Yilan-Yilan Koe 15 - ALLALA KUMƐ

Saraka-Mintantɛ Tɔn Di-Koe Isirɛla Mɔgɛnu Ma

¹ Mari ya a fɔ Musa ye ko,

² “Isirɛla mɔgɛnu ba ke lanyiri-nyamanɛ wo rɔ tumɛ min, i ni anu hɛnkili labila tɔn kɛnu ko anu si minnu bira.”

³ Musa ya Marila kumɛ latenbi ko, “Ni wo ye a fɛ ka saraka-mintantɛ di Mari ma alako a sumɛ ni diya a ye, ni a mara lanyiri-sarakɛ la wo, ni a mara hɛniki-sarakɛ la wo, ni a mara sewa-sarakɛ la wo, fɔ wo sarakɛnu ni bɔ wola kolo-fannu tɔ.

⁴ Fenfen min si ma dɛgɛ-munke la, anu si wo ma kɔ-fan la ka na wonubɛ sarakɛ la anu nyɔgɔn fɛ. Min tenbi nala sarakɛ la, a mara saga la wo, a mara baa la wo, wo tigi ni na dɛgɛ-munke pani-kunbɛ-nya kelen na min tamaganɛ ɔlifi-tuli kilasi-nya nani na ka wo sa sarakɛ wo kuma.

⁵ Wo tigi ni na nɔnbɔ-gbɔ-yi kilasi-nya nani fanan na ka wo sa kɛnu kuma.

⁶ “Min tenbi nala saga-yigi la, wo tigi ni na dɛgɛ-munke pani-kunbɛ-nya fila la a bolo min tamaganɛ ɔlifi-tuli kilasi wɔrɔ la ka a sa sarakɛ wo kuma.

⁷ Wo tigi ni na nɔnbɔ-gbɔ-yi kilasi wɔrɔ la a bolo ka wo sa sarakɛ kɛnu fanan kuma. Anu ba sarakɛ wo mintan tumɛ min, sarakɛ wo ta-sisi-sumɛ si diya Mari ye bɛrɛkɛ!

^8-9 “Min tenbi nala tura-bulan la a bolo, a mara saraka-mintanta la wo, a mara yisi-kima-saraka la wo, a mara lanyiri-saraka la wo, wo tigi ni na dɛgɛ-munke pani-kunbɛ-nya sawa la min tamaganɛ ɔlifi-tuli kilasi segin na a bolo ka a sa tura-sarakɛ kɛ kuma.

¹⁰ Wo tigi ni na nɔnbɔ-gbɔ-yi kilasi-nya segin na a bolo ka wo sa sarakɛ kɛnu kuma. Anu ba sarakɛ wo mintan tumɛ min, sarakɛ wo ta-sisi-sumɛ si diya Mari ye bɛrɛkɛ!

¹¹ “Min tenbi nala sarakɛ la, wo tigi ye nala kɔ-fan kɛ le nyɔgɛ la a bolo.

¹² Mɔgɔ wa na kolo-fan min nyɔgɛ la, a si na wo nyɔgɛ ɔlifi-tuli anubɛ dɛgɛ-munke anubɛ nɔnbɔ-gbɔ-yi la a bolo iko tɔn kɛnu ya a fɔ nya min.

^13-16 Tɔn kɛnu bi wo dama kuma, i mara dugurɛn na wo, i mara sundan na min siginɛ wo tɛma anubɛ min tenbimatoe wo. Wo damasi ni tɔn kɛnu bira min si ma saraka-mintantɛ suma-diyamɛ la Mari ye. Sundan wo, dugurɛn wo, wo bɛɛsi kelen Mari yala. Kɛ si ma habadan-tɔn la wo ye.”

^17-18 Musa ya Mari kuman-kan kɛ latenbi Isirɛla mɔgɛnu ma ko, “Wola dannu ba na lanyiri-nyamanɛ wo rɔ tumɛ min, kɛ si ma tɔn la wo ye.

¹⁹ Anu tenbi nyamanɛ wo dɔn-fan dɔnna tumɛ min, anu ni do bi ka a ma kɔ-fan la Mari ye.

²⁰ Anu bi dɔn-fen-kun-fɔlɛ min tɛgɛla, anu si wo ma biredi la ka wo biredi-lɔngbɔn fɔlɔtɛ ma kɔ-fan la Mari ye. Anu si kɛ bi ka a don saraka-masɔlɛ bolo. Wo si a di a ma iko wo duruta dɔn-fen kɔ-fan dila a ma nya min.

²¹ Ha duninya si ban, kɛ ye wota namunyɛ la ka biredi fɔlɔtɛ ma kɔ-fan la Mari ye.”

^22-23 Mari ya a fɔ Musa ye ko, “N bara nta tɔn minnu di i ma ka a fɔlɔ kaka ma, tɔn kɛnu bi wo kuma ha duninya si ban. Ni Isirɛla mɔgɛ do nyinara tɔn wo do ko tumɛ min,

²⁴ kɔnɔ tɔ-a-la, a ni a lɔn, wo kɔma, a si sarakɛ bɔ. Ni Isirɛla mɔgɛ bɛɛsi nyinara, wo kɔma, anu ni a lɔn, anu ni sarakɛ wo bɔ. Wo sarakɛ le kɛnu na anu si minnu bɔ. Anu si tura kelen bɔ anubɛ wo nyɔgɛ dɛgɛ-munke anubɛ wo nyɔgɛ nɔnbɔ-gbɔ-yi iko n bara a fɔ wo ye nya min nun. Wo mintan-sumɛ si diya nde, Mari ye. Anu si baa-kɔrɔn kelen bɔ ka wo ma hakɛ-sarakɛ la.

²⁵ Saraka-masɔlɛ si a ma, mɔgɛ bɛɛsila hakɛ yama ni togon iko anuta namu ye nya min. Ni anu ya sarakɛ wo bɔ, wo kɔma, nde, Mari si anu makoto bawo anu nyinara le.

^26-29 Mɔgɛ min nyɛrɛ samara, wo tigi si na baa-yɛrɛ san kelan la hakɛ-sarakɛla ko la. Saraka-masɔlɛ si a ma, a hakɛ yama ni togon iko anuta namu ye nya min. Wo kɔma, nde, Mari si a makoto ka a sɛninya. A mara dugurɛn na wo, a mara sundan na wo, nde, Mari si anu bɛɛsi makoto kamasɔrɔn anu dama si taran samɛ wo kɔrɔ.

³⁰ “Ni mɔgɛ do ya a tui ka tɔn wo do tinya, a ara bila nde, Mari la. Wo si mɔgɛ wo bira ka a faga. Wo mara dugurɛn na wo, a mara sundan na wo, wo tigi si faga

³¹ kamasɔrɔn a ara murutiya nde, Mari ma. Wo tigi nyɛrɛ tɔgɛ si to a nyɛrɛ la, yɔ!”

Sulen-Tele Tinya-Koe Tamasere

³² Lun kelen, wo tumɛ anu bi wula-da-rakolɔn rɔ, anu ya kei kelen taran, a ye sɔgɔ-nyinɛ la Sulen-Tele ma.

³³ Anu ya a bira ka ta a la Musa anubɛ Aruna anubɛ Isirɛla mɔgɔ-banu bara.

³⁴ Kei kɛ biranɛ gbɛ anu bolo kɔnɔ anu ma a lɔn anu si a kiti tɛgɛ nya min. Woletɔ Musa ya Mari fanan manyinika.

³⁵ Mari ya a fɔ Musa ye ko, “Fɔ wo ni a faga le, yɔ! Wo damasi ni a bi ka bɔ a la dagɛ kɔma ka a mabon kuri la.”

³⁶ Woletɔ Isirɛla mɔgɛnu ya a bi ka ta a la dagɛ kɔma ka a mabon. Anu ya a faga iko Mari ya a fɔ Musa ye nya min.

Bunsan Sɔ-Koe Anuna Kura-Tɔnkɔn Nanɛ Rɔ

^37-38 Musa ya Mari kuman-kan latenbi Isirɛla mɔgɛnu ma ko, “Ka a dabira bi ma ha duninya si ban, wo ni wola kurɛ ladan ka a bunsan sɔ a tɔnkɔn nanɛ la. Wo ni yili-kolo-bilolamɛ kelen basan wola kura bunsan nanɛ kɛnu na.

³⁹ Wo wa a bunsan kɛnu yen tumɛ min, wo si wo miri Marila tɔnnu ma ka anu bira. Wo si a ma, wo ti wo nyɛrɛ sako kɛ ka wo kan-kɔ sɔ a la.

⁴⁰ Ni wo ya a kuman-kan kɛ latɔnbagaya, wo si ma ata mɔgɔ-yabɔnɛnu na worɔ.”

⁴¹ Woletɔ Mari ya a fɔ Musa ye ko, “Wota Mari Alla le nde la. Nde nara wo la ka bɔ Iyipiti nyamanɛ rɔ. Nde si ma woleta Mari la.”