Yilan-Yilan Koe 13 - ALLALA KUMƐ

Kenan Nyamanɛ Lakɔrɔsi Koe

¹ Mari ya a fɔ Musa ye ko,

² “Mɔgɔ-ba kelen-kelen yabɔ bɔnsɔn tan-ni-filɛ kɛnu tɔ ka ta Kenan nyamanɛ lakɔrɔsi n ya min di wo benbanu ma.”

³ Musa ya mɔgɔ-ba tan-ni-filɛ wonu nata nyamanɛ wo mafɛlɛn tinɛ iko Mari ya a fɔ a ye nya min.

⁴ A ya Sakarala dan Samowa lata ka bɔ Rubɛn bɔnsɔn rɔ.

⁵ A ya Horila dan Sefati lata ka bɔ Simiyɔn bɔnsɔn rɔ.

⁶ A ya Yɛfunɛla dan Kelabu lata ka bɔ Yuda bɔnsɔn rɔ.

⁷ A ya Yusufula dan Ikali lata ka bɔ Isakari bɔnsɔn rɔ.

⁸ A ya Nunna den Hosiya lata ka bɔ Ifɛrɛm bɔnsɔn rɔ.

⁹ A ya Refula dan Pati lata ka bɔ Bɛnyamɛ bɔnsɔn rɔ.

¹⁰ A ya Sodila dan Kadiyali lata ka bɔ Sɛbulɔn bɔnsɔn rɔ.

¹¹ A ya Susila dan Kadai lata ka bɔ Manasa bɔnsɔn rɔ.

¹² A ya Kɛmalila dan Amiyɛli lata ka bɔ Dan bɔnsɔn rɔ.

¹³ A ya Maikalila dan Sita lata ka bɔ Asɛra bɔnsɔn rɔ.

¹⁴ A ya Fafisila dan Naba lata ka bɔ Nafatali bɔnsɔn rɔ.

¹⁵ A ya Mekila dan Kuwɛli lata ka bɔ Kadi bɔnsɔn rɔ.

¹⁶ Musa ya Hosiya tɔgɛ yɛlɛma ka a kele ko Yasowa.

¹⁷ Musa ya anu nata Kenan nyamanɛ mafɛlɛn tinɛ. A ya a fɔ anu ye ko, “Wo ta Kenan nyamanɛ mafɛlɛn ka a fɔlɔ yan ma. Wo ni wo telen Kenan dugula wara la. Wo wa bɔ nyɔ, wo ni ta kantɔ-wara la kɔnkɛnu siya kan min.

¹⁸ Wo ni ta nyɔ-mɔgɛnu mafɛlɛn ni anu kolo-gbɛlɛ ma ko, ka, ni anu ta ma gbɛlɛ ma ko. Ma ni a lɔn ni anu siya ma ko fanan, ka, ni anu ma siya ma ko.

¹⁹ Wo ni nyamanɛ wo mafɛlɛn ni a kin, ka, ni a ma kin. Wo ni soenu mafɛlɛn ni tarɛ mininɛ le anu ma, ka, ni tarɛ minini ma anu ma.

²⁰ Wo ni dugu-kole mafɛlɛn ni dɔn-fan si ma-a-la a rɔ, ka, ni a ti ma-a-la. Wo ni a mafɛlɛn ni kɔlɔma siyaman bi nyɔ, ka, ni kɔlɔma siyaman sa nyɔ. Wo ni na nyamanɛ wo dɔn-fen siyaman na wo bolo.” (Anu tara nyɔ karɛ min na, anu bɛnta nɔnbɔ-gbɔɛ wo mɔ-wati le ma.)

^21-24 Mɔgɔ-ba tan-ni-filɛ kɛnu bɔra Paran wulɛ rɔ ka ta Kenan nyamanɛ mafɛlɛn tumɛ min, anu ya Kenan nyamanɛ mafɛlɛn fɔlɔn Sini wulɛ rɔ dugula wara la. Anu tara a mafɛlɛnna dugula wara la ha Anaki bɔnsɔn-mɔgɛnu bi Hiburɔn soe burɔ kan min. Anu ya Anaki kebilɛ min taran nyɔ, wonu kunba, anu yan, anu sɛnbɛ kolo. Anuna kebila-kunyɛnu tɔgɛ le kɛnu na, Ahiman wo, Sɛsayi wo, Talamayi wo. (Hiburɔn soe kina Sowan soe ko min bi Iyipiti nyamanɛ rɔ, san wɔrɔnfila.) Anu tara Kenan nyamanɛ lakɔrɔsila fanan kantɔ ha Rihobu soe burɔ min bi Hamati kɔnkɔ-gbɛran wara la. Anu sɛgimatoe belenta nɔnbɔ-gbɔɛ tɔnsɔn kelen tɛgɛla ka wonu bi. Anu ya nɔnbɔ-tɔnsɔn min tɛgɛ, wo gbili. Ka a tɛgɛ ata gbiliyɛ ma, fɔ anu ba a kiri kɔlɔma ma. Mɔgɔ fila si kɔlɔma wo bi ka a sa anu kanban-kunyɛ ma. (Anu ya nɔnbɔ-gbo-tɔnsɔn wonu sɔrɔn fole min na, anu ya fole wo tɔgɔ sa Tɔnsɔn Fole.) Anu nara toro-gbɔɛ anubɛ kɔlɔma-gbɔɛ donu fanan na min tɔgɛ pamakarani.

²⁵ Anu banta nyamanɛ wo lakɔrɔsila tele bi-nani kɔrɔ tumɛ min, anu sɛgira tun.

²⁶ Anu sɛgira Aruna anubɛ Musa anubɛ Isirɛla mɔgɛ bɛɛ wara, Kɛdɛsi dagɛ rɔ min bi Paran wulɛ rɔ. Anu ya minnu tayen nyɔ, anu ya wo bɛɛ rakaran. Anu nara nyamanɛ wo dɔn-fen-siyamɛ minnu na, anu ya wonu fanan yira anu na.

²⁷ Nyamanɛ lakɔrɔsilɛnu nara anu dantɛgɛ Musa ye ko, “Ma ara nyamanɛ wo damasi mafɛlɛn. Ma ara a yen ko nyamanɛ wo kin dɔgɔma-ma-de! Dugu-hakikɛ le wo la min si ki-fan lasabati. A mafɛlɛn, ma nara dɔn-fan minnu na ma bolo.

²⁸ Kɔnɔ hɛɛ, Kenan nyamanɛ wo gbɛlɛ! Nyɔ ragbɛlɛ! Fanka-tigi gbansannu bi nyɔ. Nyamanɛ wo soenu kolo dɔgɔma-ma-de, anubɛ a tara-belebele-wɛ minnu nadannɛ kuri la, mɔgɔ ti ke ka anu nɔ nyɔ. Wo kɔma, ma ya mɔgɔ-kinama-belebele-wɛnu yen nyɔ.

²⁹ Ma ya Amalɛki mɔgɛnu taran Kenan dugula wara la. Hɛtinu wo, Yɛbusinu wo, Amoranu wo, wonu siginɛ kɔnkɛnu tɛma. Kenan mɔgɛ donu siginɛ Mɛdetereniyan kɔgɔ-yi dafɛ anubɛ donu fanan siginɛ Yorodan bɛ wara la.”

³⁰ Isirɛla mɔgɔ damasi wulita da-kɔrɔ-kumɛ fɔla Musa ma. Kɔnɔ Kelabu ya anu nakala, a ko, “Ma ni ta anu kɛlɛ kaka ka nyamanɛ wo bi anu bolo. Ma si ke le ka anu nɔ feu!”

³¹ Kɔnɔ Kelabu ta-nyɔgɛ minnu tara a fɛ, wonu ya Kelabu sɔsɔ ka a fɔ ko, “Ma ti wonu nɔ. Mɔgɛ wonu kolo-gbɛlɛ ma ko.”

³² Anu ya foninyɛ ranyɛnsɛn Isirɛla mɔgɛnu tɛma. Hali anu ya a fɔ ko, “Dɔn-fan minnu bi nyɔ, wo ti mɔgɛ wonu tabɔ hali, ado dɔn-fen ti ma-a-la nyɔ. Mɔgɛ min bɛɛsi ye nyɔ, wonu yan ma ko kosɛbɛ!

³³ Ma ya fanka-tiginu yen nyɔ minnu yan ma ko, anu kolo ma ko, ado fanka ye anu na ka tenbi male la pon! Anaki bɔnsɔn le mɔgɛ kɛnu na. Ma ya ma nyɛrɛ yen anu yakɔrɔ iko mɛnɛ-mɛnɛnɛnu. Anu fanan ya ma yen ka le.”