Lankɛnimayɛ 21 - ALLALA KUMƐ

San-Kolo-Kurɛ anubɛ Dugu-Kolo-Kurɛ Wara-Koe

¹ Wo kɔma, n ya san-kolo-kurɛ yen anubɛ dugu-kolo-kurɛ. San-kolo fɔlɔtɛ anubɛ dugu-kolo fɔlɔtɛ, wonu bara tenbi ka tunu yen, ado kɔgɔ-yi fanan sa nyɔ tun.

² Nba, n ya Yerusalɛm-So-Sɛnima-kurɛ yen yigila ka bɔ Arinyɛni tɔ Alla bolo. Soe wo makirinɛ, ado a rabɛnnɛ iko kɔɛn-kurɛ rabɛnnɛ nya min ala keila ko la.

³ N ya kuman-kan-ba lamɔɛn ka bɔ mansaya-sigi-fan rɔ. A ko, “Alla mayiginɛ mɔgɛnu fɛ kaka, ado a si to anu fɛ. Anu si ma ata mɔgɛnu na. Alla nyɛrɛ si taran anu fɛ ka ma anuta Alla la.

⁴ A si ya-yi bɛɛ firan anu yɛ la. Saya ti kɛ tun. Yisi-gbala sa tun. Di-kɛ ti kɛ tun. Hali dumɛ, a ti taran. Ko-kɔrɛnu bara tenbi ka tunu yen!”

⁵ Wo kɔma, min mayiginɛ mansaya-sigi-fan rɔ, wo ko, “Nba, kaka, n bi fan bɛɛ mala a kurɛ la!” A ya a fɔ n ye fanan ko, “Kɛ sɛbɛ bawo kumɛ kɛnu, tonyɛ le. Mɔgɛ si la wonu na le feu!”

⁶ Nba, a ko, “A ara ban! A fɔlɔtɛ anubɛ a laban le nde la, ado a dabirɛ anubɛ a kundɔn le nde la fanan. Mɔgɔ-wo-mɔgɔ kan lagbalanɛ, n si nimaya-tenke-yi di wo ma min sɔnkɔ sa.

⁷ Mɔgɔ-wo-mɔgɔ wa nɔlɛ kɛ, a si fan kɛnu sɔrɔn nde bolo. N si ma ata Alla la. Ale si ma nna dan la.

⁸ Kɔnɔ a kilandɔgɔ wo, a lanayabɛlɛ wo, a haramu-ko-kɛla wo, a mɔgɔ-fagala wo, a yɛlan wo, minnu bi duriyɛ kɛla wo, minnu bi bɛsɛnu kɔla wo, anubɛ foninya-fɔlɛ bɛɛ, wonu barɛ le ta-dalɛ wo la. Dalɛ wo ye mintanna tɛ anubɛ munku-gbɛ le la. Sayɛ fila nyɔgɛ le wo la.”

Yerusalɛm Kurɛ Wara-Koe

⁹ Pani-kunba wɔrɔnfilɛ minnu nafanɛ fitina labannu na, wonu bi melika wɔrɔnfilɛ minnu bolo nun, wo kelen nara n bara. A ko, “Na, n ni kɔnyɔ-kurɛ yira i la, saga-danla musi, kɔni.”

¹⁰ Allala Ni-Sɛnimɛ yigira n kuma. Nba, ale melika tara n na kɔnkɔ-layan-bɛ kun tɛma pon! A ya Alla-halala-So-Sɛnimɛ, Yerusalɛm, yira n na. A ye yigila ka bɔ Arinyɛni tɔ Alla bolo.

¹¹ A ye malan-malanna Allala gbiliyɛ bolo. Soe wo ye malan-malanna iko kuru-da-gbɛlɛ min tɔgɛ yasipa. A gbɛnɛ iko daimon.

¹² A tarɛ yanyanɛ bɛrɛkɛ! Da tan-ni-fila le ye a ma. Melika tan-ni-fila ye kun-tigiyɛ kɛla dɛ wonu na, da kelen, melika kelen. Isirɛla bɔnsɔn tan-ni-filɛ, wonu tɔgɔ kelen-kelen sɛbɛnɛ a kelen-kelan wo bɛɛ ma.

¹³ Da sawa ye a tɔnkɔn kelen-kelennamɛ-bɛɛ rɔ. Da sawɛ ye tele-bɔɛ. Da sawɛ ye tele-yigi. Da sawɛ ye dugu la. Da sawɛ ye kantɔ wara la.

¹⁴ Soe wo tarɛ kurukɛra kuru tan-ni-filɛ wo le kuma. Saga-danta kilaya tan-ni-filɛ tɔgɛ sɛbɛra kuru kelen-kelan wo bɛɛ ma.

¹⁵ Melika min kumara n ye, sɛnɛ fen-suman-kɔlɔma ye wo bolo alako a si soe wo suman nya min, a dɛnu anubɛ a tarɛ.

¹⁶ Soe wo tɔnkɔn nanɛ bɛɛ rakɛn. A lɔngbɔn anubɛ a kɔnɛ rakɛn. Melika ya soe suman ala fen-suman-kɔlɔma la. A sɔɛ mɛli waga kelen mɛli kɛmɛ loli (1,500). A kɔnɛ anubɛ a lɔngbɔn anubɛ a sɔɛ bɛɛ rakɛn.

¹⁷ Melika ya tarɛ fanan suman. Ala yanyɛ nunkan-nya kɛmɛ kelen, nunkan bi-nani ani nunkan nani (144) iko mɔgɛ wola fen-suman-fan wola yanyɛ ye nya min.

¹⁸ Tarɛ wo ladanta kuri la min tɔgɛ yasipa. Soe wo nyɛrɛ ladanta sɛnɛ-hakikɛ la. A gbɛnɛ fanan iko daimon.

¹⁹ Soe wo kurukɛ-kurinu tabɛnnɛ kuru-da-gbɛlɛ-su bɛɛ le la. A kurukɛ kuri fɔlɔtɛ tɔgɛ le yasipa. A fila nyɔgɛ tɔgɛ le safaira. A sawa nyɔgɛ tɔgɛ le agati. A nani nyɔgɛ tɔgɛ le ɛmarɔdi.

²⁰ A loli nyɔgɛ tɔgɛ le ɔnikisi. A wɔrɔ nyɔgɛ tɔgɛ le kaniliyan. A wɔrɔnfila nyɔgɛ tɔgɛ le kɔwɔti. A segin nyɔgɛ tɔgɛ le bɛrili. A kɔnɔntɔ nyɔgɛ tɔgɛ le topasi. A tan nyɔgɛ tɔgɛ le kalasidoni. A tan-ni-kelen nyɔgɛ tɔgɛ le tɔrikɔsi. A tan-ni-fila nyɔgɛ tɔgɛ le amɛtisi.

²¹ Kɔnɔ-kolo-da-gbɛlɛ, wonu denu nadannɛ a da tan-ni-filɛ wonu na. Da wo kelen-kelennamɛ-bɛɛ ladannɛ kɔnɔ-kolo-da-gbɛlɛ kelen-kelennamɛ-bɛɛ la. Soe wo kilɛ ladannɛ sɛnɛ-hakikɛ le la. A gbɛnɛ iko daimon.

²² N ma Alla-Bato-Bɔn yen soe wo burɔ bawo Mari Alla Sɛnbɛ Bɛɛ Tigi anubɛ saga-dan le Alla Bato-Bonyɛ la.

²³ Soe wo mako mumɛ sa tele anubɛ karɛ la bawo Allala gbiliyɛ ye malanna a burɔ. Ata lɛnpu le saga-dan la.

²⁴ Sibolenu si tagama ata waan rɔ. Duninya-mansɛnu si na a sanba ka bɔ anuta nɔnfulinu tɔ.

²⁵ Soe wo dɛnu nakanɛ si taran tele bɛɛ. Anu na ti togon mumɛ bawo suyi ti ke nyɔ mumɛ!

²⁶ Sibolenu si na anuna gbiliyɛ anubɛ anuna nɔnfulinu na soe wo burɔ.

²⁷ Kɔnɔ fen-kɔsɔni wo fenfen ti don soe wo burɔ. Mɔgɛ min si kisimiriya-koe kɛ, wonu ti don soe wo burɔ mumɛ! Hali foninya-fɔlɛnu ti don. Fɔ minnu tɔgɛ sɛbɛnɛ saga-danta nimaya-buku rɔ, wonu denu dɔrɔn si don soe wo burɔ.