Ko-Dabirɛnu 21 - ALLALA KUMƐ

Isiyaka Sɔrɔn-Koe

¹ Mari duwara Sira ye iko a ya lanyiri kiri a ye nya min nun.

² Hali Iburayima kɔrɔyanɛ, Sira ya buyi bi a ma ka den-kei sɔrɔn a ye a wati-latɛgɛnɛ rɔ iko Alla ya lanyiri kiri anu ye nya min nun.

³ Iburayima ya dan wo tɔgɔ sa Isiyaka.

⁴ A sɔrɔn-tele segin nyɔgɛ ma, Iburayima ya a lakemininya iko Mari ya a fɔ a ye nya min nun.

⁵ Isiyaka ye sɔrɔnna tumɛ min, wo ya a taran, Iburayima sɔrɔn ara san kɛmɛ bɔ.

⁶ Sira ko, “Alla ara yɛlɛn di n ma ka n nasewa, woletɔ min bɛɛ wa kɛ lamɔɛn, wonu si sewa n fɛ.”

⁷ A ko, “Yon si a miri a ma lefan ko nde, Sira, si kin-yi di le dan ma nun Iburayima warɛ bɔn la? Hali wo, n kɔrɔyanɛ ara den-kei sɔrɔn a ye.”

⁸ Isiyaka koloyara. Dennɛ wo da-ka tumɛ, Iburayima ya ladiyɛ kɛ a ye.

Hega anubɛ Sumanyila Gben-Koe

⁹ Lunyɛ do, Iyipiti kɛ Hega ya dan min sɔrɔn Iburayima ma, Sira ya wo yen yɛlɛnna ala dan Isiyaka ma.

¹⁰ Woletɔ Sira ya a fɔ Iburayima ye ko, “Yɔɔn-musi kɛ anubɛ ala dan gben alako yɔɔn-musi kɛla dan anubɛ nna dan kana kɛɛ ratala anu nyɔgɔn tɛma.”

¹¹ Kumɛ wo ma diya Iburayima ye mumɛ bawo den filɛ wo bɛɛ rakɛn a ye.

¹² Alla ya a fɔ Iburayima ye ko, “I yisi kana tɔrɔ ila yɔɔn-musi anubɛ ala dan gben-koela ko la. Sira ya min fɔ, i ni wo ma kamasɔrɔn n bara lanyiri min bɛɛsi kiri, lanyiri wo bɛɛ si kanbali Isiyaka anubɛ a bɔnsɔn le ye.

¹³ N si yɔɔn-musi wola dan bɔnsɔn fanan nasiyaya bawo ile Iburayimala dan le ale la fanan.”

¹⁴ Woletɔ Iburayima ya a lasɔ subaga dɛ ma ka a fandɛ anubɛ yi-gbolo-bɔrɛ don Hega bolo. Wo ya yi-bɔrɛ dun a kɛɛ la. Iburayima ya Hega anubɛ ala dan Sumanyila lata anu kun fɛ. Anu tara ka to yilan-yilanna Biri-Siba wulɛ rɔ.

¹⁵ Anuna yi banta gbolo-bɔrɛ wo rɔ tumɛ min, Hega ya ala dan wo to sani kɔlɔma-nɛ do kɔrɔ.

¹⁶ A tara a sigi wula-yan la kamasɔrɔn a ko, “N kana nna dan kɛ yen fagala.” A tora dila nyɔ dan wola ko la biribiri!

¹⁷ Alla ya Sumanyila fanan di-kɛ-kan lamɔɛn. Allata melika kuman-kan bɔra san-kole rɔ ka Hega rakele ko, “Hega, i yisi tɔrɔnɛ i ma nfenna? I kana kilan kamasɔrɔn i ya ila dan to sanɛ kan min, Alla ye a di-kɛ-kan lamɔɛnna nyɔ.

¹⁸ Ta ila dan lasɔ ka a bolo bira kamasɔrɔn Alla si a bɔnsɔn lasiyaya.”

¹⁹ Alla ya musi wo yɛ laka kɔlɔn ma. Yi ye a rɔ. A tara ka gbolo-bɔrɛ wo lafa yi la ka a di ala dan wo ma.

²⁰ Alla ye keminɛ wo fɛ nun. A koloyara ka a sigi wulɛ rɔ. A mara kalabɛn-nakɛ-donse la.

²¹ A sigira Paran wulɛ rɔ. A na tara musi do furu a ye Iyipiti nyamanɛ rɔ ka na wo don a bolo wulɛ rɔ nyɔ.

Lanyiri Kiri-Koe Abimɛlɛki anubɛ Iburayima Tɛma

²² Wo wati rɔ, Kirari mansɛ anubɛ ata kɛlɛ-kurugbɛ Fikoli tara Iburayima wara. Mansɛ wo ya a fɔ Iburayima ye ko, “I ye koe min bɛɛsi mala, Alla ye i fɛ wonu tɔ.

²³ Woletɔ i keli Alla yala ko ni i ti mabɛ nna dannu yanfa anubɛ n mamanɛnu. Kɔnɔ iko n bara ko-nyimɛ kɛ i ye nya min, i yandi, i ni a kɛ mabɛ nna dannu ye wo nya na le. Fananta i ye nyamanɛ kɛ rɔ, i ni to a fɛ-birala a kilɛ fɛ.”

²⁴ Iburayima ya a fɔ a ye ko, “A ye mabɛ Alla tɛma.”

²⁵ Iburayima ya mansɛ wola wɔli-kɛlɛnu yasere-masa a la bawo anu bara ala kɔlɔn bi a bolo.

²⁶ Mansɛ wo ya a fɔ ko, “Kɔnɔ i ma kɛ fɔ n ye wɛ nun. N ma a lɔn min ya kɛ ma. Fɔ bi, n bara kumɛ kɛ lamɔɛn.”

²⁷ Wo kɔma, Iburayima ya sagɛ anubɛ ninki do bi ka wonu di mansɛ wo ma. Anu mɔgɔ filɛ bɛɛ ya lanyiri kiri anu nyɔgɔn tɛma.

²⁸ Kɔnɔ Iburayima ya saga-den-musuma wɔrɔnfila bɔ saga-kulɛ rɔ ka anu sɔ anu dan na.

²⁹ Mansɛ wo ya a fɔ Iburayima ye ko, “Nfenna ko la i wara saga-den-musuma wɔrɔnfilɛ kɛnu sɔ anu dan na?”

³⁰ Iburayima ya a fɔ a ye ko, “Nba, sagɛ kɛnu bira n bolo. Anu ni ma sereyɛ la mabɛ nyamanɛta mɔgɛnu tɛma ko nde le ya kɔlɔn kɛ sin, ado n halalɛ le.”

³¹ Woletɔ kan tinɛ wo tɔgɛ sara ko Biri-Siba kamasɔrɔn anu mɔgɔ filɛ bɛɛsi ya anu keli Alla yala nyɔ.

³² Anu ban lanyiri kirila anu nyɔgɔn tɛma, mansɛ wo anubɛ ala kɛlɛ-kurugbɛ Fikoli ya anu nasɔ ka sɛgi anu barɛ Kirari soe burɔ Filisitinu bi kan min.

³³ Iburayima ya kɔlɔma-nɛ do ki Biri-Siba dafɛ ka habadan-Mari-Alla bato nyɔ.

³⁴ Iburayima ya tele siyaman bɔ Filisitinuna nyamanɛ rɔ.