Hɛnkilimaya-Kumɛnu 5 - ALLALA KUMƐ

Yɛlɛnya-Ko-Makawandilɛ

¹ nna den, i tole masɔ ka i miri nta hɛnkilimaya-kumɛ kɔrɛ ma.

² Ni i ya wo ma, i si kusanya i nyɛrɛ birala. I kuma-nya si a yira ko i wara a nya-lɔn.

³ Tumado, kei-gbɛrɛla musi da-gbole si diya i ye iko liyi, ado ala kuma-diyamɛnu si i bolo labira

⁴ kɔnɔ tɔ-a-la, a si a lakunaya i kuma iko kotuli ka i sanba dumɛ la.

⁵ A si i bi ka i layigi kanbɛ rɔ. A si i telen nyahanama-kilɛ la.

⁶ Musi wo sa tagamana simayɛta kilɛ fɛ, ado a ma a lɔn ko a tagama-nya ma telen.

⁷ Nna dannu, wo ni wo tole masɔ n na. Wo kana nyina nna kumɛnu ko.

⁸ Wo ni wo masɛgi musu-sufa wonu na. Wo kana wo gbɛrɛn anuna bonda-dɛ ma.

⁹ Ni wo ya wo tui ka ta nyɔ, wo ye gbiliyɛ min tɔ nun, wo si to wo ta-nyɔgɛnu ye. Ni wo ma, kinikinibɛlɛnu si wo pose faga.

¹⁰ Wo tɔrɔ-gbɛnu si to sundannu ye, ado wo si to wɔli-gbɛlɛmɛ kɛla Alla-batobɛlɛnuna bɔn la.

¹¹ Sayɛ wa gbɛrɛn wo ma, wo si to kurunna ha wo ni faga. Wo si bara kirayɛ bolo.

¹² Wo si to a fɔla wo nyɛrɛ ma ko, “Nfenna n ma hɛnkili sɔrɔn yona? Nfenna n ma n tole masɔ mɔgɛnu na?

¹³ N ma sɔn n tole masɔla n karan-mɔgɔ la. N ya n tengberenya n makawandilɛnu na.

¹⁴ A ara to se, n tatinyanɛ ni taran mɔgɛ bɛɛ tɛma.”

¹⁵ I ni i latelen ila musi ye ka a keni.

¹⁶ I kana musu-gbɛrɛkɛ latenbi i kɔma. Wobɛ musu-gbɛrɛkɛ kana diya.

¹⁷ Diyanayɛ min bi wobɛ ila musi tɛma, wo ni to wo mɔgɔ fila tɛma. I kana wo ratala anubɛ musu-gbɛrɛkɛ tɛma.

¹⁸ Woletɔ a fisa, i dennɛ ye musi min furula, wobɛ wo ni to sewɛ rɔ.

¹⁹ Ila musi wo ni kinya i yala iko mina. A wara-koe ni i hɛnɛ. I ni to ala keninteyɛ kɔrɔ iko birinkan.

²⁰ nna den, nfenna i si ila keninteyɛ yira musu-gbɛrɛkɛ la ka ila musi to nyɔ? I kana mɔgɔ-gbɛrɛla musi bira a bole ma.

²¹ I ya ko-wo-ko ladan, Mari kolan bɛnnɛ i ma, yɔ! I tara kan-bo-kan, a ye i mafɛlɛnna.

²² Ko-yogomɛ si ma gbɛrɛ la ko-yogoma-kɛlɛ ye, ado a si bira a halala gbɛrɛ-lasiginɛ wo la, yɔ!

²³ A ye fagala bawo a ma sɔn a nyɛrɛ marala. Ata kuntanya-hakɛ si a latuntun kanbɛ rɔ.