Hɛnkilimaya-Kumɛnu 31 - ALLALA KUMƐ

Mansa Lɛmuwɛli Makawandi-Koe

¹ Mansa Lɛmuwɛli na ya karan minnu di a ma, wo le kɛnu na.

² A ko, “Nna den, n bara ile min dantɛgɛ Mari ma nun,

³ i kana i to musinu ma. Wonu bara mansɛ minnu tabunden, wonu siya.

⁴ “Nna den, a ma kin, mansɛnu ni baan min, ado baan-min-sɔgɛ kana anu bira.

⁵ Ni mansɛ ya a min, a si nyina tɔnnu ko tiriya! Ala ko ti taran ala mɔgɛnu bara-ko rɔ ka telenbagaya-ko ladan makolamɛnu ye.

⁶ Mɔgɛ min niyi ma ara dɔgɔya a rɔ anubɛ minnu bi tɔrɔyɛ rɔ, gbɛɛ-minyɛ bɛnta wonu denu denu ma.

⁷ Anu ni anu min alako anu ni nyina anuna tɔrɔyɛnu ko.

⁸ “Mɔgɛ minnu ti ke anu kuma-kuma fɔla, a fisa, ile mansɛ ni kuma wonu ye.

⁹ I ni ma kiti-tɛgɛla-latelennɛ la ka bolo-kolɔnnu anubɛ makolamɛnu dɛnbɛ.”

Musu-Nyimɛ Wara-Koe

¹⁰ Ka musu-hakikɛ sɔrɔn, wo gbɛlɛ de! Kɔnɔ ni i bole bɛnta a la, a tenbira dugu-kɔrɔ-nɔnfuli la.

¹¹ Ala kei si la a la, ado ala kei ye nyinina fan min bɛɛsi ma, a ara wonu sɔrɔn.

¹² A siyi-tele-mumɛ-bɛɛ kɔrɔ, a si ko-nyimɛ le gbansan ma ala kei ye. A ti ko-yogoma ma a la mumɛ!

¹³ Tuma-wo-tuma, a ye kura-hakika-dan le la. A ti bandan boloma-wɔlɛ la.

¹⁴ A si na dɔn-fan la iko yila-kulɔn ka bɔ wula-yan la.

¹⁵ A si a lasɔ banda-ka-da-pinpi ma ka wɔlɛ yira ala yɔɔn-musinu na ka dɔn-fan rabɛn bonna-mɔgɛnu ye.

¹⁶ A si a yɛ lakalan ka dugu-hakikɛ do san a nyɛrɛ-tɔrɔ-gbɛ la ka ki-fan donu ki wo rɔ.

¹⁷ Sɛbɛna-mɔgɛ le ale la. A si a sɛbɛ don a halala-wɔlɛ ma, ado a ragbɛlɛ fanan.

¹⁸ A ya a lɔn ko a ya wɔli-wo-wɔli kɛ, a si tɔnɛ sɔrɔn wo rɔ. A si to wɔlila ha su-talɛ ma.

¹⁹ A si wurundi kɛ ka a ladan kurɛ la.

²⁰ A si bolo-kolɔnnu kɔ sewɛ rɔ ka anu dɛnbɛ.

²¹ A ti hɔn ala bonna-mɔgɛnu kuma kimɛ rɔ bawo a ara anu fɛrɛya-bɔ duruku-hakikɛnu na.

²² A si birinkannu nadan a nyɛrɛ ye ka a nyɛrɛ fɛrɛya-bɔ kura-hakikɛ la.

²³ Ala kei si ma mɔgɔ-malɔnnɛ la nyamanita-mɔgɔ-banu tɛma.

²⁴ A si kura-hakikɛnu kara fɛrɛya-bɔɛnu na ka anu mayira yilanu ma.

²⁵ A sɛbɛ donnɛ, ado a wara-koe gbili mɔgɛnu ma. Ale yigi tɛgɛni ma sinanna ko la.

²⁶ A si hɛnkilimaya-kumɛnu fɔ ka kila-nyimɛ yira mɔgɛnu na.

²⁷ A si ala bɔn fɛ-bira a kilɛ fɛ. A ti sɔn tinya-mansaya-ko ladanna.

²⁸ Ala dannu si duwa a ye. Ala kei si a tanto.

²⁹ Anu si a fɔ ko, “Musu-siyaman bi ko-nyima-siyaman kɛla kɔnɔ ile tenbira wonu na pirr!”

³⁰ Musi donu yakɔrɛla kinyɛ si mɔgɛ yanfa, ado a ti a laban. Kɔnɔ musi minnu bi kilanna Mari la, wonu si gbiliyɛ sɔrɔn.

³¹ A ara ko-nyimɛ min bɛɛsi kɛ, mɔgɛ si a wɔlibɔ wola ko la. Mɔgɛ si musu-sufa kɛ gbiliya le mɔgɔ-banu tɛma.