Ko-Dabirɛnu 41 - ALLALA KUMƐ

Mansɛta Kiyo Kɔrɛ Fɔ-Koe

¹ San fila tenbinɛ wo kɔma, mansɛ wo kiyora a sɔnɛ Nayɛli bɛ dafɛ.

² A ya ninki wɔrɔnfila yen bɔla bɛ rɔ ka yɛlɛ gbele ma. Anu kin, anu tɔlɔnɛ. Anu ya bin dɔn dabira ba-lɛɛ wo rɔ.

³ Wo kɔma, n ya ninki wɔrɔnfila-gbɛrɛ yen yɛlɛla ka bɔ bɛ wo rɔ. Anu baranɛ kɔnkɔlɔnyɔ! Anu nara anu sɔ ninki doinu fɛ kɔnkɔn la.

⁴ Ninki-baranɛ wonu bɔra ninki-tɔlɔnɛ wonu kɔma kilɛ la ka ninki-tɔlɔnɛ wonu dɔn saa! Mansɛ kundenta.

⁵ Wo kɔma, kinɔgɛ tenbira a ma tun. A ya kiyo fila nyɔgɛ sa. A kiyora nyɔ-sɔngbɔn wɔrɔnfila la. Anu bi nyɔ-gbaga kelen ma. Anu kunba, anu kin.

⁶ Wo kɔma, a ya nyɔ wɔrɔnfila yen bɔla nyɔɛ doi wonu kɔma. Anu worowarɛ! Fɔnyɔ tugura. Anu mara sɔnfɔlɔn!

⁷ Nyɔ-sɔnfɔlɔn wɔrɔnfilɛ wonu ya nyɔ-kunba wɔrɔnfilɛ wonu nakunu. Mansɛ kundenta tun, a ko, “Yaga, n bi kiyo la nun kɛ?”

⁸ Kiyo wonu ya mansɛ lafili pirikali! Wo wulun sɔgɔma, mansɛ wo ya kilayɛnu tanyɛnsɛn ala nyamanɛ rɔ ka hɛnkilimɛnu anubɛ nya-nyini-kɛlɛnu kele. Ale Iyipiti mansɛ ya ala kiyo rakaran anu ye kɔnɔ ala nyamanita-mɔgɛ wonu fenfen ma ke ala kiyo wonu kɔrɛ fɔla a ye.

⁹ Ala baan-bɔlɛ ya a fɔ a ye ko, “N na ara bila bi. N bara ko-yogomɛ le ma bawo n na ara nyina.

¹⁰ Seren-kɔ, ile mansɛ diminyara mabɛ ila biredi-mintannɛ ma min kɛ, i ya ma sa yele la i makandannɛ kun-tigi Pɔtifala bɔn dafɛ.

¹¹ Lunyɛ do, mabɛ wo kiyora suyi rɔ. Kɔnɔ mala kiyonu, kelen ma anu na.

¹² Hiburu-keminɛ do ye ma fɛ nyɔ nun yele la. Pɔtifala yɔɔn le ale la nun. Ma ya mala kiyo wonu takaran a ye. A ya mala kiyo wonu kɔrɛ fɔ ma ye.

¹³ Mala kiyo wonu bɔra-a-la iko a ya a fɔ ma ye nya min. Nde sɛgira n gbɛ rɔ wɔli-kɛ-tinɛ. Biredi-mintannɛ wo donta kɔlɔma ma.”

¹⁴ Mansɛ ya kilayɛ lata ale Yusufu kele tinɛ yele la. Anu ya a labɔ yele-bon-pinpinɛ wo la tiriya! Yusufu ya a dɛ masii ka a mayɛlɛma. A tara a sɔ mansɛ yakɔrɔ.

¹⁵ Mansɛ wo ya a fɔ Yusufu ye ko, “N bara kiyo min sa, mɔgɔ-wo-mɔgɔ ma ke nna kiyo wo kɔrɛ fɔla n ye. Kɔnɔ n bara ile wara-koe lamɔɛn ko ile si ke le ka mɔgɛnuna kiyo kɔrɛ rakaran.”

¹⁶ Kɔnɔ Yusufu ya a fɔ mansɛ ye ko, “Nde ti ke kiyo kɔrɛ fɔla n nyɛrɛ ma fɔ Alla. Wo le si ke a kɔrɛ fɔla alako i yisi ni kimɛ.”

¹⁷ Mansɛ ya a fɔ Yusufu ye ko, “N kiyora n sɔnɛ Nayɛli bɛ dafɛ.

¹⁸ N ya ninki-tɔlɔni wɔrɔnfila yen yɛlɛla gbele ma. Anu ya bin-dɔn dabira lɛɛ wo rɔ.

¹⁹ Wo kɔma, n ya ninki wɔrɔnfila-gbɛrɛkɛ yen yɛlɛla gbele ma ninki-tɔlɔnɛ wonu kɔma. Anu baranɛ kɔnkɔlɔnyɔ! N ma ninki-yogoyanɛ yen ka ke wonu tɔ Iyipiti nyamanɛ rɔ.

²⁰ Ninki-baranɛ wonu ya ninki-tɔlɔnɛ wonu dɔn saa!

²¹ Hali anu bara ninki-tɔlɔnɛ wonu dɔn, anu ma bɔ anu su la. Anu baranɛ kɔnkɔlɔnyɔ iko fɔlɔn. N kundenta.

²² “Wo kɔma, n kinɔgɔra tun. N kiyora nyɔ-sɔngbɔn wɔrɔnfila la. Anu bi nyɔ-gbaga kelen ma. Anu kunba, anu kin.

²³ Wo kɔma, n ya nyɔ wɔrɔnfila yen bɔla nyɔɛ doi wonu kɔma. Anu worowarɛ! Fɔnyɔ tugura. Anu mara sɔnfɔlɔn!

²⁴ Nyɔ-sɔnfɔlɔn wɔrɔnfilɛ wonu ya nyɔ-kunba wɔrɔnfilɛ wonu nakunu salon! Kɔnɔ n ya kiyo kɛnu takaran hɛnkilimɛ anubɛ nya-nyini-kɛlɛnu ye kɔnɔ anu fenfen ma ke kiyo kɛnu kɔrɛ fɔla n ye.”

²⁵ Yusufu ya a fɔ mansɛ ye ko, “Ila kiyo filɛ kɛ bɛɛsi, kɔrɔ kelen. Alla ye nala min mala, a ya wo le tamasere yira i la wo la.

²⁶ Ninki-tɔlɔni wɔrɔnfilɛ wonu, anubɛ nyɔ-kunba wɔrɔnfilɛ wonu, san wɔrɔnfila le wonu na. Wonu kɔrɛ, kelen.

²⁷ Ninki-barani wɔrɔnfilɛ anubɛ nyɔ-sɔnfɔlɔn wɔrɔnfilɛ wonu, san wɔrɔnfila le wonu fanan na. Wo kɔrɛ le, kɔnkɔ-fitinɛ si na nyamanɛ kɛ rɔ san wɔrɔnfila.”

²⁸ Yusufu ko, “A si ma iko n bara a fɔ ile mansɛ ye nya min kɛ la. Alla ye nala min mala nyamanɛ kɛ rɔ, a ara wo le yira ile mansɛ la kiyo rɔ wo la.

²⁹ San wɔrɔnfila, dɔn-fan ye warala Iyipiti nyamanɛ kɛ rɔ. Kurukurun ti a ban, tarali ti a ban.

³⁰ Wo kɔma san wɔrɔnfila, kɔnkɔ-fitinɛ burunnɛ Iyipiti nyamanɛ kuma bɛff! San wɔrɔnfilɛ wonu, kɔnkɛ wo si a ma, mɔgɛnu ni nyina san wɔrɔnfila diyanɛ wonu ko. Kɔnkɔ-fitinɛ si nyamanɛ kɛ tinya.

³¹ Wo wati rɔ, wo ya dɔn-fan minnu sɔrɔn nun san wɔrɔnfila diyanɛ wonu kɔrɔ, wo fenfen ti to wo bolo nyamanɛ kɛ rɔ gbɛlɛyɛ bolo.

³² I kiyora ko filɛ minnu na kɛ la, Alla ara ban a latɛgɛla. A sa mɛla tun kiyo kɛ damasi kɔrɛ si bɔ-a-la.

³³ “Nba, woletɔ mansɛ, i ni hɛnkilimɛ do nyini min ya ko-lɔn ka wo sigi Iyipiti nyamanɛ kɛ kun na.

³⁴ I ni mɔgɔ-ba donu sigi nyamanɛ kɛ kun na minnu si ila nyamanɛ kɛ lata yarɔ. San wɔrɔnfila diyanɛ kɛ kɔrɔ, ni mɔgɔ-wo-mɔgɔ ya dɔn-fen wo dɔn-fen sɔrɔn, a ni a dan nani, a loli nyɔgɔn, mɔgɔ-ba wonu ni wo bi anu bolo ka wonu namara.

³⁵ I ni a fɔ anu ye ko anu ni to fui-fannu kundɛnna san wɔrɔnfilɛ kɛnu kɔrɔ wo nya na le. Mɔgɔ-ba wonu ni anu namara so-wɛnu burɔ ka a makandan.

³⁶ Dɔn-fan wonu na ni mara nyamanɛ ye san wɔrɔnfilɛ kɔnkɔ-fitinɛ min bi nala wo yarɔ Iyipiti nyamanɛ rɔ alako nyamanita-mɔgɛnu kana halaki kɔnkɔ-fitinɛ wo bolo.”

Yusufu Ma-Koe Kandɛ La

³⁷ Yusufula kumɛ wonu diyara mansɛ anubɛ ala mɔgɔ-banu ye.

³⁸ Mansɛ ya a fɔ ala mɔgɔ-banu ye ko, “Ma si ke mɔgɔ-kɛndɛ-gbɛrɛkɛ sɔrɔnna Allata sɛnbɛ ye min tɔ iko Yusufu kɛ?”

³⁹ Mansɛ ya a fɔ Yusufu ye ko, “Alla ara kɛ dama yira ile min na kɛ la, ma ara a lɔn ko i hɛnkili kolo mɔgɛ bɛɛtɛ ko.

⁴⁰ Nba, woletɔ n si ile Yusufu ma kun-tigi la nyamanɛ kɛ bɛɛsi kun na. I ya kuma-wo-kuma fɔ, nyamanita-mɔgɛnu si wo bira. Ile si ma nna kandɛ la. Fɔ nde kelen pe, nde le i yarɔ nyamanɛ kɛ rɔ.

⁴¹ N bara i sigi Iyipiti nyamanɛ bɛɛ kun na.”

⁴² Ale mansɛla mandan ye ala dɛɛn-kɔlɔnɛ min ma, a ya wo bɔ a bole la ka a don Yusufu bole la. A ya fɛrɛya-bɔ-hakikɛnu di a ma ka sɛnɛ-yɔlɔkɛ don a kan na.

⁴³ A ya mansɛla kandɛya-kirindi don a bolo ka ale Yusufu yira ala nyamanita-mɔgɛnu na. Anu tara kan-bo-kan, anu si a mayon ko, “Wo ni wo nyɛnkin! Wo ni wo nyɛnkin!” Yusufu taranta kun-tigiyɛ la wo nya na le Iyipiti nyamanɛ rɔ.

⁴⁴ Mansɛ ya a fɔ Yusufu ye ko, “Mansɛ le nde la kɔnɔ ni ile Yusufu ma sɔn koe minnu ma mɔgɛnu bolo, nde fanan ti sɔn wonu ma.”

^45-46 Mansɛ ya tɔgɔ-kurɛ di ale Yusufu ma, a ko, “I tɔgɛ le gbɛ ‘Duninya-Kisilɛ.’ ” Mansɛ ya Asɛnati furu Yusufu ye ka a di a ma. Asɛnati wo fa Pɔtifɛra le saraka-masɔ-wɔlɛ kɛla Iyipiti bɛsɛnu ye Hɛliyapolisi soe burɔ. Yusufu-sɔrɔn ya san bi-sawa bɔ tumɛ min, a nara to sɔ tinɛ wo sɔrɔnna Iyipiti nyamanɛ rɔ. Yusufu ya ala wɔlɛ dabira ka Iyipiti nyamanɛ ratagama.

⁴⁷ San wɔrɔnfila diyanɛ wonu kɔrɔ, nyamanɛ wo dɔn-fannu mara-a-la.

⁴⁸ Yusufu tora dɔn-fan wonu kundɛnna ka anu namara. A wa dɔn-fan minnu sɔrɔn soe minnuna foolɛ rɔ, a ni wonu namara soe wonu tɔ.

⁴⁹ Yusufu ya dɔn-fan minnu nadɛn san wɔrɔnfilɛ wonu kɔrɔ, a ma ke anu sumanna ala siyayɛ bolo.

⁵⁰ Yanni san wɔrɔnfilɛ wonu kɔnkɔ-fitinɛ ni na Iyipiti nyamanɛ rɔ, Asɛnati ya den-kei fila sɔrɔn Yusufu ye.

⁵¹ A fɔlɔtɛ sɔrɔnta tumɛ min, Yusufu ko, “Alla ara a ma, n fala denbayɛnu ya koe min ma anubɛ nta tɔrɔyɛ, n bara nyina wonu ko. Woletɔ nna den-kei-sarɛ kɛ tɔgɛ le Manasa bawo tɔgɛ wo kɔrɛ le iko mɔgɔ wa a fɔ ko, ‘Ka nyina.’ ”

⁵² Den-kei fila nyɔgɛ sɔrɔnnɛ, Yusufu ko, “Alla ara a ma, n bara yiri tɔrɔya-nyamanɛ kɛ rɔ.” Woletɔ a ya dan wo tɔgɔ sa Ifɛrɛm bawo tɔgɛ wo kɔrɛ le iko mɔgɔ wa a fɔ ko, “Yiri.”

⁵³ San wɔrɔnfila diyanɛ wonuta wati tenbira Iyipiti nyamanɛ rɔ.

^54-56 San wɔrɔnfilɛ kɔnkɔ-fitinɛ ya a dabira iko Yusufu ya a fɔ nya min. Dɔn-fen wo dɔn-fen sa nyamanɛnu tɔ minnu bi Iyipiti nyamanɛla foolɛ rɔ kɔnɔ kɔnkɛ ya Iyipiti nyamanita-mɔgɛnu bira tumɛ min, anu dira mansɛ dala dɔn-fen-koe rɔ. Mansɛ ya a fɔ anu ye ko, “Wo ta Yusufu wara. Ni ale ya min fɔ wo ye dɔn-fen-koe rɔ, wo ni wo ma.” Kɔnkɔ-fitinɛ wo gbɛlɛyara nyamanɛ bɛɛ rɔ tumɛ min, Yusufu ya bondɔnnu dɛ laka ka a mayira Iyipiti kɛnu ma. Dɔn-fan minnu namaranɛ nun, wonu tagbayara Iyipiti nyamanita-mɔgɛnu ma.

⁵⁷ Duninya-mɔgɛ bɛɛsi tara Yusufu wara Iyipiti nyamanɛ rɔ dɔn-fen nyini tinɛ bawo kɔnkɔ-fitinɛ ara duninya-mɔgɛ bɛɛ tɔrɔ wati wo rɔ.