tan-ni-filɛ wonu bi ka ta anu na nta Fani-Bɔn la ka anu sa nta tɔn-kenkirɛ yakɔrɔ n si i taran kan min.

⁵ Ni nde ya mɔgɛ min yabɔ, wota kɔlɔma si a matii. Wo le si tɔn sigi gbunya-kumɛ la wo ma Isirɛla mɔgɛnu bolo.”

⁶ Musa ya Marila kumɛ kɛ latenbi Isirɛla mɔgɛnu ma. Anu ya kɔlɔma tan-ni-kelan wonu don Musa bolo. Arunatɛ ya a dafa kɔlɔma tan-ni-fila ma.

⁷ Musa ya sewuru tan-ni-filɛ wonu bi ka ta anu na Marita Fani-Bɔn burɔ ka anu sa tɔn-kenkirɛ kɔrɔ.

⁸ Wo wulun sɔgɔma, Musa tara Marita Fani-Bɔn burɔ tɔn-kenkirɛ ye kan min. Arunata kɔlɔma min bi Lifayi bɔnsɔn nyɔgɔnyɛ la, Musa ya a yen ko wo le kelen pe ara a matii ka a nɔrɔn yabu-yabu! A yanba-kunyɛ siyaman bi a ma anubɛ a ferenu anubɛ a gbɔɛnu.

⁹ Wo kɔma, Musa ya kɔrɔ-sɔ-sewuri wonu bi ka anu nabɔ luyi ma ka anu yira Isirɛla mɔgɔ damasi la. Anu ya wonu yen tumɛ min, anu lara a la ken! Kun-tigi kelen-kelennamɛ-bɛɛ ya atɛ bi.

¹⁰ Mari ya a fɔ Musa ye tun ko, “Arunata sewuri wo bi ka a lasɛgi a gbɛ rɔ kenkirɛ kɔrɔ. I si a lamara nyɔ habadan! Isirɛla mɔgɛnu si to anu hɛnkili lamirila sewuri kɛ ma ko anu kana murutiyɛ lawuli tun! Ni anu ya murutiyɛ lawuli tumɛ min, anu dama si faga tɛrr!”

¹¹ Musa ya a ma iko Mari ya a fɔ a ye nya min.

¹² Isirɛla mɔgɛnu ya a fɔ Musa ye tun ko, “E, kaka ma damasi ye nala fagala!

¹³ Ni min ya a madon Marita Fani-Bɔn la, wo si faga le yati! E, ma damasi ye nala taranna sayɛ kɔrɔ gbɛ!”