Hɛnkilimaya-Kumɛnu 9 - ALLALA KUMƐ

Hɛnkilimayɛ anubɛ Kuntanyɛ Wara-Koe

¹ Hɛnkilimayɛ ya ala bɔn sɔ ka sɛnbɛrɛn-kɔn wɔrɔnfila sɔ a kɔrɔ minnu si bɔn wo bira gben!

² A ya soge faga ka ladiyɛ kɛ. A ya minni-fen-diyamɛ do rabɛn ka mɔgɛnu nadiya. A ya fen-dɔn-tinɛ rabɛn yɔnyɔn!

³ Hɛnkilimayɛ ya ala bonna-wɔli-kɛlɛnu nata gbengbinu kuma alako wonu ni mɔgɛnu takele.

⁴ Minnu makoe ye hɛnkilimayɛ la, bonna-wɔli-kɛlɛnu tenbi anu takelela, anu si a fɔ ko, “Wo ni don bɔn la.

⁵ Wo na fen-dɔn-tinɛ ka wo min.

⁶ Ni wo bɔra kuntannu tɛma, wo si simayɛ sɔrɔn. Wo ni bila hɛnkilimaya-kilɛ fɛ.”

⁷ Ni i ya mɔgɔ-wasinɛ latelen, a si diminya i ma. Ni i ya mɔgɔ-yogomɛ latelen, a si i tanban.

⁸ I kana mɔgɔ-wasinɛ latelen bawo ila ko si gboya a ye. Kɔnɔ ni i ya hɛnkilimɛ latelen, a si i gbiliya.

⁹ Ni i ya hɛnkilimɛ labila, a si do sa ala hɛnkilimayɛ kuma. Ni i ya mɔgɔ-telennɛ karan, ala karan ma si to kofula.

¹⁰ Hɛnkilima-tigiyɛ dabira-fɔlɛ le ka kilan Mari la. Ni i ya ale Sɛnima-Tigi lɔn, i si ko nya-yen.

¹¹ Hɛnkilimayɛ si do sa ila simayɛ kuma.

¹² Ni min ya hɛnkilimayɛ sɔrɔn, wo ara tɔnɛ sɔrɔn. Kɔnɔ ni min ya a kan-kɔ sɔ a la, wo ara bɔnɔ.

¹³ Kuntanyɛ mani de iko musu-milibɛlɛ. A ye tola seren-serenna tuma-wo-tuma, ado a ma kolo fanan.

^14-15 A si a sigi ala dandan kɔrɔ. Min ba wuli tenbila, a si wo rakele. Kuntanyɛ si ta a sigi gbengbi do kuma soe tɛma. A ni don mɔgɛnu-takele rɔ minnu bi anu hayu rɔ iko musu-milibɛlɛ wo si a ma nya min.

¹⁶ A kɛnɛna a fɔla kuntannu ma ko, “Wo na!

¹⁷ Mɔgɛ ye yi min kankanna, wo di a halala-yi ko. Mɔgɛ ye dɔn-fan min kankanna, wo di a tanyininɛ ko!”

¹⁸ Kɔnɔ mɔgɛ min bi bilala kuntanyɛ wo fɛ, a ma a lɔn ko a ye tala a nyɛrɛ si-matɛn-tinɛ wo la. A ma a lɔn fanan ko min bara ta nyɔ nun kɔrɔma la, wonu bara ta kanbɛ rɔ nun pon!